लुआह 30

धूपे बेदी

1 "तेखअ बणाऐं किक्‍करे काठा करै धूप ज़ाल़णा लै एक बेदी। 2 सह लोल़ी लाम्मी-बिरली च़कोर एक हाथ अर दूई हाथ लोल़ी सह उछ़टी हुई। बेदीए च़ऊ कूणैं लाऐ तेऊ ई काठा करै बाछ़ू ज़िहै शींग। 3 प्रैंदा का महल़ै तैहा बेदी शींगा संघी च़ोखै सुन्‍नैं करै अर फेर फिरदी लाऐ तेथ च़ोखै सुन्‍नें काणस। 4 तेखअ लाऐ बेदी दी काणसा हेठै दोहरी बाखा दूई-दूई कल़ोलै, ज़ेभै बेदी ओर्ही-पोर्ही निंणीं तेभै हणीं तेथ लोहल़ी लाई बेदी च़कणा लै।

5 "तेते लोहल़ी बी बणाऐं किक्‍करे काठा करै संघा महल़ै तिन्‍नां सुन्‍नैं करै।

6 "धूपे बेदी डाहै तूह पबित्र खिम्भा भितरे मांझ़लै पल्दै आजू ज़िधी करारे मणशू प्रैंदै प्राश्तो ढक्‍कण आसा डाहअ द, हुंह करूं ताह संघै तिधी गल्‍ला।

7,8 "आझ़ा बाद, हर धैल़ै दोत्ती-उडै ज़ेभै हारण सदीअ ज़ाल़े, तेभै ज़ाल़ै मुंह बिधाता लै बेदी प्रैंदै शोभली बास्सा आल़अ धूप पोस्ती दर पोस्ती। 9 धूप बेदी प्रैंदै निं छ़ोतलअ धूप ज़ाल़ी, नां तेथ हूम बल़ी अर नाज़ बल़ी करी अर नां तेथ प्रैंदै अर्घअ दैई।

10 "हर साल करै हारण धूप बेदीए शींगा दी पशूओ लोहू लेस्सी पापो प्राश्त करना तेता पबित्र, पाप बल़ीए एऊ बधाना करै पोस्ती दर पोस्ती इहअ ई। अह बेदी आसा मुंह बिधाता लै खास पबित्र।"

पबित्र खिम्भा लै ढब्बअ

11 बिधाता बोलअ मोसा लै इहअ बी, 12 "ज़ेभै तूह इज़राईली मणछे गणांई करे, तेभै लागणीं इज़राईली मांझ़ै हर मणछा आपणीं ज़ानीं लै किम्मत दैणीं, ताकि ज़ेभै गणांई होए लागी दी, तेभै निं तिन्‍नां लै किज़ै आफ़त लोल़ी आई।

13-15 "उन्‍नीं साला उझै अमरे मणछ च़ाऐ सह सेठ होए, च़ाऐ सह दाल़जी होए, तिन्‍नां सोभी लागणीं एक बराबर किम्मत दैणीं। बिधाता लै सह भैंट लागणीं तिन्‍नां पबित्र ज़ैगे च़लणें साबै एक सुन्‍नें ठान्‍नीं*30:13-15 सुन्‍नें ठान्‍नीं आधअ शकेल 5:7 गराम दैणीं।*30:13-15 गेरा हअ त सोभी का होछ़अ तोल 0.6 गराम ✝30:13-15 लुआ. 38:25,26; मोत्त. 17:24

16 "सोभी इज़राईली का इना ढब्बै कठा करी लाऐ तेता मेल़-ज़ोल़े खिम्भे कामां-काज़ा दी, ऐहा गल्‍ला पिछ़ू निं हुंह बिधाता आपणैं इज़राईली मणछा बिस्सरदअ अर एता करै तिन्‍नें पापो प्राश्त बी जाणअ हई।"

कांस्सैओ बडअ कल़ाह

17 तेखअ बोलअ बिधाता मोसा लै इहअ, 18-21 "हाथा धोणा लै बणा एक कांस्सैओ बडअ कल़ाह अर तेता बशैल़णा लै बणाऐं कांस्सैओ एक बठैल़णू बी। तेखअ डाहै तेता बल़ीदान करने बेदी पिछ़ू अर मेल़-ज़ोल़े खिम्भे प्रऊल़ी आजू, ताकि प्रोहत खिम्भा भितरी मुंह बिधाता सेटा डेऊणैं का आजी या बल़ीदान अर हूम करनै का आजी आपणैं हाथ-खूर धोई सके। पोस्ती दर पोस्ती लोल़ी पैहलै एऊ ई बधाने साबै आपणैं हाथ-खूर धोऐ, इहअ निं हआ कि सह मरे।"✝30:18-21 लुआ. 38:8

अभिषेक करना लै तेल

22 तेखअ बोलअ बिधाता मोसा लै भिई इहअ,✝30:22 लुआ. 37:29 23-25 "नापी करै आणै चअन बाटी*30:23-25 चअन बाटी इब्रानी दी 500 शकेल मतलब छ़ह किलू लोवान, डेढ बाटी दाल़चिनी, डेढ बाटी बलसाम नाओंए खुशबूदार ईख अर चअन बाटी तेज़पात्ते खुशबूदार तरोल़ै, संघा राल़ै इना सोभी नौ सेर*30:23-25 नौ सेर च़ार किलू तेल जैतूने तेला संघै। सह हणअ अभिषेक करना लै पबित्र तेल। 26 संघा करै तेता करै मेल़-ज़ोल़े खिम्भ, करारे मणशू, 27 सदीऐओ, सारै समाना संघी पलग अर धूप बेदीओ, 28 हूम बल़ी करने बेदीओ अर कल़ाहो तेते बठैल़णू संघी अभिषेक। 29 एऊ साबै शुधी करी हणैं तिंयां सोभै पबित्र, तेखअ ज़ुंण बी तिन्‍नां छ़ुंए, सह हणअ तेता करै पबित्र।

30 "ज़ेभै तूह हारण अर तेऊए शोहरूओ प्रोहतो काम करना लै अभिषेक करे, तेभै करै तिन्‍नां एऊ तेला छ़ल़िकी करै पबित्र। 31 संघा खोज़ै इज़राईली का मेरअ हुकम, ‘प्रोहतो अभिषेक करै पोस्ती दर पोस्ती एऊ ई तेला करै। मुंह बिधाता लै अर्पण किअ द अह तेल आसा पबित्र। 32 एऊ तेला निं कहा मणछे घेरी लाई अर नां एता ज़िहअ किज़ै होर तेल लाई। अह तेल आसा पबित्र तेल अर तम्हां लै बी आसा अह पबित्र। 33 ज़ै कुंण एता ज़िहअ किज़ै होर बणांए अर ज़ै प्रोहता छ़ाडी एऊ तेला होरीए घेरी लाए, सह हणअ आजू मेरै लोगा मांझ़ा का दूर।’"

धनैरअ

34,35 तेखअ बोलअ बिधाता मोसा लै इहअ, "खुशबूदार नैईर, लाल समुंदरे कस्तूरो खुशबूदार खोप्पअ, लाख अर लोवान, इना सोभी खुशबूदार च़िज़ा पाऐ नापी करै एक बराबर। तेथ जैंदरी धख लूंण राल़ी करै बणांए शुचअ अर पबित्र धूप। 36 तेता का पिशै थोल़अ ज़िहअ भींन, संघा छ़ल़िकै तेता मेल़-ज़ोल़े खिम्भा भितरी करारे मणशू आजू, ज़िधी एछी मुंह ताह संघै गल्‍ला करनी करी। ऐहा गल्‍लो डाहै धैन कि अह धूप आसा खास पबित्र। 37 किल्हैकि अह आसा मुंह बिधाता लै अर्पण किअ द, इहअ या एता ज़िहअ किज़ै होर धूप निं आप्पू लै बणाऊंदै लागी। 38 ज़ै कुंण कधू एता ज़िहअ किज़ै शोभली बास्सो धूप मज़अ लणा लै बणांए, सह हणअ आजू मेरै आपणैं लोगा मांझ़ा का दूर।"