1 "हारण अर तेऊए शोहरूए मेरै प्रोहतो काम करनै का आजी करै तूह तिन्‍नों अभिषेक। तेतो बधान हणअ इहअ कि एक बाछ़ू अर दूई गाभू आणै इहै ज़ेथ किछ़ै खोट निं होए। 2 कणके पिठे बणाऐं जैतूने तेल राल़ी आखरै बडै-बडै रोट अर बाऊरी-बाऊरी लुच़ी चाणी भोज़न, सज़ेल़अ निं तेथ पाई। 3 तेऊ सारै भोज़ना पाऐ एकी च़ठै भितरी संघा आणै तेता तिन्‍नां गाभू अर बाछ़ू संघी मुंह सेटा लै।

4 "तेखअ आणै हारण अर तेऊए शोहरू मेल़-ज़ोल़े खिम्भे प्रऊल़ी सेटा, संघा न्हैऊऐ तिन्‍नां पाणीं करै। 5 तेखअ बन्हैऊंऐं हारणा लै च़ोल़ी, प्रोहते कामां करनैओ बाघलअ च़ोल़अ, सदरी, नसाफ करने च़ौकी, गाची। 6 तेखअ लाऐ हारणे मुंडै साफअ अर तेथ लाऐ निली डोरी आल़ै तेऊ सुन्‍नें पबित्र बिंदू*।✝

7 "तेखअ करै तेऊए मुंडै जैतूनो तेल तरैल़ी करै अभिषेक।

8 "तेता बाद बन्हैऊंऐं हारणे शोहरू लै तिन्‍नां लै बणाऐं दै तिंयां खास च़ोल़ै, 9 गाची अर तिन्‍नें साफै, संघा करै तिन्‍नों बी अभिषेक, किल्हैकि तिंयां अर आजू तिन्‍नें आद-लुआद हणैं पोस्ती दर पोस्ती प्रोहत।*

10 "तेखअ आणै मेल़-ज़ोल़े खिम्भे प्रऊल़ी सेटा तेऊ बाछ़ू, संघा बझ़ैल़ै हारण अर तेऊए शोहरू का बाछ़ूए मुंडै हाथ लाणैं। 11 तेखअ करै मुंह बिधाते मेल़-ज़ोल़े खिम्भे प्रऊल़ी सम्हनै बेदी प्रैंदै तेऊ बाछ़ू बल़ीदान। 12 तेते लोहू का लाऐ धख-धख बेदीए च़ऊ कूणैं दी लागै दै शींगा दी अर बाकी लोहू पोछै बेदी हेठै पाऊआ दी।

13 "तेते आंजा फेरे च़र्बी, काल़ज़ै प्रैंदे भाछी अर दुही बुक्‍की ज़ाल़ै तेते च़र्बी संघी बेदी दी। 14 पर तेतो होर मास्स, खाल अर पोट ज़ाल़ै खिम्भे डेरै बागै प्रोहते पाप माफ करना लै पाप बल़ी।

15 "तेखअ आणै एक गाभू, संघा बझ़ैल़ै हारण अर तेऊए शोहरू का तेऊ गाभूए मुंडै हाथ लाणैं, 16 तेखअ करै तेऊ गाभूओ बल़ीदान संघा छ़ल़िकै तेतो लोहू बेदी च़ऊ फेर। 17 तेऊ गाभू छ़िन्हैं-रुटै संघा डाहै तेऊ गाभूए अर छ़ल़ू धोई करै तिन्‍नां शिखा अर मुंडा संघी बेदी प्रैंदै। 18 तेखअ करै तेऊ सारै गाभू बेदी दी हूम बल़ी अर सह हूम हणअ मुंह बिधाता लै।✝

19 "तेखअ आणै दुजअ गाभू, संघा बझ़ैल़ै हारण अर तेऊए शोहरू का तेऊ गाभूए मुंडै हाथ लाणैं, 20 तेखअ करै तेऊ गाभू बल़ीदान, संघा लाऐ तेते लोहू का धख-धख हारण अर तेऊए शोहरूए दैहणै कानै, दैहणै हाथ अर खूरे गुंठै, बाकी लोहू पोछै तेखअ बेदी च़ऊ फेर पाऊआ दी। 21 बेदी का राल़ै धख लोहू तेला जैंदरी संघा छ़ल़िकै तेता हारण अर तेऊए शोहरूए झिकल़ै दी, इहअ करै हणैं तिंयां तिन्‍नें झिकल़ै संघी मुल्है पबित्र।

22 "अह गाभू आसा प्रोहते संस्कार करना लै। तेऊ गाभूओ दैहणीं बाखो गुल़छ़ू, छ़तरी, आंजा फेरे च़र्बी, काल़ज़े भाछी अर दुहै बुक्‍की काढै तेते च़र्बी संघी ज़ुदी। 23 तेखअ काढै च़ठै का भोज़ना मांझ़ै एक रोट, एक लुच़ी अर एक फुलकी, 24 संघा दैऐ तेता शिखा संघी हारण अर तेऊए शोहरूए हाथै, संघा बोलै तिन्‍नां लै तेता मुंह सम्हनै हाथै ढाकी रगाऊंणा लै। अह हणीं मुंह बिधाता लै रगाऊई करै दैनी दी भैंट। 25 तेखअ ढाकै तिन्‍नां सोभी च़िज़ा तिन्‍नें हाथा का पोर्ही, संघा करै तेता बेदी दी हूम बल़ी, अह हणअ मुंह बिधाता लै किअ द हूम।

26 "तेऊ दुजै गाभूओ बच़अ द छ़ल़्हअ अर फल़ाठ आसा प्रोहतो भाग, तेते शिखा सका हारण अर तेऊए शोहरू खाई, पैहलै लऐ तेता आपणैं हाथ उझै च़की मुंह बिधाते सम्हनै रगाऊई।

27,28 "इज़राईल आजू बी पोस्ती दर पोस्ती ज़ेभै प्रोहतो संस्कार होए, च़ाऐ मुखा बर्गत मांगणा लै करे, गाभूओ छ़ल़्हअ अर दैहणीं बाखो गुल़छ़ू ज़ुंण मुंह बिधाता सम्हनै हाथ उझै च़की करै रगाऊई भैंट करनअ, सह आसा मुल्है पबित्र, तेते शिखा सका सिधअ प्रोहत खाई। अह बधान रहणअ सदा इहअ ई।

29 "हारणा मरनै बाद तेऊए खिंबा दी पोस्ती दर पोस्ती ज़ुंण बी माहा प्रोहत बणें तेऊओ अभिषेक अर संस्कार करै इना ई पबित्र झिकल़ै बन्हैऊंईं करै। 30 ज़ुंण बी तेऊए ज़ैगा मेल़-ज़ोल़े खिम्भा दी माहा प्रोहत होए, ज़ेभै सह पैहली बारी पबित्र ज़ैगा प्रोहते च़ाकरी करदअ एछे, तेभै लोल़ी तेऊ साता धैल़ै तैणीं ईंयां झिकल़ै बान्हीं डाहै।

31 "प्रोहतो संस्कार करना लै आणै दै तेऊ गाभूए शिखा लोल़ी पबित्र ज़ैगा बणाईं। 32 तेखअ खाऐ हारण अर तेऊए शोहरू तेऊ गाभूए शिखा, रोट, लुच़ी अर फुलकै मेल़-ज़ोल़े खिम्भे प्रऊल़ी दी बेशी करै। 33 तेऊ भोज़ना अर शिखा सका सिधै तिंयां ई खाई ज़ेता करै तिन्‍नों संस्कार हुअ अर शुचै हुऐ, होर निं तिन्‍नां कोहै खाई किल्हैकि तिंयां आसा पबित्र। 34 ज़ै तेऊ पबित्र भोज़ना का किज़ै दुजै धैल़ै दोत्ती लै छ़ुटे, तेता निं तेखअ खाई, तेता पाऐ पठी दहई।

35 "ज़िहअ मंऐं ताखा खोज़अ, तेऊ ई साबै करै साता धैल़ी तैणीं बाढै हारण अर तेऊए शोहरूओ संस्कार। 36 हर धैल़ै करै पापो प्राश्त करना लै एक बाछ़ू पाप बल़ी अर बेदी करै तेभै शुची, जैतूनो तेल मल़ी करै तूह बेदीओ अभिषेक ताकि सह पबित्र होए। 37 एता करै तूह साता धैल़ी तैणीं कबल्‍लअ, इहअ करै हणीं बेदी पबित्र, तेखअ ज़ुंण बी तैहा बेदी छ़ुंए सह बी हणअ पबित्र।

38 "हर धैल़ै लागणै ताह बेदी सेटा एकी-एकी साले दूई मिम्मूं बल़ीदान करनै। 39 एक मिम्मूं करै दोत्ती अर दुजअ करै सान्हां बल़ीदान। 40,41 तिन्‍नां मिम्मूं संघै करै दोत्ती अर उडै दुही बगती कोई दूई सेर *जैतूनो तेल राल़ी करै आधअ पाथअ कणको पिठअ भैंट, संघा दैऐ च़ार सेर* दाखे रसो अर्घअ। अह भोज़न हणअ मुंह बिधाता लै भैंट किअ द अर तेऊ हूमा करै हआ हुंह खुश। 42,43 मेल़-ज़ोल़े खिम्भे प्रऊल़ी आजू करै थारै आद-लुआद पोस्ती दर पोस्ती एही ई हूम बल़ी।

"पोस्ती दर पोस्ती करूं हुंह बिधाता आप्पै तम्हां इज़राईली सेटा तिधी एछी गल्‍ला अर मेरै च़मकदै धुप्पै करनी अह ज़ैगा पबित्र।

44 "मुंह करै हणअ अह खिम्भ पबित्र अर हारण अर तेऊए शोहरू हणैं मुल्है मेल़-ज़ोल़े खिम्भा भितरी प्रोहते च़ाकरी करनै जोगी। 45 मुंह बस्सणअ तम्हां इज़राईली मांझ़ै अर हुंह हणअ थारअ परमेशर। 46 तेभै लागणअ तम्हां का थोघ कि हुंह ई आसा थारअ परमेशर बिधाता ज़ुंणी तम्हैं मिसर देशा का आणै बच़ाऊई, ताकि हुंह तम्हां जैंदरी बस्से।"