1 लेबी खिंबे एकी मणछै किअ एकी लेबी खिंबे ई शोहरी संघै बैह।

2 सह शोहरी हुई सुंदी अर तेसो हुअ भाऊ, ज़ांऊं तैहा भाल़अ कि सह भाऊ त हेरनअ बधिया, तैहा डाहअ सह चिई भिन्‍नैं तैणीं च़ोरी।✝

3 ज़ांऊं तैहा लै सह च़ोरी डाहणअ कठण हुअ, तैहा बणाअं तेऊ लै नगाल़ैओ एक बडअ छ़ाब्बअ, संघा लेस्सअ सह च़कणाट माट्टीए गारा करै, तैहा पाअ सह शोहरू तेऊ छ़ाब्बै भितरी संघा बहाऊअ सह नील नदीए बाढै लागै दै कछैरे घाहा जैंदरी पाणीं दी।

4 तेऊ शोहरूए दाई* ती दूरा का ज़ेही भाल़ी लागी दी कि एऊ भाऊओ किज़ै हणअ।

5 तैहा बगती आई मिसर देशे माहा राज़ेए देई नील नदीए बाढै न्हैऊंदी अर तेसे साथणीं ज़ुंण तेसे दासी ती, तिंयां लागी दरैअए बाढै हांढदी-फिरदी। ज़ांऊं राज़ेए देई का कछैरे घाहा जैंदरी सह छ़ाब्बअ शुझुअ, तैहा बोलअ आपणीं दासी लै तेऊ छ़ाब्बै पाणीं जैंदरा का बागै काढणा लै।✝

6 ज़ांऊं राज़ेए देई सह छ़ाब्बअ खोल्हअ, तैहा भाल़अ तेथ भितरी होछ़अ ज़िहअ शोहरू अर तैहा फिरी तेऊ लै खास्सी झींण अर तैहा बोलअ इहअ, "अह हणअ कहा इब्रानीओ शोहरू।"

7 तेखअ आई सह तेऊ शोहरूए दाई मिसर देशे माहा राज़ेए देई नेल़, संघा बोलअ, "तूह किज़ै बोला, हुंह कहा इब्रानी बेटल़ी मांझ़ै ताल्है एऊ शोहरूए हेर-सभाल़ करना लै शादूं ज़ुंण एऊ शोहरू का दुध पणैऊंए?"

8 मिसर देशे माहा राज़ेए देई बोलअ, "डेऊ।" सह शोहरी बी डेऊई संघा आणी तैहा तेऊ शोहरूए ईज शादी।

9 माहा राज़ेए देई बोलअ तैहा का, "एऊ शोहरू लै पणैऊं तूह दुध अर हुंह दैंऊं ताल्है तेते मज़दूरी।"

शोहरूए ईजै निंयं सह घअरा लै, संघा लागी तेऊ का दुधा पणैंऊंदी।

10 ज़ांऊं सह शोहरू धख बडअ हुअ, तैहा निंयं सह मिसर देशे माहा राज़ेए देई सेटा लै अर तैहा बणाअं सह आपणअ गोदी पूत अर तैहा डाहअ तेऊओ नाअं इहअ बोली मोसा*, "मंऐं आसा काढअ द अह पाणीं जैंदरा का।"✝

11 ज़ांऊं मोसा ज़ुआन हुअ, सह डेऊअ तिधा लै ज़िधी तेऊए आपणैं भाई-बंध कठण-कठण काम करा तै। तिधी भाल़अ तेऊ इहअ कि एक मिसर देशो मणछ आसा एकी इब्रानी मणछा च़िक्‍कदअ लागअ द।✝

12 मोसा भाल़अ फेर कि कोहै निं आथी भाल़अ लागअ द, तेखअ पाअ तेऊ सह मिसर देशो मणछ मारी संघा डाहअ रेता जैंदरी दाबी।

13 दुजै धैल़ै भाल़अ तेऊ भिई कि दूई इब्रानी मणछ आसा आप्पू मांझ़ै च़िखदै लागै दै। मोसा डेऊअ तेऊ च़िक्‍कणै आल़ै मणछा सेटा लै संघा लागअ पुछ़दअ, "तूह किल्है आसा आपणैं ई भाई-बंधा च़िक्‍कदअ-मारदअ लागअ द?" 14 तेऊ मणछै पुछ़अ मोसा का, "तूह कुंणी बणाअं म्हारअ पांच़? तूह कै मुंह बी तिहअ ई च़ाहा मारी पाणअ ज़िहअ तंऐं हिझ़ सह मिसर देशो मणछ पाअ मारी?"

इहअ शूणीं डरअ मोसा किल्हैकि तेऊ हेरअ ज़ाणीं कि ऐहा गल्‍लो थोघ गअ सोभी का लागी कि हिझ़ किज़ै हुअ।✝ 15 ज़ांऊं ईंयां गल्‍ला मिसर देशे माहा राज़ै शूणीं, सह च़ाहा त मोसा मारी पाणअ। पर मोसा ठुर्हअ राज़ै सेटा का संघा डेऊअ मिद्यान देशा लै।✝

तिधी हुअ एकी धैल़ै इहअ कि सह थिअ एकी कुहै सेटा बेठअ द, 16 तिधे प्रोहते ती सात शोहरी तिंयां आई आपणैं बाबे भेडा-बाकरीए हेल़्ही का पाणीं पणैऊंणा लै तिधी पाणीं भरदी।

17 होर फुआल लागै हेल़्ही पोर्ही दरल़ाऊंदै, पर मोसा किई तिन्‍नें मज़त अर तेऊ पणैऊंअं तिन्‍नें डागै-धणा का पाणीं। 18 ज़ांऊं तिंयां घअरै आपणैं बाबा च़ितरु सेटा पुजी, तेऊ पुछ़अ तिन्‍नां का, "तम्हैं आझ़ किज़ै किअ कि तम्हैं गई आझ़ बडी छ़ेक्‍कै एछी?"

19 तिन्‍नैं शोहरी खोज़अ आपणैं बाबा का, "एकी मिसर देशे मणछै छ़ड़ैऊई हाम्हैं होरी फुआला का अर तेऊ ई दैनअ हाम्हां लै डागै-चैणें हेल़्ही पणैऊंणा लै कुहै का खास्सअ पाणीं भरी।"

20 तेखअ पुछ़अ तेऊ आपणीं तिन्‍नां शोहरी का, "सह मणछ किधी आसा? सह बी त संघा आणनअ तम्हैं किल्है छ़ाडअ तिधी? तेऊ बी शादा हाम्हां संघै रोटी खांदै।"

21 मोसा हुअ च़ितरुए घअरै रहणा लै राज्ज़ी, बादा का किअ तेऊ आपणीं शोहरी सपोरो मोसा संघै बैह। 22 तैहा का हुअ मोसो एक शोहरू अर मोसा डाहअ इहअ बोली तेऊ नाअं गर्शोम* कि हुंह आसा होरी देशै परदेसी।

23 खास्सी साला बाद हुअ इहअ कि मिसर देशो राज़अ मूंअ। इज़राईली मणछ लागै गलामी दी कठण नोकरी करदी मज़ती लै लेरदै-पकारदै, 24 परमेशरै शूणीं तिन्‍नें लेरा-पकारा। परमेशर निं आबराम, इसहाक अर याकबा संघै किई दी आपणीं करारा बिस्सरुअ।✝

25 परमेशरा का थिअ इज़राईलीए हालतो थोघ अर तेऊ किई तिन्‍नां लै झींण।