मोसो शौहरअ च़ितरु आअ मिलदअ
1 च़ितरु थिअ मिद्यान देशो प्रोहत, अर मोसो शौहरअ। तेऊ बी शूणीं ईंयां गल्ला कि बिधाता मिसर देशे गलामी का आज़ाद करी मोसा अर इज़राईली मणछा लै किज़ै-किज़ै किअ।
2-4 मोसा ती आपणीं लाल़ी सपोरा तैहा का हुऐ दै दूई शोहरू, आपणैं शौहरै सेटा डाहै दै अर च़ितरु थिअ तिन्नां आप्पू सेटा डाहणां लै राज्ज़ी। ज़धू मोसो ज़ेठअ शोहरू हुअ तधू थिअ सह मिद्यान देशै परदेसी, तैही डाहअ मोसा तेऊ नाअं, "गर्शोम18:2-4 गर्शोम परदेसी।"18:2-4 लुआ. 2:21,22; शधा. 7:29
ज़ांऊं मोसो दुजअ शोहरू हुअ, मोसा बोलअ इहअ, "मुंह डाहणअ एऊ नाअं, ‘एलीआजर18:2-4 एलीआजर मतलब, परमेशरै किई मेरी मज़त,’ किल्हैकि ज़हा बिधाते च़ाकरी मेरअ बाब करा, तेऊ बच़ाऊअ हुंह मिसर देशे माहा राज़ै का।"
5,6 इज़राईली थिऐ परमेशरे सीनाई धारा नेल़ शुन्नैं रेगीस्तानै आपणैं डेरै पाऐ दै, मोसे शौहरै च़ितरु दैनअ तेऊ लै इहअ समाद, "हुंह एछणअ ताह सेटा लै, तेरी लाल़ी अर तेरै दूई शोहरू बी आणनैं मुंह आप्पू संघा।"
7 ज़ांऊं तिंयां तिधी पुजै, मोसा डेऊअ तिन्नां सेटा लै बाता तैणीं संघा टेक्कअ आपणैं शौहरै च़ितरु सेटा माथअ अर च़ुंज़ी माख्खी दैई दैनी मल़्हैची। एकी-दुजै का राज्ज़ी-खुशी पुछ़ी डेऊऐ तिंयां डेरै लै। 8 खिम्भा भितरी बेशी खोज़ी मोसा आपणैं शौहरै का बाढै सारी गल्ला कि बिधाता इज़राईली मणछ मिसरी लोगा अर तिन्नें मिसर देशे माहा राज़ै का किहै-किहै बच़ाऊऐ। मोसा खोज़अ इहअ बी कि मिसर देशा का निखल़ी बाता तिन्नें खरी दी बिधाता किहअ रहअ हर ज़ैगा तिन्नां लै खल़अ।
9 बिधाता इज़राईली लै किहै-किहै भलाईए काम किऐ, इना गल्ला शूणीं हुअ च़ितरु खुश, 10 तेऊ बोलअ ज़ोरै-ज़ोरै इहअ, "ज़ै-ज़ैकार आसा तेऊ बिधाते! ज़ुंणी तम्हैं अर सारै इज़राईली मिसर देशे लोगा का अर तिन्नें माहा राज़ै का बच़ाऊऐ। 11 ऐबै गअ मुखा थोघ लागी कि सोभी देअआ का बडअ जोधअ आसा बिधाता, किल्हैकि तेऊ बच़ाऊऐ इज़राईली तिन्नें दुशमणा का ज़हा आपणैं बलबान हणैंओ घमंड थिअ।"
12 तेखअ किई मोसे शौहरै च़ितरु बिधाता लै हूम बल़ी अर मेल़-ज़ोल़ो बल़ीदान तेखअ बेठै हारण अर इज़राईलीए खास-खास सैणैं बिधाता सम्हनै पबित्र भोज़ा खांदै।
च़ितरु दैनी मोसा लै सलाह
(बधान 1:9-18)
13 दुजै धैल़ै बेठअ मोसा लोगे फैंसलै करदअ, दोत्ता पोर्ही उडै तैणीं रहै खास्सै मणछ तेऊ फेर झाल़्हुई। 14 मोसो शौहरअ च़ितरु लागअ भाल़अ कि मोसा किज़ै-किज़ै लागा करनअ, तेता भाल़ी बोलअ तेऊ मोसा लै इहअ, "अह किज़ै काम आसा ज़ुंण तूह इना लोगा लै करा? तूह किल्है हआ एक्कै ज़ण्हअ बेठअ द अर इनै लोगै किल्है हआ दोत्ता पोर्ही उडै तैणीं ताह फेर झाल़अ किअ द?"
15 मोसा बोलअ आपणैं शौहरै च़ितरु लै इहअ, "ईंयां एछा मुंह सेटा पुछ़दै कि बिधाता तिन्नां लै किज़ै बोला। 16 तेखअ ज़ेभै इने किज़ै मकदमैं हआ तेभै दैआ हुंह बिधातो बधान अर हुकम समझ़ाऊई इने फैंसलै करी।"
17 च़ितरु बोलअ मोसा लै इहअ, "अह काम निं एऊ साबै हंदअ आथी, ज़िहअ तूह करा। 18 इहअ करै थकणअ तूह अर ईंयां लोग बी थकणैं। अह काम आसा खास्सअ अर अह निं तेरै एक्कीए भलै हंदअ।
19 "ऐबै शुण तूह मुखा, मेरी आसा ताल्है एक सलाह, तेता लै हेरनी परमेशरा तेरी मज़त करी।
"तूह कर आप्पू सिधअ इहअ काम कि लोगे हर गल्ले बारै कर परमेशरा का गल्ला, 20 संघा कर लोगा का परमेशरो बधान अर हुकम खोज़ी अर तिन्नां समझ़ाऊई कि तिन्नां किहअ लागा रहणअ अर तिन्नां किज़ै लागा करनअ। 21 लोगे होरी कामां लै छ़ांट तूह इहै मणछ ज़ुंण परमेशरे डरा हेठै रहणैं आल़ै, शुचै-पाक्कै अर मानदार होए अर ज़ुंण तेऊ कामां जोगी होए। तेखअ दै तिन्नां लै दस, पज़ाह अर हज़ार-हज़ार लोगे ज़िम्मैंबारी।
22 "ईंयां रहणैं हर बगत लोगा लै पांच़। ज़ै किज़ै बडअ मकदमअ होए, तेता आणे ईंयां ताह सेटा लै अर बाकी मकदमैंओ फैंसलअ सका ईंयां आप्पै करी। इहअ करै हणअ तेरअ बोझ़ बी हल़कअ किल्हैकि तेखअ करनी इना बी तेरै एऊ कामां लै ताह संघै मज़त।
23 "ज़ै तूह एऊ साबै करे, बिधाता बी च़ाहा एता एऊ ई साबै करनअ। तेखअ नां ताल्है खास्सअ बोझ़ पल़णअ अर ईंयां लोग बी डेऊणैं राज्ज़ी-खुशी आपणैं घअरा लै।"
24 ज़िहअ च़ितरु बोलअ, मोसा किअ तिहअ ई। 25 तेऊ छ़ांटै इज़राईलीए गोत्र अर टोली मांझ़ै इहै मणछ पांच़ ज़ुंण एऊ कामां करनै जोगी थिऐ। तेखअ दैनी तिन्नां लै दस, पज़ाह, शौ अर हज़ारा-हज़ारा लोगे ज़िम्मैंबारी। 26 तिंयां लागै सोभी लोगे नसाफ करदै, होछ़ै अर सान मकदमें फैंसलै करदै लागै तिंयां आप्पी अर ज़ुंण लोगा मांझ़ै बडै अर कठण मकदमैं हआ तै तिन्नां निंयां तै तिंयां मोसा सेटा।
27 तेखअ दैनअ मोसा खास्सै धैल़ै बाद आपणअ शौहरअ घअरा लै बाता तैणीं सभाही। च़ितरु बी डेऊअ सोभी संघै ज़ुल़ी-मिल़ी आपणैं घअरा लै फिरी।