1,2 इज़राईली लागै रपडीम ज़ैगा का हांढदै, मिसर देशा का निखल़ी गऐ तै इज़राईली दूई भिन्‍नैं बिति अर चिऊथै भिन्‍नैं ज़ेठै पुजै तिंयां साज़ै धैल़ै सीनाई धारा गोधै शुन्‍नैं रेगीस्तानै, संघा पाऐ तिन्‍नैं तिधी डेरै।

3 मोसा डेऊअ तेखअ उझै बिधाता संघै गल्‍ला करदअ। बिधाता किई मोसा संघै गल्‍ला संघा बोलअ इहअ, "सोभी याकबे आद-लुआदा का खोज़ मेरअ समाद। तूह खोज़ इज़राईली का, 4 ‘तम्हैं भाल़अ आपणीं आछी कि मंऐं मिसर देशे लोगा लै किहअ-किहअ किअ, तम्हैं पजैल़ै मंऐं इधी राज्ज़ी-राम्बल़ै ज़िहअ मुक्षरलअ आपणैं बच्च़ै आपणैं फैंखा दी आणा।

5 "‘ऐबै ज़ै तम्हैं ज़िहअ हुंह बोले तेही ई मेरी करारा मने, तै हणैं तम्हैं मेरै आपणैं लोग। सारअ संसार आसा मेरअ,✝ 6 पर तम्हैं आसा मेरअ पबित्र देश अर मेरी आपणीं खास परज़ा, मेरी च़ाकरी करनै आल़ै प्रोहत हणैं तम्हैं।’ इना गल्‍ला खोज़ तूह इज़राईली का।"✝

7 तेखअ डेऊअ मोसा उंधै, इज़राईली मांझ़ै सोभी टोलीए सैणैं कठा करी खोज़ी मोसा सारी गल्‍ला तिन्‍नां का ज़िहअ बिधाता तेऊ लै हुकम किअ त। 8 तिन्‍नैं सोभी बोलअ मोसा लै, "ज़िहअ-ज़िहअ बिधाता बोलअ, हाम्हां करनअ तिहअ ई, अह रही म्हारी ज़बान।"

मोसा खोज़ी ईंयां गल्‍ला बिधाता का।

9 तेखअ बोलअ बिधाता मोसा लै, "ताह फेर घोर्हनै घणैं बादल़ अर तेथ जैंदरी एछी करनी मुंह ताह संघै गल्‍ला, ताह संघै गल्‍ला करदअ लोल़ी हुंह इना होरी का शुण्हुंअ ताकि आझ़ा बाद तिंयां तेरअ विश्वास करे।"

ज़ुंण गल्‍ला इज़राईली मोसा का बोली ती, तिंयां गल्‍ला खोज़ी मोसा बिधाता का पठी।

10 बिधाता बोलअ मोसा लै इहअ, "तूह डेऊ उंधै लोगा सेटा लै फिरी संघा बोलअ इहअ, ‘आझ़ अर काल्‍ला आसा तम्हां लै आप्पू च़ांगै-च़ोखै हणैंओ बगत। आपणैं झिकल़ै धोई 11 लोल़ी तम्हैं पर्शी लै तैर्हुई रहै, किल्हैकि पर्शी एछणअ बिधाता सोभी लोगा सम्हनै सीनाई धारा प्रैंदै।’

12 "धारा फेर डाहै तूह सारै दी बाल़ लाई अर लोगा लै डाहै चतैनगी दैई, ‘धारा लै निं उझै उखल़दै लागी, एते सिऊंआं बी निं लागी एछदै! ज़ुंण इहअ करे तेऊ पाऐ मारी,✝ 13 च़ाऐ सह मणछ होर या पशू, तेऊ निं हाथा करै छ़ुंहीं बी आथी! तेऊ मारै पात्थरो ढो दैई, कि मारै तेऊ कतीरा करै।’

"ज़ांऊं तम्हां का करनाल़ा बाज़णें बडी छ़ेल़ शुण्हिंए, तेता बाद सका तम्हैं उझै धारा लै उखल़ी।"✝

14 तेखअ आअ मोसा धारा प्रैंदा का उंधै लोगा सेटा लै। तेखअ बोलअ तेऊ लोगा लै झिकल़ै धोई च़ांगै-च़ोखै हणां लै। 15 मोसा बोलअ लोगा लै इहअ, "पर्शी लै रहा च़ांगै-च़ोखै हई तैर्हुई, तेभै तैणीं रहै आपणीं बेटल़ी संघै सुत्तणै-बेशणै का बी दूर।"

16 चिऊथै धैल़ै दोत्ती लागी सरगै गुल़ूबिज़ल़ूए ढिम्हां अर बिज़ल़ीए च़पराल़ै। सीनाई धारा फेर घोर्हुऐ घणैं बादल़, तेखअ शुण्हुंई खास्सी ज़ोरै करनाल़ी बाज़णें छ़ेल़ अर धारा नेल़ खिम्भे डेरै दी ज़ुंण लोग थिऐ, तिन्‍नां छ़ुटी डरै काम्मणीं।✝

17 मोसा निंयैं तिंयां सोभ डेरै का बागै अर सोभ लोग रहै सीनाई धारा फेर गोधै खल़्हुई। 18 सीनाई धारा का लागअ धूँ किल्हैकि बिधाता आअ तिधी आगी जैंदरी। धूँ त इहअ, ज़िहअ बडै भठै का धूँ उझ़िआ अर सारी धारा हुई ज़ाज़री*।✝

19 ज़ांऊं करनाल़ी बाज़णें छ़ेल़ होर बी ज़ोरै-ज़ोरै लागी शुण्हदी, तेखअ लागअ मोसा बोल्दअ अर बिधाता किई तेऊए बैण शूणीं तेऊ संघै गल्‍ला।

20 बिधाता होथअ सीनाई धारा प्रैंदै, संघा शादअ मोसा धारे च़ुंडी लै अर मोसा डेऊअ उझै। 21 तेखअ बोलअ बिधाता मोसा लै, "उंधै एछ डेऊई संघा डाह तिन्‍नां मणछा लै चतैनगी दैई, इहअ निं हआ कि तिंयां बाल़ चोल़ी मुंह भाल़ै उझै लागे हांढदै, इहअ करै सका तिन्‍नां मांझ़ै खास्सै मणछ मरी।

22 "ज़ुंण प्रोहत बी मुंह बिधाता सेटा एछदै रहा, तिन्‍नां लै बी बोलै कि पैहलै लआ आप्पू शुचै हई, नांईं ता पल़णीं तिन्‍नां बी मेरी मार।"

23 मोसा बोलअ बिधाता लै, "तिंयां निं ऐहा धारा उझै एछी सकदै, किल्हैकि तंऐं आसा हाम्हैं पैहलै ई हेरै दै चतैन करी कि सीनाई धारा डाहै फेर-फिरदै बाल़ लाई शुची।"

24 बिधाता बोलअ तेऊ लै, "उंधै ता डेऊ, संघा आण हारणा आप्पू संघै उझै। पर होर प्रोहत अर बाकी लोग निं बाल़ा भितरी एछी! इहअ निं हआ कि तिन्‍नां मेरी मार पल़े।"

25 मोसा होथअ तेखअ धारा प्रैंदा का उंधै संघा खोज़ी बिधाता बोली दी गल्‍ला सोभी लोगा का।