1 ईशू रहअ नगरी अर गराऊंऐं शिक्षा दैंदअ अर परमेशरे राज़ो खुशीए समादा प्रच़ार करदअ अर तेऊए बारा च़ेल्‍लै बी हआ तै संघा। 2 कई बेटल़ी त भूत शाचअ द अर बमारी दी पल़ी दी। ईशू किई तिंयां सोभ नरोगी। तिन्‍नां मांझ़ै ती मगदल़ गराऊंए मरिअम बी अर तैहा दी थिअ सतरूपी भूत। 3 हेरोदेस राज़ेए खुजा नाओंए भढारीए लाल़ी जोआना अर सूसना बी थिई तिधी अर होर बी थिई कई बेटल़ी तिधी। ईंयां सोभ करा ती आपणीं-आपणीं ज़ैदात करै ईशू अर तेऊए च़ेल्‍ले च़ाकरी।

4 ज़ांऊं खास्सै मणछ कठा हुऐ अर नगरी-नगरीए लोग ईशू सेटा लै एछा तै, ईशू बोली तिन्‍नां लै कथ्या खोज़ी एही गल्‍ला, 5 "एकी बारी निखल़अ एक कृषाण बेज़ै बऊंदअ। बेज़ै बऊंदी बारी पल़अ धख बेज़अ बाते बाढै अर सह जैंटअ कई अर सरगै डैऊंदै च़ेल्‍लू-पखीरू लै हुअ तेतो च़ुनण। 6 धख बेज़अ पल़अ पात्थरा जैंदरी, सह टिप्पअ, टिप्पअ पर ज़लैल़ै दी बाच नांईं हणें बज़्हा का शुक्‍कअ। 7 धख बेज़अ पल़अ झ़ाकल़ै अर सह बझ़अ, बझ़अ पर दाभूअ कांडै जैंदरी। 8 धख बेज़अ पल़अ रज़दी-पज़दी ज़िम्मीं दी अर सह बेज़अ टिप्पअ अर तेथ लागी बधिया फसल।" तेखअ बोलअ ईशू तिन्‍नां लै, "ज़ै तम्हैं एता समझ़णअ च़ाहा, तै दैऐ ऐहा गल्‍ला दी धैन कि मंऐं एभै तम्हां का किज़ै बोलअ।"

9 च़ेल्‍लै पुछ़अ ईशू सेटा एछी, "अह कथ्या किज़ै आसा?" ईशू बोलअ तिन्‍नां लै, 10 "तम्हैं सका परमेशरे राज़ो भेद समझ़ी। पर होरी का लागा कथ्या खोज़ी एते तैणीं समझ़ाऊंणअ,

* मोत्त. 4:11; ईशा. 6:9-10 ‘तिंयां निं मुंह भाल़ी शिखल़दै,

नां तिंयां मेरी गल्‍ला शूणीं समझ़दै।’

11 "बेज़ै बऊंणैं आल़अ कृषाण आसा परमेशरे बैण खोज़णैं आल़ै ज़िहअ। 12 कई लोग आसा इहै बेज़ै ज़िहै ज़ुंण बाते बाढै पल़अ, ज़ेतरअ छ़ेक्‍कै तिंयां बैण शूणां राख्स एछा तेभी अर तेऊए दिला का करा बैण दूर ज़िहअ च़ेल्‍लू निंयां बेज़ै च़ुंघी कि इहअ निं हआ कि अह विश्वास करी तिन्‍नां उद्धार भेटे। 13 तिहअ ई शकरीली ज़िम्मीं दी पल़अ द बेज़अ आसा तिन्‍नां लोगे बारै ज़ुंण परमेशरो बैण शूणां अर तेभी खुशी-खुशी संघै मना। पर आप्पू पाक्‍कअ विश्वास नांईं हणें बज़्हा रहा तिंयां थोल़ै ई धैल़ै लै। बैण मनणे बज़्हा ज़ांऊं तिन्‍नां लै खरी पल़ा, तिंयां हटा तेभै परमेशरा दी विश्वास करनै का पिछ़ू। 14 ज़ुंण बेज़अ झ़ाकल़ै पल़अ सह आसा तिन्‍नां मणछे बारै ज़ुंण बैण ता शूणां, पर सुलै-सुलै पल़ा तिन्‍नां फिकर, धन-माया अर ज़िऊंणें सुखा दी अर तिन्‍नें फसल बी निं हंदी। 15 पर रज़दी-पज़दी ज़िम्मीं दी बेज़अ आसा इहअ ज़ुंण बैण शूणीं शुचै मन्‍नैं सभाल़ी डाहा अर सबर करी फूला-फल़ा।

16 "इहअ निं कोह आथी ज़ुंण दीअ ज़ाल़ी दरोठू भितरी डाहा कि पलगा हेठै डाहा पाई, तेता डाहा दीअदानी दी उछ़टै ताकि सारै घअरा भितरी एछणैं आल़ै लै प्रैश्शअ होए। 17 किल्हैकि ढोपी डाही दी च़ीज़ शुझणीं सोभी का अर गुप्त च़ीज़ हणीं सोभी नदरी प्रगट। 18 एते तैणीं दै ऐहा गल्‍ला दी धैन कि तम्हैं केऊ साबै शूणां? ज़ुंण मेरी शिक्षा शूणां, तिन्‍नां लै दैणीं होर बी खास्सी समझ़। पर ज़ुंण नांईं शूणां, तिन्‍नां का निंणअ सह बी पोर्ही ज़ेता तिंयां इहअ सोठा कि तिंयां गऐ समझ़ी।"

19 ईशूए ईज अर भाऊ आऐ तेऊ सेटा लै पर लोगे जेल्ह-मरेल्ही जैंदरी निं तिंयां तेऊ का मिली सकै। 20 तेखअ बोलअ ईशू का कुंणी इहअ कि तेरी ईज अर भाई आसा बागै खल़्हुऐ दै अर तिंयां च़ाहा ताखा मिलणअ। 21 ईशू बोलअ इहअ, "मेरी ईज अर भाई-बैहणी आसा ईंयां ज़ुंण परमेशरो बैण शूणां अर मना।"

22 तेखअ एकी धैल़ी ईशू अर च़ेल्‍लै किश्ती दी बेठै अर ईशू बोलअ तिन्‍नां लै, "च़ाल्‍ला हाम्हां डेऊणअ समुंदरा पार। तेखअ तिन्‍नैं बी किश्ती खोल्ही।" 23 पर ज़ांऊं किश्ती पाणीं दी च़लदी लागी, ईशू सुत्तअ अर समुंदरा दी आअ ढिश-बागर अर किश्ती लागी पाणीं करै भरदी अर तिंयां सोभ च़ाल्‍लै डुबी।

24 तेखअ झ़ैऊअ तिन्‍नैं ईशू खल़अ अर तेऊ लै बोलअ, "हे प्रभू, हे मालक हाम्हैं च़ाल्‍लै खतम हई। तेखअ ईशू झ़ाहल़ काढी नैरी अर ढिश-बागर रुकी, तेखअ जाई करै हुअ चैन।" 25 तेखअ बोलअ ईशू तिन्‍नां लै, "थारअ विश्वास किधी आसा?" पर तिंयां डरै अर तिंयां हुऐ रहैन अर आप्पू मांझ़ै लागै गल्‍ला करदै, "अह कुंण आसा? ज़ुंण ढिश-बागर अर समुंदरे छ़ाल्‍ली लै बी दैआ हुकम अर तिंयां शूणां एऊए हर गल्‍ला?"

26 तेखअ पुजै तिंयां समुंदरा पार गरासेनी मुल्खै ज़ुंण समुंदरा पार गलील सम्हनै आसा। 27 ज़ांऊं तिंयां पार बाढै होथै, तिन्‍नां भेटअ तैहा नगरीओ एक मणछ, तेऊ दी त भूत शाचअ द अर सह निं झिकल़ै बी बान्हदअ त अर नां सह घअरै रहंदअ त, सह रहा त मल्थाना दी।

28 तेऊ पाई ईशू भाल़ी लैल़ा अर ईशू सेटा बधल़ूई करै ज़ोरै-ज़ोरै बोलअ, "हे परम प्रधान परमेशरो पूत ईशू, म्हारअ ताह संघै किज़ै मेल़-ज़ोल़? हुंह करा ताखा अरज़ कि मुल्है निं कष्ट दैई।" 29 तेऊ बोलअ इहअ तै कि ईशू दैनअ भूता तेऊ का पोर्ही निखल़णेंओ हुकम। किल्हैकि भूत करा त तेभा-तेभी तेऊ करै उपद्रभ, लोग; डाहा तै तेऊ शांघल़ी करै बान्हीं पर सह पाआ त तिन्‍नां बी चोल़ी अर भूत दरल़ाऊआ त तेऊ सारै उज़र रेगीस्तानै।

30 ईशू पुछ़अ तेऊ का, "ताह नाअं किज़ै आसा?" तेऊ दैनअ ज़बाब, "सैना" किल्हैकि तिंयां थिऐ खास्सै भूत। 31 तिन्‍नैं भूतै किई ईशू का अरज़, "हाम्हां निं तेऊ नथहऐ कूंडा दी पाई ज़ेथ परमेशर भूता लै सज़ा दैआ।"

32 तिधी त धारठी लागअ द एक सुंगरो बडअ छ़ुंड च़रदअ अर तिन्‍नैं किई ईशू का अरज़, "हाम्हां दै एथ पेशणैं अर ईशू बी दैनअ तिन्‍नां तेथ डेऊणैं।" 33 तेऊ का निखल़ै भूत पोर्ही अर तिंयां पेठै सुंगरे छ़ुंडा दी अर सारै सुंगर हुऐ बेगरै अर तिंयां पेठै समुंदरे डुघै पाणीं दी अर मूंऐं।

34 इहअ भाल़ी तिंयां सुंगरा गुआल़ै तिधा का ठुर्है अर नगरी गराऊंऐं दैनअ ऐहा गल्‍लो समाद। 35 लोग आऐ एता भाल़ै, ईशू सेटा एछी ज़हा दी सह भूत निखल़अ त, सह भाल़अ तिन्‍नैं ईशूए च़रणा सेटा राम्बल़अ, झिकल़ै बान्हीं बेठअ द तेऊ भाल़ी डरै तिंयां सोभ। 36 तिधी ज़ुंणी तिंयां गल्‍ला आपणीं आछी भाल़ी ती तिन्‍नैं खोज़अ तिन्‍नां होरी का तेऊ भूत शाचै दै मणछो पूरअ हाल कि अह मणछ भूता का किहअ करै बच़अ। 37 तेखअ गरासेनी मुल्खै आरी-पारीए सोभी लोगै किई ईशू का अरज़, "म्हारै एऊ मुल्खा का डेऊ बागै" किल्हैकि तिन्‍नां पल़अ खास्सअ फिकर।

ईशू बी किश्ती दी बेठअ अर फिरअ बापस। 38 ज़हा मणछा का भूत निखल़अ त सह लागअ ईशू का अरज़ करदअ कि मुंह बी दै ताह संघै एछणैं पर ईशू किअ तेऊ लै इहअ बोली नांईं कि 39 "आपणैं घअरा लै डेऊ अर सोभी का खोज़ कि परमेशरै ताल्है किहै बडै-बडै च़मत्कारे काम किऐ।" अर सह लागअ सारी नगरी प्रच़ारा करदअ कि ईशू भाल़ा मुल्है किहै बडै-बडै काम किऐ।

40 ज़ांऊं ईशू बापस त एछदअ लागअ द, खास्सै मणछ मिलै तेऊ संघै खुशी-खुशी, किल्हैकि तिंयां थिऐ तेऊ न्हैल़ै भाल़ै लागै दै। 41 तिधी आअ याईर नाओं एक मणछ। सह थिअ सभागृहो कारदार। सह पल़अ ईशूए च़रणैं, संघा लागअ सह ईशू का अरज़ करदअ "मेरै घअरा लै च़ाल्‍ल।" 42 तेऊए ती बारा साले एक्‍कै शोहरी अर सह थिई मरदी तैर। ज़ांऊं ईशू हांढदअ लागअ, पिछ़ू लागै होर बी खास्सै मणछ हांढदै। 43 बाता हांढदी आई एक बेटल़ी, तैहा ती बारा साला ओर्ही लोहू बगणेंओ रोग अर तैहा हेरी ती आपणीं सारी ज़ैदात लाज़ा-पुआई लै बैईदा सेटा छेभी अर सह निस्सी ती तेऊ रोगा का केही नरोगी हई। 44 सह आई पिछ़ू का संघा छ़ुंअ ईशूओ झिकल़ैओ पाल्‍लअ अर तेसो लोहू बगणअ हुअ ज़ाथी तेभी बंद।

45 एता लै बोलअ ईशू, "हुंह कुंणी छ़ुंअ?"

ज़ांऊं तिधी सोभी नांह किअ, तेखअ बोलअ पतरासै अर तेऊए होरी साथी, "हे मालक, एतरी लोगे जेल्ह-मरेल्ही जैंदरी कसरअ हाथ लागअ होए, कै थोघ?"

46 पर ईशू बोलअ तिन्‍नां लै, "हुंह छ़ुंअ कुंणी ज़रूर किल्हैकि मंऐं च़ेती मुखा शगती निखल़दी।" 47 ज़ांऊं तैहा बेटल़ी ज़ाणअ कि सह निं ऐबै आप्पू च़ोरी सकदी, तेखअ खोज़ी तैहा डरदी-काम्बदी ईशू सेटा माथअ टेक्‍की करै सारी गल्‍ला शुची-शुची कि मंऐं तूह किल्है छ़ुंअ अर किहै करै हुई तेभी नरोगी। 48 ईशू बोलअ तैहा लै, "बेटीऐ, तंऐं किअ विश्वास कि हुंह सका ताह नरोगै करी अर मंऐं हेरी तूह एऊ रोगा का नरोगी करी। ऐबै डेऊ शांती दी आपणैं घअरा लै तूह गई एऊ रोगा का छ़ुटी।" 49 ईशू त तैहा लै इहअ बोल्दअ ई लागअ द कि सभागृहे कारदारे घअरा का आअ समाद, "तेरी शोहरी गई मरी ऐबै निं प्रभू लै इधी एछणेंओ कष्ट दैई।" 50 ईशू दैनअ ऐहा गल्‍ला शूणीं तेऊ लै हैअ, "हैल़अ निं करी, तूह डाह सिधअ विश्वास, तै ज़ाणीं सह बच़ी।" 51 घअरै पुजी ईशू पतरास, जोहन्‍ना, याकब अर तैहा शोहरीए ईज-बाब छ़ाडी निं कोहै आप्पू संघै भितरा लै एछणैं दैनअ। 52 सोभ तै तैहा लै लेरदै-पकारदै लागै दै, पर ईशू बोलअ तिन्‍नां लै, "लेरा-पकारा निं लाआ, अह निं मूंईं आथी अह आसा सुत्ती दी।" 53 तिंयां लागै ऐहा गल्‍ला शूणीं हास्सदै कि अह ता मरी आसा गई दी। 54 पर ईशू ढाकअ तेसो हाथ संघा बोलअ ज़ोरै, "लान्हींऐ खल़ी उझ़ू।" 55 तैहा शोहरी फिरअ भिई शाह अर सह उझ़ुई खल़ी। ईशू बोलअ तिन्‍नां लै इहअ कि ऐहा लै दैआ किज़ै खाणां लै। 56 तेसे ईज-बाब बी हुऐ रहैन। पर ईशू डाहअ तिन्‍नां लै इहअ बोली कि अह ज़ुंण इधी हुअ, ऐहा गल्‍ला निं कोही का खोज़ी।