1 इज़राईलीए मिसर देशा का निखल़णें च़ार शौ अश्शी साला बाद गई ती सुलैमाना इज़राईला दी राज़अ बणी च़ौथी साल लागी अर बशाह पोर्ही लागअ सह बिधाते भबना च़िणदअ। 2 भितरा का बणाअं राज़ै सुलैमानै बिधाता लै भबन तिह हाथ लाम्मअ अर नौ हाथ बिरलअ अर मज़ल च़िणीं कोई तेर्हा हाथ उछ़टी। 3 भबना आजू डाही नौ हाथ लाम्मी खिटी। 4 भबना फेर-फिरदै पाऐ भित्ती दी तीरू आजू का घाटै भितरा बाखा बणाऐं तिंयां बिरलै। 5,6 भबना बागै पिछ़ू अर दोहरी भित्तीए नील़ै च़िणैं भढारा लै कमरै। तेथ पाई चअन मज़ला। थाल्‍ले मज़ल थिई पांज़ हाथ बिरली, मांझ़ली मज़ल थिई छ़ह हाथ बिरली अर सोभी का प्रैंधल़ी मज़ल थिई सात हाथ बिरली। थाल्‍ले मज़ले मेटा का च़िणअ मांझ़ली मज़लो मेट घाटअ अर मांझ़ली मज़ले मेटा का प्रैंधल़अ मेट त तेता का घाटअ ताकि काठे चाची पाणें ज़रुरत नां पल़े।

7 भबना च़िणने पात्थर तै पैहलै ई ठोल्‍लू-छ़िणीं करै च़कोर आणै दै बणाईं। तैही निं च़िणदी बारी ठोल्‍लू-छ़िणीं या किज़ू होरी लोहे ल्होखरे छ़ेल़ शुण्हदी ती।

8 हेठल़ी मज़ले भढारा लै थिई भबने दखण दिशा बाखा बात अर प्रैंधल़ी मज़ले भढारा लै बी थिई तिधी का शिहल़ लागी दी। 9 राज़ै सुलैमानै छ़ेक्‍कअ भबन बणाईं अर प्रैंदै ती तेथ केल़ुईए भ्रैहणी पाई दी अर तेता प्रैंदै त केल़ुईए बडी-बडी च़ाऊल़ीओ मेल़ पाअ द। 10 बाघली भित्तीए नील़ै बागा बाखा ज़ुंण भढारे कमरै थिऐ च़िणैं दै, तेते मज़ल ती पांज़ हाथ उछ़टी अर तिंयां ती भबने भित्ती दी केल़ुईए मटैहणूं करै ज़ोल़ै दै।

11 बिधाता बोलअ सुलैमाना लै इहअ, 12 "ज़ै तूह मेरअ बधान अर तेते सोभी बिधी मने। तै करनी मुंह सह करार पूरी ज़ुंण मंऐं तेरै बाब दाबेदा संघै किई ती। 13 तै रहणअ हुंह आपणीं परज़ा इज़राईली जैंदरी एऊ भबनै अर तिंयां निं मुंह कधि शोटी डाहणैं।"

14 इहअ करै छ़ेक्‍कअ सुलैमानै बिधाता लै भबन बणाईं।

15 भितरा बाखा महल़ी भबने भित्ती केल़ुईए काठा करै अर धरनीं पाअ कैलीए काठो मेल़। 16 भबना भितरी बणाईं सोभी का पिछ़ू खास पबित्र ज़ैगा। सह पांड बणाईं बिह हाथ च़कोर। तेता लै किऐ च़ऊ बाखा केल़ुईए फहल़ै खल़ै।✝ 17 पबित्र ज़ैगा आजू बच़ी च़ाल़्ही हाथ लाम्मी ज़ैगा। 18 पबित्र ज़ैगे पांड महल़ी भितरा का केल़ुईए काठा करै तेथ निं पात्थरे भीत धख ज़ेही बी शुझदी रही। तिन्‍नां भित्ती अर प्रैंदै लाऐ दै खील-फूले खेल़्तर।

19 भबना भितरी खास पबित्र ज़ैगा तैहा पांडा डाहअ बिधाते करारो मणशू। 20 खास पबित्र ज़ैगा ती लाम्मी, बिरली अर उछ़टी बिह-बिह हाथ अर सह पांड महल़ी सारै का च़ोखै सुन्‍नैं करै। तेता आजू बेदी फेर बी लाऐ केल़ुईए चकाठी।✝ 21 खास पबित्र ज़ैगे पांड महल़ी सुलैमानै भितरा बाखा च़ोखै सुन्‍नैं करै अर तेते प्रऊल़ी दी लाई सुन्‍नैं करै महल़ी दी शांघल़। 22 इहअ करै महल़ी भबने पबित्र ज़ैगा भितरा का पठी सुन्‍नैं करै अर पबित्र ज़ैगे बेदी बी महल़ी पठी सुन्‍नैं करै।

23 ✝तेखअ बणाऐं तिन्‍नैं जैतूने काठे दूई दस-दस हाथ लाम्मै करूब✝ नाओंए स्वर्ग दूत संघा डाहै तिंयां खास पबित्र ज़ैगा। 24-26 तिंयां दुहै करूब बणाऐं हेरनै एक्‍कै ज़िहै। दुही दी लाऐ दूई-दूई फैंख। फैंख तै पांज़-पांज़ हाथ लाम्मै। एकी फैंखे च़ुंडी का दुजै फैंखे च़ुंडी तैणीं हुऐ तिंयां दस हाथ लाम्मै। 27 तिंयां करूब डाहै भितरी खास पबित्र ज़ैगा पिछ़ू भित्ती नील़ै। एकीओ फैंख लागअ पार दैहणीं भित्ती दुजै करूबे फैंखै छ़ुंहीं बाऊंईं भीत अर पबित्र ज़ैगा मांझ़ा-मांझ़ी छ़ुंहीं एकी-दुजे फैंखे च़ुंडी। 28 तिंयां दुहै करूब बी महल़ै च़ोखै सुन्‍नैं करै।

29 भबने भित्ती दी पाई भितरी अर बागै करूब स्वर्ग दूत, खज़ूरे बूट, अर खील-फूले खेल़्तर। 30 खास पबित्र ज़ैगे पांड महल़ी धरनीं बी च़ोखै सुन्‍नैं करै।

31 खास पबित्र ज़ैगै प्रऊल़ी लै बणाऐं जैतूने काठे पाल्‍लै अर तेते चकाठी अर प्रैंदा का बणाअं द्रींड पांज़ा कूणींओ। 32 तेता लै ज़ोल़ी पाल्‍लै बी बणाऐं जैतूने काठे अर तेथ बी ती करूब स्वर्ग दूत, खज़ूरे बूट, अर खील-फूले खेल़्तर पाई दी अर तिंयां सोभै च़िज़ा ती सुन्‍नैं करै महल़ी दी। 33 भबने बाघली बडी प्रऊल़ी लै बी बणाऐं जैतूने काठे द्रींड अर ईंयां तै सोभै च़कोर। 34 तेता लै च़ार ज़ोल़ी पाल्‍लै बणाऐं कैलीए काठे। तिंयां पाल्‍लै बणाऐं ज़ोल़ी करै इहै कि घुआल़दा बारी हआ तै तिंयां पाल्‍लै दोछ़ै। 35 तिंयां बी महल़ै च़ोखै सुन्‍नैं करै अर तेथ बी थिई करूब स्वर्ग दूत, खज़ूरे बूट, अर खील-फूले खेल़्तर पाई दी।

36 पबित्र ज़ैगा आजूए खुल्ही ज़ैगा भित्तीए नील़ै च़िणीं चअन पात्थरे कूंणी च़की खिटी अर प्रैंदै लाऐ तेथ लाम्मै-लाम्मै केल़ुईए दार।

37 बिधाते भबने आथरी च़िणदै लागै तै सुलैमाने राज़ा दी च़ौथी साला बशाहै। 38 तिंयां मुक्‍कै सुलैमाने राज़ा दी गैर्हूई साला मकशीरै ज़िहअ तिंयां च़ाहा तै तिहअ भबन बणाईं। इहअ करै लागी तिन्‍नां तेता बणाणां लै सात साला।