1 राज़ै 15

यहूदा मुल्खै राज़ै अबियाहो राज़

1 इज़राईला दी थिअ नबातो शोहरू जरोबाम राज़अ, तेऊए राज़ा दी ठार्हुई साला बणअ यहूदा मुल्खै अबियाह राज़अ। 2 तेऊ किअ चिई साला तैणीं एरुशलेम नगरी दी राज़। तेऊए ईज ती अबशलोमे शोहरी माकाहा। 3 अबियाहै किअ आपणैं बाबा ई ज़िहअ पाप अर सह निं बिधाता लै तिहअ शुचअ-पाक्‍कअ रहअ ज़िहअ तेऊओ पल़दादू राज़अ दाबेद थिअ। 4,5 ✝15:4-5 1 राज़. 11:36; 2 शमू. 11:1-27राज़अ दाबेद करा त तिहअ ज़िहअ बिधाता च़ाहा त कि सह करे। हित्ती उरियाहे लाल़ी संघै पाप करनै का सुआई निं तेऊ आपणीं ज़िऊंदी ज़िता होर किछ़ै गलती किई। अबियाह थिअ दाबेदो पल़पोचअ, बिधाता डाही एरुशलेम नगरी बच़ाऊई अर बिधाता दैनअ अबियाह लै शोहरू कि सह तेऊ बाद राज़अ बणें। 6 रहबाम अर जरोबामा मांझ़ै एतरी साला ज़ुंण कबल्‍लअ झ़गल़अ रहअ सह रहअ आजू अबियाह ज़िऊंदी ज़िता बी तिहअ ई।✝15:6 2 इति. 13:3-21 7 ज़िहअ-ज़िहअ बी अबियाह राज़ै किअ, सह आसा यहूदा मुल्खै इतिहासे कताबा दी लिखी डाहअ द। अबियाह अर जरोबामे रहै सारी अमरा जुध लागी।

8 अबियाह मूंअ संघा डाहअ सह दाबेदपूर गहल़ै दाबी अर आजू बेठअ तेऊओ शोहरू आसाह यहूदा मुल्खै राज़अ।

यहूदा दी राज़ै आसाहो राज़

9 इज़राईला दी थिअ जरोबामो राज़ अर तेऊए राज़ा दी बिहुई साला बणअ आसाह यहूदा मुल्खो राज़अ अर 10 तेऊ किअ कताल़ी साला तैणीं एरुशलेम नगरी दी राज़। अबशलोमे शोहरी माकाहा थिई आसाहे पल़दादी। 11 आसाह किअ आपणैं दाद-बाब दाबेदा ई ज़िहअ काम ज़ेता करै बिधाता खुश हआ। 12 ज़ुंण देशै कंज़रै मर्ध अर बेटल़ी आसा, मुहुर्ती अर तेता पुजणें ज़ैगा बी किई तेऊ आपणैं देशा का खतम।✝15:12 2 इति. 15:8-15 13 आसाह राज़े पल़दादी माकाहा ज़ुंण अशेरा देबीए च़िल़्हखरी मुहुर्त बणाईं ती सह बी च़की तेऊ संघा डाही किद्रोन खागै दहई। माकाहा लै थिई राज़माते पदबी, सह बी निं तेऊ आजू लै डाही। 14 ज़ात पठी निं तेऊ देहुरै ढोल़ै आथी पर तज़ी बी रहअ आसाह आपणीं सारी ज़िन्दगी बिधाता लै शुचअ-पाक्‍कअ। 15 ज़ुंण सुन्‍नैं-च़ंदीए भांडै तेऊए बाबै अर ज़ुंण तेऊ आप्पू बिधाता लै थिऐ अर्पण किऐ दै, तिंयां डाहै तेऊ सोभै बिधाते भबनै।

16 यहूदा दी राज़अ आसाह अर इज़राईला दी थिअ राज़अ बाशा, इना दुही रहअ सारी अमरा जुध लागी। 17 एकी बारी छ़ेल़अ इज़राईले राज़ै बाशा यहूदा संघै जुध संघा किअ रामाह नगरी कबज़अ। तेऊ बणाअं तेथ फेर-फिरदअ गहल़ बागै डाहै आपणीं सैना संघा किअ यहूदा लै लोगै एछणअ डेऊणअ बंद। 18 राज़ै आसाह किअ इहअ कि बिधाते भबनै अर तेऊए मैहलै ज़ुंण सुन्‍नैं-च़ंदीए भांडै थिऐ रहै दै, तिंयां काढै तेऊ सोभ संघा दैनै आपणैं कार-करिंदे हाथै दमिश्क अराम देशे राज़ै बेन्हदादा सेटा, सह थिअ तब्रीमोनो शोहरू अर हेज़ियोनो पोचअ। संघा दैनअ तेऊ लै इहअ समाद, 19 "ज़िहअ म्हारै बाबो आप्पू मांझ़ै ज़ोल़-मेल़ थिअ, हाम्हां बी करनअ आजू तिहअ ई। ईंयां सुन्‍नैं-च़ंदीए भांडै दैनै मंऐं ताल्है भैंट। ऐबै एछ तूह मुंह संघै अर इज़राईले राज़ै बाशा संघै कर आपणीं करार खतम ताकि सह मेरी देशे ज़ैगा का आपणीं सैना संघी पोर्ही निखल़े।"

20 राज़ै बेन्हदादै किअ तिहअ ई ज़िहअ राज़ै आसाहै बोलअ अर तेऊ छ़ाडै आपणीं सैने दलपति संघा छ़ेल़अ कई इज़राईली नगरी दी जुध। तिन्‍नैं किअ इजोन, दान अबेल, अबेल-बेथ-माकाहा नगरी गलील समुंदरे मुल्खै कबज़अ अर नप्ताली गोत्रो सारअ देश बी ज़ितअ तिन्‍नैं। 21 ज़ांऊं राज़ै बाशा शूणअ कि इहअ हुअ, तेऊ पाई रामाह नगरी गहल़ा-कोटा बणाणें छ़ाड संघा डेऊअ तिर्सा नगरी लै फिरी।

22 तेखअ किअ आसाह राज़ै सारै यहूदा मुल्खै सोभी लै हुकम कि ज़ुंण बाशा राज़ै रामाह नगरी गहल़ा बणाणां लै काठ पात्थर तै लाऐ दै, तिन्‍नां च़का। संघा लाऐ तिंयां काठ पात्थर बिन्यामीन गोत्रे नगरी गिबा अर मिज़पा नगरी गहल़ा बणाणां लै।

23 आसाह राज़ै आपणैं राज़ा दी ज़ेतरै बी काम किऐ, ज़ेतरै जुध ज़ितै, ज़ेतरी नगरी भिई बसाऊई तिंयां आसा यहूदा मुल्खे इतिहासे कताबा दी लिखी डाही दी। ज़ांऊं सह प्रोढअ हुअ, तेऊ लागी खूरै बमारी। 24 राज़अ आसाह मूंअ संघा डाहअ सह दाबेदपूर गहल़ै दाबी अर आजू बेठअ तेऊओ शोहरू जहोशापात तेऊए ज़ैगा यहूदा मुल्खो राज़अ।

इज़राईला दी राज़अ नादाब

25 यहूदा थिअ आसाह राज़अ, तेऊए राज़ा दी दुजी साला बणअ जरोबामो शोहरू नादाब इज़राईल मुल्खो राज़अ अर तेऊ किअ बिहा साला तैणीं राज़। 26 ज़िहअ तेऊए बाबै पाप किअ, आजू किअ तेऊ बी तिहअ ई अर इज़राईली का बी कराऊअ तेऊ तिहअ ई पाप ज़ेता का बिधाता नफरत करा।

27,28 आहिजो शोहरू बाशा थिअ इस्साकार गोत्रा का, तेऊ बणाईं नादाब राज़ै मारना लै तरकीब। ज़ांऊं नादाब अर तेऊए सैना पलिश्तीए देशै गिबतोन नगरी संघै जुधा लै डेऊऐ, बाशा पाअ तिधी नादाब मारी। इहअ करै बणअ बाशा इज़राईल मुल्खो राज़अ। तधू ती यहूदा मुल्खै आसाहे राज़ा चिऊथी साल लागी दी। 29 राज़गाद्दी दी बेशदी लागअ बाशा जरोबामे खिंबा दी सोभी मारदअ। सह हुअ तिहअ ई ज़िहअ बिधाता आपणैं गूर शिलोहे आहिजे का पैहलै ई हेरअ त बोली। जरोबामे खिंबा दी पाए बाशा होछ़ै का प्रोढै तैणीं सोभ मर्ध मारी अर तेथ निं तेऊ एक बी ज़िऊंदअ छ़ाडअ।✝15:29 1 राज़. 14:10 30 इहअ हुअ तै कि जरोबामै ठैऊई बिधाता लै खास्सी रोश्शै, किल्हैकि तेऊ किअ पाप अर इज़राईली का बी कराऊअ तेऊ पाप।

31 ज़िहअ-ज़िहअ बी राज़ै नादाबै किअ, सह आसा इज़राईले इतिहासे कताबा दी लिखी डाहअ द। 32 यहूदा मुल्खै राज़ै आसाह अर इज़राईल मुल्खे राज़ै बाशा रहै आपणीं ज़िऊंदी ज़िता एकी-दुजै संघै जुधा ई करदै लागी।

इज़राईला दी राज़ै बाशो राज़

33 यहूदा दी थिअ आसाह राज़अ अर तेऊए राज़ा दी चिऊथी साला बणअ आहिजो शोहरू बाशा इज़राईला दी राज़अ। तेऊ किअ तिर्सा नगरी का इज़राईला प्रैंदै च़ौबी साला तैणीं राज़। 34 ज़िहअ तेऊए बाबै जरोबामै पाप किअ, बाशा बी किअ आजू तिहअ ई पाप अर इज़राईली का बी कराऊअ पाप ज़ेता का बिधाता नफरत करा।