1 राज़ै 12

उतरा बाखा बस्सै दै इज़राईलीओ द्रोह

1 रहबाम डेऊअ शकेम नगरी, तिधी त सोभी इज़राईली तेऊ राज़ै बणाणां लै झाल़अ किअ द। 2 नबातो शोहरू जरोबाम थिअ राज़ै सुलैमाने डरै ठुर्ही मिसर देशे राज़ै सेटा रहंदअ लागअ द। ज़ांऊं तेऊ का थोघ लागअ कि इहअ-इहअ हुअ, सह आअ मिसर देशा का फिरी। 3 पर उतरा बाखा बस्सै दै इज़राईली गोत्रै शादअ जरोबाम अर तेखअ डेऊऐ तिंयां जरोबामा संघा निंईं रहबामा सेटा। तिन्‍नैं बोलअ रहबामा लै, 4 "तेरै बाब राज़ै सुलैमानै डाहै हाम्हैं मारी-मारी कामां लाई अर कारै दैणैंओ बोझ़ बी पाअ हाम्हां लै बेघै खास्सअ। ज़ै तूह म्हारै एऊ बोझ़ा हल़कअ करे अर म्हारअ ज़िऊंणअ बी सान करे, तै आसा हाम्हैं मानदारी संघै तेरी च़ाकरी करना लै मज़ूर।"

5 रहबामै दैनअ ज़बाब, "मुंह दैआ सोठी लणैं, तम्हैं लोल़ी चिई धैल़ै बाद मुंह सेटा भिई आऐ, तेखअ खोज़ूं हुंह तम्हां का आपणअ ज़बाब।"

6 राज़ै रहबामै लई तिन्‍नां सैणैं-प्रोढै का सलाह ज़ुंण तेऊए बाब सुलैमाना संघै सारी अमरा रहै, "तम्हैं दैआ मुल्है ओर्ही सलाह कि हुंह परज़ा लै किज़ै ज़बाब दैंऊं?"

7 तिन्‍नैं दैनअ रहबामा लै ज़बाब, "ज़ै तूह इहअ च़ाहा कि परज़ा तेरी शुणें, तै कर तिन्‍नां संघै भली गल्‍ला अर तिन्‍नों बोझ़ हल़कअ करी कर तिन्‍नां खुश, तिहअ करै रहणैं तिंयां सदा तेरै गलाम।"

8 रहबामै किई सैणैं-प्रोढे सलाह शूणीं नां शूणीं अर सह डेऊअ तेखअ तिन्‍नां आपणीं सुआल़ीए खारकै मणछा का सलाह पुछ़दअ ज़ुंण तेऊ संघै होछ़ी उझै रहा तै। 9 रहबामै पुछ़अ तिन्‍नां का, "परज़ा बोला मुल्है तिन्‍नों बोझ़ हल़कअ करना लै, तम्हैं मुल्है एते बारै किज़ै सलाह दैआ कि हुंह किज़ै करूं?"

10 तिन्‍नैं दैनअ तेऊ लै ज़बाब, "तूह बोलै तिन्‍नां लै इहअ, ‘मेरी कान्हीं गुंठी आसा मेरै बाबै कुछी का बी मोट्टी, ज़ै तम्हां मेरै बाबो खास्सअ बोझ़ समझ़ा, तै लागा आजू तम्हैं भाल़ै कि मुंह किज़ै करनअ!’ 11 तिन्‍नां लै बोलै, ‘मेरै बाबै पाअ तम्हां लै खास्सअ बोझ़, मुंह पाणअ तम्हां लै तेता का बी खास्सअ। तेऊ च़िक्‍कै तम्हैं कोल़ै करै, मुंह क्रिंज़णै तम्हैं लोहे तिछै बिंच़ू करै।’"

12 ज़ेही गल्‍ल हुई ती, तिहै ई गऐ चिऐ धैल़ै बाद जरोबाम अर होर इज़राईली राज़ै रहबामा सेटा पुजी। 13 राज़ै रहबामै निं सैणैं-प्रोढे सलाह दी धैन दैनअ अर तेऊ दैनअ तिन्‍नां लै काठअ ज़बाब, 14 ज़ेही तेऊ लै खारकै मणछै सलाह दैनी तेऊ दैनअ परज़ा लै तिहअ ई ज़बाब, "मेरै बाबै पाअ तम्हां लै खास्सअ बोझ़, पर मुंह पाणअ तम्हां लै तेता का बी खास्सअ। तेऊ च़िक्‍कै तम्हैं कोल़ै करै, मुंह क्रिंज़णै तम्हैं लोहे तिछै बिंच़ू करै!" 15 राज़ै रहबामै निं परज़े गल्‍ल मनी अर इहअ करै किई बिधाता सह गल्‍ल पूरी ज़ुंण शिलोह नगरीए आहिजा गूरै नबाते शोहरू जरोबामा का बोली ती।✝12:15 2 शमू. 20:1

16 ज़ांऊं सोभी इज़राईली का ज़ाण्हुंअ कि राज़अ निस्सअ तिन्‍नें एक बी गल्‍ल शूणीं, तिंयां लागै बोल्दै, "ईशैईए शोहरू दाबेद अर तेऊए खिंबा का हआ ज़ुदै! इनै हाम्हां लै आझ़ तैणीं किअ किज़ै? इज़राईलीओ, आपणैं-आपणैं घअरा लै च़ाल्‍ला! रहबाम करो ऐबै आपणैं लोगा प्रैंदै राज़!"✝12:16 2 शमू. 20:1

इहअ करै किअ इज़राईली रहबामा लै द्रोह, 17 रहबाम डाहअ तिन्‍नैं सिधअ तिन्‍नां मणछा प्रैंदै राज़अ ज़ुंण यहूदा मुल्खै रहा तै।

18 तेखअ छ़ाडअ राज़ै रहबामै अदोराम ज़ुंण सोभी बेठू प्रैंदै सैणअ आसा कि इज़राईली संघै गल्‍ला करे। पर तिन्‍नैं दैनअ तेऊ लै पात्थरो ढो संघा पाअ सह मारी। तेखअ ठुर्हअ रहबाम छ़ेक्‍कै-छ़ेक्‍कै आपणैं रथा प्रैंदै बेशी एरुशलेम नगरी लै। 19 इहअ करै हुऐ उतरा बाखा बस्सै दै इज़राईली दखणा बाखा यहूदा बस्सै दै राज़ै दाबेदे खिंबा का दूर अर तिंयां आसा आझ़ तैणीं बी इहै ई।

20 ज़ांऊं सोभी इज़राईली का थोघ लागअ कि जरोबाम आसा गअ द मिसर देशा का फिरी एछी, तिन्‍नैं किअ बडअ झाल़अ संघा तेथ शादअ सह बी तेखअ बणाअं तिन्‍नैं इज़राईलीओ राज़अ। राज़ै दाबेदे आद-लुआदा संघै रहै सिधै यहूदा गोत्रे लोग।

शमयाह गूरै खोज़अ बिधातो समाद

21 ज़ांऊं सुलैमानो शोहरू राज़अ रहबाम एरुशलेम पुजअ, तेऊ झाल़ै यहूदा अर बिन्यामीन गोत्रा का एक लाख अश्शी हज़ार सपाही ज़ुंण सोभी का राम्बल़ै जोधै थिऐ। तेऊओ मतलब थिअ इहअ कि उतरा बाखे इज़राईली संघै छ़ेल़णअ तेऊ जुध संघा करनै तिंयां सोभ इज़राईली आपणैं काबू। 22 पर बिधाता बोलअ आपणैं गूर शमयाह लै इहअ, 23 "तूह दै राज़ै रहबाम अर यहूदा अर बिन्यामीन सोभी गोत्रे लोगा लै इहअ समाद, 24 ‘तम्हैं निं आपणैं ई सक्‍कै भाई-बंधा संघै जुधा करदै लागी। तम्हैं डेओआ सोभ आपणैं घअरा लै, सह आसा हुंह बिधाता आप्पै ज़ुंणीं इहअ दैनअ हणैं।’" रहबाम अर तेऊए सारी सैना शूणअ तिहअ ई ज़िहअ बिधाता बोलअ संघा डेऊऐ तिंयां आपणैं घअरा लै फिरी।

जरोबाम बी पेठअ बिधाता छ़ाडी कबाता

25 इज़राईलीओ राज़अ हुअ ऐबै जरोबाम अर तेऊ बणाअं एप्रैम धारा बाखे मुल्खै शकेम नगरी फेर गहल़ संघा रहअ थोल़ै धैल़ै तिधी। तेखअ डेऊअ सह तिधा का पनीएल नगरी संघा किई सह नगरी फेर गहल़ च़िणीं पाक्‍की। 26,27 जरोबाम सोठा त इहअ, "सोभ इज़राईली डेओआ आझ़ बी बिधाता सेटा बल़ीदान करना लै एरुशलेम नगरी। हई सका कि तिंयां भिई राज़ै दाबेदे खिंबा बाखा लै फिरे! तेखअ सका तिंयां मुंह मारी अर यहूदो राज़अ रहबाम बणाणअं तिन्‍नां भिई आपणअ राज़अ!"

28 राज़ै जरोबामै लई होरी का बी सलाह संघा बणाईं सुन्‍नें बडी-बडी दूई बाछ़ूए मुहुर्ती संघा बोलअ आपणीं परज़ा लै, "तम्हां लागा बिधाता पूज़दै एरुशलेम नगरी पुजणअ ज़ुंण इधा का खास्सी दूर आसा। इज़राईलीओ, इधी भाल़ा, ईंयां आसा थारै आपणैं देअ ज़ुंणीं तम्हैं मिसर देशा का आसा काढी आणै दै!"✝12:28 लुआ. 32:4 29 एक सुन्‍नेंओ बाछ़ू डाहअ तेऊ बेतेल अर दुजअ डाहअ तेऊ दान स्तापी। 30 इहअ करै लागै इज़राईली घोर पाप करदै अर तिंयां लागै बेतेल अर दान माथै टेक्‍कदै डेऊंदै! 31 जरोबामै डाहै उझै उछ़टी धारा प्रैंदै बी कई देहुरै च़िणीं संघा डाहै तेथ लेबी गोत्रा मांझ़ा का पज़ैरै।

बेतेल डाही मकशीरे भिन्‍नैं जाचा

32 तेखअ डाही जरोबामै पंद्रा मकशीरै बेतेल आपणीं जाच ज़ेही यहूदा मुल्खै एरुशलेम हआ ती। ज़ुंण तेऊ तिधी बाछ़ूए मुहुर्ती बणाईं, तेता आजू बेदी दी किअ तेऊ बल़ीदान। संघा डाहअ बेतेल बी एक प्रोहत तिन्‍नां प्रोहता मांझ़ै ज़ुंण धारा प्रैंदै देहुरै दी पज़ैरै हआ तै डाहै दै।✝12:32 लेब. 23:33,34 33 पंद्रा मकशीरै किअ जरोबामै आपणीं बणाईं दी बाछ़ूए मुहुर्ती सेटा बेदी दी बल़ीदान। संघा डाही सोभी इज़राईली लै हर साल तिधी जाच।