1 ज़ांऊं चिई साला तैणीं सरग निं हुअ, तेखअ बोलअ खास्सै धैल़ै बाद बिधाता एलियाह लै, "तूह डेऊ, संघा प्रघल़ू राज़ै अहाबा सेटा। तेखअ बर्शाऊं हुंह सरग।" 2 एलियाह डेऊअ अहाब राज़ै सेटा लै।

सामरी थिअ घोर नकाल़ पल़अ द। 3 अहाब राज़ै शादअ ओबेदियो, सह थिअ तिन्‍नां धैल़ै राज़े मैहलो बज़ीर। पर दिला का रहा त सह बिधाते डरा हेठै इधी तैणीं कि 4 ज़धू जज़बेल बिधाते सोभी गूरा मारदी ती लागी दी, ओबेदियो डाहै तै तैहा का कोई शौ गूर पज़ाह-पज़ाहे छ़ुंढा दी जुहल़ी च़ोरी संघा किई तिन्‍नां लै च़ुप्प-च़ुप्पै रोटी-पाणीं दैई। 5 अहाब राज़ै बोलअ ओबेदियो लै, "हाम्हां हुअ आपणैं घोल़ै-खच़रा लै घाह-पाच लोल़णअ, नांईं ता लागणै हाम्हां ईंयां पशू मारनै। हाम्हां एछणअ सारै देशै भाल़ी कि किधी गाडा-नाल़ी नेल़ पाणींए बाढै घाह-पाच बी आसा।" 6 तिन्‍नैं बांडअ सारअ देश आधअ-आधअ, आधै देशै डेऊअ अहाब अर आधै देशै डेऊअ ओबेदियो आपणैं आदमी संघा निंईं लोल़ै भाल़ै। 7 ओबेदियो भेटअ बाता एलियाह गूर अर तेऊ हेरअ सह बछ़ैणीं संघा टेक्‍कअ धरनीं उटअ पल़ी तेऊ सेटा माथअ, तेखअ बोलअ इहअ, "मेरै मालक, तूह ई आसा भाल़ी?"

8 एलियाह बोलअ, "हाँ, हुंह आसा एलियाह, तूह डेऊ संघा बोल आपणैं मालक राज़ै अहाबा लै कि हुंह आसा इधी।"

9 ओबेदियो बोलअ, "ऐबै मेरअ किज़ै कशूर आसा? ज़ै हुंह अहाब राज़ै सेटा डेऊई इहअ खोज़ूं, सह सका मुंह मारी बी! 10 मेरै मालक, तेरअ परमेशर बिधाता ज़ुंण सदा ज़िऊंदअ आसा, हुंह खाआ तेऊए सोह कि राज़ै अहाबै आसा देशै-देशै ताह लोल़ै छ़ाडै दै। ज़ांऊं तूह किधी निं भेटअ, तेऊ बझ़ैल़ै तिन्‍नां देशा-देशे राज़ै का बी सोह खाणैं कि तूह निं तिन्‍नां किधी भेटअ आथी। 11 ऐबै बोला तूह मुल्है इहअ, ‘तूह डेऊ संघा बोल आपणैं मालक राज़ै अहाबा लै कि हुंह आसा इधी!’ 12 एतो कै थोघ आसा कि मेरै इधा का डेऊंदी बिधाते आत्मां ताह हेरा-हेरी किधी एही ज़ैगा पजैल़े ज़ेतो कहा का थोघ ई निं हंदअ! तेखअ ज़ांऊं मुंह अहाब राज़ै का इहअ खोज़णअ कि तूह आसा इधी अर तेऊ निं तूह इधी भेटणअ अर हुंह पाणअ तेऊ मारी ई! ऐहा गल्‍ला बी कर आद कि हुंह तेरअ दास मना होछ़ी उझै बिधाता ई। 13 मेरै मालक, तंऐं ईंयां गल्‍ला निं शूणीं कि ज़धू जज़बेल बिधाते गूरा मारदी ती लागी दी, तधू डाहै तै मंऐं कोई शौ गूर पज़ाह-पज़ाहे छ़ुंढा दी तैहा डरै जुहल़ी च़ोरी संघा करा त हुंह तिन्‍नां लै च़ुप्प-च़ुप्पै रोटी-पाणीं दैई? 14 तै केऊ साबै बोला तूह मुल्है, ‘तूह डेऊ संघा बोल आपणैं मालक राज़ै अहाबा लै कि हुंह आसा इधी।’ तेऊ पाणअ हुंह मारी।"

15 एलियाह दैनअ ओबेदियो लै ज़बाब, "स्वर्गे सारी सैने मालक बिधाता ज़ुंण सदा ज़िऊंदअ आसा, हुंह करा तेऊए च़ाकरी। हुंह खाआ तेऊए सोह कि आझ़ प्रघल़णअ मुंह राज़ै सेटा ज़रूर।"

16 ओबेदियो डेऊअ अहाब राज़ै सेटा संघा खोज़ी पठी गल्‍ला। तेखअ आअ अहाब एलियाह सेटा लै मिलदअ। 17 ज़ांऊं अहाब राज़ै एलियाह भाल़अ, तेऊ बोलअ, "आछ़ा, तूह आसा इधी भाल़ी, तूह इज़राईला लै आफ़त पाणै आल़अ!" 18 एलियाह दैनअ अहाबा लै ज़बाब, "इज़राईला लै आफ़त पाणै आल़अ निं हुंह आथी, सह आसा तूह अर तेरअ बाब, तिंयां डेऊऐ तम्हैं भाल़ बिधाता छ़ाडी बाल देअए मुहुर्ती पूज़दै। 19 ऐबै कर सोभी इज़राईली लै हुकम संघा एछा मुंह सेटा कर्मेल धारा प्रैंदै। तिन्‍नां संघै आणै च़ार शौ पज़ाह गूर बाल देअए अर च़ार शौ गूर अशेरा देबीए ज़सरअ साथ जज़बेल राणीं दैआ।" 20 अहाब राज़ै शादै सोभ इज़राईली अर बाल देअ अर अशेरा देबीए गूर कर्मेल धारा लै संघा किअ तिन्‍नैं सोभी तिधी झाल़अ। 21 एलियाह डेऊअ लोगा सेटा लै संघा बोलअ इहअ, "तम्हां कधू तैणीं रहणअ दुही बाता? ज़ै परमेशर बिधाता आसा, तै पूज़ा तेऊ! ज़ै बाल देअ आसा परमेशर, तै पूज़ा तम्हैं तेऊ! 22 हुंह आसा बिधाते गूरा मांझ़ै एक्‍कै बच़अ द, पर बाल देअए आसा इधी च़ार शौ पज़ाह गूर! 23 तम्हैं आणा इधी दूई बल्द। एक दैआ बाल देअए गूरा लै, तेखअ करा तेऊ बल़ीदान संघा डाहा तेतो मास्स बेदीए झ़ुका प्रैंदै पर आग निं तेथ चैल़ी। बल़ीदाना लै ज़ुंण पशू मेरअ हणअ, हुंह बी करूं तिहअ ई अर हुंह बी निं तेथ आग चैल़दअ। 24 बाल देअए गूर करै आपणैं देअआ सेटा अरज़ अर हुंह करूं बिधाता सेटा। तेखअ ज़ुंण सरगा का आग शोटी ज़बाब दैए सह ई हणअ असली परमेशर।"

सोभी लोगै बोलअ, "हाँ, ठीक आ, इहअ करा तै।"

25 तेखअ बोलअ एलियाह बाल देअए सोभी गूरा लै, "तम्हैं आसा खास्सै, तम्हैं छ़ांटा आप्पू लै बाछ़ू संघा करा हूम करना लै बल़ी तैर। तेखअ लआ तम्हैं आपणैं देअआ का अरज़ करी, पर बेदी दी आग निं चैल़ी आथी।"

26 लोगै आणअ एक बाछ़ू संघा दैनअ बाल देअए गूरा लै। तिन्‍नैं डाहअ सह बेदी प्रैंदै बल़ीदान करी, तेखअ रहै दोत्ता पोर्ही दपहरै तैणीं आपणैं बाल देअआ का अरज़ करदै लागी। तिंयां थिऐ ज़ोरै-ज़ोरै एही अरज़ करदै लागै दै, "हे बाल देअआ, म्हारी अरज़ शुण! म्हारी शुण!" संघा रहै मिट्टदै-छ़ेर्हदै अर बेदी फेर फेरी दैंदै लागी ज़ुंण तिन्‍नैं बणाईं ती। पर तिन्‍नां निं किछ़ ज़बाब भेटअ।

27 दपहरै लागअ बिधातो गूर एलियाह इहअ बोली तिन्‍नें सुहांगा करदअ, "होर ज़ोरै-ज़ोरै पाआ लैल़ा! सह आसा थारअ देअ! झ़ाणीं सह किधी आपणैं धैनै होए बेठअ द, कि किधा लै डेऊअ द होए! हई सका कि सह निंजा होए सुत्तअ द! तम्हां हुअ सह खल़अ झ़ैऊंणअ!" 28 बाल देअए गूर लागै ज़ोरै-ज़ोरै अरज़ करदै संघा लागै तिन्‍नें रबाज़े साबै आपणीं घेरी छ़ूरी-बर्छ़ै करै च़िरै दैंदै कि तिन्‍नें घेरी का लागी लोधल़े छेरा! 29 तिंयां रहै दपहरा बाद बी खास्सी घल़ी तिहै ई मिट्टदै-छ़ेर्हदै लागी पर तिन्‍नां निं किछ़ै ज़बाब भेटअ! होर ता होर तिन्‍नें देअआ बाखा निं धख ज़ेही छ़ेल़-छ़ुणक बी हुई!

30 तेखअ बोलअ एलियाह खिरी लोगा लै, "तम्हैं एछा ओर्ही मुंह नेल़।" लोगै किअ तेऊ फेर झाल़अ। तेखअ लागअ एलियाह बिधाते तैहा पराणीं बेदी भिई च़िणदअ ज़ुंण ढोल़ी दी थिई। 31 एलियाह छ़ांटै इज़राईले बारा गोत्रे साबै बेदी च़िणणा लै बारा पात्थर। बिधातो त इहअ समाद याकबा सेटा पुजी गअ द, "तेरअ नाअं हणअ इज़राईल।"✝ 32 तिन्‍नां पात्थरा करै बणाईं तेऊ बिधाते नाओंऐं एक बेदी। तेथ फेर खण्हीं तेऊ डुघी खाल़्ही ज़ेथ खास्सअ पाणीं एछी सके। 33 तेखअ सज़ाऊई तेऊ बेदी प्रैंदै झ़ुका, बाछ़ू बल़ीदान करी किऐ तेते ठोर-ठोर संघा डाहअ तेतो सह मास्स बेदीए तिन्‍नां झ़ुका प्रैंदै। तेखअ बोलअ तेऊ लोगा लै, "च़ार घल़ै आणा पाणींए संघा तरैल़ा तिन्‍नां बेदी हूम बल़ी अर झ़ुका प्रैंदै।" 34 तेखअ बोलअ एलियाह, "भिई तरैल़ा एथ प्रैंदै च़ार घल़ै पाणींए।" लोगै किअ तिहअ ई। तेखअ बोलअ एलियाह, "होर आणा च़ार घल़ै पाणींए संघा तरैल़ा बेदी प्रैंदै।" चिऊथी बारी बी किअ तिन्‍नैं तिहअ ई।

35 सह पाणीं पल़अ बेदी प्रैंदै एतरअ कि बेदी फेर फिरदी ज़ुंण खाल़्ही कोती ती, सह हुई पाणीं करै भरी।

36 सह थिई उडै बिधाता लै बल़ीदान करने बेल, एलियाह गूर डेऊअ बेदी सेटा संघा किई बिधाता का एही अरज़, "हे आबराम, इसहाक अर याकबे परमेशर बिधाता! आझ़ लोल़ी अह गल्‍ल सोभी का शुझुई कि इज़राईलो परमेशर आसा तूह ई अर हुंह आसा तेरअ दास अर सोभी का लोल़ी थोघ लागअ कि ज़ुंण मंऐं किअ, तेता करना लै त मुल्है तंऐं हुकम किअ द। 37 हे बिधाता, तूह शुण मेरी अरज़ संघा दै एतो ज़बाब, ताकि इधी सोभी लोगा का थोघ लागे कि तूह ई आसा परमेशर अर तंऐं शादै ईंयां भिई आप्पू लै बापस।"

38 हेरा-हेरी शोटी बिधाता सरगा का आग अर हूम बल़ीदान किऐ दै मास्सो, झ़ुका अर बेदीए पात्थरा संघी हुअ धरनीं छ़ार अर बेदी फेर पाणीं शुक्‍कअ पठी। 39 ज़ांऊं तिधी लोगै इहअ च़मत्कार आपणीं आछी भाल़अ, तिन्‍नैं टेक्‍कअ धरनीं उटै पल़ी माथअ संघा लागै इहअ बोल्दै, "बिधाता आसा परमेशर, सिधअ बिधाता ई आसा परमेशर!"

40 तेखअ किअ एलियाह गूरै हुकम, "इना बाल देअए गूरा ढाका सोभी, ईंयां निं इधा का ठुर्है लोल़ी!" लोगै ढाकै तिंयां सोभ अर एलियाह निंयैं तिंयां उंधै किशोन गाडा लै संघा पाऐ तिधी सोभ मारी।

41 तेखअ बोलअ एलियाह अहाब राज़ै लै, "ऐबै डेऊ संघा खा-पिई। मुखा शुण्हिंआं इहअ कि पाणींओ हर्हल-खर्हल च़ाल्‍लअ रिंगी।"

42 ✝ज़ांऊं अहाब राज़अ खांदअ-पिंदअ डेऊअ, एलियाह उखल़अ कर्मेल धारे च़ुंडी लै संघा पल़अ धरनीं उटी बाखा, आपणअ मूंड किअ तेऊ उंधै ज़ान्हूं जैंदरी उटअ, 43 तेखअ बोलअ तेऊ आपणैं दासा लै, "उझै निखल़ आजू ज़िहअ संघा भाल़ समुंदरा बाखा।" सह दास उखल़अ उझै आजू ज़िहअ समुंदरा बाखा भाल़अ संघा बोलअ, "एथ निं मुखा किछ़ शुझदअ।" एलियाह बोलअ तेऊ लै, "भिई डेऊ साता बारी भाल़।" 44 सातुई बारी ज़ांऊं सह दास बापस फिरअ, तेऊ बोलअ एलियाह लै, "मुखा शुझिआ मणछे हाथा ज़िहअ धख ज़िहअ बादल़।"

एलियाह बोलअ, "तूह डेऊ अहाब राज़ै सेटा लै संघा बोल तेऊ लै, ‘आपणअ रथ ज़ुंडी होथ सरग हणैं का आजी उंधै, नांईं ता तूह शाचणअ एतै।’"

45 तेतरी गऐ हेरा-हेरी सरगै काल़ै घणैं बादल़ घोर्हुई अर ढिश-बागरी आणै झ़ैऊई अर सरगा का लागअ लोदल़-छ़ोदल़ पाणीं। अहाब राज़अ डेऊअ आपणैं रथा दी शुंआर हई जज्रेल खागा लै। 46 बिधाता दैनअ एलियाह लै इहअ बल कि सह ठुर्हअ अहाब राज़े रथा आजू-आजू जज्रेल खागै तैणीं ज़ांघा हांढी।