1 राज़ै 13

एकी मणछै किअ बेतेल बेदीओ बरोध

1,2 ✝ 13:1-2 2 राज़. 23:15,16 एकी धैल़ै त जरोबाम बेतेल नगरी तैहा बेदी सेटा भैंट च़ढाऊंणा लै खल़्हुअ द। तिधी आअ नच़ानक यहूदा का एक परमेशरो मणछ संघा लागअ ज़ोरै इहअ बोल्दअ, "बिधाता आसा मुखा ऐहा बेदीए बारै समाद दैनअ द कि दाबेदे खिंबा दी हणअ आजू एक जोशिया नाओं शोहरू। तेऊ करनै ऐहा बेदी दी तिंयां प्रोहत बल़ीदान ज़ुंण इधी बल़ीदान करा। ऐहा बेदी दी हणअ मणछे हाडकेओ हूम।" 3 तेखअ बोलअ आजू तेऊ मणछै इहअ, "अह बेदी धुआशणीं दूई बाखा लै अर एथ भितरो छ़ार छिंघणअ धरनीं। तेखअ लागणअ तम्हां का थोघ कि मुंह बाती इना गल्‍ला करनै आल़अ आसा बिधाता आप्पै।"

4 ज़ांऊं राज़ै जरोबामै इहअ शूणअ, तेऊ बोलअ तेऊ परमेशरे मणछा बाखा गुंठी करी ज़ोरै इहअ, ज़ुंणी बेतेले तैहा बेदीए बारै हाक्‍का पाई बोलअ त, "ढाका एऊ!" एतरअ दै जरोबामा बोल़णैं कि तेऊओ हाथ मछैंअ तिधी अर तेऊए बाह हुई ल़ेल़ी कि सह निं तेता पिछ़ू बी करी सकअ। 5 सह बेदी बी धुआशुई हेरा-हेरी दूई बाखा लै अर तेतो छ़ार छिंघूअ तिधी धरनीं। ज़िहअ तेऊ मणछै बिधाते नाओंऐं बोलअ त सह हुअ तिहअ ई पूरअ। 6 तेखअ बोलअ राज़ै जरोबामै तेऊ मणछा लै, "ज़ीबाण, तूह कर बिधाता सेटा मुल्है अरज़ कि सह मेरी बाह नरोगी करे।"

तेऊ मणछै किई बिधाता सेटा अरज़ अर राज़े बाह हुई तेभी नरोगी। 7 तेखअ बोलअ राज़ै जरोबामै बिधाते तेऊ मणछा लै, "तूह च़ाल्‍ल मुंह संघै संघा लअ धख खाई पिई। हुंह च़ाहा ताल्है तेरै एऊ कामां लै नांम बी दैणीं।"

8 परमेशरे तेऊ मणछै दैनअ ज़बाब, "ज़ै तूह मुल्है आपणअ आधअ राज़ बी दैए, हुंह निं तैबी बी ताह संघै डेऊई किज़ै खांदअ पिंदअ आथी। 9 बिधाता आसा मुल्है हुकम किअ द। तेऊ बोलअ इहअ कि नां खाई, नां पिई अर नां तैहा बाता घअरा लै फिरी डेऊई ज़हा बाता हुंह आअ।" 10 तेखअ निं सह मणछ तैहा बाता बापस डेऊअ ज़हा बाता सह बेतेल आअ त, पर सह डेऊअ होरी बाता।

बेतेल एक प्रोढअ गूर

11 तधू काल्‍ला रहा त बेतेल एक प्रोढअ गूर। तेऊए शोहरू खोज़ी तेऊ का तिंयां सारी गल्‍ला कि यहूदा का आऐ दै बिधाते एकी मणछै राज़े बारै किज़ै बोलअ अर किज़ै किअ। 12 तेऊ प्रोढै गूरै पुछ़अ, "यहूदा का आअ द सह परमेशरो मणछ कहा बाता डेऊअ?" तिन्‍नैं खोज़अ तेऊ का कि ऐहा बाता डेऊअ किल्हैकि तिन्‍नैं हेरअ त सह डेऊंदअ भाल़ी। 13 तेऊ प्रोढै गूरै बोलअ आपणैं शोहरू लै, "मुल्है करा ज़ीन-काठी लाई गाधे शुंआरी तैर।"

तिन्‍नैं किअ तिहअ ई संघा डेऊअ सह गाधै प्रैंदै बेशी 14 तैहा बाता यहूदा का आऐ दै तेऊ मणछा पिछ़ू लोल़अ। बाता भेटअ तेऊ प्रोढै गूरा सह परमेशरो मणछ बडै महरूए बूटा हेठै बेठअ द, तेऊ पुछ़अ, "यहूदा का आअ द परमेशरो मणछ तूह ई आसा?"

तेऊ बोलअ, "हाँ, हुंह ई आसा।"

15 प्रोढै गूरै बोलअ, "तूह च़ाल्‍ल मेरै घअरा लै संघा लअ रोटी खाई।"

16 पर यहूदा का आऐ दै गूरै बोलअ, "हुंह निं तेरै घअरा लै एछी सकदअ अर नां ताह संघै फिरी डेऊंदअ, नां ऐहा ज़ैगा रोटी खांदअ नां हुंह पाणीं झुटदअ, 17 किल्हैकि बिधाता आसा मुल्है हुकम किअ द। तेऊ बोलअ इहअ कि नां किज़ै खाई नां पाणीं झुटी अर नां तैहा बाता घअरा लै फिरी डेऊई ज़हा बाता तूह आअ त।"

18 तेखअ बोलअ बेतेले तेऊ प्रोढै गूरै, "हुंबी आसा ताह ई ज़िहअ गूर, बिधाते एकी स्वर्ग दूतै बोलअ मुल्है ताह आपणैं घअरा लै निंणां लै अर मुल्है कि हुंह ताल्है रोटी खैऊए अर ताल्है झुटणा लै पाणीं दैए।" यहूदा का आऐ दै बिधाते गूरै निं ज़ाणअ कि बेतेलो सह प्रोढअ गूर आसा झ़ुठअ बोल्दअ लागअ द! 19 तेखअ डेऊअ सह तेऊ प्रोढै गूरे घअरा लै संघा खाई तिधी रोटी अर पाणीं बी झुटअ। 20 ज़ांऊं तिंयां रोटी खांदै तै बेठै दै, बिधाता बोलअ तेऊ प्रोढै गूरा का, 21 संघा बोलअ बेतेले तेऊ प्रोढै गूरै ज़ोरै-ज़ोरै यहूदा का आऐ दै गूरा लै, "बिधाता बोला ताल्है इहअ, ‘तंऐं निं मेरअ हुकम मनअ! तंऐं निं ज़िहअ मंऐं बोलअ तिहअ किअ! 22 ज़िधा लै मंऐं नांह किअ थिअ, तूह फिरअ तिधा ई लै संघा लागअ तिधी खांदअ पिंदअ! एता पिछ़ू पाणअ तूह मारी अर तेरी ल्हास निं तिधी डाहणीं ज़िधी तेरै दाद-बाब डाहै।’"

23 ज़ांऊं तिंयां खाई-पिई मुक्‍कै, तेऊ प्रोढै गूरै किअ यहूदा का आऐ दै गूरा लै ज़ीन काठी लाई गाधअ तैर। 24 तेखअ लागअ यहूदा का आअ द गूर हांढदअ। बाता भेटअ तेऊ सिह अर तेऊ पाअ सह मारी। तेऊओ गाधअ अर सिह रहै दुहै तेऊए ल्हासा सेटा तिधी खल़्हुई। 25 तैहा बाता डेऊऐ नगरीए कई लोग अर तिन्‍नैं भाल़ी ल्हास अर सिह भाल़अ तिधी खल़्हुअ द। तिंयां डेऊऐ बेतेल ठुर्ही ज़िहअ तिन्‍नैं भाल़अ, सह खोज़अ सोभी का ज़िधी सह प्रोढअ गूर रहा त।

26 ज़ांऊं बेतेल नगरीए तेऊ प्रोढै गूरा का इहअ थोघ लागअ, तेऊ बोलअ, "अह हणअ बिधातो सह ई गूर ज़ुंणीं बिधातो हुकम चोल़अ! तैही छ़ाडअ बिधाता सिह संघा पाअ सह मारी, ज़िहअ बिधाता बोलअ त तिहअ ई।" 27 तेखअ बोलअ तेऊ आपणैं शोहरू लै, "मेरै गाधै दी लाआ ज़ीन काठी।" तिन्‍नैं किअ तिहअ ई, 28 तेखअ डेऊअ सह तैहा बाता अर बाता भेटी तेऊ यहूदा का आऐ दै गूरे ल्हास अर तेऊओ गाधअ अर सिह भाल़ै तिधी खल़्हुऐ दै, किल्हैकि नां तिन्‍नैं सिहै सह ल्हास खाई अर नां तिन्‍नां गाधै लै पल़ै चुटी। 29 तेऊ प्रोढै गूरै च़की बिधाते गूरे सह ल्हास संघा पाई गाधै प्रैंदै तेखअ पजैल़ी सह बापस बेतेल नगरी संघा डाही तिधी दाबी। 30 तेऊ डाही सह ल्हास तेऊ प्रोढै गूरै आपणैं दादा-बाबे ल्हासा दाबणे ज़ैगा दाबी। तेऊए शोहरू मनाऊंअ तेऊ लै एही लेरा लाई शोग, "ओ मेरै भाईआ, मेरै भाईआ, तूह किधी डेऊअ!" 31 ज़ांऊं तेऊ प्रोढै गूरै तेऊए ल्हास दाबी छ़ेक्‍की, तेखअ बोलअ तेऊ आपणैं शोहरू लै, "ज़ेभै हुंह मरे, तेभै डाहै मुंह बी ऐहा ई ज़ैगा एऊ बिधाते गूरे काछ़ा बाखा दाबी। 32 मुंह आसा पूरअ भरोस्सअ कि ज़ुंण बिधाते एऊ गूरै बेतेल बेदी अर सामरी नगरीए धारा प्रैंदे सोभी देहुरे बारै बोलअ थिअ, सह हणअ पाक्‍कै दी पूरअ।"

जरोबाम पल़अ घोर पापा दी

33 इज़राईलो राज़अ जरोबाम निं पाप करनै का पिछ़ू हटअ। तेऊ डाहै तिन्‍नां उछ़टी धारा बेदी अर देहुरै दी लेबी गोत्रा छ़ाडी होर बी कज़ोहै प्रोहत बणाईं। ज़ुंण बी प्रोहत बणनअ च़ाहा त, तेऊओ करा त सह संस्कार संघा डाहा त तिन्‍नां प्रोहत बशैल़ी। 34 अह इहअ करनअ हुअ जरोबामे सारी खिंबा लै घोर पाप अर एता ई करै हुअ खिरी सह आपणैं राज़-पाठा संघी पठी बरैबाद।