1 दोत्ती-दोत्थी सोभै बडै प्रोहत, सैणैं, अर शास्त्री अर सारी माहा सभा बेठै दै लोगै आप्पू मांझ़ै जोग किअ अर ईशू निंयं बान्हीं करै राज़पाल पिलातुसा सेटा लै।

2 पिलातुसै पुछ़अ ईशू का, "कै तूह यहूदी मणछो राज़अ आसा?"

ईशू बोलअ तेऊ लै, "तंऐं हेरअ आप्पै बोली।"

3 बडै प्रोहतै लाऐ ईशू लै खास्सै दोश। 4 पिलातुसै पुछ़अ ईशू का भिई, "तूह ज़बाब किल्है निं दैंदअ, भाल़ ईंयां लोग ताल्है केतरी गल्‍ले दोशा आसा लांदै लागै दै?" 5 ईशू निं तिन्‍नां लै किछ़ ज़बाब दैनअ, पिलातुस हुअ बडअ रहैन।

6 राज़पाल पिलातुसो त इहअ रबाज़ कि सह करा त तेऊ ऊवार्णे थैरे धैल़ी एकी कैदी आज़ाद ज़ुंण कैद खानै होए अर ज़हा लै लोग आज़ाद करने अरज़ करे। 7 बरोबा नाओं एक मणछ बी थिअ तिन्‍नां धैल़ै कैद। सह थिअ रोमी राज़े द्रोह करनै आल़ै संघै, अर सह थिअ राज़ द्रोह अर हत्या करनै पिछ़ू कैद किअ द। 8 खास्सै मणछ डेऊऐ राज़पाला का अरज़ करदै कि ज़िहअ तूह हाम्हां लै आझ़ तैणीं करदअ आसा आअ द तिहअ ई कर।

9 राज़पाल पिलातुसै बोलअ तिन्‍नां लै, "तम्हैं कै इहअ च़ाहा कि तम्हां लै ‘यहूदी मणछे राज़ै’ करूं आज़ाद?"

10 पिलातुसा का थिअ थोघ कि बडै प्रोहत करा ईशू लै ज़ीद अर तै आसा अह इनै ढाकअ द। 11 पर बडै प्रोहतै तै तिंयां लोग शकाऊई डाहै दै। लोगै बोलअ ईशूए बदल़ै तेऊ बरोबा आज़ाद करना लै। 12 ज़ांऊं पिलातुसै इहअ शूणअ, तेऊ पुछ़अ तिन्‍नां का एकी बारी भिई, "ज़ै हुंह एऊ बरोबा आज़ाद करूं, तै हुंह एऊ लै किज़ै करूं ज़हा लै तम्हैं यहूदी मणछो राज़अ बोला?"

13 तिन्‍नैं लोगै बोलअ भिई ज़ोरै-ज़ोरै, "एऊ छ़ड़ाऊआ क्रूसा दी।"

14 पिलातुसै बोलअ तिन्‍नां लै, "किल्है, एऊ किज़ै ज़ुल्म किअ?"

पर तिन्‍नैं लाई होर भिई ज़ोरै-ज़ोरै लैल़ा, "एऊ छ़ड़ाऊआ क्रूसा दी।"

15 तेखअ किअ पिलातुसै लोगा खुश करनै तैणीं बरोबा आज़ाद, अर ईशू दैनअ कोल़ै करै च़िक्‍की रोमी सपाही का क्रूसा दी छ़ड़ाऊंणा लै।

16 सपाही निंयं ईशू गहल़ा भितरी राज़ भबनै अर सपाहीए पल़टण शादी तिधा लै। 17 तेखअ बन्हैऊंअ तिन्‍नैं ईशू लै बैंज़णीं रंगो च़ोल़अ अर तेऊए मुंडै लाअ झ़रीलै कांडैओ मुगट।

18 तेखअ लागै इहअ बोली सुहांगा करदै, "हे यहूदीए राज़ैआ नमस्ते।" 19 तिन्‍नैं पाअ तेऊए मुंहां लै थुक्‍की, शोठै करै बाही तेऊए मुंडै अर तेऊ सम्हनै ज़ान्हूंए बलै बेशी लागै तिंयां तेऊए सुहांगा करदै। 20 तेखअ खोल्हअ तिन्‍नैं तेऊ का बैंज़णीं रंगो च़ोल़अ पोर्ही अर तेऊ का बन्हैऊंऐं तेऊए ई झिकल़ै, तेखअ निंयं क्रूसा दी मारना लै एरुशलेम नगरी बागै।

21 सकंदर अर रुपसो बाब शमौन नाओं मणछ अर एक कुरेन नगरी का आअ द मणछ त लागअ द गराऊंआं का तेस्सी बाती एछदअ, तिन्‍नैं ढाकअ सह ज़ोरा-ज़ोरी कि सह क्रूसा बगारू च़ाले। ज़ांऊं सपाही ईशू नगरी का बागै तै निंदै लागै दै, तिन्‍नां का शुझुअ एक मणछ किधी गराऊंआं, तेऊ नाअं त शमौन, सह आसा त कुरेन नगरी का सकंदर अर रुपसो बाब। सपाही निंयं सह ज़ोरा-ज़ोरी ईशूए क्रूसा बगारू।

22 तिन्‍नैं निंयं ईशू गुलगुता नाओंए ज़ैगा लै ज़ेता लै "खोपल़ीए ज़ैगा हआ।" 23 तिधी लागै तिंयां तेऊ लै मुर्र नाओंए दुआई राल़अ द दाखे मिल्‍लै रसा दैंदै ज़ेता करै दाह का राम हआ पर ईशू निं सह झ़ुठअ।

24 तेखअ छ़ड़ाऊअ तिन्‍नैं सपाही ईशू क्रूसा दी अर तेऊए झिकल़ै बांडणां लै पाई आप्पू मांझ़ै परच़ी कि कहा लै कै लोल़ी भेटअ अर तिंयां बांडै।✝ 25 दोत्ती पैहलै पहरै छ़ड़ाऊअ तिन्‍नैं सह क्रूसा दी। 26 क्रूसे च़ुंडी टोक्‍की तिन्‍नैं एक तगती, अर तेथ त तेऊओ दोश लिखअ द, "यहूदी मणछो राज़अ।"

27 तिन्‍नैं छ़ड़ाऊऐ क्रूसा दी दूई डाकू बी एक ईशूए दैहणीं बाखा अर एक बाऊंईं बाखा। 28 इहअ करै हुअ पबित्र शास्त्रा दी लिखअ द बैण बी पूरअ, "सह गणअ ज़ुल्म करनै आल़ै संघै।"✝

29 तेस्सी बाती एछदै-डेऊंदै करा तै आपणैं मूंड झ़ल़ाऊई करै तेऊए इहअ बोली निंदा, "शाबाश! भबना ढोल़णैं आल़ैआ अर चिई धैल़ी भितरी बणाणैं आल़ैआ, 30 एऊ क्रूसा का होथ धरनीं अर आप्पू ता बच़ हेरुं!"✝

31 बडै प्रोहत अर शास्त्री सैणैं बी लागै सोभ सुहांग करी इहअ बोल्दै, "होर ता बच़ाऊऐ एऊ पर आप्पू निं बच़ी सकअ। 32 ज़ै तूह मसीहा अर इज़राईली मणछो राज़अ थिऐ होथ एऊ क्रूसा का धरनीं, तै करनअ हाम्हां बी तेरअ विश्वास।"

इहअ ई ज़ुंण तिंयां ईशू संघै डाकू बी तै क्रूसा दी छ़ड़ाऊऐ दै, तिंयां बी लागै ईशूए निंदा करदै।

33 दपहरा पोर्ही चिऊथै पहरै तैणीं रहअ तेऊ देशै घोर न्हैरअ हई अर उडै तैणीं रही ज़ेही राच पल़ी। 34 चिऊथै पहरै बोलअ ईशू बडै ज़ोरै एक बोल, "इलोई, इलोई, लम्मा शबक्तनी?" मतलब, "हे मेरै परमेशर, हे मेरै परमेशर, तंऐं किल्है छ़ाडअ हुंह?"

35 ज़ुंण तिधी नेल़ तै खल़्हुऐ दै तिन्‍नां मांझ़ै बोलअ कई लोगै इहअ, "भाल़ा, अह आसा एलियाह गूरा लै हाक्‍का लांदअ लागअ द।"

36 एक आअ ठुर्ही, अर मिल्‍लै दाखे रसा दी डबेऊअ शाट्टअ अर नगाल़ीए च़ुंडी दी चैल़ी करै दैनअ तेऊ का च़ाखणा लै, होरी बोलअ इहअ बी कि खल़्हिया, "भाल़ा हेरुं, एलियाह गूर एऊ बच़ाऊंदअ एछणअ कि नांईं।"

37 तेखअ शोटै ईशू ज़ोरै लैल़ पाई आपणैं प्राण। 38 परमेशरे भबनै लाअ द पल्दअ धेल़्हुअ प्रैंदा का थाल्‍लै तैणीं दूई बाखा लै।

39 तेखअ ज़ुंण सुबैदारै तिधी ईशू नेल़ पहरी थिअ, ज़ांऊं तेऊ सह ज़ोरै लैल़ पाई प्राण शोटदअ भाल़अ, तेऊ बोलअ, "अह मणछ आसा असली दी सच्च़ी परमेशरो पूत थिअ।"

40 कई बेटल़ी बी थिई दूर खल़्हुई करै भाल़ी लागी दी, तिन्‍नां मांझ़ै तै मगदल़ गराऊंए मरिअम, दुजी मरिअम ज़ुआन याकब अर जोसेसे ईज अर सलोमी थिऐ तिधी।

41 ज़धू ईशू गलील मुल्खै हआ त, ईंयां बी हआ ती ईशू संघै, अर तिंयां बी करा तै तेऊए च़ाकर, होर बी थिई ईशू संघै एरुशलेम नगरी लै खास्सी बेटल़ी आई दी।

42 तेतरी च़ाल्‍ली ती सान्ह पल़ी अर बशैघो धैल़अ थिअ शुरू हणैं आल़अ।

43 अरमतियाह गराऊंओ रहणैं आल़अ युसुफ आअ अर सह थिअ यहूदी माहा सभा दी साझ़ू, अर सह थिअ आप्पू बी परमेशरे राज़ एछणैं न्हैल़अ लागअ द। सह डेऊअ हिम्मत करी राज़पाल पिलातुसा सेटा लै संघा मांगी तेऊ ईशूए ल्हास।

44 पिलातुस हुअ रहैन कि सह एतरअ छ़ेक्‍कै गअ मरी! पिलातुसै शादअ सुबैदार संघा पुछ़अ तेऊ का, "तेऊ मरी कै खास्सअ बगत गअ हई?"

45 ज़ांऊं पिलातुसा का इहअ थोघ लागअ कि ईशू हेरै प्राण शोटी, तेखअ दैनी तेऊ युसुफा लै तिधा का ल्हासा निंणे ज़ाज़त।

46 तेखअ पल़ेटी युसुफै ल्हास एकी बाछे च़ादरा दी संघा डाही सह तैहा घोरी दी ज़ुंण शाफल़ा दी थिई कोती दी। घोरीए मोहरै डाही एक बडी टोल्ह बदल़ी। 47 मगदल़ गराऊंए मरिअम अर जोसेसे ईज मरिअम ती लागी दी भाल़ी कि ईशू किधी आसा डाहअ द।