5 "हे परमेशर बिधाता, तूह आसा स्वर्गै! तूह आसा महान अर हाम्हां लागा तेरी ई डरा हेठै रहणअ। तूह आसा शुचअ-पाक्कअ अर तंऐं किई आपणीं करार तिन्नां लै पूरी ज़ुंण ताल्है झ़ूरा अर ज़ुंण ज़िहअ तंऐं बोलअ तिहअ ई हुकम मना। 6 बिधाता, मुंह बाखा भाल़, हुंह आसा तेरअ दास, हुंह आसा धैल़-राच इज़राईलीए तैणीं ताह सेटा अरज़ करदअ लागअ द। हुंह मना ऐहा गल्ला कि इज़राईली परज़ा किअ पाप अर मेरै दाद-बाब अर मंऐं बी किअ पाप। 7 हाम्हैं किअ ताल्है बूरअ अर हाम्हैं निं तिहअ किअ ज़िहअ तंऐं हुकम किअ त। हाम्हैं निं तेऊ बधाने साबै ज़िन्दगी ज़िऊई ज़ुंण तंऐं आपणैं दास मोसा का दैनअ त। 8 हे बिधाता, तूह कर तैहा गल्ला आद ज़ुंण तंऐं मोसा का बोलअ त, ‘ज़ै तम्हैं इज़राईली मुल्है विश्वास घात करे, तै छिंगणैं मुंह तम्हैं देशै-देशै। 9 पर ज़ै तम्हैं मुंह बाखा फिरे अर ज़िहअ मंऐं हुकम किअ तिहअ ई करे, तै आणनैं मुंह तम्हैं तेखअ तैहा ज़ैगा लै बापस झाल़ी ज़ुंण ज़ैगा ज़ुंण मंऐं आपणीं पूज़ा-गाज़ा लै आसा छ़ांटी दी, च़ाऐ तम्हैं दूर देशै पृथूईए पुंझ़ै बी किल्है निं होए।’
10 "हे बिधाता, ईंयां आसा तेरै दास, तेरी आपणीं परज़ा। तंऐं आसा ईंयां आपणैं महान बल अर ज़ोरा करै बच़ाऊऐ दै। 11 ऐबै शुण मेरी अरज़ अर इना सोभी तेरै दासे प्राथणां ज़ुंण तेरअ अदर करनअ च़ाहा। तूह कर आझ़ मुंह सफल कि फारसी माहा राज़ै लोल़ी मुल्है झींण किई।"
तिन्नां धैल़ै करा त हुंह फारसी माहा राज़ै लै दाखे रसा पणैऊंणे च़ाकरी।