¹ וַיְדַבֵּר יְהוָה אֶל ־ מֹשֶׁה לֵּאמֹֽר ׃

² אֱמֹר אֶל ־ אֶלְעָזָר בֶּן ־ אַהֲרֹן הַכֹּהֵן וְיָרֵם אֶת ־ הַמַּחְתֹּת מִבֵּין הַשְּׂרֵפָה וְאֶת ־ הָאֵשׁ זְרֵה ־ הָלְאָה כִּי קָדֵֽשׁוּ ׃

³ אֵת מַחְתּוֹת הַֽחַטָּאִים הָאֵלֶּה בְּנַפְשֹׁתָם וְעָשׂוּ אֹתָם רִקֻּעֵי פַחִים צִפּוּי לַמִּזְבֵּחַ כִּֽי ־ הִקְרִיבֻם לִפְנֵֽי ־ יְהוָה וַיִּקְדָּשׁוּ וְיִֽהְיוּ לְאוֹת לִבְנֵי יִשְׂרָאֵֽל ׃

⁴ וַיִּקַּח אֶלְעָזָר הַכֹּהֵן אֵת מַחְתּוֹת הַנְּחֹשֶׁת אֲשֶׁר הִקְרִיבוּ הַשְּׂרֻפִים וַֽיְרַקְּעוּם צִפּוּי לַמִּזְבֵּֽחַ ׃

⁵ זִכָּרוֹן לִבְנֵי יִשְׂרָאֵל לְמַעַן אֲשֶׁר לֹֽא ־ יִקְרַב אִישׁ זָר אֲשֶׁר לֹא מִזֶּרַע אַהֲרֹן הוּא לְהַקְטִיר קְטֹרֶת לִפְנֵי יְהוָה וְלֹֽא ־ יִהְיֶה כְקֹרַח וְכַעֲדָתוֹ כַּאֲשֶׁר דִּבֶּר יְהוָה בְּיַד ־ מֹשֶׁה לֽוֹ ׃

⁶ וַיִּלֹּנוּ כָּל ־ עֲדַת בְּנֵֽי ־ יִשְׂרָאֵל מִֽמָּחֳרָת עַל ־ מֹשֶׁה וְעַֽל ־ אַהֲרֹן לֵאמֹר אַתֶּם הֲמִתֶּם אֶת ־ עַם יְהוָֽה ׃

⁷ וַיְהִי בְּהִקָּהֵל הָֽעֵדָה עַל ־ מֹשֶׁה וְעַֽל ־ אַהֲרֹן וַיִּפְנוּ אֶל ־ אֹהֶל מוֹעֵד וְהִנֵּה כִסָּהוּ הֶעָנָן וַיֵּרָא כְּבוֹד יְהוָֽה ׃

⁸ וַיָּבֹא מֹשֶׁה וְאַהֲרֹן אֶל ־ פְּנֵי אֹהֶל מוֹעֵֽד ׃ פ

⁹ וַיְדַבֵּר יְהוָה אֶל ־ מֹשֶׁה לֵּאמֹֽר ׃

¹⁰ הֵרֹמּוּ מִתּוֹךְ הָעֵדָה הַזֹּאת וַאֲכַלֶּה אֹתָם כְּרָגַע וַֽיִּפְּלוּ עַל ־ פְּנֵיהֶֽם ׃

¹¹ וַיֹּאמֶר מֹשֶׁה אֶֽל ־ אַהֲרֹן קַח אֶת ־ הַמַּחְתָּה וְתֶן ־ עָלֶיהָ אֵשׁ מֵעַל הַמִּזְבֵּחַ וְשִׂים קְטֹרֶת וְהוֹלֵךְ מְהֵרָה אֶל ־ הָעֵדָה וְכַפֵּר עֲלֵיהֶם כִּֽי ־ יָצָא הַקֶּצֶף מִלִּפְנֵי יְהוָה הֵחֵל הַנָּֽגֶף ׃

¹⁴ וַיְהִי בִּנְסֹעַ הָעָם מֵאָהֳלֵיהֶם לַעֲבֹר אֶת ־ הַיַּרְדֵּן וְהַכֹּהֲנִים נֹֽשְׂאֵי הָאָרוֹן הַבְּרִית לִפְנֵי הָעָֽם ׃

¹⁵ וּכְבוֹא נֹשְׂאֵי הָֽאָרוֹן עַד ־ הַיַּרְדֵּן וְרַגְלֵי הַכֹּֽהֲנִים נֹשְׂאֵי הָֽאָרוֹן נִטְבְּלוּ בִּקְצֵה הַמָּיִם וְהַיַּרְדֵּן מָלֵא עַל ־ כָּל ־ גְּדוֹתָיו כֹּל יְמֵי קָצִֽיר ׃

¹⁶ וַיַּעַמְדוּ הַמַּיִם הַיֹּרְדִים מִלְמַעְלָה קָמוּ נֵד ־ אֶחָד הַרְחֵק מְאֹד באדם הָעִיר אֲשֶׁר מִצַּד צָֽרְתָן וְהַיֹּרְדִים עַל יָם הָעֲרָבָה יָם ־ הַמֶּלַח תַּמּוּ נִכְרָתוּ וְהָעָם עָבְרוּ נֶגֶד יְרִיחֽוֹ ׃

¹⁷ וַיַּעַמְדוּ הַכֹּהֲנִים נֹשְׂאֵי הָאָרוֹן בְּרִית ־ יְהוָה בֶּחָֽרָבָה בְּתוֹךְ הַיַּרְדֵּן הָכֵן וְכָל ־ יִשְׂרָאֵל עֹֽבְרִים בֶּחָרָבָה עַד אֲשֶׁר ־ תַּמּוּ כָּל ־ הַגּוֹי לַעֲבֹר אֶת ־ הַיַּרְדֵּֽן ׃

¹⁴ שׁוּבוּ בָנִים שׁוֹבָבִים נְאֻם ־ יְהוָה כִּי אָנֹכִי בָּעַלְתִּי בָכֶם וְלָקַחְתִּי אֶתְכֶם אֶחָד מֵעִיר וּשְׁנַיִם מִמִּשְׁפָּחָה וְהֵבֵאתִי אֶתְכֶם צִיּֽוֹן ׃

¹⁵ וְנָתַתִּי לָכֶם רֹעִים כְּלִבִּי וְרָעוּ אֶתְכֶם דֵּעָה וְהַשְׂכֵּֽיל ׃

¹⁶ וְהָיָה כִּי תִרְבּוּ וּפְרִיתֶם בָּאָרֶץ בַּיָּמִים הָהֵמָּה נְאֻם ־ יְהוָה לֹא ־ יֹאמְרוּ עוֹד אֲרוֹן בְּרִית ־ יְהוָה וְלֹא יַעֲלֶה עַל ־ לֵב וְלֹא יִזְכְּרוּ ־ בוֹ וְלֹא יִפְקֹדוּ וְלֹא יֵעָשֶׂה עֽוֹד ׃

¹⁰ וַיַּעֲשׂוּ הָאֲנָשִׁים כֵּן וַיִּקְחוּ שְׁתֵּי פָרוֹת עָלוֹת וַיַּאַסְרוּם בָּעֲגָלָה וְאֶת ־ בְּנֵיהֶם כָּלוּ בַבָּֽיִת ׃

¹¹ וַיָּשִׂמוּ אֶת ־ אֲרוֹן יְהוָה אֶל ־ הָעֲגָלָה וְאֵת הָאַרְגַּז וְאֵת עַכְבְּרֵי הַזָּהָב וְאֵת צַלְמֵי טְחֹרֵיהֶֽם ׃

¹² וַיִשַּׁרְנָה הַפָּרוֹת בַּדֶּרֶךְ עַל ־ דֶּרֶךְ בֵּית שֶׁמֶשׁ בִּמְסִלָּה אַחַת הָלְכוּ הָלֹךְ וְגָעוֹ וְלֹא ־ סָרוּ יָמִין וּשְׂמֹאול וְסַרְנֵי פְלִשְׁתִּים הֹלְכִים אַחֲרֵיהֶם עַד ־ גְּבוּל בֵּית שָֽׁמֶשׁ ׃

¹³ וּבֵית שֶׁמֶשׁ קֹצְרִים קְצִיר ־ חִטִּים בָּעֵמֶק וַיִּשְׂאוּ אֶת ־ עֵינֵיהֶם וַיִּרְאוּ אֶת ־ הָאָרוֹן וַֽיִּשְׂמְחוּ לִרְאֽוֹת ׃

¹⁴ וְהָעֲגָלָה בָּאָה אֶל ־ שְׂדֵה יְהוֹשֻׁעַ בֵּֽית ־ הַשִּׁמְשִׁי וַתַּעֲמֹד שָׁם וְשָׁם אֶבֶן גְּדוֹלָה וַֽיְבַקְּעוּ אֶת ־ עֲצֵי הָעֲגָלָה וְאֶת ־ הַפָּרוֹת הֶעֱלוּ עֹלָה לַיהוָֽה ׃ ס

¹⁵ וְהַלְוִיִּם הוֹרִידוּ ׀ אֶת ־ אֲרוֹן יְהוָה וְאֶת ־ הָאַרְגַּז אֲשֶׁר ־ אִתּוֹ אֲשֶׁר ־ בּוֹ כְלֵֽי ־ זָהָב וַיָּשִׂמוּ אֶל ־ הָאֶבֶן הַגְּדוֹלָה וְאַנְשֵׁי בֵֽית ־ שֶׁמֶשׁ הֶעֱלוּ עֹלוֹת וַֽיִּזְבְּחוּ זְבָחִים בַּיּוֹם הַהוּא לַֽיהוָֽה ׃

וּבְבֹא מֹשֶׁה אֶל ־ אֹהֶל מוֹעֵד לְדַבֵּר אִתּוֹ וַיִּשְׁמַע אֶת ־ הַקּוֹל מִדַּבֵּר אֵלָיו מֵעַל הַכַּפֹּרֶת אֲשֶׁר עַל ־ אֲרֹן הָעֵדֻת מִבֵּין שְׁנֵי הַכְּרֻבִים וַיְדַבֵּר אֵלָֽיו ׃ פ

וַיַּעַשׂ בְּצַלְאֵל אֶת ־ הָאָרֹן עֲצֵי שִׁטִּים אַמָּתַיִם וָחֵצִי אָרְכּוֹ וְאַמָּה וָחֵצִי רָחְבּוֹ וְאַמָּה וָחֵצִי קֹמָתֽוֹ ׃

וַיִּקַּח וַיִּתֵּן אֶת ־ הָעֵדֻת אֶל ־ הָאָרֹן וַיָּשֶׂם אֶת ־ הַבַּדִּים עַל ־ הָאָרֹן וַיִּתֵּן אֶת ־ הַכַּפֹּרֶת עַל ־ הָאָרֹן מִלְמָֽעְלָה ׃

וַיָּבֵא אֶת ־ הָאָרֹן אֶל ־ הַמִּשְׁכָּן וַיָּשֶׂם אֵת פָּרֹכֶת הַמָּסָךְ וַיָּסֶךְ עַל אֲרוֹן הָעֵדוּת כַּאֲשֶׁר צִוָּה יְהוָה אֶת ־ מֹשֶֽׁה ׃ ס

וַיָּרַע הָעָם וַֽיִּתְקְעוּ בַּשֹּֽׁפָרוֹת וַיְהִי כִשְׁמֹעַ הָעָם אֶת ־ קוֹל הַשּׁוֹפָר וַיָּרִיעוּ הָעָם תְּרוּעָה גְדוֹלָה וַתִּפֹּל הַֽחוֹמָה תַּחְתֶּיהָ וַיַּעַל הָעָם הָעִירָה אִישׁ נֶגְדּוֹ וַֽיִּלְכְּדוּ אֶת ־ הָעִֽיר ׃

¹ וַיְדַבֵּר יְהוָה אֶל ־ מֹשֶׁה לֵּאמֹֽר ׃

² בְּיוֹם ־ הַחֹדֶשׁ הָרִאשׁוֹן בְּאֶחָד לַחֹדֶשׁ תָּקִים אֶת ־ מִשְׁכַּן אֹהֶל מוֹעֵֽד ׃

³ וְשַׂמְתָּ שָׁם אֵת אֲרוֹן הָעֵדוּת וְסַכֹּתָ עַל ־ הָאָרֹן אֶת ־ הַפָּרֹֽכֶת ׃

⁶ וַתִּכְבַּד יַד ־ יְהוָה אֶל ־ הָאַשְׁדּוֹדִים וַיְשִׁמֵּם וַיַּךְ אֹתָם בעפלים אֶת ־ אַשְׁדּוֹד וְאֶת ־ גְּבוּלֶֽיהָ ׃

⁷ וַיִּרְאוּ אַנְשֵֽׁי ־ אַשְׁדּוֹד כִּֽי ־ כֵן וְאָמְרוּ לֹֽא ־ יֵשֵׁב אֲרוֹן אֱלֹהֵי יִשְׂרָאֵל עִמָּנוּ כִּֽי ־ קָשְׁתָה יָדוֹ עָלֵינוּ וְעַל דָּגוֹן אֱלֹהֵֽינוּ ׃

⁸ וַיִּשְׁלְחוּ וַיַּאַסְפוּ אֶת ־ כָּל ־ סַרְנֵי פְלִשְׁתִּים אֲלֵיהֶם וַיֹּֽאמְרוּ מַֽה ־ נַּעֲשֶׂה לַֽאֲרוֹן אֱלֹהֵי יִשְׂרָאֵל וַיֹּאמְרוּ גַּת יִסֹּב אֲרוֹן אֱלֹהֵי יִשְׂרָאֵל וַיַּסֵּבּוּ אֶת ־ אֲרוֹן אֱלֹהֵי יִשְׂרָאֵֽל ׃ ס

⁹ וַיְהִי אַחֲרֵי ׀ הֵסַבּוּ אֹתוֹ וַתְּהִי יַד ־ יְהוָה ׀ בָּעִיר מְהוּמָה גְּדוֹלָה מְאֹד וַיַּךְ אֶת ־ אַנְשֵׁי הָעִיר מִקָּטֹן וְעַד ־ גָּדוֹל וַיִּשָּׂתְרוּ לָהֶם עפלים ׃

¹⁰ וַֽיְשַׁלְּחוּ אֶת ־ אֲרוֹן הָאֱלֹהִים עֶקְרוֹן וַיְהִי כְּבוֹא אֲרוֹן הָאֱלֹהִים עֶקְרוֹן וַיִּזְעֲקוּ הָֽעֶקְרֹנִים לֵאמֹר הֵסַבּוּ אֵלַי אֶת ־ אֲרוֹן אֱלֹהֵי יִשְׂרָאֵל לַהֲמִיתֵנִי וְאֶת ־ עַמִּֽי ׃

¹¹ וַיִּשְׁלְחוּ וַיַּאַסְפוּ אֶת ־ כָּל ־ סַרְנֵי פְלִשְׁתִּים וַיֹּֽאמְרוּ שַׁלְּחוּ אֶת ־ אֲרוֹן אֱלֹהֵי יִשְׂרָאֵל וְיָשֹׁב לִמְקֹמוֹ וְלֹֽא ־ יָמִית אֹתִי וְאֶת ־ עַמִּי כִּֽי ־ הָיְתָה מְהֽוּמַת ־ מָוֶת בְּכָל ־ הָעִיר כָּבְדָה מְאֹד יַד הָאֱלֹהִים שָֽׁם ׃

¹⁰ וְעָשׂוּ אֲרוֹן עֲצֵי שִׁטִּים אַמָּתַיִם וָחֵצִי אָרְכּוֹ וְאַמָּה וָחֵצִי רָחְבּוֹ וְאַמָּה וָחֵצִי קֹמָתֽוֹ ׃

¹¹ וְצִפִּיתָ אֹתוֹ זָהָב טָהוֹר מִבַּיִת וּמִחוּץ תְּצַפֶּנּוּ וְעָשִׂיתָ עָלָיו זֵר זָהָב סָבִֽיב ׃

¹² וְיָצַקְתָּ לּוֹ אַרְבַּע טַבְּעֹת זָהָב וְנָתַתָּה עַל אַרְבַּע פַּעֲמֹתָיו וּשְׁתֵּי טַבָּעֹת עַל ־ צַלְעוֹ הָֽאֶחָת וּשְׁתֵּי טַבָּעֹת עַל ־ צַלְעוֹ הַשֵּׁנִֽית ׃

¹³ וְעָשִׂיתָ בַדֵּי עֲצֵי שִׁטִּים וְצִפִּיתָ אֹתָם זָהָֽב ׃

¹⁴ וְהֵבֵאתָ אֶת ־ הַבַּדִּים בַּטַּבָּעֹת עַל צַלְעֹת הָאָרֹן לָשֵׂאת אֶת ־ הָאָרֹן בָּהֶֽם ׃

¹⁵ בְּטַבְּעֹת הָאָרֹן יִהְיוּ הַבַּדִּים לֹא יָסֻרוּ מִמֶּֽנּוּ ׃

¹⁶ וְנָתַתָּ אֶל ־ הָאָרֹן אֵת הָעֵדֻת אֲשֶׁר אֶתֵּן אֵלֶֽיךָ ׃

¹⁷ וְעָשִׂיתָ כַפֹּרֶת זָהָב טָהוֹר אַמָּתַיִם וָחֵצִי אָרְכָּהּ וְאַמָּה וָחֵצִי רָחְבָּֽהּ ׃

¹⁸ וְעָשִׂיתָ שְׁנַיִם כְּרֻבִים זָהָב מִקְשָׁה תַּעֲשֶׂה אֹתָם מִשְּׁנֵי קְצוֹת הַכַּפֹּֽרֶת ׃

¹⁹ וַעֲשֵׂה כְּרוּב אֶחָד מִקָּצָה מִזֶּה וּכְרוּב ־ אֶחָד מִקָּצָה מִזֶּה מִן ־ הַכַּפֹּרֶת תַּעֲשׂוּ אֶת ־ הַכְּרֻבִים עַל ־ שְׁנֵי קְצוֹתָֽיו ׃

²⁰ וְהָיוּ הַכְּרֻבִים פֹּרְשֵׂי כְנָפַיִם לְמַעְלָה סֹכְכִים בְּכַנְפֵיהֶם עַל ־ הַכַּפֹּרֶת וּפְנֵיהֶם אִישׁ אֶל ־ אָחִיו אֶל ־ הַכַּפֹּרֶת יִהְיוּ פְּנֵי הַכְּרֻבִֽים ׃

²¹ וְנָתַתָּ אֶת ־ הַכַּפֹּרֶת עַל ־ הָאָרֹן מִלְמָעְלָה וְאֶל ־ הָאָרֹן תִּתֵּן אֶת ־ הָעֵדֻת אֲשֶׁר אֶתֵּן אֵלֶֽיךָ ׃

¹ וִֽירִיחוֹ סֹגֶרֶת וּמְסֻגֶּרֶת מִפְּנֵי בְּנֵי יִשְׂרָאֵל אֵין יוֹצֵא וְאֵין בָּֽא ׃ ס

² וַיֹּאמֶר יְהוָה אֶל ־ יְהוֹשֻׁעַ רְאֵה נָתַתִּי בְיָֽדְךָ אֶת ־ יְרִיחוֹ וְאֶת ־ מַלְכָּהּ גִּבּוֹרֵי הֶחָֽיִל ׃

³ וְסַבֹּתֶם אֶת ־ הָעִיר כֹּל אַנְשֵׁי הַמִּלְחָמָה הַקֵּיף אֶת ־ הָעִיר פַּעַם אֶחָת כֹּה תַעֲשֶׂה שֵׁשֶׁת יָמִֽים ׃

⁴ וְשִׁבְעָה כֹהֲנִים יִשְׂאוּ שִׁבְעָה שׁוֹפְרוֹת הַיּֽוֹבְלִים לִפְנֵי הָאָרוֹן וּבַיּוֹם הַשְּׁבִיעִי תָּסֹבּוּ אֶת ־ הָעִיר שֶׁבַע פְּעָמִים וְהַכֹּהֲנִים יִתְקְעוּ בַּשּׁוֹפָרֽוֹת ׃

⁵ וְהָיָה בִּמְשֹׁךְ ׀ בְּקֶרֶן הַיּוֹבֵל בשמעכם אֶת ־ קוֹל הַשּׁוֹפָר יָרִיעוּ כָל ־ הָעָם תְּרוּעָה גְדוֹלָה וְנָפְלָה חוֹמַת הָעִיר תַּחְתֶּיהָ וְעָלוּ הָעָם אִישׁ נֶגְדּֽוֹ ׃

⁶ וַיִּקְרָא יְהוֹשֻׁעַ בִּן ־ נוּן אֶל ־ הַכֹּהֲנִים וַיֹּאמֶר אֲלֵהֶם שְׂאוּ אֶת ־ אֲרוֹן הַבְּרִית וְשִׁבְעָה כֹֽהֲנִים יִשְׂאוּ שִׁבְעָה שֽׁוֹפְרוֹת יוֹבְלִים לִפְנֵי אֲרוֹן יְהוָֽה ׃

⁷ ויאמרו אֶל ־ הָעָם עִבְרוּ וְסֹבּוּ אֶת ־ הָעִיר וְהֶחָלוּץ יַעֲבֹר לִפְנֵי אֲרוֹן יְהוָֽה ׃

וְנוֹעַדְתִּי לְךָ שָׁם וְדִבַּרְתִּי אִתְּךָ מֵעַל הַכַּפֹּרֶת מִבֵּין שְׁנֵי הַכְּרֻבִים אֲשֶׁר עַל ־ אֲרֹן הָעֵדֻת אֵת כָּל ־ אֲשֶׁר אֲצַוֶּה אוֹתְךָ אֶל ־ בְּנֵי יִשְׂרָאֵֽל ׃ פ

³³ וַיִּסְעוּ מֵהַר יְהוָה דֶּרֶךְ שְׁלֹשֶׁת יָמִים וַאֲרוֹן בְּרִית ־ יְהוָה נֹסֵעַ לִפְנֵיהֶם דֶּרֶךְ שְׁלֹשֶׁת יָמִים לָתוּר לָהֶם מְנוּחָֽה ׃

³⁴ וַעֲנַן יְהוָה עֲלֵיהֶם יוֹמָם בְּנָסְעָם מִן ־ הַֽמַּחֲנֶֽה ׃ ׆ ס

³⁵ וַיְהִי בִּנְסֹעַ הָאָרֹן וַיֹּאמֶר מֹשֶׁה קוּמָה ׀ יְהוָה וְיָפֻצוּ אֹֽיְבֶיךָ וְיָנֻסוּ מְשַׂנְאֶיךָ מִפָּנֶֽיךָ ׃

³⁶ וּבְנֻחֹה יֹאמַר שׁוּבָה יְהוָה רִֽבְבוֹת אַלְפֵי יִשְׂרָאֵֽל ׃ ׆ ס

וַיְהִי בעלות הַכֹּהֲנִים נֹשְׂאֵי אֲרוֹן בְּרִית ־ יְהוָה מִתּוֹךְ הַיַּרְדֵּן נִתְּקוּ כַּפּוֹת רַגְלֵי הַכֹּהֲנִים אֶל הֶחָרָבָה וַיָּשֻׁבוּ מֵֽי ־ הַיַּרְדֵּן לִמְקוֹמָם וַיֵּלְכוּ כִתְמוֹל ־ שִׁלְשׁוֹם עַל ־ כָּל ־ גְּדוֹתָֽיו ׃

¹ אָז יַקְהֵל שְׁלֹמֹה אֶת ־ זִקְנֵי יִשְׂרָאֵל אֶת ־ כָּל ־ רָאשֵׁי הַמַּטּוֹת נְשִׂיאֵי הָאָבוֹת לִבְנֵי יִשְׂרָאֵל אֶל ־ הַמֶּלֶךְ שְׁלֹמֹה יְרוּשָׁלִָם לְֽהַעֲלוֹת אֶת ־ אֲרוֹן בְּרִית ־ יְהוָה מֵעִיר דָּוִד הִיא צִיּֽוֹן ׃

² וַיִּקָּהֲלוּ אֶל ־ הַמֶּלֶךְ שְׁלֹמֹה כָּל ־ אִישׁ יִשְׂרָאֵל בְּיֶרַח הָאֵֽתָנִים בֶּחָג הוּא הַחֹדֶשׁ הַשְּׁבִיעִֽי ׃

³ וַיָּבֹאוּ כֹּל זִקְנֵי יִשְׂרָאֵל וַיִּשְׂאוּ הַכֹּהֲנִים אֶת ־ הָאָרֽוֹן ׃

⁴ וַֽיַּעֲלוּ אֶת ־ אֲרוֹן יְהוָה וְאֶת ־ אֹהֶל מוֹעֵד וְאֶֽת ־ כָּל ־ כְּלֵי הַקֹּדֶשׁ אֲשֶׁר בָּאֹהֶל וַיַּעֲלוּ אֹתָם הַכֹּהֲנִים וְהַלְוִיִּֽם ׃

⁵ וְהַמֶּלֶךְ שְׁלֹמֹה וְכָל ־ עֲדַת יִשְׂרָאֵל הַנּוֹעָדִים עָלָיו אִתּוֹ לִפְנֵי הָֽאָרוֹן מְזַבְּחִים צֹאן וּבָקָר אֲשֶׁר לֹֽא ־ יִסָּפְרוּ וְלֹא יִמָּנוּ מֵרֹֽב ׃

⁶ וַיָּבִאוּ הַכֹּהֲנִים אֶת ־ אֲרוֹן בְּרִית ־ יְהוָה אֶל ־ מְקוֹמוֹ אֶל ־ דְּבִיר הַבַּיִת אֶל ־ קֹדֶשׁ הַקֳּדָשִׁים אֶל ־ תַּחַת כַּנְפֵי הַכְּרוּבִֽים ׃

⁷ כִּי הַכְּרוּבִים פֹּרְשִׂים כְּנָפַיִם אֶל ־ מְקוֹם הָֽאָרוֹן וַיָּסֹכּוּ הַכְּרֻבִים עַל ־ הָאָרוֹן וְעַל ־ בַּדָּיו מִלְמָֽעְלָה ׃

⁸ וַֽיַּאֲרִכוּ הַבַּדִּים וַיֵּרָאוּ רָאשֵׁי הַבַּדִּים מִן ־ הַקֹּדֶשׁ עַל ־ פְּנֵי הַדְּבִיר וְלֹא יֵרָאוּ הַחוּצָה וַיִּהְיוּ שָׁם עַד הַיּוֹם הַזֶּֽה ׃

⁹ אֵין בָּֽאָרוֹן רַק שְׁנֵי לֻחוֹת הָאֲבָנִים אֲשֶׁר הִנִּחַ שָׁם מֹשֶׁה בְּחֹרֵב אֲשֶׁר כָּרַת יְהוָה עִם ־ בְּנֵי יִשְׂרָאֵל בְּצֵאתָם מֵאֶרֶץ מִצְרָֽיִם ׃

¹⁰ וַיְהִי בְּצֵאת הַכֹּהֲנִים מִן ־ הַקֹּדֶשׁ וְהֶעָנָן מָלֵא אֶת ־ בֵּית יְהוָֽה ׃

¹¹ וְלֹֽא ־ יָכְלוּ הַכֹּהֲנִים לַעֲמֹד לְשָׁרֵת מִפְּנֵי הֶֽעָנָן כִּי ־ מָלֵא כְבוֹד ־ יְהוָה אֶת ־ בֵּית יְהוָֽה ׃ פ

¹ וַיְהִי אֲרוֹן ־ יְהוָה בִּשְׂדֵה פְלִשְׁתִּים שִׁבְעָה חֳדָשִֽׁים ׃

² וַיִּקְרְאוּ פְלִשְׁתִּים לַכֹּהֲנִים וְלַקֹּֽסְמִים לֵאמֹר מַֽה ־ נַּעֲשֶׂה לַאֲרוֹן יְהוָה הוֹדִעֻנוּ בַּמֶּה נְשַׁלְּחֶנּוּ לִמְקוֹמֽוֹ ׃

³ וַיֹּאמְרוּ אִֽם ־ מְשַׁלְּחִים אֶת ־ אֲרוֹן אֱלֹהֵי יִשְׂרָאֵל אַל ־ תְּשַׁלְּחוּ אֹתוֹ רֵיקָם כִּֽי ־ הָשֵׁב תָּשִׁיבוּ לוֹ אָשָׁם אָז תֵּרָֽפְאוּ וְנוֹדַע לָכֶם לָמָּה לֹא ־ תָסוּר יָדוֹ מִכֶּֽם ׃

² וַיַּעַרְכוּ פְלִשְׁתִּים לִקְרַאת יִשְׂרָאֵל וַתִּטֹּשׁ הַמִּלְחָמָה וַיִּנָּגֶף יִשְׂרָאֵל לִפְנֵי פְלִשְׁתִּים וַיַּכּוּ בַמַּֽעֲרָכָה בַּשָּׂדֶה כְּאַרְבַּעַת אֲלָפִים אִֽישׁ ׃

³ וַיָּבֹא הָעָם אֶל ־ הַֽמַּחֲנֶה וַיֹּֽאמְרוּ זִקְנֵי יִשְׂרָאֵל לָמָּה נְגָפָנוּ יְהוָה הַיּוֹם לִפְנֵי פְלִשְׁתִּים נִקְחָה אֵלֵינוּ מִשִּׁלֹה אֶת ־ אֲרוֹן בְּרִית יְהוָה וְיָבֹא בְקִרְבֵּנוּ וְיֹשִׁעֵנוּ מִכַּף אֹיְבֵֽינוּ ׃

⁴ וַיִּשְׁלַח הָעָם שִׁלֹה וַיִּשְׂאוּ מִשָּׁם אֵת אֲרוֹן בְּרִית ־ יְהוָה צְבָאוֹת יֹשֵׁב הַכְּרֻבִים וְשָׁם שְׁנֵי בְנֵֽי ־ עֵלִי עִם ־ אֲרוֹן בְּרִית הָאֱלֹהִים חָפְנִי וּפִֽינְחָֽס ׃

⁵ וַיְהִי כְּבוֹא אֲרוֹן בְּרִית ־ יְהוָה אֶל ־ הַֽמַּחֲנֶה וַיָּרִעוּ כָל ־ יִשְׂרָאֵל תְּרוּעָה גְדוֹלָה וַתֵּהֹם הָאָֽרֶץ ׃

⁶ וַיִּשְׁמְעוּ פְלִשְׁתִּים אֶת ־ קוֹל הַתְּרוּעָה וַיֹּאמְרוּ מֶה קוֹל הַתְּרוּעָה הַגְּדוֹלָה הַזֹּאת בְּמַחֲנֵה הָעִבְרִים וַיֵּדְעוּ כִּי אֲרוֹן יְהוָה בָּא אֶל ־ הַֽמַּחֲנֶֽה ׃

⁷ וַיִּֽרְאוּ הַפְּלִשְׁתִּים כִּי אָמְרוּ בָּא אֱלֹהִים אֶל ־ הַֽמַּחֲנֶה וַיֹּאמְרוּ אוֹי לָנוּ כִּי לֹא הָיְתָה כָּזֹאת אֶתְמוֹל שִׁלְשֹֽׁם ׃

⁸ אוֹי לָנוּ מִי יַצִּילֵנוּ מִיַּד הָאֱלֹהִים הָאַדִּירִים הָאֵלֶּה אֵלֶּה הֵם הָאֱלֹהִים הַמַּכִּים אֶת ־ מִצְרַיִם בְּכָל ־ מַכָּה בַּמִּדְבָּֽר ׃

⁹ הִֽתְחַזְּקוּ וִֽהְיוּ לַֽאֲנָשִׁים פְּלִשְׁתִּים פֶּן תַּעַבְדוּ לָעִבְרִים כַּאֲשֶׁר עָבְדוּ לָכֶם וִהְיִיתֶם לַאֲנָשִׁים וְנִלְחַמְתֶּֽם ׃

¹⁰ וַיִּלָּחֲמוּ פְלִשְׁתִּים וַיִּנָּגֶף יִשְׂרָאֵל וַיָּנֻסוּ אִישׁ לְאֹהָלָיו וַתְּהִי הַמַּכָּה גְּדוֹלָה מְאֹד וַיִּפֹּל מִיִּשְׂרָאֵל שְׁלֹשִׁים אֶלֶף רַגְלִֽי ׃

¹¹ וַאֲרוֹן אֱלֹהִים נִלְקָח וּשְׁנֵי בְנֵֽי ־ עֵלִי מֵתוּ חָפְנִי וּפִֽינְחָֽס ׃

וַיָּבֹאוּ אַנְשֵׁי ׀ קִרְיַת יְעָרִים וַֽיַּעֲלוּ אֶת ־ אֲרוֹן יְהוָה וַיָּבִאוּ אֹתוֹ אֶל ־ בֵּית אֲבִינָדָב בַּגִּבְעָה וְאֶת ־ אֶלְעָזָר בְּנוֹ קִדְּשׁוּ לִשְׁמֹר אֶת ־ אֲרוֹן יְהוָֽה ׃ פ

וַיְהִי מִיּוֹם שֶׁבֶת הָֽאָרוֹן בְּקִרְיַת יְעָרִים וַיִּרְבּוּ הַיָּמִים וַיִּֽהְיוּ עֶשְׂרִים שָׁנָה וַיִּנָּהוּ כָּל ־ בֵּית יִשְׂרָאֵל אַחֲרֵי יְהוָֽה ׃ ס

¹² וַיֻּגַּד לַמֶּלֶךְ דָּוִד לֵאמֹר בֵּרַךְ יְהוָה אֶת ־ בֵּית עֹבֵד אֱדֹם וְאֶת ־ כָּל ־ אֲשֶׁר ־ לוֹ בַּעֲבוּר אֲרוֹן הָאֱלֹהִים וַיֵּלֶךְ דָּוִד וַיַּעַל אֶת ־ אֲרוֹן הָאֱלֹהִים מִבֵּית עֹבֵד אֱדֹם עִיר דָּוִד בְּשִׂמְחָֽה ׃

¹³ וַיְהִי כִּי צָעֲדוּ נֹשְׂאֵי אֲרוֹן ־ יְהוָה שִׁשָּׁה צְעָדִים וַיִּזְבַּח שׁוֹר וּמְרִֽיא ׃

¹⁴ וְדָוִד מְכַרְכֵּר בְּכָל ־ עֹז לִפְנֵי יְהוָה וְדָוִד חָגוּר אֵפוֹד בָּֽד ׃

¹⁵ וְדָוִד וְכָל ־ בֵּית יִשְׂרָאֵל מַעֲלִים אֶת ־ אֲרוֹן יְהוָה בִּתְרוּעָה וּבְקוֹל שׁוֹפָֽר ׃