וְאַתָּה בֶן ־ אָדָם אַל ־ תִּירָא מֵהֶם וּמִדִּבְרֵיהֶם אַל ־ תִּירָא כִּי סָרָבִים וְסַלּוֹנִים אוֹתָךְ וְאֶל ־ עַקְרַבִּים אַתָּה יוֹשֵׁב מִדִּבְרֵיהֶם אַל ־ תִּירָא וּמִפְּנֵיהֶם אַל ־ תֵּחָת כִּי בֵּית מְרִי הֵֽמָּה ׃

וְדִבַּרְתָּ אֶת ־ דְּבָרַי אֲלֵיהֶם אִֽם ־ יִשְׁמְעוּ וְאִם ־ יֶחְדָּלוּ כִּי מְרִי הֵֽמָּה ׃ פ

עַל הַר ־ גָּבֹהַ עֲלִי ־ לָךְ מְבַשֶּׂרֶת צִיּוֹן הָרִימִי בַכֹּחַ קוֹלֵךְ מְבַשֶּׂרֶת יְרוּשָׁלִָם הָרִימִי אַל ־ תִּירָאִי אִמְרִי לְעָרֵי יְהוּדָה הִנֵּה אֱלֹהֵיכֶֽם ׃

בַּיּוֹם הַהוּא יֵאָמֵר לִירֽוּשָׁלִַם אַל ־ תִּירָאִי צִיּוֹן אַל ־ יִרְפּוּ יָדָֽיִךְ ׃

יְהוָה אֱלֹהַיִךְ בְּקִרְבֵּך גִּבּוֹר יוֹשִׁיעַ יָשִׂישׂ עָלַיִךְ בְּשִׂמְחָה יַחֲרִישׁ בְּאַהֲבָתוֹ יָגִיל עָלַיִךְ בְּרִנָּֽה ׃

וַיֹּאמֶר אַל ־ תִּירָא כִּי רַבִּים אֲשֶׁר אִתָּנוּ מֵאֲשֶׁר אוֹתָֽם ׃

וַיִּתְפַּלֵּל אֱלִישָׁע וַיֹּאמַר יְהוָה פְּקַח ־ נָא אֶת ־ עֵינָיו וְיִרְאֶה וַיִּפְקַח יְהוָה אֶת ־ עֵינֵי הַנַּעַר וַיַּרְא וְהִנֵּה הָהָר מָלֵא סוּסִים וְרֶכֶב אֵשׁ סְבִיבֹת אֱלִישָֽׁע ׃

הֲלוֹא צִוִּיתִיךָ חֲזַק וֶאֱמָץ אַֽל ־ תַּעֲרֹץ וְאַל ־ תֵּחָת כִּי עִמְּךָ יְהוָה אֱלֹהֶיךָ בְּכֹל אֲשֶׁר תֵּלֵֽךְ ׃ פ

אַל ־ תִּירָא כִּי עִמְּךָ ־ אָנִי אַל ־ תִּשְׁתָּע כִּֽי ־ אֲנִי אֱלֹהֶיךָ אִמַּצְתִּיךָ אַף ־ עֲזַרְתִּיךָ אַף ־ תְּמַכְתִּיךָ בִּימִין צִדְקִֽי ׃

אַל ־ תִּֽירְאִי אֲדָמָה גִּילִי וּשְׂמָחִי כִּֽי ־ הִגְדִּיל יְהוָה לַעֲשֽׂוֹת ׃

כִּי אֲנִי יְהוָה אֱלֹהֶיךָ מַחֲזִיק יְמִינֶךָ הָאֹמֵר לְךָ אַל ־ תִּירָא אֲנִי עֲזַרְתִּֽיךָ ׃ ס

אַל ־ תִּֽירְאִי תּוֹלַעַת יַֽעֲקֹב מְתֵי יִשְׂרָאֵל אֲנִי עֲזַרְתִּיךְ נְאֻם ־ יְהוָה וְגֹאֲלֵךְ קְדוֹשׁ יִשְׂרָאֵֽל ׃

אַחַר ׀ הַדְּבָרִים הָאֵלֶּה הָיָה דְבַר ־ יְהוָה אֶל ־ אַבְרָם בַּֽמַּחֲזֶה לֵאמֹר אַל ־ תִּירָא אַבְרָם אָנֹכִי מָגֵן לָךְ שְׂכָרְךָ הַרְבֵּה מְאֹֽד ׃

וַיֹּאמֶר יְהוָה אֵלַי אַל ־ תֹּאמַר נַעַר אָנֹכִי כִּי עַֽל ־ כָּל ־ אֲשֶׁר אֶֽשְׁלָחֲךָ תֵּלֵךְ וְאֵת כָּל ־ אֲשֶׁר אֲצַוְּךָ תְּדַבֵּֽר ׃

אַל ־ תִּירָא מִפְּנֵיהֶם כִּֽי ־ אִתְּךָ אֲנִי לְהַצִּלֶךָ נְאֻם ־ יְהוָֽה ׃

חִזְקוּ וְאִמְצוּ אַל ־ תִּֽירְאוּ וְאַל ־ תַּעַרְצוּ מִפְּנֵיהֶם כִּי ׀ יְהוָה אֱלֹהֶיךָ הוּא הַהֹלֵךְ עִמָּךְ לֹא יַרְפְּךָ וְלֹא יַעַזְבֶֽךָּ ׃ פ