Proximidade

וַֽיְהִי ־ שָׁם עִם ־ יְהוָה אַרְבָּעִים יוֹם וְאַרְבָּעִים לַיְלָה לֶחֶם לֹא אָכַל וּמַיִם לֹא שָׁתָה וַיִּכְתֹּב עַל ־ הַלֻּחֹת אֵת דִּבְרֵי הַבְּרִית עֲשֶׂרֶת הַדְּבָרִֽים ׃

Êxodo 34:28

מָגִנֵּנוּ רְאֵה אֱלֹהִים וְהַבֵּט פְּנֵי מְשִׁיחֶֽךָ ׃

Salmos 84:10

אַךְ ׀ טוֹב וָחֶסֶד יִרְדְּפוּנִי כָּל ־ יְמֵי חַיָּי וְשַׁבְתִּי בְּבֵית ־ יְהוָה לְאֹרֶךְ יָמִֽים ׃

Salmos 23:6

וּֽבְרַחֲמֶיךָ הָרַבִּים לֹֽא ־ עֲשִׂיתָם כָּלָה וְלֹא עֲזַבְתָּם כִּי אֵֽל ־ חַנּוּן וְרַחוּם אָֽתָּה ׃

Neemias 9:31

פְּנֵי יְהוָה בְּעֹשֵׂי רָע לְהַכְרִית מֵאֶרֶץ זִכְרָֽם ׃

צָעֲקוּ וַיהוָה שָׁמֵעַ וּמִכָּל ־ צָרוֹתָם הִצִּילָֽם ׃

Salmos 34:17,18

תּֽוֹדִיעֵנִי אֹרַח חַיִּים שֹׂבַע שְׂמָחוֹת אֶת ־ פָּנֶיךָ נְעִמוֹת בִּימִינְךָ נֶֽצַח ׃

Salmos 16:11

1 וַעֲזַרְיָהוּ בֶּן ־ עוֹדֵד הָיְתָה עָלָיו רוּחַ אֱלֹהִֽים ׃

2 וַיֵּצֵא לִפְנֵי אָסָא וַיֹּאמֶר לוֹ שְׁמָעוּנִי אָסָא וְכָל ־ יְהוּדָה וּבִנְיָמִן יְהוָה עִמָּכֶם בִּֽהְיֽוֹתְכֶם עִמּוֹ וְאִֽם ־ תִּדְרְשֻׁהוּ יִמָּצֵא לָכֶם וְאִם ־ תַּעַזְבֻהוּ יַעֲזֹב אֶתְכֶֽם ׃ ס

3 וְיָמִים רַבִּים לְיִשְׂרָאֵל לְלֹא ׀ אֱלֹהֵי אֱמֶת וּלְלֹא כֹּהֵן מוֹרֶה וּלְלֹא תוֹרָֽה ׃

4 וַיָּשָׁב בַּצַּר ־ לוֹ עַל ־ יְהוָה אֱלֹהֵי יִשְׂרָאֵל וַיְבַקְשֻׁהוּ וַיִּמָּצֵא לָהֶֽם ׃

5 וּבָעִתִּים הָהֵם אֵין שָׁלוֹם לַיּוֹצֵא וְלַבָּא כִּי מְהוּמֹת רַבּוֹת עַל כָּל ־ יוֹשְׁבֵי הָאֲרָצֽוֹת ׃

6 וְכֻתְּתוּ גוֹי ־ בְּגוֹי וְעִיר בְּעִיר כִּֽי ־ אֱלֹהִים הֲמָמָם בְּכָל ־ צָרָֽה ׃

7 וְאַתֶּם חִזְקוּ וְאַל ־ יִרְפּוּ יְדֵיכֶם כִּי יֵשׁ שָׂכָר לִפְעֻלַּתְכֶֽם ׃ ס

8 וְכִשְׁמֹעַ אָסָא הַדְּבָרִים הָאֵלֶּה וְהַנְּבוּאָה עֹדֵד הַנָּבִיא הִתְחַזַּק וַיַּעֲבֵר הַשִּׁקּוּצִים מִכָּל ־ אֶרֶץ יְהוּדָה וּבִנְיָמִן וּמִן ־ הֶעָרִים אֲשֶׁר לָכַד מֵהַר אֶפְרָיִם וַיְחַדֵּשׁ אֶת ־ מִזְבַּח יְהוָה אֲשֶׁר לִפְנֵי אוּלָם יְהוָֽה ׃

9 וַיִּקְבֹּץ אֶת ־ כָּל ־ יְהוּדָה וּבִנְיָמִן וְהַגָּרִים עִמָּהֶם מֵאֶפְרַיִם וּמְנַשֶּׁה וּמִשִּׁמְעוֹן כִּֽי ־ נָפְלוּ עָלָיו מִיִּשְׂרָאֵל לָרֹב בִּרְאֹתָם כִּֽי ־ יְהוָה אֱלֹהָיו עִמּֽוֹ ׃ פ

10 וַיִּקָּבְצוּ יְרוּשָׁלִַם בַּחֹדֶשׁ הַשְּׁלִישִׁי לִשְׁנַת חֲמֵשׁ ־ עֶשְׂרֵה לְמַלְכוּת אָסָֽא ׃

11 וַיִּזְבְּחוּ לַיהוָה בַּיּוֹם הַהוּא מִן ־ הַשָּׁלָל הֵבִיאוּ בָּקָר שְׁבַע מֵאוֹת וְצֹאן שִׁבְעַת אֲלָפִֽים ׃

12 וַיָּבֹאוּ בַבְּרִית לִדְרוֹשׁ אֶת ־ יְהוָה אֱלֹהֵי אֲבוֹתֵיהֶם בְּכָל ־ לְבָבָם וּבְכָל ־ נַפְשָֽׁם ׃

13 וְכֹל אֲשֶׁר לֹֽא ־ יִדְרֹשׁ לַיהוָה אֱלֹהֵֽי ־ יִשְׂרָאֵל יוּמָת לְמִן ־ קָטֹן וְעַד ־ גָּדוֹל לְמֵאִישׁ וְעַד ־ אִשָּֽׁה ׃

14 וַיִּשָּֽׁבְעוּ לַיהוָה בְּקוֹל גָּדוֹל וּבִתְרוּעָה וּבַחֲצֹצְרוֹת וּבְשׁוֹפָרֽוֹת ׃

15 וַיִּשְׂמְחוּ כָל ־ יְהוּדָה עַל ־ הַשְּׁבוּעָה כִּי בְכָל ־ לְבָבָם נִשְׁבָּעוּ וּבְכָל ־ רְצוֹנָם בִּקְשֻׁהוּ וַיִּמָּצֵא לָהֶם וַיָּנַח יְהוָה לָהֶם מִסָּבִֽיב ׃

16 וְגַֽם ־ מַעֲכָה אֵם ׀ אָסָא הַמֶּלֶךְ הֱסִירָהּ מִגְּבִירָה אֲשֶׁר ־ עָשְׂתָה לַאֲשֵׁרָה מִפְלָצֶת וַיִּכְרֹת אָסָא אֶת ־ מִפְלַצְתָּהּ וַיָּדֶק וַיִּשְׂרֹף בְּנַחַל קִדְרֽוֹן ׃

17 וְהַבָּמוֹת לֹא ־ סָרוּ מִיִּשְׂרָאֵל רַק לְבַב ־ אָסָא הָיָה שָׁלֵם כָּל ־ יָמָֽיו ׃

18 וַיָּבֵא אֶת ־ קָדְשֵׁי אָבִיו וְקָֽדָשָׁיו בֵּית הָאֱלֹהִים כֶּסֶף וְזָהָב וְכֵלִֽים ׃

19 וּמִלְחָמָה לֹא הָיָתָה עַד שְׁנַת ־ שְׁלֹשִׁים וְחָמֵשׁ לְמַלְכוּת אָסָֽא ׃ ס

2 Crônicas 15

אַחַת ׀ שָׁאַלְתִּי מֵֽאֵת ־ יְהוָה אוֹתָהּ אֲבַקֵּשׁ שִׁבְתִּי בְּבֵית ־ יְהוָה כָּל ־ יְמֵי חַיַּי לַחֲזוֹת בְּנֹֽעַם ־ יְהוָה וּלְבַקֵּר בְּהֵיכָלֽוֹ ׃

Salmos 27:4

דִּרְשׁוּ יְהוָה וְעֻזּוֹ בַּקְּשׁוּ פָנָיו תָּמִֽיד ׃

Salmos 105:4

דִּרְשׁוּ יְהוָה וְעֻזּוֹ בַּקְּשׁוּ פָנָיו תָּמִֽיד ׃

1 Crônicas 16:11

דִּרְשׁוּ יְהוָה בְּהִמָּצְאוֹ קְרָאֻהוּ בִּֽהְיוֹתוֹ קָרֽוֹב ׃

Isaías 55:6

יְהִי יְהוָה אֱלֹהֵינוּ עִמָּנוּ כַּאֲשֶׁר הָיָה עִם ־ אֲבֹתֵינוּ אַל ־ יַעַזְבֵנוּ וְאַֽל ־ יִטְּשֵֽׁנוּ ׃

1 Reis 8:57