1 Nyɛɛ kase mi kaa bɔ nɛ ami hu i kase Kristo ɔ. 2 Mamimɛ suɔli, ye bua jɔ nyɛ he kaa nyɛ kai nihi nɛ i tsɔɔ nyɛ ɔ nɛ nyɛ peeɔ tsuo pɛpɛɛpɛ.

3 Se nɔ́ kake nɛ ma suɔ nɛ nyɛɛ le ji kaa yo e yi ji nyumu. Nɛ nyumu hu e yi ji Kristo, nɛ Kristo e yi ji Mawu. 4 Lɔ ɔ he je ɔ, ke nyumu ngɛ sɔlee aloo e ngɛ Mawu Munyu fiɛe nɛ pɛɛ ngɛ e yi ɔ, Kristo he guɛ nɛ e ngɛ gbee ji lɔ ɔ nɛ. 5 Nɛ yo nɛ sɔleɔ aloo e gbaa ngɛ magbɛ nɔ nɛ e fí duku ɔ, e huno he guɛ nɛ e ngɛ gbee ɔ nɛ. Ejakaa e yi nɔ fimi ɔ tsɔɔ kaa e ngɛ nyumu ɔ sisi. 6 Ke ji yo sume kaa e ha e yi nɔ ɔ, lɛɛ e sɛ e yi ɔ. Se ke yi ɔ sɛmi hu ngɛ lɛ zo pee ɔ, lɛɛ e ha nɔ mɔ. 7 Se nyumu lɛɛ ke e ngɛ sɔlee ɔ, e sɛ kaa e buɔ pɛɛ aloo e haa e yi nɔ, ejakaa e pɛɛ ɔ tsɔɔ kaa e ngɛ nimli a sisi.

Mawu hɛ mi nyami ji nyumu nɛ e bɔ ngɛ e subai nɔ ɔ. Nɛ yo hu ji nyumu hɛ mi nyami. 8 Ejakaa pi yo mi nɛ a je kekle nyumu ɔ kɛ je, se kekle yo ɔ je nyumu mi. 9 Nɛ a bɔ Adam nɛ ji kekle nyumu ɔ ngɛ yo nɛ ji Hawa a he je, se Adam he nɛ a bɔ Hawa ngɛ. 10 Lɔ ɔ he je ɔ, yo maa ha e yi nɔ kɛ tsɔɔ okadi kaa e ngɛ nyumu sisi, nɛ e ji okadi kɛ ha hiɔwe bɔfo ɔmɛ nɛ a bua jɔɔ he.

11 Se nyɛ kai kaa ngɛ Mawu blɔ nya tomi ɔ nya a, nyumu he hia yo, nɛ yo hu he hia nyumu. 12 Ejakaa kɛ je benɛ a je kekle yo kɛ je nyumu mi se ɔ, nyumuhi tsuo gu yo mi kɛ ba; se nyumu kɛ yo tsuo je Mawu nɛ ji a Bɔlɔ ɔ mi.

13 Ke nyɛ nitsɛmɛ nyɛ susuu ngɛ enɛ ɔ he kee? Anɛ e hi kaa yo nɛ e sɔle ngɛ magbɛ nɔ́ nɛ e he e yi nɔ lo? 14 Anɛ wa he nile tete tsɔɔ we wɔ kaa e sa nɛ yihi a ha a yi nɔ lo? Nyumu nɛ ngɛ yi bwɔmi gaga a, e peeɔ le zo. 15 Se yo nɛ ngɛ yi bwɔmi gaga a, e fiaa ngɛ he. 16 Ke nɔ ko ngɛ hlae nɛ e je enɛ ɔ he nguane ɔ, nɔ́ nɛ ngɛ ye nya ji, wɔɔ lɛɛ wa tsɔɔ we nɔ́ kpa ko pe enɛ ɔ, kaa yo nɛ e ha e yi nɔ ke e ngɛ Sɔlee, aloo e ngɛ fiee ngɛ ma he mi; nɛ Mawu asafo ɔmɛ kulaa hu suɔ ja.

17 Nɔ́ nɛ piɛ nɛ i ma ngma nyɛ ngɛ he ji nɔ́ ko nɛ i kɛ nyɛ kpa we gbi ngɛ he. Ejakaa e peeɔ mi kaa ke nyɛ kpe ngɛ Nutsɔ Niye ni ɔ he ɔ, nɔ́ yaya mohu jee mi pe nɔ́ kpakpa. 18 A deɔ mi nya sami kɛ mi gbamihi nɛ baa nyɛ kpɛti ke nyɛ kpe ɔ, nɛ i heɔ yeɔ fa kɛ fa. 19 E peeɔ mi kaa nyɛ ngɛ susue kaa e sa nɛ mi gbamihi nɛ ba nyɛ kpɛti konɛ ni kpakpa amɛ nɛ ngɛ nyɛ kpɛti ɔ, a je a he si nɛ a le mɛ.

20 Ke nyɛ bua nyɛ he nya ngɛ he kake ɔ, pi Nutsɔ ɔ Niye ni ɔ yemi nɛ nyɛ ba, 21 se nyɛ nitsɛmɛ nyɛ ni yemi. Ejakaa i nu kaa nyɛ mlɛ we nyɛ bi. Nɔ tsuaa nɔ yeɔ ni ɔ mlamlaamla nɛ e susuu we e nyɛmi he; nɛ benɛ hwɔ ngɛ nɔ ko yee ɔ, e nyɛmi lɛɛ e nu da hluu nɛ e de. 22 Anɛ e ji anɔkuale sane lo? Anɛ nyɛ be we nɛ nyɛ maa ye nyɛ niye ni ɔmɛ ngɛ mi, nɛ nyɛ maa nu da a hu ngɛ lejɛ ɔ? Mawu asafo ɔ he guɛ nɛ nyɛ ngɛ gbee aloo nihi nɛ be nɔ́ ko ɔmɛ a hɛ mi si nɛ nyɛ ngɛ puee lo? Mɛni sa kaa ma de ngɛ nɔ́ nɛ ɔmɛ a he? Nyɛ ngɛ hlae nɛ ma je nyɛ yi lo? Dabi! Enɛ ɔ lɛɛ i be nyɛ yi jee.

23 Ejakaa nɔ́ nɛ Nutsɔ ɔ nitsɛ de mi ngɛ e Niye ni ɔ he nɛ i kɛ ba ha nyɛ ɔ ji nɛ ɔ nɛ: Nutsɔ Yesu ɔ, jamɛ a nyɔ ɔ mi nɛ Yuda tsɔɔ e se blɔ ɔ, e wo abolo, 24 nɛ benɛ e na Mawu si ngɛ he ɔ, e ku mi nɛ e ngɔ ha e kaseli ɔmɛ nɛ e de ke, "Nyɛ he nɛ nyɛɛ ye. Enɛ ɔ ji ye nɔmlɔ tso nɛ a ku ha nyɛ. Nyɛɛ pee enɛ ɔ nɛ nyɛ kɛ kai mi." 25 Ja a nɔuu nɛ e wo wai kplu ɔ hu ngɛ Niye ni ɔ se nɛ e de ke, "Kplu nɛ ɔ ji somi he ngɛ nyɛ kɛ Mawu kpɛti nɛ a kɛ ye muɔ ɔ ma nɔ mi. Nyɛɛ pee enɛ ɔ si abɔ nɛ nyɛ maa nu ɔ nɛ nyɛ kɛ kai mi." 26 Ejakaa be fɛɛ be nɛ nyɛ maa ye abolo nɛ ɔ nɛ nyɛ maa nu kplu nɛ ɔ, nyɛ ngɛ Nutsɔ Mawetsɛ ɔ gbenɔ sane ɔ fiɛe kaa e gbo ha nyɛ. Nyɛɛ hi enɛ ɔ pee kɛ ya si be nɛ e maa ba ekohu.

27 Lɔ ɔ he je ɔ, nɔ nɛ yeɔ abolo nɛ ɔ nɛ e nuu Nutsɔ ɔ kplu ɔ ngɛ blɔ nɛ sɛ nɔ ɔ, e yeɔ Nutsɔ ɔ nɔmlɔ tso ɔ kɛ e muɔ ɔ he fɔ. 28 Enɛ ɔ he je ɔ, e sa nɛ nɔmlɔ nɛ ka lɛ nitsɛ e he saminya nɛ e hyɛ ha loko ji e ye abolo ɔ eko nɛ e nu kplu nɛ ɔ eko. 29 Ejakaa ke e ye abolo ɔ nɛ e nu kplu ɔ bɔ nɛ sɛ ɔ, Mawu kojomi mohu nɛ e ngɛ gblae kɛ ngɛ e nɔ́ fɔe, ejakaa e bui Kristo nɔmlɔ tso ɔ kɛ e gbenɔ ɔ. 30 Nɛ enɛ ɔ he je nɛ nyɛ ti nihi fuu gbɔjɔ nɛ a ngɛ hiɔ nue, nɛ nihi fuu hu gbo ɔ nɛ.

31 Se ke nyɛ ka nyɛ nitsɛmɛ nyɛ he saminya loko nyɛ ye ni ɔ, a be nyɛ kojoe, nɛ a be nyɛ tue gblae. 32 Se ke Nutsɔ ɔ kojo wɔ nɛ e gbla wa tue ɔ, e ji tsɔsemi kɛ ha wɔ bɔ nɛ pee nɛ a ko bu wɔ kɛ je ɔ tsuo fɔ. 33 Lɔ ɔ he je ɔ, mamimɛ suɔli, ke nyɛ bua nyɛ he nya ngɛ Nutsɔ ɔ Niye ni ɔ he ɔ, nyɛɛ mlɛ nyɛ bi. 34 Ke hwɔ ngɛ nyɛ ti nɔ ko yee ɔ, e ye ni ngɛ we mi bɔ nɛ pee nɛ e ko gbla kojomi kɛ fɔ lɛ nitsɛ e nɔ ke nyɛ tsuo nyɛ kpe.

I kɛ nyɛ maa sɛɛ ni kpa amɛ nɛ piɛ ɔ ke i ba su nyɛ ngɔ.