1 Nyɛɛ di suɔmi se nɛ nyɛ bi Mumi ɔ dloomi nike ni ɔmɛ hulɔ, titli ɔ, gbami kɛ Mawu Manye Munyu ɔ fiɛmi. 2 Ke nɔ ko tuɔ gbi kpahi nɛ pi kasemi nɛ e kase ɔ, e le kaa Mawu nɛ e kɛ ngɛ munyu tue se pi nimli, ejakaa a be sisi nue, akɛnɛ Mumi ɔ he wami nya e ngɛ munyu ɔ tue ngɛ, nɛ e ji laami mi munyu. 3 Nɔ nɛ gbaa nɛ e fiɛɔ Mawu Munyu ɔ, e yeɔ kɛ buaa nimli nɛ e woɔ mɛ he wami, nɛ e jɔɔ a bua konɛ a wa kɛ pi si ngɛ Nutsɔ ɔ mi. 4 Lɔ ɔ he je ɔ, nɔ nɛ tuɔ munyu ngɛ gbi kpahi a mi ɔ, e yeɔ kɛ buaa lɛ nitsɛ e he, ejakaa lɔ ɔ haa e waa ngɛ Mumi ɔ mi. Se nɔ nɛ gbaa nɛ e fiɛɔ Mawu Munyu ɔ, lɛɛ e yeɔ kɛ buaa asafo ɔ nɛ e hi kɛ pi si ngɛ he tsɔmi kɛ bua jɔmi mi.

5 I ko suɔ nɛ nyɛ tsuo nyɛ na gbi slɔɔtohi a tumi dloomi nike ni ɔ eko; se titli ɔ, gbami kɛ Mawu Munyu ɔ fiɛmi dloomi ɔ, ejakaa nɔ nɛ gbaa a, e pe nɔ nɛ tuɔ gbi slɔɔtohi nɛ a nui sisi, ja e nyɛɔ tsɔɔ sisi nɛ nɔ tsuaa nɔ naa he se.

6 Anyɛmimɛ suɔli, ke i ba nyɛ ngɔ nɛ i ba tu munyu ngɛ gbi nɛ nyɛ nui sisi mi ɔ, mɛni se nyɛ ma na ngɛ he? Se ke i de nyɛ nɔ́ nɛ Mawu je kpo kɛ tsɔɔ mi ɔ paa, loo nihi nɛ i le, loo nihi nɛ maa ba, loo Mawu anɔkuale Munyu ɔ, enɛ ɔmɛ ji níhi nɛ maa ye kɛ bua nyɛ. 7 Kaa bɔ nɛ bɛ loo saku nɛ a fiaa a ngɛ ɔ, nɛ ke e pɛmi ɔ mi tsɔ we nɛ a nui sisi ɔ, ja a nɛ gbi nɛ a nui sisi ngɛ, ejakaa ke a ngɛ bɛ kpae aloo a ngɛ saku fiae nɛ e mi tsɔ we ɔ, nɔ ko be lee nɔ́ nɛ a ngɛ kpae aloo nɔ́ nɛ a ngɛ fiae. 8 Nɛ ke sojahi a bɛ kpalɔ ɔ bɛ kpami ɔ mi tsɔ we ɔ, kɛ soja amɛ maa pee kɛ le kaa a ngɛ mɛ ta nga nɔ tsɛe kɛɛ? 9 Ja a nɔuu kɛ ke nyɛ hu nyɛ tu gbi nɛ a nui sisi ɔ, nɔ ko be nɔ́ nɛ nyɛ ngɛ dee ɔ sisi nue. Ke e ba mi ja a, lɛɛ nyɛ ngɛ kaa nɔ ko nɛ e kɛ gbogbo ngɛ munyu tue.

10 Gbi slɔɔtohi fuu ngɛ je ɔ mi nɛ a he ngɛ se nami kɛ ha nihi nɛ nuɔ a sisi ɔ. 11 Se a he be se nami kɛ ha mi, ejakaa ke nɔ ko kɛ mi ngɛ gbi nɛ ɔmɛ eko tue nɛ i nui sisi ɔ, e ma plɛ he kpa no ngɛ ye hɛ mi nɛ ami hu i peeɔ ma je no ngɛ e hɛ mi. 12 Si abɔ nɛ nyɛ ngɛ Mumi mi dloomi ni ɔmɛ a se die ɔ, nyɛ bi níhi nɛ a he hia pe kulaa kɛ níhi nɛ maa ye kɛ bua asafo ɔ tsuo.

13 Lɔ ɔ he je ɔ, ke a dloo nɔ ko nɛ e tuɔ gbihi nɛ a nui sisi ɔ, e sɔle nɛ e kpa pɛɛ konɛ a dloo lɛ nɛ e nyɛ nɛ e tsɔɔ nihi nɛ e deɔ ɔmɛ a sisi hulɔ. 14 Ejakaa ke i sɔleɔ ngɛ gbi nɛ i nui sisi mi ɔ, ye mumi ɔ sɔleɔ lɛɛ, se i li nɔ́ nɛ i ngɛ dee ɔ. 15 Lɛɛ kɛ ma pee kɛɛ? E sa nɛ ma pee ni enyɔ ɔmɛ tsuo. Ma sɔle ngɛ gbi nɛ a nui sisi mi kɛ gbi nɛ nɔ tsuaa nɔ nuɔ sisi mi. Ma la ngɛ gbi nɛ a nui mi, nɛ ma la ngɛ gbi nɛ a nuɔ sisi mi konɛ ma nyɛ nu Mawu yi jemi nɛ i ngɛ jee ɔ sisi. 16 Ejakaa ke o kɛ mumi ɔ kɛkɛ ngɛ Mawu yi jee ngɛ gbi nɛ a nui sisi mi ɔ, kɛ maa pee kɛɛ nɛ nihi nɛ nui nɔ́ nɛ o ngɛ dee ɔ sisi ɔ maa piɛ o he kɛ je Mawu yi nɛ a na lɛ si kɛɛ? 17 E ngɛ mi kaa o ngɛ Mawu si nae saminya mohu, se o yi kɛ bua we nihi nɛ ngɛ lejɛ ɔ.

18 I naa Mawu si kaa i tuɔ gbi slɔɔtohi ngɛ laami mi pe nyɛ ti nɔ tsuaa nɔ. 19 Se ngɛ asafo ɔ hɛ mi ɔ, ma suɔ kaa ma tu munyu kakaaka enuɔ pɛ nɛ a maa nu sisi nɛ e maa ye kɛ bua ni kpahi pe nɔ nɛ ma tu munyu akpe nyɔngma ngɛ gbi slɔɔtohi nɛ a nui sisi mi.

20 Anyɛmimɛ suɔli, nyɛ ko pee nyɛ he jokuɛwi ngɛ nɔ́ nɛ ɔmɛ a sisi numi mi. Nyɛɛ pee nyɛ he bimwɔwi ngɛ yayami peemi blɔ fa mi. Se ngɛ juɛmi blɔ fa mi ɔ, nyɛɛ pee nyɛ he juɛmitsɛmɛ nɛ nuɔ níhi kaa enɛ ɔmɛ a sisi. 21 Ejakaa a de wɔ ngɛ blema Ngmami ɔ mi kaa Mawu maa tsɔ nihi kɛ je zugba kpahi a nɔ kɛ ba nɛ a kɛ e ma a ba tu munyu ngɛ gbi slɔɔtohi a mi, se a be mɛ tue bue po. 22 Lɔ ɔ he je ɔ, gbi slɔɔtohi a tumi pi Mawu he wami okadi ha Mawu bimɛ. Se mohu e ji okadi kɛ ha nihi nɛ he we yi. Gbami nɛ ji Mawu Munyu ɔ e anɔkuale tluluu ɔ fiɛmi ɔ ji nɔ́ nɛ he hia ni nɛmɛ nɛ he ye ɔ, se pi ni nɛmɛ nɛ he we yi. 23 Ja a he je ɔ, ke nɔ nɛ he we yi aloo nɔ nɛ na we dloomi ni nɛ ɔmɛ eko ba sɔlemi nɛ e ba nu nɛ asafo mluku ɔ tsuo ngɛ munyu tue ngɛ gbi slɔɔtohi a mi ɔ, e ma susu kaa nyɛ ngɛ godo nue. 24 Se ke nyɛ ngɛ gbae nɛ nɔ ko nɛ he we yi aloo nyɛmi he ko ngɛ Kristo mi nɛ nui ni nɛ ɔmɛ a sisi ba je lejɛ ɔ, fiɛmi nɛ ɔmɛ tsuo ma ha nɛ e he nile maa kojo lɛ nɛ e maa nu e he lo sisi kaa yayami peelɔ ji lɛ. 25 Nyɛ fiɛmi ɔ ma je e juɛmi mi laami níhi kpo ngɔ tsɔɔ lɛ paa nɛ e ma ha nɛ e kpla si ngɛ e nakutso nya nɛ e ja Mawu nɛ e ye odase kaa Mawu ngɛ nyɛ kpɛti niinɛ.

26 Anyɛmimɛ, nɔ́ nɛ i ngɛ nyɛ dee ji, ke nyɛ bua nyɛ he nya nɛ nyɛ ma ja Mawu, nɛ nyɛ ti nɔ ko ngɛ la ko, nɔ ko hu ngɛ tsɔɔmi ko, nɔ ko ngɛ Mawu sɛ titli ko kpo jemi, nɔ ko hu ngɛ gbi kpa ko tumi, nɛ nɔ ko hu ngɛ sisi tsɔɔmi ko ɔ, a pee ni nɛ ɔmɛ tsuo bɔ nɛ e maa ye kɛ bua nɔ tsuaa nɔ nɛ e ma ha e nane nɛ pi si ngɛ Nutsɔ ɔ mi. 27 Ke nihi maa tu gbi slɔɔto kpa ko ɔ, a he nɛ ko hiɛ pe enyɔ loo etɛ, nɛ a tu kakaaka konɛ nɔ kpa ko hu nɛ tsɔɔ nɔ nɛ a ngɛ dee ɔ sisi. 28 Se ke sisi tsɔɔlɔ ko be lejɛ ɔ, a tu munyu ɔ zaa kɛ ha mɛ nitsɛmɛ a he kɛ Mawu nɛ nɔ ko nɛ ko nu a nya.

29 Gbali enyɔ loo etɛ ɔ, a tu munyu ɔ kakaaka konɛ nihi nɛ piɛ ɔ a bu tue. 30 Se ke nɔ ko ngɛ gbae nɛ jamɛ a be ɔ mi nɔuu nɔ ko na Mawu sɛ ko ɔ, gbalɔ ɔ nɛ jɔɔ munyu ɔ tumi. 31 Enɛ ɔ ma ha nɛ nihi tsuo nɛ a dloo mɛ gbami ɔ ma na he blɔ nɛ a gba kakaaka konɛ nɔ tsuaa nɔ nɛ kase nɔ ko kɛ ye kɛ bua e he. 32 Nyɛɛ le kaa ke gbalɔ ko ná Mawu sɛ ko ɔ, e ma nyɛ ye e he nɔ nɛ e be munyu tue kɛ ya si e maa su e nɔ. 33 Ejakaa Mawu pi nɔ nɛ suɔ blɔ nya tomi nɛ ngɛ basabasa. Se mohu nɔ nɛ e suɔ ji kake peemi kɛ he jɔmi kaa bɔ nɛ e ngɛ ngɛ asafo ɔmɛ a mi ɔ.

34 Yi ɔmɛ a ko tu munyu ngɛ asafo kpehi a mi. A ko ngmɛ mɛ blɔ nɛ a tu munyu ngɛ nihi a he sɛsɛmi mi, ejakaa a ngɛ nyumu ɔmɛ a sisi kaa bɔ nɛ Ngmami ɔ de ɔ. 35 Ke a ngɛ sane bimi ko ɔ, a bi a huno ɔmɛ ngɛ we mi, ejakaa e sɛ kaa yihi tuɔ munyu ngɛ asafo kpehi a mi. 36 Korinto bi, anɛ nyɛɛ kɛ mi kpa we gbi lo? Anɛ nyɛ ngɛ susue kaa nyɛ kɛkɛ nyɛ ngɔ nɛ Mawu Munyu ɔ ba nɛ nyɛ ngɔ e maa gbe nya ngɛ lo? Ke ja a, lɛɛ nyɛ ngɛ nyɛ he mlɔɔe. 37 Ke nyɛ ti nɔ ko buu e he kaa gbalɔ ji lɛ aloo a dloo lɛ Mumi Klɔuklɔu ɔ mi níke nɔ́ titli ko ɔ, e sa nɛ e le kaa nɔ́ nɛ i ngɛ dee ɔ, e ji kita nɛ je Nutsɔ ɔ nitsɛ dɛ mi. 38 Se ke nɔ ko ngɛ nɛ e kɛ mi kpa we gbi lolo ɔ, wa maa ngmɛɛ e he ngɛ e nɔ́ nɛ e li ɔ mi.

39 Lɔ ɔ he je ɔ, anyɛmimɛ, nyɛɛ di gbami se, bɔ nɛ pee nɛ nyɛ nyɛ nɛ nyɛɛ fiɛ Mawu Munyu ɔ nɛ e mi nɛ tsɔ; nɛ nyɛ ko de ke gbi slɔɔtohi a tumi hi. 40 Se mohu nyɛɛ pee nɔ́ tsuaa nɔ́ nɛ da ngɛ e blɔ nɔ.