1 Mamimɛ, ma suɔ nɛ ma de nyɛ dloomi ni tsumi nɛ Mawu tsu kɛ ha Makedonia asafo ɔmɛ ɔ.

2 E ngɛ mi kaa a ngɛ nɔ nami kɛ he hiami babauu mi mohu, se kɛ ɔ, a bua jɔ a he ngɛ a ohia si himi ɔ mi, nɛ a je a mi mi jɔmi ɔ mi nɛ a ke nihi ni babauu kaa niatsɛmɛ. 3 Nɛ ma nyɛ ye he odase kaa tsa pi bɔ nɛ a ma nyɛ kɛkɛ nɛ a ha, se a ha kɛ be nɔ po ngɛ mɛ nitsɛmɛ a suɔmi nya. 4 A kpa wɔ pɛɛ kaa waa ngɔ sika nɛ a tsu ɔ kɛ ya ha nyɛmimɛ Kristo se nyɛɛli ɔmɛ ngɛ Yerusalem bɔ nɛ pee nɛ mɛ hu a na bua jɔmi kaa a ye kɛ bua mɛ. 5 Nɔ́ nɛ a pee nɛ wa hɛ be nɔ́ kulaa ji kaa, a ngɔ a he kɛ ha Nutsɔ ɔ kekle kɛ wɔ hu, konɛ Nutsɔ ɔ nɛ kudɔ mɛ kɛ gu wa nɔ.

6 Enɛ ɔ ha nɛ wa kpa Tito pɛɛ konɛ bɔ nɛ e je ni tsumi ɔ sisi ɔ, e ya nɔ nɛ e wo nyɛ he wami kɛ gbe nya. 7 Nɛ kaa bɔ nɛ nyɛ hine hɛ mi nyɛɛli ngɛ nihi fuu mi, ngɛ hemi kɛ yemi kɛ munyu tumi kɛ nile kɛ mɔde bɔmi kɛ suɔmi mi ɔ, wa maa suɔ nɛ nyɛɛ pee hɛ mi nyɛɛli ngɛ ni kemi mi ngɛ suɔmi mi hulɔ. 8 Tsa pi mlaa nɛ i ngɛ nyɛ woe; nɛ i de we ke doo ɔ, nyɛɛ pee hulɔ, se nihi suɔ kaa a maa pee. Nɛ enɛ ɔ ha nɛ a naa nyɛ suɔmi kaa anɔkuale suɔmi, se pi munyu gu tumi.

9 Nyɛ le kaa wa Nutsɔ Yesu hyi tɔ kɛ suɔmi kɛ mi mi jɔmi, ejakaa lɛ nɛ ji niatsɛ ɔ, e plɛ ohiafo ngɛ nyɛ yemi kɛ buami he je, konɛ nyɛɛ gu e ohia a nɔ kɛ plɛ niatsɛmɛ.

10 I ngɛ nyɛ slɔe kaa nyɛɛ gbe nɔ́ nɛ nyɛ je sisi jeha ji nɛ ɔ nya, ejakaa nyɛ ji nihi nɛ wo kikɛmɛ a juɛmi nɛ ɔ kɛ ba, nɛ nyɛ nɔuu nɛ nyɛ je sisi hulɔ. 11 Nyɛ tsa ni tsumi ɔ nɔ kɛ hɛ dɔ nɛ nyɛɛ gbe nya kaa bɔ nɛ nyɛɛ kɛ he wami je sisi ɔ, nɛ nyɛ ha bɔ nɛ nyɛ ma nyɛ kɛ je bɔ nɛ nyɛ ngɛ ɔ mi kɛ bua jɔmi. 12 Ejakaa ke e je nyɛ tsui mi ɔ, lɛɛ nyɛ ha bɔ nɛ nyɛ ma nyɛ, nɛ e maa muɔ Mawu hɛ kaa nyɛ ha bɔ nɛ nyɛ bua jɔ he, se pi bɔ nɛ nyɛ bua jɔɛ he.

13 I de we kaa ni nɛmɛ nɛ nyɛ ke mɛ ni ɔ, a na ni kpɔtɔɔ nɛ a bua nɛ jɔ a he, nɛ nyɛɛ lɛɛ nyɛɛ hao. 14 Se mohu ma suɔ kaa nyɛɛ kɛ mɛ nɛ dla nɔ́ nɛ nyɛ ngɛ ɔ mi. Amlɔ nɛ ɔ, nyɛ ngɛ ni bɔ nɛ sa nɛ nyɛ ma nyɛ ye kɛ bua ni nɛmɛ nɛ e fi mɛ ɔ, konɛ mɛ hu a ye kɛ bua nyɛ ngɛ nyɛ fimi be mi; enɛ ɔ ma ha nɛ nɔ tsuaa nɔ ma na e hiami nɔ́ pɛpɛɛpɛ. 15 Kaa bɔ nɛ Ngmami ɔ de ɔ, "Nɔ nɛ bua fuu nya a, e na we kɛ bi nɔ; nɛ nɔ nɛ bua bɔɔ nya a, e na bɔ nɛ sa."

16 I naa Mawu si kaa e kɛ nyɛ he mɔde bɔmi nɛ i ngɛ bɔe nɛ ɔ nɔuu wo Tito hu e tsui mi. 17 Tito bu ye ga womi ɔ tue mohu, se e ji lɛ nitsɛ hu e suɔmi kaa e ba nyɛ ngɔ ekohu nɛ e ba ye kɛ bua nyɛ. 18 E ma nyɛ ngɔ kɛ nyɛmi ko nɛ a le lɛ saminya ngɛ asafo ɔmɛ kulaa a mi kaa Manye Munyu ɔ fiɛlɔ agbo. 19 Anɔkuale ji kaa asafo ɔmɛ kulaa hla kikɛmɛ a nyɛmi nɛ ɔ nɛ e piɛ ye he nɛ wa wo nike ni ɔmɛ kɛ ya Yerusalem. Enɛ ɔ maa wo Nutsɔ ɔ hɛ mi nyami nɛ e maa tsɔɔ mɔde nɛ wa ngɛ bɔe nɛ waa ye kɛ bua wa he. 20 E piɛɛ wa he, ejakaa wa be suɔe nɛ a tu wa he munyu yaya ko ngɛ nike ni agbo nɛ wa hɛɛ kɛ yaa nɛ ɔ he. 21 Mawu le kaa anɔkuale yemi ngɛ wa mi, se i suɔ kaa nimli hu nɛ a na. Nɛ lɔ ɔ he je nɛ wa to kikɛmɛ a blɔ nya nɛ ɔ ngɛ. 22 Wa ngɛ nyɛmi kpa ko hu tsɔe kɛ piɛɛ a he; wa ka lɛ ngɛ níhi fuu mi nɛ wa na kaa e yeɔ anɔkuale ngɛ asafo ɔ mi. Amlɔ nɛ ɔ, e hɛ dɔ kɛ ha bami ɔ ngɛ e hɛ nɛ e kɛ fɔ nyɛ nɔ ɔ he je, ejakaa i de lɛ kaa nyɛ yeɔ kɛ buaa nɔ.

23 Tito lɛɛ, ye he piɛlɔ nɛ e kɛ mi ngɛ ni tsue kɛ ha nyɛ yemi kɛ buami; nɛ nyɛmimɛ enyɔ ɔmɛ hu, wa asafo ɔmɛ a nane mi dali kɛ Kristo hɛ mi nyami ji mɛ.

24 Lɔ ɔ he je ɔ, nyɛɛ suɔ mɛ kaa bɔ nɛ nyɛ suɔ mi ɔ, nɛ nyɛɛ pee níhi nɛ wa fiaa kɛ fɔɔ nyɛ nɔ ngɛ mi ɔ kɛ ha mɛ.