1 "Hiɔwe Matsɛyemi ɔ ngɛ kaa wetsɛ ko nɛ je kpo makɛ mla nɛ e ho ya bɔ ni tsuli apaa nɛ a ya tsu ni ha lɛ ngɛ e wai ngmɔ mi. 2 Nɛ bɔ nɛ e kɛ apaa yeli ɔmɛ ye ni tsumi ɔ nya nɛ a kplɛɛ nɔ ji sidi akpe enyɔ ligbi kake; kɛkɛ nɛ e wo mɛ blɔ kɛ ho e wai ngmɔ ɔ mi ya.

3 Maa pee mɔtu ngmlɛ nɛɛ mi ɔ, e je kpo ekohu nɛ e ya na ni kpahi nɛ a daa si yaka gu ngɛ jua a nɔ; 4 nɛ e de mɛ ke a ya nɛ a ya tsu ni ngɛ e wai ngmɔ ɔ mi nɛ e maa wo mɛ hiɔ bɔ nɛ sa; nɛ a ho. 5 Jehanɛ ɔ kɛ ma piani ngmlɛ nyɔngma kɛ enyɔ kɛ ngmlɛ etɛ mi ɔ, e je kpo ekohu nɛ e ya pee ja a nɔuu.

6 Maa pee gbɔkuɛ ngmlɛ enuɔ mi ɔ, e je kpo ekohu nɛ e ya na ni kpahi hu nɛ a daa si yaka gu, nɛ e bi mɛ ke, ‘Mɛni he je nɛ nyɛ tsu we nɔ́ ko mwɔnɛ ɔ?’

7 Nɛ a de lɛ ke, ‘Ejakaa nɔ ko ba bɔɛ wɔ apaa.’ Nɛ e de mɛ ke, ‘Ke ja a, lɛɛ nyɛ hu nyɛ ba ho ye wai ngmɔ ɔ mi ya.’

8 Benɛ e su gbɔkuɛ ɔ, wai ngmɔtsɛ ɔ de e hiɔ wolɔ ɔ ke e ya wo ni tsuli ɔmɛ hiɔ; e wo kɛ je sekpɛtsɛ ɔmɛ a nɔ kɛ ya su kekletsɛ ɔmɛ a nɔ. 9 Nɛ benɛ gbɔkuɛ ngmɛ enuɔtsɛ ɔmɛ ba a, a ti nɔ tsuaa nɔ na sidi akpe enyɔ. 10 Benɛ e su kekle bi ɔmɛ a nɔ ɔ, a susu kaa a hiɔwo ɔ maa hiɛ pe sekpɛ bi ɔmɛ a nɔ́ ɔ, se mɛ hu a na ja a nɔuu.

11 Benɛ a nine su a hiɔwo ɔ nɔ ɔ, a tu munyu kɛ si ngmɔtsɛ ɔ, 12 nɛ a de ke, ‘Sekpɛtsɛ nɛ ɔmɛ ɔ, ngmlɛfia kake kɛkɛ nɛ a tsu ni ɔ nɛ o ha waa kɛ mɛ hiɔwo kake, wɔ nihi nɛ wa tsu ni kɛ je mɔtu nɛ pɔ tɔ wɔ nɛ latsa tsa wɔ ɔ.’

13 Ngmɔtsɛ ɔ he nɔ nɛ e de a ti nɔ kake ke, ‘Ye huɛ, i pee we mo yayami ko! Anɛ tsa pi sidi akpe enyɔ nɛ i kɛ mo ye nya a lo? 14 Mo he o hiɔwo ɔ nɛ o ho! Ye suɔmi nya ni ji kaa ma ha sekpɛtsɛ ɔmɛ kaa bɔ nɛ i ha nyɛ ɔ kɛ. 15 Anɛ i be he blɔ kaa i peeɔ nɔ́ nɛ i suɔ kɛ ami nitsɛ ye sika lo? Mɛni he je nɛ e sa kaa o na abofu ngɛ ye mi mi jɔmi ɔ he?’ 16 Ja a nɔuu e maa ba mi kaa sekpɛ bi ma plɛ kekle bi, nɛ kekle bi ma plɛ sekpɛ bi."

17 Benɛ Yesu yaa Yerusalem ɔ, e tsɛ e kaseli nyɔngma kɛ enyɔ ɔmɛ kɛ ya se nɛ e de mɛ ke, 18 "Nyɛɛ hyɛ, wa yaa Yerusalem nɛ a ma je Nɔmlɔ Bi ɔ he gbi kɛ ha osɔfo nikɔtɔma amɛ kɛ mlaa tsɔɔli ɔmɛ nɛ a maa bu lɛ gbenɔ fɔ. 19 A maa ngɔ lɛ kɛ ha ma je li ɔmɛ nɛ a maa ye e he fɛu, nɛ a maa fiaa lɛ kpa. Nyagbe ɔ a maa sɛu lɛ, nɛ ligbi nɛ ji etɛ ɔ nɔ ɔ, a ma tle lɛ si ekohu."

20 Kɛkɛ nɛ Zebedeo bimɛ ɔmɛ a nyɛ ɔ ngɔ e bimɛ nyumu ɔmɛ,Yakobo kɛ Yohane kɛ ba Yesu ngɔ nɛ a ba kpla si, nɛ e ba lɛ nɔ́ ko.

21 Yesu bi lɛ ke, "Mɛni o ngɛ hlae?" Nɛ e ha heto ke, "Mo ha nɛ ye bimɛ enyɔ nɛ ɔmɛ a ti nɔ kake nɛ hi o hiɔ nɔ, nɛ nɔ kake hu nɛ hi o muɔ nɔ ngɛ o Matsɛyemi ɔ mi."

22 Se Yesu he nɔ nɛ e de lɛ ke, "O li nɔ́ nɛ o ngɛ bie ɔ." Nɛ e bi Yakobo kɛ Yohane ke, "Anɛ nyɛ ma nyɛ maa nu tsimi nya nyu nɛ i yaa nu ɔ lo?" A he nɔ ke, "Ee, wa ma nyɛ!"

23 Nɛ Yesu de mɛ ke, "Nyɛ ma nyɛ maa nu ye tsimi ɔ nya nyu niinɛ, se ye hiɔ nɔ kɛ ye muɔ nɔ himi ɔ lɛɛ tsa pi ye nɔ i nɛ i kɛ haa. Hihe nɛ ɔmɛ ɔ, a to kɛ ha nihi nɛ ye Tsɛ hla momo ɔ."

24 Benɛ ni nyɔngma amɛ nu enɛ ɔ, a muklii mi fu Yakobo kɛ Yohane.

25 Se Yesu tsɛ mɛ kɛ ba e ngɔ nɛ e de mɛ ke, "Nyɛ le kaa ngɛ ma je li ɔmɛ a blɔ fa mi ɔ, matsɛ ɔmɛ yeɔ a nɔ, nɛ a kpɛti nimli ngua amɛ hu ngɛ nihi ngɛ a sisi nɛ a ngɛ he wami ngɛ a nɔ. 26 Se nyɛɛ lɛɛ e be ja ngɛ nyɛ kpɛti. Nyɛ ti nɔ tsuaa nɔ nɛ suɔ kaa e pee nɔmlɔ ngua ngɛ nyɛ kpɛti ɔ, lɛ mohu e pee nyɛ sɔmɔlɔ. 27 Nɛ nɔ tsuaa nɔ nɛ suɔ kaa e pee nɔkɔtɔma ngɛ nyɛ kpɛti ɔ, e pee nyɛ tsɔlɔ; 28 kaa bɔ nɛ Nɔmlɔ Bi ɔ bɛ nɛ a sɔmɔ lɛ, se e ba sɔmɔmi mohu, nɛ e ngɔ e wami ngɔ pee kpɔmi nɔ́ kɛ ha nihi fuu ɔ."

29 E ba mi kaa benɛ Yesu kɛ e kaseli ɔmɛ je Yeriko kɛ yaa a, nimli babauu nyɛɛ a se.

30 Nɛ nyumuhi hɛ yuyuili enyɔ hii si ngɛ blɔ ɔ he, nɛ benɛ a nu kaa Yesu bee ɔ, a bɔni ngmlaa kpami ke, "Moo na wɔ mɔbɔ, Nutsɔ, David Bi."

31 Asafo ɔ ke a yi ke a pee dii, se a bɔni ngmlaa a kpami wawɛɛ pe kekle ɔ ke, "Moo na wɔ mɔbɔ, Nutsɔ, David Bi!"

32 Benɛ Yesu ba su he nɛ a ngɛ ɔ, e da si nɛ e tsɛ mɛ nɛ e bi mɛ ke, "Mɛni nyɛ ngɛ hlae nɛ ma pee ha nyɛ?" 33 Nɛ a de lɛ ke, "Nutsɔ, wa ngɛ hlae nɛ waa hyɛ ní!"

34 Yesu muklii mi sa lɛ ngɛ a he nɛ e ta a hɛ ngmɛ ɔmɛ a he, nɛ amlɔ ɔ nɔuu ɔ, a bɔni nɔ́ hyɛmi nɛ a nyɛɛ e se.