1,2 Yesu kɛ mɛ tu munyu ekohu ngɛ abɛhi a mi kɛ tsɔɔ bɔ nɛ Hiɔwe Matsɛyemi ɔ ngɛ ha. E de mɛ ke, "Hiɔwe Matsɛyemi ɔ ngɛ kaa matsɛ ko nɛ ngmɛ yo kpeemi okplɔɔ ha e binyumu. 3 E kpee nihi fuu, nɛ benɛ a gbe niye ni ɔ nya a, e tsɔ nihi ke a ya tsɛ nihi nɛ a kpee mɛ kɛ ma okplɔɔ ɔ he ɔ, se a bɛ. 4 E kpale tsɔ tsɔli kpahi ke a ya de mɛ ke, ‘A gbe nɔ́ tsuaa nɔ nya, a gbe ye na a ekomɛ kɛ ye lohwe zɔtsɛ ɔmɛ, lɔ ɔ he je ɔ, a ba yo kpeemi ɔ!’

5 Se ni ɔmɛ bui e tsɛmi ɔ nɛ a je kɛ ho a ni tsumihi ya; nɔ kake ho e ngmɔ mi ya, nɛ nɔ ko hu ho e jua yemi ya. 6 Ni nɛmɛ nɛ piɛ ɔ nu tsɔli ɔmɛ nɛ a wa mɛ yi mi nɛ a gbe a ti ni komɛ.

7 Kɛkɛ nɛ matsɛ ɔ mi mi fu nɛ e tsɔ e sojahi nɛ a ya gbe awi yeli ɔmɛ nɛ a sa a ma a. 8 Nɛ e de e tsɔli ɔmɛ ke, ‘A gbe yo kpeemi ni ɔ nya mohu, se nihi nɛ a kpee ɔ, a sɛ. 9 Ja he je ɔ, nyɛɛ je kpo kɛ ya gbɛjegbɛ ɔ kɔ nya amɛ nɛ nyɛ ya kpee nɔ tsuaa nɔ nɛ nyɛ maa na kɛ ba yo kpeemi he ɔ.’

10 Nɛ sɔmɔli ɔmɛ je kpo kɛ ho blɔ ɔmɛ a nɔ ya, nɛ a ya bua nihi nɛ a na amɛ tsuo a nya kɛ ba, nimli kpakpahi kɛ nimli yayamihi tsuo, nɛ yo kpeemi he ɔ hyi tɔ. 11 Se benɛ matsɛ ɔ ba ni ɔmɛ a he nyami ɔ, e ba na kaa nyumu ko ngɛ a kpɛti nɛ wui yo kpeemi tade.

12 Nɛ e bi lɛ ke, ‘Huɛ, kɛ pee kɛɛ nɛ o ba hiɛ ɔ nɛ o wui yo kpeemi tade?’ Se nyumu ɔ pɛ e nya mi.

13 Kɛkɛ nɛ matsɛ ɔ de e sɔmɔli ɔmɛ ke, ‘Nyɛɛ fi e ninehi kɛ e nanehi nɛ nyɛ wo lɛ ya sake kɛ fa blɔ se diblii ɔ mi, he nɛ ya fomi kɛ lungu nya kpemi ngɛ ɔ.’ 14 Ejakaa, a tsɛ nihi fuu mohu, se nihi bɔɔ pɛ a maa hla."

15 Nɛ Farisi bi ɔmɛ ya kpe konɛ a susu blɔ nɔ nɛ a maa gu kɛ ka Yesu he, nɛ e de nɔ́ ko nɛ a maa da nɔ kɛ nu lɛ. 16 Nɛ a tsɔ a kaseli ɔmɛ ekomɛ kɛ Herode bi ɔmɛ ekomɛ kɛ ho e ngɔ ya nɛ a ya bi lɛ ke, "Tsɔɔlɔ, wa le kaa anɔkualetsɛ ji mo. O tsɔɔ nɔ nɛ ji anɔkuale ɔ, nɛ o hlɛ nimli a mi, ejakaa o hyɛ we nimli a hɛ mi, nɛ o yi gbeye hulɔ. 17 Lɔ ɔ he je ɔ, de wɔ bɔ nɛ o susuu ha. Anɛ e da kaa a tsuɔ lapoo haa Kaisare aloo e dɛ."

18 Se Yesu kɔ a juɛmi yaya a se nɛ e de mɛ ke, "Osatotsɛmɛ, mɛnɔ nyɛ ngɛ kae kɛ munyu nɛ ɔ? 19 Nyɛ wo sika a eko kɛ ba tsɔɔ mi." Nɛ a kɛ pɛsua tsɔɔ lɛ.

20 Nɛ e bi mɛ ke, "Mɛnɔ foni ngɛ nɔ ɔ, nɛ mɛnɔ biɛ ngɛ sisi ɔ?"

21 A de lɛ ke, "Kaisare nɔ i." Nɛ e de mɛ ke, "E da, lɛɛ nyɛɛ ngɔ Kaisare nɔ́ kɛ ha Kaisare, konɛ nyɛɛ ngɔ nɔ́ tsuaa nɔ nɛ ji Mawu nɔ́ ɔ hu kɛ ha Mawu."

22 Heto nɛ e ha mɛ nɛ ɔ pee mɛ nyakpɛ nɛ a si lɛ nɛ a je.

23 Se jamɛ a ligbi ɔ nɔuu ɔ, Saduki bi ɔmɛ nɛ deɔ ke ni gbogboehi a si temi ko be ɔ hu ba e ngɔ ba bi lɛ ke, 24 "Tsɔɔlɔ, Mose de wɔ ke, ke nɔ ko gbo nɛ e be bi ɔ, e nyɛmi nɛ ngɔ e yo ɔ konɛ a bimɛ ɔmɛ nɛ ye e nyɛmi nɛ gbo ɔ gbosi ni ɔ. 25 Jehanɛ ɔ, nyɛmimɛ nyumuhi kpaago komɛ hi si. A Tɛte ɔ ngɔ yo, nɛ e gbo. Akɛnɛ e be bi he je ɔ, Tɛtɛ ɔ ngɔ e yo ɔ. 26 Tɛtɛ ɔ hu ba gbo, nɛ akɛnɛ lɛ hu e kɛ yo ɔ fɔ we bi he je ɔ, e si yo ɔ ke ha e senɔ Tɛɛ ɔ. E tsa nɔ ja a kɛ ya su nɔ nɛ ji kpaago ɔ nɔ. 27 Ngɛ mɛ tsuo a se ɔ yo ɔ hu ba gbo. 28 Jehanɛ ɔ, nyɛmimɛ kpaago nɛ ɔmɛ ɔ, a ti mɛnɔ maa pee yo ɔ tsɛ ngɛ ni gbogboehi a si temi ɔ mi, ejakaa mɛ tsuo a kɛ lɛ hi si hyɛ?"

29 Yesu he nɔ nɛ e de mɛ ke, "Nyɛ ngɛ tɔe, ejakaa nyɛ li Ngmami Klɔuklɔu ɔ kɛ Mawu he wami. 30 Ejakaa ngɛ ni gbogboehi a si temi ɔ mi ɔ, yo ngɔmi ko be, nɛ nɔ tsuaa nɔ ngɛ kaa Mawu bɔfo ngɛ hiɔwe. 31 Anɛ nyɛ kane we Ngmami ɔ nɛ kɔɔ ni gbogboehi a si temi he ɔ lo? Anɛ nyɛ yo we kaa nyɛ nɛ Mawu kɛ ngɛ munyu tue benɛ e de ke, 32 ‘Ami ji Abraham kɛ Isak kɛ Yakob a Mawu ɔ nɛ?’ Lɔ ɔ he je ɔ, Mawu pi ni gbogboehi a Mawu, se mohu hɛ kali a Mawu i."

33 Benɛ asafo ɔ nu enɛ ɔ, a nya kpɛ a he ngɛ e ni tsɔɔmi ɔ he. 34 Se benɛ Farisi bi ɔmɛ nu kaa Yesu ku Saduki bi ɔmɛ a nya la a, a ba bua a he nya ngɛ he kake, nɛ a pee a juɛmi kaa a ma ya bi munyu kpa ko. 35 Ja a he je ɔ, a ti nɔ kake nɛ ji mlaa tsɔɔlɔ ɔ ka lɛ nɛ e bi lɛ ke, 36 "Tsɔɔlɔ, Mose mlaa amɛ a kpɛti te nɔ́ nɛ ji ngua pe kulaa nɛɛ?"

37 Yesu he nɔ nɛ e de mɛ ke, " ‘Moo suɔ Nutsɔ ɔ Mawu ɔ kɛ o tsui kɛ o klaa kulaa kɛ o juɛmi kulaa.’ 38 Enɛ ɔ ji kita amɛ a mi kekle nɔ kɛ ngua pe kulaa. 39 Nɛ enyɔne ɔ nɛ nyɛɛ se ɔ ngɛ kaa kekle nɔ ɔ kɛ, ‘Moo suɔ o nyɛmi nɔmlɔ kaa bɔ nɛ o suɔ mo nitsɛ o he ɔ.’ 40 Mlaa nɔ nɛmɛ nɛ piɛ ɔmɛ kɛ gbali ɔmɛ a munyu ɔmɛ tsuo je mlaa enyɔ nɛ ɔmɛ a mi, nɛ ke o ye mlaa nɛ ɔmɛ a nɔ ɔ, o maa na kaa o ngɛ mlaa kpa amɛ tsuo a nɔ yee."

41 Benɛ Farisi bi ɔmɛ a nya ba bua a, Yesu bi mɛ ke, 42 "Kɛ nyɛ susuu ngɛ Kristo ɔ he kɛɛ? Mɛnɔ bi ji lɛ?" A ha lɛ heto ke, "David bi ji lɛ."

43 Nɛ e bi mɛ ekohu ke, "Lɛɛ mɛni he je mɔ nɛ benɛ Mumi Klɔuklɔu ɔ ba David nɔ nɛ e ngɛ munyu tue ɔ e tsɛ lɛ Nutsɔ nɛ e de ke, 44 ‘Mawu de ye Nutsɔ ɔ ke, Hii si ngɛ ye hiɔ nɔ kɛ ya si be mi nɛ ma ngɔ o he nyɛli ɔmɛ kɛ wo o nane sisi.’ 45 Ke David tsɛ lɛ ‘Nutsɔ’ ɔ, kɛ peeɔ kɛɛ nɛ e pa peeɔ e bi mɔ?"

46 A nyɛ we nɛ a ha lɛ heto ko, nɛ kɛ je jamɛ a be ɔ mi ɔ nɔ ko nyɛ we lɛ munyu ko nɛ e bi hu.