1 Benɛ Yesu tu e kaseli ɔmɛ munyu nɛ ɔ gbe nya a, e de mɛ ke,

2 "Kaa bɔ nɛ nyɛ le ɔ, e piɛ ligbi enyɔ pɛ nɛ a maa ye Hebemi Kaimi Ligbi ɔ, nɛ a ma je Nɔmlɔ Bi ɔ he gbi kɛ ha nɛ a sɛu lɛ."

3 Jamɛ a be ɔ mi ɔ, osɔfo nikɔtɔma amɛ kɛ Yuda mlaa tsɔɔli ɔmɛ ya bua a he nya ngɛ Kaiafa, osɔfo nɔkɔtɔma a we ɔ mi, 4 nɛ a ya hla blɔ nɔ nɛ a maa gu kɛ nu Yesu ngɛ ga mi nɛ a gbe lɛ. 5 Se a ma nya si kaa, "Tsa pi ngɛ Hebemi Ligbi ɔ nɔ, ejakaa gidigidi maa ba ma a mi."

6 Nɛ Yesu pue nɔ kɛ ho Betania ya, nɛ e ya to Simon, kpititsɛ ɔ we mi. 7 Se benɛ e hii si ngɛ ni yee ɔ, yo ko hɛɛ tɔ kɛ e mi nu je via nɛ he jua wa saminya kɛ ba e ngɔ nɛ e ba plɛ ngɔ pue e yi kpɛti.

8 Se benɛ e kaseli ɔmɛ na a, a mi mi fu nɛ a de ke, "Mɛni yaka sika puɛmi ji nɛ ɔ? 9 Jinɛ e sa kaa a jua nu je via nɛ ɔ sika fuu nɛ a ngɔ kɛ ha ohiafohi."

10 Se benɛ Yesu na a juɛmi ɔ, e de mɛ ke, "Mɛni he je nyɛ ngɛ yo nɛ ɔ haoe? Ejakaa e tsu ni kpakpa ha mi. 11 Nyɛɛ kɛ ohiafo ɔmɛ nɛ ngɛ daa, se ami lɛɛ tsa pi daa nɛ i kɛ nyɛ maa hi si. 12 E plɛ nu je via nɛ ɔ ngɔ pue ye nɔ kɛ to ye nɔmlɔ tso ɔ dlami kɛ pumi. 13 Niinɛ, i ngɛ nyɛ dee ke, he fɛɛ he nɛ a maa fiɛ Manye Munyu ɔ ngɛ, ngɛ je mi tsuo ɔ, a maa wo nɔ nɛ e pee nɛ ɔ ta kɛ kai lɛ."

14 Kɛkɛ nɛ Yuda Iskariot, kaseli ɔmɛ a ti nɔ kake je kɛ ho osɔfo nikɔtɔma amɛ a ngɔ ya, 15 nɛ e ya bi mɛ ke, "Mɛni nyɛ ma ha mi nɛ ma je Yesu kɛ wo nyɛ dɛ mi?" Nɛ a kane sika sidi nyingmi etɛ ngɔ ha lɛ. 16 Nɛ kɛ je jamɛ a be ɔ mi ɔ, Yuda Iskariot bɔni blɔ nɔ nɛ e maa gu kɛ tsɔɔ Yesu se blɔ hlami.

17 Benɛ Hebemi be ɔ kekle ligbi ɔ su ɔ, kaseli ɔmɛ ba Yesu ngɔ ba bi lɛ ke, "Jije o suɔ kaa wa ya dla kɛ ha Hebemi ɔ yemi?"

18 Nɛ e he nɔ de mɛ ke, "Nyɛɛ ya ma a mi nɛ nyɛ ya de asimasi ke, ‘Wa Nutsɔ ɔ ke, ye be su ta, nɛ i kɛ ye kaseli ɔmɛ ma ba ye Hebemi ɔ ngɛ o we ɔ mi.’ " 19 Nɛ kaseli ɔmɛ ya pee bɔ nɛ Yesu de mɛ ɔ, nɛ a ya dla Hebemi niye ni ɔ ngɔ to.

20 Jamɛ a ligbi ɔ gbɔkuɛ ɔ, e kɛ e kaseli nyɔngma kɛ enyɔ ɔ ya hi si ngɛ niye ni ɔ he. 21 Benɛ a ngɛ ni ɔ yee ɔ, e de mɛ ke, "Nyɛ ti nɔ kake maa tsɔɔ ye se blɔ."

22 Kɛkɛ nɛ kaseli ɔmɛ a ni pee mɔbɔmɔbɔ, nɛ a bɔni lɛ bimi kakaaka ke, "Nutsɔ, ami i lo?"

23 E he nɔ de mɛ ke, "Nɔ nɛ nine kɛ ye nine kpe ngɛ ka a mi ɔ, lɛ ji nɔ nɛ maa tsɔɔ ye se blɔ. 24 Nɔmlɔ Bi ɔ ma gbo kaa bɔ nɛ a ngma ngɛ e he ɔ mohu se due ha nɔmlɔ nɛ maa tsɔɔ e se blɔ ɔ, afani nɛ a fɔ we jamɛ a nɔmlɔ ɔ."

25 Kɛkɛ nɛ Yuda hu bi lɛ ke, "Nutsɔ, ami i lo?" Yesu he nɔ de lɛ ke, "Ee, mo i!"

26 Benɛ a ngɛ ni ɔ yee ɔ, Yesu wo abolo nyafii ko nɛ e gbaa nɔ, nɛ e ku mi, nɛ e ngɔ ha e kaseli ɔmɛ nɛ e de ke, "Nyɛ he nɛ nyɛɛ ye, ejakaa enɛ ɔ ji ye Nɔmlɔ tso ɔ nɛ."

27 E wo wai kplu ɔ, nɛ e na si, nɛ e ngɔ ha mɛ nɛ e de mɛ ke, "Nyɛ ti nɔ tsuaa nɔ nɛ nu eko, 28 ejakaa enɛ ɔ ji ye muɔ nɛ ji Somi He ɔ nɔ́ ɔ nɛ a po kɛ pue si kɛ ha nihi fuu a he yayami kemi. 29 Anɔkuale, i ngɛ nyɛ dee ke, i be wai nɛ ɔ eko nue hu kɛ ya si be nɛ i kɛ nyɛ maa nu lɛ ehe ngɛ ye Tsɛ Matsɛyemi ɔ mi."

30 Nɛ benɛ a la yi jemi la a, a pue nɔ kɛ ho Nuyoku ɔ nɔ ya.

31 Kɛkɛ nɛ Yesu de mɛ ke, "Nyɔ nɛ ɔ mi ɔ, nyɛ tsuo nyɛ ma si ami nɔ kake, ejakaa a ngma ngɛ Ngmami Klɔuklɔu ɔ mi ke, ‘Mawu maa fia to hyɛlɔ ɔ nɔ nɛ to asafo ɔ tsuo maa gbɛ fia.’ 32 Se ye si temi ɔ se ɔ, i ma sɛ nyɛ hlami kɛ ya Galilea nɛ i kɛ nyɛ ma ya kpe ngɛ lejɛ ɔ."

33 Petro de lɛ ke, "Ke nɔ tsuaa nɔ kpale ngɛ o se ɔ, ami lɛɛ i be kpalee gblee."

34 Nɛ Yesu de lɛ ke, "Anɔkuale, i ngɛ mo dee ke, nyɔ nɛ ɔ mi nɔuu, loko ji kungwɔ ma kpa nɔ ɔ, o ma kua mi si etɛ."

35 Se Petro ma nɔ mi nɛ e de ke, "Ke i kɛ mo ma gbo tete po ɔ, i be kpalee ngɛ o se." Nɛ kaseli kpa amɛ hu de ja a nɔuu.

36 Jehanɛ ɔ, Yesu kɛ mɛ ba abɔɔ ko nɛ a tsɛɛ ke Getsemane ɔ mi nɛ e de mɛ ke, "Nyɛɛ hi si ngɛ hiɛ ɔ, i yaa nɛ ma ya sɔle." 37 Nɛ e wo Petro kɛ Zebedeo bimɛ nyumuhi enyɔ, Yakobo kɛ Yohane ɔ ngɔ piɛ e he kɛkɛ nɛ aywilɛho nu lɛ nɛ e hao.

38 Nɛ e de mɛ ke, "Ye klaa ngɛ haoe ngɛ ye mi kɛ yaa su gbenɔ mi; nyɛɛ hi si ngɛ hiɛ ɔ nɛ nyɛɛ kɛ mi nɛ fɔ nyɔ."

39 E nyɛɛ kɛ ya e hɛ mi bɔɔ nɛ e ya ngɔ e hɛ mi ngɔ bu si, nɛ e sɔle nɛ e de ke, "Ye Tsɛ, ke e maa hi ɔ, mo ha nɛ a wo kikɛmɛ a kplu nɛ ɔ ngɛ ye nɔ kɛ ho, se mohu pi bɔ nɛ i suɔ, se bɔ nɛ mo o suɔ."

40 Benɛ e kpale kɛ ba e kaseli ɔmɛ a ngɔ ɔ, e ba na kaa a hwɔ mahe, nɛ e tsɛ Petro nɛ e de lɛ ke, "Anɛ nyɛ be nyɛe nɛ nyɛɛ kɛ mi maa fɔ nyɔ ngmlɛfia kake pɛ lo? 41 Nyɛɛ fɔ nyɔ nɛ nyɛɛ sɔle konɛ ka nɛ ko ye nyɛ nɔ, ejakaa mumi ɔ ngɛ kplɛɛe mohu, se nɔmlɔ tso ɔ gbɔjɔ."

42 E si mɛ ekohu nɛ e ho ya sɔle nɛ e de ke, "Ye Tsɛ, ke kplu nɛ ɔ be hiɛ jemi kɛ je ye nɔ kaa ja i nu doo ɔ, a pee bɔ nɛ o suɔ."

43 Benɛ e kpale kɛ ba a ngɔ ɔ, e ba na kaa a hwɔ mahe ekohu, ejakaa nyɔ gbe mɛ. 44 Lɔ ɔ he je ɔ, e si mɛ ekohu nɛ e ho ya sɔle nɔ nɛ ji si etɛ, nɛ e tu jamɛ a munyu ɔ nɔuu.

45 Jehanɛ ɔ benɛ e kpale kɛ ba e kaseli ɔmɛ a ngɔ ɔ, e bi mɛ ke, "Anɛ nyɛɛ lɛɛ nyɛ he mi jɔ nyɛ nɛ nyɛ ngɛ mahe hwɔe lo? Ngmlɛfia a su nɛ a ma je Nɔmlɔ Bi ɔ kɛ wo yayami peeli a dɛ mi. 46 Nyɛɛ te si nɛ waa ho! Nyɛɛ hyɛ, nɔ nɛ maa tsɔɔ ye se blɔ ɔ nɛ ma a nɛ!"

47 Yesu nya nɔɛ si nɛ Yuda nɛ ji e kaseli nyɔngma kɛ enyɔ ɔmɛ a kpɛti nɔ kake ɔ ba su si kɛ nihi babauu nɛ je osɔfo nikɔtɔma amɛ kɛ ma mi nikɔtɔma amɛ a ngɔ ɔ piɛ e he, nɛ a hɛɛ klaate kɛ tso kpotihi. 48 Nɛ Yuda, nɔ nɛ ngɛ e se blɔ tsɔɔe ɔ to mɛ okadi kaa a nu nɔ nɛ e ma nga a, ejakaa lɛ ji nɔ nɛ a ngɛ hlae ɔ nɛ. 49 Kɛkɛ nɛ Yuda ba Yesu ngɔ tɛɛ ba de lɛ ke, "Nutsɔ, mo he manye!" Nɛ e fua lɛ atuu kaa nɔ kɛ e huɛ.

50 Se Yesu de lɛ ke, "Ye huɛ, yaa o hɛ mi nɛ o pee nɔ́ nɛ o ma peemi ɔ." Kɛkɛ nɛ ni ɔmɛ ba tua lɛ nɛ a nu lɛ.

51 Nɛ nihi nɛ kɛ Yesu nyɛɛ ɔ a ti nɔ kake hia klaate nɛ e ja Osɔfo Nɔkɔtɔma a tsɔlɔ ɔ tue nɛ e je nya.

52 Nɛ Yesu de lɛ ke, "Moo ngɔ o klaate ɔ kɛ to e to he ɔ, ejakaa ni nɛmɛ nɛ hiaa klaate ɔ, klaate nya nɔuu nɛ a ma gbo ngɛ. 53 Anɛ o susu kaa i be nyɛe ma bi ye Tsɛ nɛ amlɔ nɛ ɔ nɔuu e ma ha mi hiɔwe bɔfohi akpe abɔ nɛ a ba fa ye he? 54 Se ke i pee ja a, kɛ maa pee kɛɛ nɛ Ngmami ɔmɛ maa ba mi kɛɛ, kaa ja a pee kikɛ ɔ nɔuu?" 55 Kɛkɛ nɛ Yesu de ni ɔmɛ ke, "Anɛ nɔmlɔ awi yelɔ ko ji mi nɛ nyɛ ba mi numi kɛ nyɛ dɛ klaate kɛ tso kpotihi nɛ ɔ lo? I kɛ nyɛ hi Sɔlemi We ɔ nɛ i tsɔɔ nyɛ ni daa, nɛ nyɛ nui mi. 56 Se a pee enɛ ɔ tsuo konɛ nihi nɛ gbali ɔmɛ ngma a nɛ ba mi." Kɛkɛ nɛ kaseli ɔmɛ tsuo tu fo kɛ si lɛ.

57 Nɛ ni nɛmɛ nɛ ba nu Yesu ɔ kpaka lɛ kɛ ho Kaiafa nɛ ji Osɔfo Nɔkɔtɔma a we ɔ mi ya, he nɛ Yuda mlaa tsɔɔli ɔmɛ kɛ nikɔtɔma amɛ bua a he nya ngɛ ɔ. 58 Jamɛ a be ɔ mi ɔ, Petro nyɛɛ e se ngɛ lokoo kɛ ba Osɔfo Nɔkɔtɔma a we ɔ mi, nɛ e ya sɛ lejɛ ɔ nɛ e kɛ soja amɛ ya hii si ngɛ kpo ɔ nɔ konɛ e na nɔ nɛ maa ba Yesu nɔ.

59 Osɔfo nikɔtɔma amɛ kɛ Yuda kojoli ɔmɛ tsuo ya bua a he nya ngɛ a kojomi he ngua pe kulaa a, nɛ a hla nihi nɛ a ba ye nyangɔ odase ngɛ Yesu he konɛ a na nɔ ko nɔ nɛ a da nɛ a bu lɛ gbenɔ fɔ. 60 Nɛ e ngɛ mi kaa a na lakpa odase yeli fuu mohu, se a odase yemi ɔmɛ dɛ tɛ kake nɔ. Nyagbe ɔ, lakpa odase yeli enyɔ ba, 61 nɛ a ba de ke, "Nyumu nɛ ɔ de ke, ‘Ma nyɛ Mawu Sɔlemi We ɔ ma hule nɛ ma kpale ma lɛ ligbi etɛ.’ "

62 Kɛkɛ nɛ Osɔfo Nɔkɔtɔma a te si da si nɛ e bi Yesu ke, "Saminya! O be nu nɔ nɛ a ngɛ dee ɔ? Anɛ o de ja a loo o de we?" 63 Se Yesu pɛ e nya mi. Nɛ Osɔfo Nɔkɔtɔma a de lɛ ke, "I ngɛ mo bie ngɛ Mawu hɛ kalɔ ɔ biɛ mi kaa ke mo ji Kristo, Mawu Bi ɔ, o de wɔ."

64 Nɛ Yesu he nɔ ke, "Ee, bɔ nɛ o de ɔ, ja i. Se i ngɛ nyɛ dee ke, kɛ je be nɛ ɔ mi kɛ yaa a, nyɛ maa na Nɔmlɔ Bi ɔ nɛ hii si ngɛ Mawu hiɔ nine nɔ, nɛ e ma ngɛ hiɔwe bɔ kuu ɔmɛ a mi."

65 Kɛkɛ Osɔfo Nɔkɔtɔma a gba lɛ nitsɛ e tade, nɛ e de kɛ ngmlaa ke, "E bɔ musu! Mɛni odase yeli kpahi wa pa ngɛ hlae ekohu? Nyɛ tsuo nyɛ nu nɔ nɛ e de ɔ paa. 66 Kɛ nyɛ susu kɛɛ?" A he nɔ kɛ ngmlaa ke, "E sa gbenɔ! E sa gbenɔ!"

67 Kɛkɛ nɛ a la lada ngɔ pue e hɛ mi, nɛ a fiaa lɛ ni. Ni komɛ hu gba lɛ ma, 68 nɛ a de lɛ ke, "Kristo, gbaa o tsɔɔ wɔ. Mɛnɔ ji nɔ nɛ gba mo ma a?"

69 Jamɛ a be ɔ mi ɔ, Petro hii si ngɛ se lokoo ngɛ kpo ɔ nɔ, nɛ sɔmɔlɔ yo ko ba e ngɔ ba bi lɛ ke, "Tsɛ mo hu o kɛ Yesu nɛ ngɛ, ejakaa nyɛ tsuo nyɛ je Galilea?"

70 Se Petro kua ngɛ mɛ tsuo a hɛ mi, nɛ e de kɛ ngmlaa ke, "I li nɔ nɛ o ngɛ dee nɛ ɔ tete!"

71 Pee se benɛ e je kpo kɛ ho agbo ɔ se ya a, sɔmɔlɔ yo kpa ko hu na lɛ, nɛ e de nihi nɛ e kɛ mɛ daa si ɔ ke, "Nyumu nɛ ɔ, e kɛ Yesu Nazaret no ɔ nɛ ngɛ."

72 Se Petro kua ekohu, nɛ e kɛ kita kami de ke, "I li nɔmlɔ nɛ ɔ tete!"

73 Pee se bɔɔ ɔ, nihi nɛ daa si ngɛ lejɛ ɔ ba e ngɔ nɛ a ba de lɛ ke, "Wa le kaa e kaseli ɔmɛ a ti nɔ kake ji mo, ejakaa o munyu tumi tete ngɛ mo si jee kaa Galilea no."

74 Kɛkɛ nɛ Petro bɔni gbiɛmi kɛ kita kami nɛ e de ke, "I li kikɛmɛ a Nɔmlɔ nɛ ɔ." Nɛ kungwɔ kpa nɔ amlɔ ɔ nɔuu. 75 Nɛ Petro kai nɔ nɛ Yesu de lɛ ɔ, "Loko ji kungwɔ ma kpa nɔ ɔ, o ma kua mi si etɛ." Nɛ e je kpo ya fo ya wawɛɛ.