1 Kɛkɛ nɛ Yesu tsɛ e kaseli nyɔngma kɛ enyɔ ɔmɛ kɛ ba e ngɔ, nɛ e ha mɛ he wami ngɛ mumi yayamihi a nɔ nɛ a hia mɛ nɛ a tsa hiɔ fɛɛ hiɔ.

2 Kaseli nyɔngma kɛ enyɔ ɔmɛ a biɛhi ji: Simon nɛ a pɔɔ lɛ tsɛmi ke Petro ɔ, kɛ e nyɛmi Andrea; Yakobo, Zebedeo bi ɔ kɛ e nyɛmi Yohane; 3 Filipo kɛ Bartolomeo; Toma kɛ Mateo, lapoo tsulɔ ɔ; Yakobo, Alfeo bi ɔ, kɛ Lebeo nɛ a tsɛɛ lɛ Tadeo hulɔ ɔ; 4 Simon Kanaan no ɔ; kɛ Yuda Iskariot nɔ nɛ tsɔɔ Yesu se blɔ ɔ.

5 Nɛ Yesu tsɔ mɛ, nɛ e de mɛ ke, "Nyɛ ko gu ma je li ɔmɛ loo Samaria bi ɔmɛ a ngɔ. 6 Se mohu nyɛɛ ya Israel bi ɔmɛ nɛ ji Mawu tohi nɛ laa amɛ pɛ a ngɔ. 7 Nyɛ ya fiɛ nɛ nyɛ de mɛ ke, Hiɔwe Matsɛyemi ɔ su si ta. 8 Nyɛ tsa hiɔtsɛmɛ, nyɛ tle ni gbogboehi si, nyɛ tsa kpititsɛmɛ nɛ nyɛɛ hia mumi yayamihi. Nyɛ ko he hiɔwo ko, ejakaa yaka gu nɛ a kɛ ha nyɛ hu.

9 Nyɛ ko hɛɛ sika; 10 nɛ nyɛ ko hɛɛ blɔ hiami kotoku, nɛ nyɛ ko hɛɛ tadehi kɛ tokotahi kɛ piɛ nɔ nɛmɛ nɛ nyɛ wo ɔmɛ a he; nɛ nyɛ ko hɛɛ dema tso tete, ejakaa nihi nɛ nyɛ maa ye kɛ bua mɛ ɔ maa hyɛ nyɛ nɔ. 11 Nɛ ma tsuaa ma loo kɔpe tsuaa kɔpe mi nɛ nyɛ ma ya sɛ ɔ, nyɛ hla dalɔ nɛ ngɛ lejɛ ɔ se blɔ nɛ nyɛ ya to e ngɔ kɛ ya si be nɛ nyɛ maa je kɛ ya ma kpa mi. 12 Ke nyɛ bi nɛ a ha nyɛ to he ɔ, nyɛɛ kɛ wetsɛ ɔ nɛ hi si saminya, 13 nɛ ke nyɛ na kaa dalɔ we i ɔ, nyɛɛ gbaa we ɔ, se kɛ e pi dalɔ lɛɛ nyɛɛ ngɔ gbaami ɔ ngɔ to. 14 Nɛ ma loo we mi he nɛ a he we nyɛ atuu ngɛ ɔ, nyɛ blɛ nyɛ nane si zu ɔ kɛ pue si loko ji nyɛɛ je jamɛ a ma a loo we ɔ mi. 15 Niinɛ, i ngɛ nyɛ dee ke, e maa fani ha Sodom kɛ Gomora, mahi nɛ a yi kpɛti wa amɛ pe jamɛ a ma a, loo we ɔ ngɛ Kojomi Ligbi ɔ nɔ.

16 I ngɛ nyɛ tsɔe kaa jijɔhi kɛ yaa ogbeteehi a kpɛti. Nyɛ hɛ mi nɛ tɛ kaa sinɔhi, nɛ nyɛ he nɛ jɔ kaa obleku lahuɛhi. 17 Nɛ nyɛɛ pee klaalo, ejakaa a maa nu nyɛ, nɛ a maa kojo nyɛ, nɛ a maa fiaa nyɛ kpa ngɛ kpe he ɔmɛ. 18 Ngɛ ye he je ɔ, a maa kojo nyɛ ngɛ matsɛhi a hɛ mi. Se lɔ ɔ ma ha nyɛ he blɔ nɛ nyɛ kɛ ye ye he odase kɛ tsɔɔ mɛ kɛ je ɔ tsuo.

19 Ke a nu nyɛ ɔ, nyɛ ko hao nyɛ he ngɛ nɔ nɛ nyɛ ma ya de ngɛ kojomi he ɔ he, ejakaa ke be ɔ su ɔ, a maa tsɔɔ nyɛ nɔ nɛ sa nɛ nyɛ de ɔ. 20 Ejakaa pi nyɛ nɛ nyɛ maa tu munyu ɔ se mohu hiɔwe Tsɛ ɔ Mumi ɔ ji nɔ nɛ maa tu munyu ngɛ nyɛ mi.

21 Nyɛmi maa tsɔɔ nyɛmi se blɔ nɛ e maa ngɔ lɛ kɛ ha gbenɔ, ja a nɔuu tsɛmɛ maa tsɔɔ a bimɛ a se blɔ. Nɛ bimɛ hu maa te si kɛ wo a tsɛmɛ nɛ a maa ngɔ mɛ kɛ ha nɛ a gbe mɛ. 22 Nɛ nɔ tsuaa nɔ maa nyɛ nyɛ, ejakaa ye nihi ji nyɛ. Se nɔ tsuaa nɔ nɛ maa ye ni nɛ ɔmɛ a nɔ kunimi kɛ ya su nyagbe ɔ, a ma he e yi wami.

23 Ke a ngɛ nyɛ yi mi wae ngɛ ma kake mi ɔ, nyɛɛ tu fo kɛ ho ma kpa mi ya. Niinɛ, i ngɛ nyɛ dee ke nyɛ be Israel ma amɛ tsuo a nɔ kpae kɛ gbe nya loko ji Nɔmlɔ Bi ɔ maa ba. 24 Kaselɔ pa we e tsɔɔlɔ; nɛ nyɔguɛ hu pa we e nutsɔ. 25 Nɔ nɛ baa tsɔɔlɔ nɔ ɔ, e saa kaselɔ ɔ he, nɛ nɔ nɛ baa nutsɔ nɔ ɔ, e saa nyɔguɛ he. Nɛ ke a tsɛ wetsɛ ɔ abosiami loo Beelzebul, si enyɛmɛ nɛ a be e we bi ɔmɛ tsɛe ja? 26 Nyɛ ko ye ni nɛmɛ nɛ ngɛ nyɛ he gbeye woe ɔ gbeye. Ejakaa be ma nɛ anɔkuale ɔ maa je kpo paa, nɛ a diblii mi ni peemi ni ɔmɛ ma plɛ magbɛ nɔ sane.

27 Ja he je ɔ, nɔ nɛ i ngɛ nyɛ dee ngɛ diblii mi nɛ ɔ, nyɛ ya kpa ngmlaa nɛ nyɛ de ngɛ ma hɛ mi; nɛ nɔ nɛ i de ngɔ wo nyɛ tue mi zaa a, nyɛ ya fiɛ ngɛ ma nɔ.

28 Nyɛ ko ye nihi nɛ ma nyɛ nyɛ nɔmlɔ tso ɔ maa gbe se a be klaa a nyɛɛ gbemi ɔ gbeye, se mohu nyɛɛ ye nɔ nɛ nyɛɛ klaa a kɛ nɔmlɔ tso ɔ tsuo he mi kpataa ngɛ la mi ɔ pɛ gbeye. 29 Anɛ otokliihi enyɔ nɛɛ tsa pi pɛsua nɛ a juaa mɛ lo? Se a ti eko nɔe zugba nɛ Tsɛ ɔ li he nɔ ko. 30 Nyɛ yi bwɔmi po ɔ a kane kulaa nɛ a le nya. 31 Lɔ ɔ he je ɔ, nyɛ ko hao, ejakaa nyɛ he jua wa hluu pe otokliihi babauu.

32 Nɔ tsuaa nɔ nɛ woɔ ye ta ngɛ ma hɛ mi kaa ye nɔ ji lɛ ɔ, ami hu ma wo e ta ngɛ ye Tsɛ nɛ ngɛ hiɔwe ɔ hɛ mi. 33 Nɛ nɔ tsuaa nɔ nɛ kuaa mi ngɛ nimli a hɛ mi ɔ, ami hu ma kua lɛ ngɛ ye Tsɛ nɛ ngɛ hiɔwe ɔ hɛ mi.

34 Nyɛ ko susu kaa i ba nɛ ma ba ha he jɔmi ngɛ zugba a nɔ. Dabi, pi he jɔmi hami nɛ i ba, se klaate mohu nɛ i wo kɛ ba. 35 Ejakaa i ba nɛ ma ba ha bi nɛ te si kɛ wo e tsɛ, nɛ biyo nɛ te si kɛ wo e nyɛ, nɛ nganyɛ hu nɛ te si kɛ wo e nganyɛ, 36 nɛ nɔ e he nyɛli pe kulaa maa pee nihi nɛ ngɛ lɛ nitsɛ e we ɔ mi. 37 Nɔ nɛ suɔ e tsɛ loo e nyɛ pe mi ɔ, e sɛ nɛ e peeɔ ye nɔ, nɛ nɔ nɛ suɔ e binyumu loo biyo hu pe mi ɔ, e be nyɛe maa pee ye nɔ. 38 Ja a nɔuu nɔ nɛ wo we e sɛumi tso ɔ nɛ e nyɛɛ ye se ɔ, lɛ hu e be ye nɔ pee.

39 Nɔ tsuaa nɔ nɛ baa e klaa yi ɔ, e maa laa lɛ, se nɔ nɛ kɛ e klaa ha mi ɔ, e yi ma na wami.

40 Nɔ nɛ ma he nyɛ atuu ɔ, ami nɛ e ngɛ hee ɔ nɛ. Nɛ nɔ nɛ ma he mi atuu ɔ, Mawu nɔ nɛ tsɔ mi ɔ nɛ e ngɛ hee ɔ nɛ. 41 Nɛ nɔ tsuaa nɔ nɛ heɔ gbalɔ atuu ngɛ Mawu nɔmlɔ nɛ e ji ɔ he ɔ, e ma na hiɔwo nɛ gbalɔ ma na a. Nɛ nɔ nɛ ma he dalɔ atuu ngɛ dalɔ nɛ e ji ɔ he ɔ, e ma na dalɔ hiɔwo.

42 Nɛ ke nɔ ko ma ha jokuɛwi nɛ ɔmɛ a ti nɔ kake nyu nɛ e nu ngɛ kaselɔ biɛ mi ɔ, niinɛ, i ngɛ lɛ dee ke e hiɔwo be le bɔe kɔkɔɔkɔ."