1 Jehanɛ ɔ Mumi Klɔuklɔu ɔ kpaka Yesu kɛ ho nga a nɔ ya konɛ Abosiami nɛ e ya ka lɛ ngɛ lejɛ ɔ. 2 Benɛ Yesu hi ngma ngɛ nga a nɔ nyɔ kɛ pia ligbi nyingmi eywiɛ ɔ, hwɔ ba bɔni lɛ yemi wawɛɛ. 3 Kɛkɛ nɛ Abosiami ba ka lɛ nɛ e de lɛ ke e ha nɛ tɛ ɔmɛ nɛ ngɛ lejɛ ɔ nɛ a plɛ abolo ha lɛ nɛ e ye. Abosiami tsa nɔ nɛ e de Yesu ke, "Ke o pee ja a, lɔ ɔ nɛ a ma kɛ na kaa Mawu Bi ji mo."

4 Se Yesu ha lɛ heto nɛ e de lɛ ke, "Dabi! Mawu Munyu ɔ deɔ wɔ ke abolo kɛkɛ be adesa klaa yi wami nyɛe ma he, se Mawu Munyu ɔ nɔ yemi mohu nɛ he hia."

5 Jehanɛ ɔ Abosiami ngɔ Yesu kɛ ho Yerusalem Sɔlemi We ɔ yi kpɛti ploplooplo ya nɛ e de lɛ ke, 6 "Ke Mawu Bi ji mo tutuutu ɔ, moo tu kɛ je hiɛ ɔ kɛ ya ma si, ejakaa Mawu Munyu ɔ de ke,

‘Mawu maa tsɔ e bɔfo ɔmɛ

nɛ a maa bu o he

nɛ o be plaae.’ "

7 Yesu ha Abosiami heto ke, "Mawu Munyu ɔ deɔ hu ke, ‘Mo ko ka Nutsɔ o Mawu ɔ yaka gu!’ "

8 Yesu nya nɔɛ si tete nɛ Abosiami kata lɛ ekohu kɛ ho yoku gaga ko yi kpɛti ya nɛ e wo je ɔ mi mahi kɛ a mi akɔnɔ níhi tsuo ngɔ tsɔɔ lɛ nɛ e de lɛ ke, 9 "Ma ngɔ ni nɛ ɔmɛ tsuo kɛ ha mo ke o ma kpla si kɛkɛ nɛ o ja mi."

10 Yesu ha heto ke, "Abosiami, moo be kɛ ho ye se ya! Ejakaa a ngma ke, ‘Mo ja Tsaatsɛ Mawu pɛ, nɛ lɛ kɛkɛ tue o bu.’ "

11 Kɛkɛ nɛ Abosiami si Yesu nɛ hiɔwe bɔfohi ba nɛ a ba sɔmɔ lɛ.

12 Benɛ Yesu nu kaa a nu Yohane kɛ wo tsu mi ɔ, e si Yudea nɛ e kpale kɛ ba Nazaret ngɛ Galilea. 13 Se e kɛ we nɛ e kpale ke ba Kapernaum ngɛ Galilea Wo ɔ nya ngɛ Zebulon kɛ Naftali kasa mi. 14 Enɛ ɔ ha nɛ Gbalɔ Yesaia munyu ɔ ba mi kaa,

15,16 "La agbo ko kpɛ ha nibwɔhi nɛ ngɛ diblii mi ngɛ Zebulon kɛ Naftali,

mahi nɛ ngɛ Yordan Pa a he

kɛ Galilea zugba a se ɔ."

17 Nɛ Yesu bɔni fiɛmi kɛ je jamɛ a be ɔ mi ke, "Nyɛɛ kpale ngɛ nyɛ yayami ɔmɛ a se nɛ nyɛ ba sa we ngɛ Mawu ngɔ, ejakaa Hiɔwe Matsɛyemi ɔ su si ta."

18 Ligbi ko benɛ Yesu ngɛ si slaae ngɛ Galilea Wo ɔ nya a, e na nyɛmimɛ wo hɛli enyɔ komɛ nɛ ji Simon nɛ a tsɛɛ lɛ ke Petro ɔ kɛ Andrea nɛ a ngɛ hɛe.

19 Yesu tsɛ mɛ nɛ e de mɛ ke, "Nyɛɛ ba nɛ nyɛ ba nyɛɛ ye se nɛ i ma pee nyɛ adesahi a klaahi a yi wami heli." 20 Yesu nya nɔɛ si nɛ Simon kɛ Andrea si a ya amɛ nɛ a fie e se.

21 Benɛ e yaa bɔɔ ngɛ wo ɔ nya a, e ya na nyɛmimɛ enyɔ kpahi nɛ a tsɛɛ mɛ ke Yakobo ke Yohane kɛ a tsɛ Zebedeo nɛ a ngɛ ya mi kpɛe ngɛ lɛ mi nɛ e tsɛ mɛ hu. 22 Oya a nɔuu nɛ a jɔɔ ni tsumi ɔ. Kɛkɛ nɛ a si a tsɛ nɔmoyo ɔ nɛ a fie e se.

23 Yesu kpa si ngɛ Galilea zugba a nɔ tsuo nɛ e fiɛ Hiɔwe Matsɛyemi ɔ he Manye Munyu ɔ ngɛ Yuda bi ɔmɛ a kpe he ɔmɛ, nɛ e tsa hiɔ fɛɛ hiɔ. 24 E nyakpɛ hiɔ tsami ɔ gbɛ kɛ fia Galilea zugba a nɔ tsuo. Enɛ ɔ he je ɔ, a ngɔ hiɔtsɛmɛ slɔɔtohi nɛ ji nihi nɛ hɛɛ mumi yayami hiɔhi, godotsɛhi kɛ nihi nɛ hule pue si nɛ a kɛ mɛ je tsitsaa hehi ke Siria tete kɛ ba e ngɔ nɛ e tsa mɛ kulaa. 25 Enɛ ɔ ha nɛ nihi fuu je Galilea kɛ e he ma nyɔngma amɛ nɛ a tsɛɛ ke Dekapoli ɔmɛ a mi, kɛ Yerusalem kɛ Yudea kɛ Yordan Pa a se nɛ a ba bɔni e se nyɛɛmi.