1 Benɛ Yesu je kpo kɛ je Sɔlemi We ɔ kɛ yaa a, e kaseli ɔmɛ nyɛɛ e se nɛ a hla kaa a maa tsɔɔ lɛ Sɔlemi We ɔ tsu ɔmɛ .

2 Se e de mɛ ke, "Tsɛ nyɛ ngɛ tsu nɛ ɔmɛ tsuo hyɛe? Anɔkuale, i ngɛ nyɛ dee ke, a be eko sie nɛ a be lɛ hulee, nɛ a be tɛ kake tete sie ngɛ eko nɔ."

3 Benɛ Yesu hii si ngɛ Nuyoku ɔ nɔ ɔ, e kaseli ɔmɛ ba e ngɔ nɛ a ba bi lɛ ke, "Mɛni be mi ni nɛ ɔmɛ maa ba mi, nɛ mɛni ji o bami kɛ je nɛ ɔ nyagbe ɔ he okadi?"

4 Nɛ Yesu de mɛ ke, "Nyɛ ko ha nɛ nɔ ko nɛ mlɔ nyɛ. 5 Ejakaa nihi fuu maa ba kaa mɛ ji Kristo ɔ nɛ, nɛ a maa mlɔ nihi babauu. 6 Ke nyɛ nu tahi a he ɔ, enɛ ɔ tsɔɔ we ye bami ɔ he okadi; ni nɛ ɔmɛ maa ba mohu, se kɛ ɔ, nyagbe ɔ sui lolo. 7 Ma maa te si kɛ wo ma, nɛ matsɛhi maa te si kɛ wo a bi, nɛ hwɔ kɛ zugba hosomi maa ba ngɛ hehi slɔɔtohi. 8 Se enɛ ɔmɛ tsuo ɔ, haomi agbo ɔ nɛ maa ba a e sisije kɛkɛ i.

9 Jamɛ a be ɔ mi ɔ, a maa wa nyɛ yi mi, nɛ a maa gbe nyɛ, nɛ je ɔ tsuo maa nyɛ nyɛ ngɛ ye he je. 10 Nyɛ ti nihi fuu a nane ma kpata, nɛ a maa nyɛ a nyɛmimɛ nɛ a maa tsɔɔ a se blɔ. 11 Nɛ nyangɔ gbali fuu maa te si nɛ a maa tɔtɔ nihi fuu a nane. 12 Akɛnɛ yayami maa pɔ he he je ɔ, nihi fuu a suɔmi he maa jɔ yluduu. 13 Se ni nɛmɛ nɛ maa hɛɛ mi kɛ ya nyagbe ɔ, a ma he a yi wami.

14 Se loko ji nyagbe ɔ maa ba a, a maa fiɛ Matsɛyemi ɔ Manye Munyu ɔ ngɔ tsɔɔ je ɔ kulaa konɛ majemaje ɔ tsuo nɛ nu he.

15 Ja a he je ɔ, ke nyɛ na kaa aywilɛho ni nɛ ɔmɛ nɛ Gbalɔ Daniel tu he munyu ɔ ba he klɔuklɔu ɔ, mo nɔ nɛ o kane womi nɛ ɔ, o kɔ se! 16 Kɛkɛ ɔ, nihi nɛ ngɛ Yudea a, a tu fo kɛ ya Yudea yoku ɔmɛ a nɔ. 17 Nɛ nihi nɛ ngɛ a tsuhi a yi mi ɔ, a ko kple si ke a yaa ngɔ nɔ ko ngɛ a tsu ɔmɛ a mi loko ji a tu fo. 18 Nihi nɛ ngɛ a ngmɔhi a mi ɔ, a ko kpale kɛ ba a wehi a mi ke a yaa ngɔ a tadehi.

19 Kpoo ha yihi nɛ hɛɛ muklii kɛ nihi nɛ hɛɛ bimwɔwi ngɛ jamɛ a be ɔ mi. 20 Nyɛɛ sɔle kaa nyɛ fo tumi be ɔ e ko ba ngɛ fiɛ lebe mi aloo ngɛ Hejɔɔmi Ligbi ɔ nɔ. 21 Ejakaa jamɛ a be ɔ mi ɔ, yi mi wami ko maa te si nɛ a nɛ eko hyɛ kɛ je je ɔ sisije kɛ ba si piɔ, nɛ a be eko nae hu gblee.

22 Niinɛ, ke a pui jamɛ a ligbi ɔmɛ a nɔ kuku ɔ, adesahi kulaa a hɛ mi ma kpata. Se a maa po a nɔ kpiti ngɛ Mawu hlami bi ɔmɛ a he.

23 Ngɛ jamɛ a be ɔ mi ɔ, ke nɔ ko de nyɛ ke, ‘Kristo ngɛ hiɛ aloo e ba be kɛ ho hiɛ loo hiɛ ya a’, nyɛ ko he ye. 24 Ejakaa lakpa Kristohi kɛ lakpa gbali maa te si nɛ a maa pee nyakpɛ nihi kɛ tsɔɔ, nɛ ke nyɛ hyɛ we nɛ hi ɔ, a kɛ maa mlɔ Mawu hlami bi ɔmɛ tete. 25 Nyɛ nɛ, i de nyɛ kɛ fɔ si.

26 Lɔ ɔ he je ɔ, ke nɔ ko de nyɛ ke Kristo ɔ kpale kɛ ba nɛ e ngɛ nga a nɔ ɔ, nyɛ ko ya hyɛ. Aloo ke a de nyɛ ke e ngɛ e he laae ngɛ he ko ɔ nyɛ ko he ye. 27 Ejakaa bɔ nɛ oslabai ngaa tlukaa si kake kɛ jee beleku kɛ yaa bonyoku ɔ, ja a nɔuu Nɔmlɔ Bi ɔ bami ɔ maa pee. 28 Ejakaa he fɛɛ he nɛ nɔ gbogboe fɔɔ si ngɛ ɔ, lejɛ ɔ okpokuhi buaa a he nya ngɛ.

29 Ngɛ yi mi wami ɔmɛ a se nɔuu ngɛ jamɛ a ligbi ɔmɛ a nɔ ɔ, pu ma piɛ diblii, nɛ nyɔhiɔ be kpɛe, nɛ dodoehi ma tsɔ kɛ je hiɔwe ba nɔ si, nɛ hiɔwe he wami ɔmɛ ma hoso.

30 Kɛkɛ ɔ, Nɔmlɔ Bi ɔ bami he okadi ɔ maa je kpo ngɛ hiɔwe nɛ gbenɔ ya maa pɛ ngɛ zugba a nɔ he fɛɛ he. Nɛ zugba a nɔ wɛtso ɔmɛ maa na Nɔmlɔ Bi ɔ kaa e ma ngɛ hiɔwe bɔ kuu ɔmɛ a mi kɛ he wami kɛ hɛ mi nyami babauu. 31 Nɛ e maa tsɔ e bɔfo ɔmɛ kɛ bɛ nɛ nya wa. A ma bua e hlami bi ɔmɛ a nya kɛ maa je je kɔ nya eywiɛ ɔmɛ tsuo kɛ hiɔwe nyagbe he ɔmɛ.

32 Jehanɛ ɔ, nyɛɛ kase tso nɛ ngɛ kaa mangoo tso he abɛ ɔ nɛ i bu nyɛ ɔ he ni. Benɛ e kɔni ɔmɛ bɔ, nɛ a bahi bɔni peemi mlɔmlɔmlɔ ɔ, nyɛ le kaa latsa be su si ta. 33 Ja a nɔuu nyɛ hu ke nyɛ na kaa ni nɛ ɔmɛ tsuo bɔni mi bami ɔ, nyɛɛ le kaa ye bami ɔ su ta. 34 Anɔkuale, i ngɛ nyɛ dee ke, yi nɔ nɛ ɔ be bee, ja ni nɛ ɔmɛ ba mi lolo.

35 Hiɔwe kɛ zugba maa be kɛ ho, se ye munyu ɔmɛ maa hi si kɛ ya neneene. 36 Se nɔ ko li ligbi ɔ kɛ ngmlɛfia a nɛ nyagbe ɔ maa ba, bɔfohi nɛ ngɛ hiɔwe ɔ tete li, nɛ Mawu Bi ɔ hu li, ja Tsɛ ɔ nɔ kake pɛ.

37 Nɔmlɔ Bi ɔ bami ɔ maa pee kaa bɔ nɛ e ba mi ngɛ Noa be ɔ mi ɔ, benɛ nyu afua ba tlukaa a. 38 Jamɛ a be ɔ mi ɔ, ni ɔmɛ hɛɛ ni yemi kɛ ni numi kɛ yo ngɔmi mi hluu kɛ ya si ligbi nɔ nɛ Noa ya sɛ daka a mi; 39 nɛ a he we nɔ́ nɛ ma a yi kɛ ya si be nɛ nyu afua a wo mɛ tsuo kɛ ho; ja a nɔuu Nɔmlɔ Bi ɔ bami ɔ hu maa pee.

40 Jamɛ a be ɔ mi ɔ, nyumuhi enyɔ maa hi ni tsue ngɛ ngmɔ nɔ, a maa ngɔ nɔ kake, nɛ a ma si nɔ kake. 41 Yihi enyɔ maa hi wɛɛe ngɛ we se, a maa ngɔ nɔ kake, nɛ a ma si nɔ kake.

42 Enɛ ɔ he je ɔ, nyɛ dla nyɛ he, ejakaa nyɛ li ligbi nɛ nyɛ Nutsɔ ɔ ma.

43 Se nyɛ na nɛ nyɛɛ le kaa bɔ nɛ wetsɛ ko maa bu e we he konɛ julɔ nɛ ko ba ju lɛ ɔ, ja a nyɛ hu nyɛ ma dla nyɛ he be fɛɛ be kɛ to. 44 Enɛ ɔ he je ɔ, nyɛ hu nyɛ dla nyɛ he kɛ to, ejakaa Nɔmlɔ Bi ɔ maa ba ngmlɛfia nɛ nyɛ he be nɔ.

45 Mɛnɔ ji tsɔlɔ ni lelɔ kɛ anɔkualetsɛ nɛ e nutsɔ ngɔ lɛ kɛ to e we bihi a nya konɛ e ha mɛ niye ni ngɛ be nɛ sa mi? 46 A gbaa jamɛ a tsɔlɔ ɔ, nɔ nɛ ke e nutsɔ ɔ ba a, e ma ba na lɛ kaa e ngɛ ni ɔ tsue pɛpɛɛpɛ ɔ. 47 Anɔkuale, i ngɛ nyɛ dee ke nutsɔ ɔ maa ngɔ lɛ ngɔ to e weto ni ɔmɛ tsuo a nya.

48 Se ke tsɔlɔ yayami ji lɛ ɔ, e ma de e he ke, ‘Ye Nutsɔ ɔ se maa fia si bɔɔ;’ 49 nɛ e ma bɔni e huɛmɛ tsɔli kpa amɛ yi mi wami, nɛ e kɛ da deli ma bɔni ni yemi kɛ ni numi. 50 Kɛkɛ nɛ e nutsɔ ɔ maa ba tlukaa, 51 nɛ e maa fiaa lɛ kpa saminya nɛ e maa wo lɛ blɔ kɛ ho osatotsɛmɛ a kojomi he ya, he nɛ ya fomi kɛ lungu nya kpemi ngɛ ɔ."