1 Lɔ ɔ he je ɔ, Yesu sɛ lɛ nɛ e po pa a kɛ ba Kapernaum nɛ ji lɛ nitsɛ e ma a mi.

2 Benɛ Yesu ya su Kapernaum ɔ, ni komɛ ngɔ nyumuyo ko nɛ ngɛ kumi hiɔ nue nɛ fɔɔ si ngɛ sa nɔ kɛ ba e ngɔ. Benɛ Yesu na a hemi kɛ yemi ɔ, e de hiɔtsɛ ɔ ke, "Binyumu, o bua nɛ jɔ o he, a ngɔ o he yayami ɔmɛ kɛ ke mo!"

3 Mlaa tsɔɔli ɔmɛ a ti ni komɛ de ngɛ a yi mi ke, "Nyumu nɛ ɔ ngɛ musu bɔe, ejakaa e ngɛ dee ke lɛ ji Mawu."

4 Yesu na a juɛmi ɔ nɛ e bi mɛ ke, "Mɛni he je nɛ nyɛ ngɛ yi mi yaya susue ɔ? 5,6 Anɛ nɔ́ nɛ a ma de hiɔtsɛ ɔ ke a wo e he yayami ɔmɛ kɛ ke lɛ ɔ nɛ e demi wa aloo kaa a ma tsa lɛ ɔ nɛ e wa?" Bɔ nɛ pee nɛ nyɛɛ le kaa i ngɛ he blɔ ngɛ zugba a nɔ, nɛ i woɔ yayamihi ngɔ kɛ e he je ɔ, i ngɛ hiɔtsɛ nɛ ɔ dee ke, "Tee si nɛ o hluɛ o sa a nɛ o ho we mi ya, ejakaa a tsa mo."

7 Kɛkɛ nɛ nyumuyo ɔ te si amlɔ ɔ nɔuu nɛ e je kɛ ho we mi ya.

8 Nɛ nihi nɛ ngɛ lejɛ ɔ nɛ na nɔ́ nɛ ɔ, a nya kpɛ a he nɛ a je Mawu yi kaa e ha adesa kikɛmɛ a he blɔ nɛ ɔ.

9 Benɛ Yesu je lejɛ ɔ nɛ e pue blɔ kɛ yaa a, e ya na lapoo tsulɔ ko nɛ a tsɛɛ lɛ Mateo ɔ nɛ e hii si ngɛ lapoo hemi he ɔ nɛ e de lɛ ke, "Ba nyɛɛ ye se." Nɛ Mateo te si amlɔ ɔ nɔuu nɛ e nyɛɛ e se.

10 Pee se benɛ Yesu kɛ e kaseli ɔmɛ ya ngɛ ni yee ngɛ Mateo we ɔ mi ɔ, yayami peeli kpanakuhi fuu ba nɛ a kɛ mɛ ba ye ni ɔ.

11 Enɛ ɔ pee Farisi bi ɔmɛ nyakpɛ nɛ a bi e kaseli ɔmɛ ke, "Mɛni he je nɛ nyɛ tsɔɔlɔ ɔ kɛ kikɛmɛ a nimli nɛ ɔmɛ ngɛ bɔe ɔ?"

12 Yesu ha mɛ heto ke, "I kɛ mɛ ngɛ bɔe ejakaa nihi nɛ ngɛ he wami ɔ tsopatsɛ he hia we mɛ, se mohu hiɔtsɛhi nɛ tsopatsɛ he hia." 13 Yesu tsa nɔ nɛ e de mɛ ke, "Nyɛɛ ya nɛ nyɛ ya hla Mawu Munyu kuku nɛ ɔ sisi, ‘Nyɛ bɔ sami ɔmɛ kɛ nike ni ɔmɛ a he hia we mi, se mohu nyɛ mɔbɔ nami he nɛ ngɛ mi hiae.’ Ejakaa i bɛ dali a tsɛmi, se mohu yayami peeli a he nɛ i ba ngɛ konɛ a tsake a tsui."

14 Ligbi ko ɔ, Yohane Baptisilɔ ɔ kaseli ɔmɛ ba Yesu ngɔ nɛ a ba bi lɛ ke, "Mɛni he je nɛ wɔ Yohane kaseli ɔmɛ kɛ Farisi bi ɔmɛ pɔɔ nya fimi se o kaseli ɔmɛ lɛɛ a hɛ hwɔ ɔ?"

15 Yesu ha mɛ heto nɛ e bi mɛ ke, "Anɛ e sa kaa ayɛflo huno ɔ huɛmɛ nɛ ye kɔmɔ nɛ a ha hwɔ be mi nɛ ayɛflo huno ɔ kɛ mɛ ngɛ ɔ lo? Se be maa ba nɛ a maa ngɔ ayɛflo huno ɔ kɛ je a he, nɛ jamɛ a be ɔ mi loko a maa ha hwɔ ɔ nɛ.

16 Nɔ ko kɛ bo nya he ta we tade momo, ejakaa ke e pee ja a, tade momo ɔ gbaa ngɛ bo nya he nɛ a kɛ tsi puɔ ɔ he, nɛ puɔ ɔ bliɔ pe kekle ɔ. 17 Mɛnɔ ngɔɔ wai he kɛ woɔ tɔ momohi a mi? Ke a pee ja a, wai he ɔ ma pɛ tɔ momo ɔmɛ nɛ da a ma pue si, nɛ tɔ ɔmɛ hu ma puɛ. Wai he ɔ, tɔ hehi a mi nɛ a kɛ woɔ bɔ nɛ pee nɛ tɔ ɔ kɛ wai ɔ tsuo nɛ a ko puɛ."

18 Benɛ Yesu ngɛ ni nɛ ɔmɛ a mi tsɔɔe ɔ, kpe he tsɔɔlɔ nɔkɔtɔma ko ba nɛ e ba kpla si ngɛ e hɛ mi nɛ e kpa lɛ pɛɛ nɛ e de ke, "Ye biyo gbo piɔ nɛ ɔ nɔuu; se o ma nyɛ tsiɛ lɛ ke o ba ta e he kɛkɛ."

19 Benɛ Yesu kɛ e kaseli ɔmɛ yaa nyumu nɔkɔtɔma a we ɔ mi ɔ, 20 yo ko nɛ muɔ ngɛ bee ngɛ e he jeha nyɔngma kɛ enyɔ sɔuu ɔ ba je e se je nɛ e ta e tade ɔ nya he, 21 ejakaa e susu ngɛ e mi kaa e ma na he wami ke e na ta e he kɛkɛ.

22 Yesu plɛ e he nɛ e de lɛ ke, "Biyo, o tsui nɛ nɔ o mi, o hemi kɛ yemi ɔ tsa mo." Kɛkɛ nɛ yo ɔ na he wami kɛ je jamɛ a ngmlɛfia a nɔ nɔuu.

23 Benɛ Yesu ya su we ɔ mi he nɛ jokuɛ yo ɔ yi ta ngɛ ɔ, e na kaa nihi fuu ngɛ hoo pee nɛ a ngɛ gbenɔ lahi lae. 24 Kɛkɛ nɛ e de ke, "Nyɛ je ni ɔmɛ kpo, ejakaa yiheyo ɔ gbo we, mahe kɛkɛ nɛ e ngɛ hwɔe!" Se ni ɔmɛ ye e he fɛu. 25 Benɛ a je kpo ta a, Yesu sɛ tsu ɔ mi he nɛ a wlɔ yiheyo ɔ ngɛ ɔ nɛ e ya pɛtɛ e nine si, nɛ amlɔ ɔ nɔuu ɔ, e te si. 26 Nɛ nyakpɛ sane nɛ ɔ gbɛ fia lejɛ ɔ zugba a nɔ tsuo.

27 Benɛ Yesu maa ho we ɔ mi lejɛ ɔ jemi ya a, nyumuhi enyɔ nɛ a hɛ yu nyɛɛ e se kɛ ngmlaa ke, "Matsɛ David Bi, moo na wɔ mɔbɔ!"

28 A nyɛɛ Yesu se kɛ ya sɛ e to he ɔ nɛ e bi mɛ ke, "Anɛ nyɛ heɔ yeɔ kaa ma nyɛ ma bli nyɛ hɛ ngmɛ yuyui ɔmɛ nɛ nyɛ maa hyɛ nɔ́ lo?" A ha heto ke, "Ee, Nutsɔ, wa heɔ yeɔ."

29 Kɛkɛ nɛ Yesu ta a hɛ ngmɛ ɔmɛ a he nɛ e de mɛ ke, "E ba mi ha nyɛ ngɛ nyɛ hemi kɛ yemi ɔ nya."

30 Nɛ a hɛ ngmɛ ɔmɛ bli amlɔ ɔ nɔuu. Nɛ Yesu bɔ mɛ kɔkɔ veveeve ke a ko ha nɛ nɔ ko nɛ le enɛ ɔ, 31 kɛkɛ nɛ a ho mohu nɛ a ya je e yi kɛ kpa ma a mi tsuo.

32 Benɛ Yesu je lejɛ ɔ kɛ yaa a, e kɛ nyumu ko nɛ mumi yayami ngɛ e mi nɛ e tui munyu ya kpe. 33 Yesu hia mumi yayami ɔ kɛ je e mi nɛ e bɔni munyu tumi nɔuu. Enɛ ɔ pee nihi nɛ ngɛ lejɛ ɔ nyakpɛ nɛ a de ke, "Wa nɛ nɔ́ nɛ ɔ eko hyɛ gblee!"

34 Se Farisi bi ɔmɛ hu de ke, "E hiaa mumi yayami kɛ jee nihi a mi ejakaa mumi yayami ɔmɛ a matsɛ ji lɛ nitsɛ."

35 Nɛ Yesu kpa si ngɛ lejɛ ɔ ma amɛ kɛ kɔpe ɔmɛ a mi; nɛ e tsɔɔ ni nɛ e fiɛ Hiɔwe Matsɛyemi ɔ he Manye Munyu ɔ ngɛ Yuda bi ɔmɛ a kpe he ɔmɛ, nɛ e tsa hiɔ slɔɔtoslɔɔtohi. 36 E muklii mi sa lɛ ngɛ nihi nɛ ba e ngɔ ɔ a he, ejakaa a haomi ɔmɛ hiɛ fuu, nɛ a li he nɛ a yaa kɛ bɔ nɛ a ngɛ pee. A ngɛ kaa jijɔhi nɛ be kpakalɔ.

37 Nɛ e de e kaseli ɔmɛ ke, "Ni kpami ɔ hiɛ, se ni tsuli ɔmɛ a he pi, 38 lɔ ɔ he je ɔ, nyɛ kpa ni kpami nɔ hyɛlɔ ɔ pɛɛ nɛ e he ni tsuli fuu kɛ ba ni kpami ɔ mi."