1 Maa pee ligbi saii se ɔ, Yesu kpale kɛ ba Kapernaum, kɛkɛ nɛ a nu e he nɔuu kaa e ba ma a mi nɛ e ngɛ we mi. 2 E kɛ we nɛ nihi bɔni bumi pue e nɔ kɛ ya si benɛ we ɔ mi hyi tɔ, nɛ agbo ɔ nya hu tsi nɛ a nɛ blɔ ngɛ he ko hu. Nɛ Yesu fiɛ Munyu ɔ kɛ tsɔɔ mɛ. 3 Kɛkɛ nɛ nihi eywiɛ komɛ tloo nɔ ko nɛ e ninehi kɛ e nanehi gbo kɛ ba ke Yesu nɛ e tsa lɛ. 4 Benɛ ni ɔmɛ na kaa blɔ be nɛ a ma kɛ wo nɔ ɔ kɛ su Yesu he mi ɔ, a kuɔ tsu ɔ nɛ a hia tsu ɔ yi mi. A wo hiɔtsɛ ɔ kɛ e sa nɛ e hwɔɔ si ngɛ nɔ ɔ tsuo kɛ gu lejɛ ɔ kɛ kple tsu ɔ mi kɛ ba fɔ Yesu hɛ mi.

5 Nɛ Yesu na nihi nɛ wo nɔ ɔ kɛ ba amɛ a hemi kɛ yemi kaa e nya wa a, e de hiɔtsɛ ɔ ke, "Binyumu, a wo o tɔmi ɔmɛ kɛ ke mo!"

6 Se Yuda nikɔtɔma amɛ ekomɛ ngɛ nihi nɛ ba lejɛ ɔ a kpɛti, nɛ a nu nɔ́ nɛ Yesu de ɔ. 7 Kɛkɛ ɔ nɔ́ nɛ a susu ji, "Mɛni he je nɔ nɛ ɔ tu munyu kaa kikɛ ɔ? Pi musu nɛ e bɔ ji nɛ ɔ lo? Ngɛ Mawu se ɔ, mɛnɔ hu pa ngɛ nɛ ma nyɛ wo nɔ ko he yayami kɛ ke lɛ?"

8 Se Yesu na nɔ́ nɛ a susu ngɛ a yi mi ɔ amlɔ ɔ nɔuu, nɛ e bi mɛ ke, "Mɛni he je nɛ enɛ ɔ ngɛ nyɛ haoe? 9 Kaa a ma de hiɔtsɛ ɔ ke, ‘A wo o tɔmi ɔmɛ kɛ ke mo’ aloo ‘Moo te si nɛ o wo o sa a nɛ o nyɛɛ ɔ, a ti te nɔ nɛ peemi wa nɛɛ’? 10 Bɔ nɛ pee nɛ nyɛɛ le mwɔnɛ ɔ kaa Nɔmlɔ Bi ɔ ngɛ he wami ngɛ zugba nɛ ɔ nɔ nɛ e woɔ tɔmi ngɔ keɔ," e plɛ hyɛ hiɔtsɛ ɔ nɛ e de lɛ ke, 11 "I ngɛ mo dee ke, moo te si nɛ o wo o sa a nɛ o ho we mi ya."

12 Yesu nya nɔɛ si nɛ hiɔtsɛ ɔ te si nɛ e wo e sa a ngɛ nimli asafo nɛ ba pue si ɔmɛ a hɛ mi nɛ e nyɛɛ e nane nɔ kɛ je kpo. Enɛ ɔ pee nɔ fɛɛ nɔ nyakpɛ nɛ a je Mawu yi nɛ a de ke, "Enɛ ɔ lɛɛ wa nɛ eko hyɛ gblee!"

13 Enɛ ɔ se ɔ, Yesu je kpo ekohu kɛ ho wo ɔ nya ya nɛ nihi fuu bu e nɔ kɛ ya lejɛ ɔ nɛ e fiɛ ha mɛ. 14 Benɛ e ngɛ nyɛɛe ngɛ wo ɔ nya a, e na Levi nɛ ji Alfeo bi ɔ nɛ e hii si ngɛ e lapoo tsumi he ɔ, nɛ e de lɛ ke, "Mo ba nyɛɛ ye se." Nɛ Levi te si nɛ e nyɛɛ Yesu se.

15 Jamɛ a ligbi ɔ gbɔkuɛ ɔ, Levi tsɛ okplɔɔ nɛ e tsɛ Yesu kɛ nihi nɛ e kɛ mɛ ngɛ nyɛɛe ɔ kɛ lapoo tsuli kpahi nɛ e kɛ mɛ tsuɔ ni ɔ kɛ yayami peeli kpanakuhi kpahi fuu nɛ nyɛɛ Yesu se ɔ nɛ a kɛ lɛ ba ye ni. 16 Se benɛ Farisi bi ɔmɛ kɛ Yuda nikɔtɔma amɛ ekomɛ na kaa Yesu kɛ nimli slɔɔto nɛ ɔmɛ hii si ngɛ ni yee ɔ, a bi e kaseli ɔmɛ ke, "Kɛ peeɔ kɛɛ nɛ e kɛ nimli kaa kikɛ ɔ nɛ a ji yayami peeli, lapoo tsuli kɛ ojo fiali a hii si nɛ a yeɔ ni kɛɛ? Pe e li a mi tso lo?"

17 Yesu nu a sane bimi ɔ nɛ e ha mɛ heto nɛ e de ke, "Hiɔtsɛ nɛ tsopatsɛ he hia, tsopatsɛ he hia we nɔmlɔ nɛ ngɛ kpakpataa. I bɛ ngɛ dali a he, se mohu yayami peeli a he nɛ i ba ngɛ nɛ a tsake a tsui."

18 Ngɛ Yuda bi ɔmɛ a jami blɔ nya tomi kɛ a kusumi nya a, a hiɔɔ ngma. Ja a nɔuu Yohane kaseli ɔmɛ kɛ Farisi bi ɔmɛ hu peeɔ. Enɛ ɔ he je ɔ, ni komɛ ba bi Yesu ke, "Mɛni he je nɛ moo lɛɛ o kaseli ɔmɛ yeɔ ni be fɛɛ be nɛ a hí ngma a?"

19 Nɛ Yesu ha mɛ heto nɛ e de ke, "Kɛ maa pee kɛɛ nɛ ayɛflo ɔ huɛmɛ maa fi nya nɛ niye ni be a nya mi yae be mi nɛ ayɛflo ɔ ngɛ yo kpee? Anɛ a bua be a he jɔe be mi nɛ e kɛ mɛ ngɛ ɔ lo? 20 Se o nɛ, be ma nɛ a ma wo a huɛ ɔ kɛ je a he nɛ jamɛ a be ɔ mi loko ji a maa hiɔ ngma a nɛ. 21 Mɛnɔ woɔ bo he kɛ taa bo momo? Bo momo ɔ ma gba nɛ pa a maa kle. 22 Nɛ mɛnɔ woɔ wai he kɛ woɔ wai tɔ momo mi? Da a nya wa nɛ tɔ ɔ ma pɛ nɛ da a ma pue si. Da he ɔ, tɔ he mi nɛ a kɛ woɔ."

23 Be ko ngɛ Hejɔɔmi Ligbi ɔ nɔ ɔ, Yesu kɛ e kaseli ɔmɛ nyɛɛ kɛ ya gu blɛfo ngmɔ ko mi. Hwɔ ngɛ kaseli ɔmɛ yee nɛ a kpɔ blɛfo ɔ eko nɛ a ngɛ kpee.

24 Enɛ ɔ ha nɛ Yuda nikɔtɔma amɛ ekomɛ bi Yesu ke, "Mɛni he je nɛ o kaseli ɔmɛ ngɛ wa Hejɔɔmi Ligbi mlaa a nɔ tɔe ɔ? Blɛfo ɔ nɛ a ngɛ kpɔe ngɛ kpee ɔ, ni nɛ a ngɛ tsue ɔ nɛ."

25 Yesu ha mɛ heto nɛ e bi ke, "Anɛ nyɛ kai we nɔ nɛ David kɛ e huɛ ɔmɛ pee ngɛ Osɔfo Nɔkɔtɔma Abiata yi nɔ benɛ hwɔ ngɛ mɛ yee ɔ? 26 Kaa a ya sɛ he nɛ tsɔ pe kulaa ngɛ Sɔlemi We ɔ nɛ a ya ye abolo nɛ a kɛ ma Mawu hɛ mi, nɛ ngɛ mlaa a nya a, osɔfohi pɛ nɛ ngɛ he blɔ nɛ a yeɔ ɔ lo?" 27 Nɛ Yesu de mɛ ke, "Nɔmlɔ he nɛ a to Hejɔɔmi Ligbi ɔ ngɛ; se tsa pi Hejɔɔmi Ligbi ɔ he nɛ a bɔ Nɔmlɔ ngɛ. 28 Ja a he ɔ, Nɔmlɔ Bi ɔ ngɛ Hejɔɔmi Ligbi ɔ po nɔ he wami."