1 "Nyɛ ko kojo nɔ ko konɛ a ko kojo nyɛ hu. 2 Ejakaa nɔ́ nɛ o ma kɛ pee nɔ ko ɔ, jamɛ a nɔ́ ɔ nɔuu nɛ a ma kɛ pee mo hu. 3 Se mɛni he je nɛ o naa ngu nyafii nɛ ngɛ o nyɛmi hɛ ngmɛ nɔ ɔ, se mo nitsɛ o nɔ́ agbo ɔ lɛɛ o nɛ? 4 Nɛ kɛ peeɔ kɛɛ nɛ o deɔ ke, Anyɛmi, mo ha nɛ ma je ngu bɔbɔyoo ɔ ngɛ o hɛ ngmɛ nɔ ha mo, be mi nɛ mo nitsɛ o nɔ́ ɔ maa si kaa koku nɛ o hyɛ we nɔ́. 5 Osatotsɛ! Mo je o ngu agbo ɔ kekle loko ji o ma nyɛ ye ke bua o nyɛmi ɔ.

6 Nyɛ ko ngɔ níhi nɛ ngɛ klɔuklɔu kɛ ha nihi nɛ a he tsɔ we, nɛ nyɛ ko sake nyɛ june ngɔ pue si ngɛ kpotoohi a hɛ mi, ejakaa a maa naa nɔ nɛ a ma tua nyɛ hulɔ.

7 Nyɛ bi, nɛ a ma ha nyɛ; nyɛ hla, nɛ nyɛ maa na; nyɛ si, nɛ a ma bli ha nyɛ. 8 Ejakaa nɔ tsuaa nɔ nɛ biɔ ɔ, e nine suu nɔ, nɛ nɔ tsuaa nɔ nɛ hlaa a, e naa; nɛ nɔ nɛ siɔ ɔ, a bliɔ haa lɛ. 9 Tsɛ te nɔ nɛ ke e bi bi lɛ abolo nɛ e ma ha lɛ tɛ nɛɛ? 10 Aloo ke e bi bi lɛ lo nɛ e ma ha lɛ sinɔ duɔtsɛ nɛɛ? Dabi! 11 Lɛɛ ke nyɛ nimli yayamihi nyɛ le bɔ nɛ a kɛ e bimɛ ni kpakpahi ɔ, anɛ nyɛ he we yi kaa nyɛ Tsɛ nɛ ngɛ hiɔwe ɔ maa ngɔ ni kpakpahi kɛ ke nihi nɛ biɔ lɛ ɔ lo?

12 Nɔ́ nɛ nyɛ maa suɔ kaa nihi nɛ a pee ha nyɛ ɔ, nyɛ hu nyɛɛ pee ja a nɔuu ha mɛ. Enɛ ɔ ji Mose mlaa amɛ kulaa a kpiti pomi."

13 "Nyɛɛ sɛ agbo nɛ bli we ɔ mi, ejakaa agbo nɛ bli ɔ kɛ blɔ gbajaa nɛ nɔ nyɛɛmi yi ɔ kɛ nɔ yaa hɛ mi kpatami mi, nɛ nihi fuu nɛ sɛɛ mi. 14 Se agbo nɛ bli we ɔ nɛ e kɛ nɔ yaa neneene wami mi ɔ nɛ, nɛ nihi bɔɔ pɛ nɛ naa jamɛ a blɔ ɔ.

15 Nyɛɛ hyɛ nyɛ he saminya ngɛ lakpa tsɔɔli ɔmɛ a he. Ejakaa a ngɔɔ jijɔ he womi kɛ haa a he kɛ baa nyɛ ngɔ nɛ nyɛ naa mɛ kaa a hi, se a mi je ɔ, ogbeteehi ji mɛ, nɛ a ma kpata nyɛ hɛ mi. 16 A ni peemi ni ɔmɛ ma ha nyɛ yo mɛ kaa bɔ nɛ a leɔ tso kɛ e yiblii ɔ. Nɔ ko ya tsɔ we wai yiblii ngɛ mio tso nɔ, aloo tso ko kaa mangoo tsoɔ yiblii ngɛ zezle nɔ. 17 A leɔ tso slɔɔtoslɔɔto ɔmɛ a mi tso kɛ a yiblii ɔmɛ. 18 Tso nɛ woɔ yiblii nɛ ngɔɔ ɔ, lɛ nɔuu e be yiblii nɛ a yi woe. Ja a nɔuu tso nɛ woɔ yiblii nɛ a yi be yiblii kpakpa nyɛe maa wo. 19 Enɛ ɔ he je nɛ a poo tso nɛ wui yiblii nɛ a yeɔ ɔ kɛ peeɔ lɛ nɛ a slɛɔ ɔ nɛ. 20 Lɔ ɔ he je ɔ, blɔ nɔ nɛ a guu kɛ leɔ tso loo nɔmlɔ adesa mi tso ji yiblii nɛ e woɔ.

21 Tsa pi nɔ tsuaa nɔ nɛ deɔ ke, ‘Nutsɔ, Nutsɔ’ ɔ nɛ maa sɛ Hiɔwe Matsɛyemi ɔ mi, ja nihi nɛ peeɔ ye Tsɛ nɛ ngɛ hiɔwe ɔ suɔmi nya ni ɔ. 22 Ngɛ Kojomi Ligbi ɔ nɔ ɔ, nihi fuu ma de mi ke, ‘Nutsɔ, Nutsɔ, wa fiɛ o he sane kɛ tsɔɔ nihi nɛ wa hia mumi yayamihi kɛ je nihi a mi, nɛ wa pee nyakpɛ níhi ngɛ o biɛ mi.’ 23 Se ma de mɛ ke, ‘I li nyɛ. Nyɛɛ je ye nɔ, nyɛ nihi nɛ nyɛ peeɔ ni yayamihi ɔ.’

24 Nɔ tsuaa nɔ nɛ buɔ ye munyu ɔmɛ tue nɛ e yeɔ a nɔ ɔ hɛ mi tɛ; e ngɛ kaa nɔ ko nɛ e ma e tsu ngɛ tɛ nɔ. 25 Nɛ akɛnɛ tsu ɔ maa si ngɛ tɛ nɔ he je ɔ, ke hiɔmi nɛ, nɛ pa hia, nɛ kɔɔhiɔ fia kɛ si tsu ɔ, e be hulee.

26 Se nihi nɛ nuɔ ye munyu ɔmɛ se a yi nɔ ɔ, a ngɛ kaa nɔmlɔ lohwe nɛ ma e tsu ngɛ kewu nɔ. 27 Nɛ ke hiɔmi nɛ, nɛ pa hia, nɛ kɔɔhiɔ fia kɛ si tsu ɔ, e maa hule bum." 28 Benɛ Yesu gbe munyu nɛ ɔmɛ a nya a, nɔ tsuaa nɔ pee yaa, 29 ejakaa e tsɔɔ mɛ ni kaa nɔ ko nɛ ngɛ he blɔ, se pi kaa Yuda mlaa tsɔɔli ɔmɛ.