1 Jamɛ a be ɔ mi nɔuu ɔ, kaseli ɔmɛ ba Yesu ngɔ nɛ a ba bi lɛ nɛ e tsɔɔ mɛ a ti nɔ nɛ maa pee nɔmlɔ ngua pe kulaa ngɛ Hiɔwe Matsɛyemi ɔ mi.

2 Kɛkɛ nɛ Yesu tsɛ jokuɛ nyafii ko kɛ ba e ngɔ, nɛ e kɛ lɛ ba da a kpɛti, 3 nɛ e de mɛ ke, "Anɔkuale nɛ i ngɛ nyɛ dee ɔ nɛ, ke nyɛ tsakee we nɛ nyɛ plɛ kaa jokuɛ tsɔwi ɔ, nyɛ be hiɔwe Matsɛyemi ɔ mi sɛe kɔkɔɔkɔ. 4 Ja a he je ɔ, nɔ tsuaa nɔ nɛ baa e he si kaa jokuɛ nɛ ɔ, lɛ ji nɔmlɔ ngua pe kulaa ngɛ Hiɔwe Matsɛyemi ɔ mi. 5 Nɛ nɔ tsuaa nɔ nɛ heɔ jokuɛ nyafii kaa nɔ nɛ ɔ atuu ngɛ ye biɛ miɔ, a mi nɛ e ngɛ hee atuu ɔ nɛ. 6 Nɛ nɔ nɛ ma kpata jokuɛ tsɔwi nɛ ɔmɛ a ti nɔ kake nɛ heɔ ye nɔ yeɔ nane ɔ, afani nɛ a kɛ wɛ muɔ e kuɛ nɛ a ya sake lɛ ngɔ fɔ wo mi.

7 Kpoo ha je ɔ ngɛ nihi a nane nɛ ngɛ kpatae ɔ he. Nane kpatami kahi ngɛ mohu, se kpoo ha nɔ nɛ nane kpatami ka a maa gu e nɔ kɛ ba a. 8 Lɔ ɔ he je ɔ, ke o nine loo o nane ha nɛ o peeɔ yayami ɔ, poo lɛ ngɛ o he nɛ o sake lɛ ngɔ fɔ he. Ejakaa e maa hi ha mo kaa o kɛ o nine popoe loo o nane popoe maa sɛ wami mi pe nɛ o nine ɔmɛ loo o nane ɔmɛ maa su ngɛ o he nɛ o maa ya neneene la a mi. 9 Nɛ ke o hɛ ngmɛ ha nɛ o peeɔ yayami ɔ, hiaa lɛ nɛ o sake lɛ ngɔ fɔ he; afani nɛ o kɛ hɛ ngmɛ kake maa sɛ wami mi pe nɛ o hɛɛ hɛ ngmɛ enyɔ nɛ o maa ya neneene la a mi.

10 Nyɛɛ hyɛ saminya nɛ nyɛ ko gbe jokuɛ tsɔwi nɛ ɔmɛ a ti nɔ ko he guɛ; ejakaa, i ngɛ nyɛ dee ke, ngɛ hiɔwe ɔ, a bɔfohi hyɛɔ ye Tsɛ hɛ mi daa. 11 Nɛ Nɔmlɔ Bi ɔ ba nɔ nɛ laa a yi wami hemi.

12 Kɛ nyɛ susu kɛɛ? Ke nɔ ko ngɛ to lafa nɛ a kpɛti kake laa a, anɛ e be to nyingmi nɛɛ kɛ nɛɛ ɔ sie ngɛ yoku ɔmɛ a nɔ nɛ e ya nɛ e ya hla kake ɔ nɛ laa a lo? 13 Nɛ ke e na lɛ ɔ, i ngɛ nyɛ dee anɔkuale mi ke, e bua jɔɔ e he ngɛ to kake ɔ he pe to nyingmi nɛɛ kɛ nɛɛ ɔ nɛ laa we ɔ. 14 Ja a nɔuu nɛ ye Tsɛ ngɛ hiɔwe ɔ sume kaa jokuɛwi nɛ ɔmɛ a ti nɔ kake hɛ mi kpataa."

15 "Ke o nyɛmi ko tɔ o nɔ ɔ, yaa nɛ o kɛ lɛ nyɛ ni enyɔ ɔmɛ kɛkɛ nyɛ ya tu. Ke e bu mo tue nɛ e nu sisi kaa e tɔ ɔ, nyɛmi nɛ pee nyɛmi. 16 Se ke e bui ɔ, ngɔɔ nɔ kake loo ni enyɔ kɛ piɛ o he nɛ nyɛ ya na lɛ ekohu konɛ odase yeli nɛ ɔmɛ nɛ a ya ye nɔ́ nɛ o ma de ɔ he odase. 17 Nɛ ke e bui mɛ hu tue o, yaa de asafo ɔ; nɛ ke e gbo asafo ɔ hu tue ɔ, moo bu lɛ kaa wɔ jalɔ loo lapoo tsulɔ. 18 Anɔkuale i ngɛ nyɛ dee ke, nɔ́ tsuaa nɔ nɛ nyɛ maa fi ngɛ zugba nɛ ɔ nɔ ɔ, a maa fi ngɛ hiɔwe; nɛ nɔ́ tsuaa nɔ nɛ nyɛ maa pine ngɛ zugba nɛ ɔ nɔ ɔ, a maa pine ngɛ hiɔwe.

19 Jehanɛ ɔ hu, i ngɛ nyɛ dee ke, ke nyɛ ti ni enyɔ pee kake ngɛ zugba nɛ ɔ nɔ kɛ bi nɔ́ ko ɔ, ye Tsɛ nɛ ngɛ hiɔwe ɔ ma ha nyɛ. 20 Ejakaa he nɛ ni enyɔ loo ni etɛ bua a he nya ngɛ ngɛ ye biɛ mi ɔ, i ngɛ a kpɛti ngɛ lejɛ ɔ."

21 Kɛkɛ nɛ Petro ba Yesu ngɔ nɛ e ba bi lɛ ke, "Nutsɔ, si enyɛmɛ ye nyɛmi ma tɔ ye nɔ nɛ i ma ngɔ kɛ ke lɛ? Si kpaago lo?"

22 Yesu he nɔ nɛ e de lɛ ke, "Dabi, tsa pi si kpaago, se mohu si kpaago totoe nyingmi kpaago.

23 Enɛ ɔ he je ɔ, Hiɔwe Matsɛyemi ɔ ngɛ kaa matsɛ ko nɛ ngɛ hlae kaa e kɛ e sɔmɔli maa bu akɔtaa. 24 Nɛ benɛ e bɔni bumi ɔ, a kɛ nɔ ko nɛ hɛɛ lɛ hiɔ sidi akpe lafa ba e ngɔ. 25 Se akɛnɛ e nyɛ we hiɔ ɔ nɛ e wo he je ɔ, e nutsɔ ɔ fa ke a jua lɛ kɛɛ e yo kɛ e bimɛ kɛ nɔ́ tsuaa nɔ nɛ e ngɛ ɔ nɛ a kɛ wo hiɔ ɔ.

26 Kɛkɛ nɛ sɔmɔlɔ ɔ kpla si ngɛ e nutsɔ ɔ hɛ mi nɛ e kpa lɛ pee ke, ‘Ye Nutsɔ, moo to o tsui si ha mi nɛ ma wo mo hiɔ ɔ tsuo.’

27 E nutsɔ ɔ muklii mi sa lɛ ngɛ e he nɛ e na lɛ mɔbɔ. E ngmɛɛ e he nɛ e kɛ hiɔ ɔ ke lɛ.

28 Se benɛ sɔmɔlɔ nɛ ɔ je kpo ɔ, e ya na e huɛmɛ sɔmɔli ɔmɛ a ti nɔ kake nɛ hɛɛ lɛ hiɔ sidi akpe enyɔ, nɛ e nu lɛ nɛ e mia e kuɛ si nɛ e de lɛ ke, ‘Moo wo mi hiɔ nɛ o hɛɛ mi ɔ nɔuu!’

29 Nɛ e huɛ sɔmɔlɔ ɔ kpla si kpa lɛ pɛɛ ke, ‘Mo na tsui ha mi nɛ ma wo mo hiɔ ɔ tsuo.’

30 Se lɛɛ e kplɛɛ we nɔ, nɛ e ha nɛ a wo lɛ tsu mi kɛ ya si be nɛ e maa wo lɛ hiɔ ɔ tsuo.

31 Se benɛ e huɛmɛ sɔmɔli ɔmɛ na nɔ́ nɛ e pee ɔ, e dɔ mɛ saminya nɛ a ya bɔ a nutsɔ ɔ nɔ́ nɛ ba a. 32 Kɛkɛ nɛ a Nutsɔ ɔ ha a ya tsɛ lɛ kɛ ba nɛ e de lɛ ke, ‘Sɔmɔlɔ yi kpɛti walɔ! Akɛnɛ o kpa mi pɛɛ he je ɔ, i ngɔ hiɔ agbo nɛ o hɛɛ mi ɔ tsuo kɛ ke mo. 33 Anɛ e sɛ kaa mo hu o naa o huɛ sɔmɔlɔ ɔ mɔbɔ kaa bɔ nɛ ami hu i na mo mɔbɔ ɔ lo?’

34 A nutsɔ ɔ muklii mi fu saminya nɛ e wo lɛ kɛ ha nɛ a ya wa lɛ yi mi nɛ a wo lɛ tsu mi kɛ ya si be nɛ e maa wo lɛ hiɔ ɔ kulaa. 35 Ja a nɔuu ye Tsɛ nɛ ngɛ hiɔwe ɔ maa pee nyɛ, ke nyɛ ngɔɛ nyɛ nyɛmimɛ a tɔmi kɛ ki mɛ ke ji nyɛ tsui mi!"