1 Ligbi ekpa se ɔ, Yesu ngɔ Petro kɛ Yakobo kɛ e nyɛmi Yohane nɛ e kɛ mɛ pɛ ho yoku ko nɔ ya. 2 A na kaa e Nɔmlɔ tso su tsake nɛ e hɛ mi bɔni kpɛmi kaa pu. E tade ɔmɛ hiɛ futafuta kaa pu la.

3 Nɛ tlukaa a, Mose kɛ Elia ba je a he kpo nɛ a kɛɛ lɛ bɔni munyu tumi. 4 Kɛkɛ nɛ Petro de Yesu ke, "Nutsɔ, e hi ha wɔ kaa waa hi hiɛ ɔ. Ke o suɔ ɔ, ma pee bo tsuhi etɛ ngɛ hiɛ ɔ, o nɔ kake kɛ Mose nɔ kake kɛ Elia nɔ kake."

5 Benɛ e ngɛ munyu nɛ ɔ tue ɔ, bɔ kuu hleii ko ba ha a nɔ, nɛ gbi ko je bɔ kuu ɔ mi de ke, "Nɔ nɛ ɔ ji ye suɔmi Bi nɛ ye bua jɔɔ e he, nyɛɛ bu lɛ tue."

6 Benɛ kaseli ɔmɛ nu gbi nɛ ɔ, a ye gbeye nɛ a kɛ a hɛ mi bu si. 7 Yesu ba nɛ e ba ta a he nɛ e de mɛ ke, "Nyɛɛ te si, nyɛ ko ye gbeye."

8 Se benɛ a wo a hɛ mi nɔ ɔ, a nɛ nɔ ko pe Yesu pɛ.

9 Nɛ benɛ a ngɛ yoku ɔ kplee ɔ, Yesu bɔ mɛ kɔkɔ ke a ko de nɔ ko nɔ́ nɛ a na a kɛ ya si Nɔmlɔ Bi ɔ maa te si ke je gbeje.

10 E kaseli ɔmɛ bi lɛ ke, "Mɛni he je nɛ mlaa tsɔɔli ɔmɛ deɔ ke ja Elia ba loko ji Nɔmlɔ Bi ɔ maa ba a?"

11 Nɛ Yesu he nɔ ke, "Anɔkuale munyu nɛ a ngɛ tue. Elia ma nɛ e ba to níhi kulaa a blɔ nɔ. 12 Se Niinɛ, Elia ba mo nɛ a yo we lɛ, nɛ nihi fuu pee lɛ níhi nɛ sɛ. Ja a nɔuu Nɔmlɔ Bi ɔ hu maa na amanehlu ngɛ a dɛ mi."

13 Enɛ ɔ ha nɛ e kaseli ɔmɛ kɔ se kaa Yohane Baptisilɔ ɔ he munyu nɛ e ngɛ tue ɔ nɛ.

14 Benɛ a kple yoku ɔ kɛ ba e sisi ɔ, a ba na nihi fuu nɛ ngɛ mɛ mlɛe kɛkɛ nɛ nyumu ko ba e ngɔ ba kpla si ngɛ e hɛ mi, 15 nɛ e de lɛ ke, "Nutsɔ, naa ye binyumuyo ɔ mɔbɔ, ejakaa e ngɛ kɔkɔ hiɔ nue nɛ e ngɛ nɔ nae; bɔɔ kɛ bɔɔ kɛkɛ e ya nɔ la mi; nɛ bɔɔ kɛ bɔɔ hu kɛkɛ e ya nɔ nyu mi. 16 I kɛ lɛ ba ha o kaseli ɔmɛ se a nyɛ we lɛ nɛ a tsa."

17 Yesu ha heto nɛ e de ke, "Oo, yinɔ bihi nɛ a tsui ti, nɛ be hemi kɛ yemi. Mɛni be i kɛ nyɛ maa hi si kɛ ya si? Nɛ mɛni be ma to ye tsui si ha nyɛ kɛ ya ta. Nyɛɛ kɛ lɛ nɛ ba ha mi ngɛ hiɛ ɔ." 18 Kɛkɛ nɛ Yesu nga mumi yayami ɔ yi nɛ e je kpo kɛ je jokuɛ ɔ mi nɛ e na he wami jamɛ a ngmlɛfia a nɔ nɔuu.

19 Pee se ɔ, Yesu kaseli ɔmɛ ba e ngɔ nɛ a ba bi lɛ ke, "Mɛni he je nɛ wɔɔ lɛɛ wa nyɛ we nɛ waa hia jamɛ a mumi yayami ɔ kɛ je kpo ɔ?"

20 Yesu he nɔ nɛ e de mɛ ke, "Nyɛ hemi kɛ yemi nɛ pi ɔ he je i. Ejakaa ke nyɛ ngɛ hemi kɛ yemi nɛ ngɛ kaa sinapi wu nyafii ɔ, nyɛ ma de yoku nɛ ɔ ke, ‘Hiaa ngɛ hiɛ ɔ kɛ ya lejɛ ɔ,’ nɛ e maa hia; nɛ nɔ ko be nɛ nyɛ be nyɛe maa pee. 21 Se kikɛmɛ a mumi yayami nɛ ɔ, a nyɛ we lɛ hiami, ja kɛ gu ngma himi kɛ sɔlemi nɔ loko ji a ma nyɛ pee."

22 Ligbi ko benɛ a ngɛ Galilea lolo ɔ, Yesu de mɛ ke, "A maa tsɔɔ Nɔmlɔ Bi ɔ se blɔ, nɛ a ma je lɛ kɛ wo nimli a dɛ mi. 23 A maa gbe lɛ nɛ ligbi nɛ ji etɛ ɔ nɔ ɔ, a ma tle lɛ si kɛ je gbeje." Kɛkɛ nɛ aywilɛho nu kaseli ɔmɛ.

24 Benɛ a ba su Kapernaum ɔ, Sɔlemi We onia tsuli ɔmɛ ba Petro ngɔ nɛ a ba bi lɛ ke, "Anɛ nyɛ tsɔɔlɔ ɔ wui jeha onia a lo?"

25 Nɛ Petro he nɔ ke, "E woɔ." Benɛ Petro ba we ɔ mi ɔ, Yesu sɛ hlami bi lɛ ke, "Kɛ o susu kɛɛ, Petro? Mɛnɔmɛ a dɛ zugba a nɔ matsɛmɛ heɔ lapoo ngɛ? Mɛ nitsɛmɛ a bimɛ a dɛ aloo ma setsɛmɛ nɛ a ye a nɔ a dɛ?"

26 Petro he nɔ ke, "Ngɛ ma setsɛmɛ a dɛ." Yesu de lɛ ke, "Saminya, lɛɛ a bimɛ ɔmɛ a he jɔ mɛ mɔ. 27 Se kɛ ɔ, wa be a nya doe, ja a he je ɔ, yaa wo ɔ nya nɛ o ya fɔ gbowe, nɛ kekleekle lo nɛ o ma sa a, moo pa e nya mi nɛ o maa na sika nɛ maa su i kɛ mo wa onia a nya. Mo je nɛ o kɛ ba ha mɛ."