Efeso 1

15 Enɛ ɔ he je ɔ, kɛ je benɛ i nu nyɛ hemi kɛ yemi nɛ nyɛ ngɛ ngɛ Nutsɔ Yesu mi ɔ, kɛ suɔmi nɛ nyɛ ngɛ kɛ ha Kristo se nyɛɛli nɛ ngɛ he fɛɛ he ɔ, 16,17 i jɔɔ we Mawu si nami kɛ ha nyɛ. I kaiɔ nyɛ daa ngɛ sɔlemi mi, nɛ i biɔ anunyami Mawu ɔ, wa Nutsɔ Yesu Kristo Tsɛ ɔ, nɛ e ha nyɛ nile nɛ nyɛɛ na paa, nɛ nyɛɛ nu nɔ nɛ Kristo ji ɔ sisi kɛ nɔ́ nɛ e ba tsu ha nyɛ ɔ. 18 Nɛ i sɔleɔ hu kaa e bli nyɛ mumi mi hɛ ngmɛ ɔmɛ nɛ nyɛɛ na nɔ́ nɛ e tsɛ nyɛ kɛ ha a, nɛ fɔɔ si ngɛ nyɛ hɛ mi nɛ nyɛ nine maa su nɔ hwɔɔ se ɔ. I ngɛ hlae nɛ nyɛɛ le kaa a pee Mawu niatsɛ, ejakaa wɔ nɛ ji Kristo nihi ɔ, a ngɔ wɔ kɛ ha lɛ. 19 Nɛ i ngɛ sɔlee nɛ nyɛɛ le bɔ nɛ e he wami kle hluu kɛ ha, nɛ e ma nyɛ ye kɛ bua nihi nɛ heɔ e nɔ yeɔ. Jamɛ a he wami ɔ nɔuu 20 nɛ e kɛ tle Kristo si kɛ je gbeje nɛ e kɛ lɛ hi anunyami ngwɔ he ngɛ Mawu hiɔ nine nɔ ngɛ hiɔwe, 21 nɛ e wo e nɔ pe matsɛ loo nɔ yelɔ loo hɛ mi nyɛɛlɔ ko. Nɛ nɔ ko be nɛ kɛ lɛ sɔ ngɛ anunyami mi ngɛ je nɛ ɔ mi loo je nɛ maa ba a mi. 22 Mawu ngɔ níhi kulaa ngɔ wo e dɛ, nɛ e pee lɛ asafo ɔ kulaa Yi. 23 Asafo ɔ ji lɛ nitsɛ e nɔmlɔ tso ɔ, nɛ lɛ nitsɛ e ngɛ mi, nɛ lɛ ji nɔ́ tsuaa nɔ peelɔ, nɛ lɛ ji nɔ nɛ haa nɔ nɔ́ tsuaa nɔ ngɛ he fɛɛ he.