1 Ayi yakukangasha, guloli mji gwa Yerusalemu yaguweriti gumema wantu, vinu gusigala mahami!

Na guweriti gumanika mumaisi, vinu guwera gambira mkenja. Muwamu mwa miji guweriti gambira mhinga gwa mfalumi,

vinu guwera mmanda kwa wamonga.

2 Pashiru poseri kalira nentu na masozi gasuluka mumasaya mwakuyi.

Kwahera ata yumu gwa wafiru wakuyi wa kumzyangazyanga.

Waganja wakuyi woseri wamgalambuka woseri wawera wankondu wakuyi.

3 Wantu wa Yuda watolwa muuhamisiwu,

na wantabisiwa nentu gambira wamanda.

Vinu walikala muwamu mwa wantu wa maisi gamonga, peni pahera ponga.

Wankontu wawu wawazyengeta na wahera pahala pakutugira.

4 Njira zazigenda Sayuni zankudaya na kwahera yawapita kugenda mumsambu.

Magomi ga Sayuni gahera shintu na watambika wakuyi walira nentu.

Wahinga wakuyi wankuhinginika na mji gweni gwamntabiku.

5 Wankondu wakuyi ndo yawawukolamlima na kuwera na mpatiru,

Mtuwa Mlungu kagutabisiya toziya ya vidoda vivuwa.

Wana wakuyi walopolwa na kujegerwa kutali.

6 Zyuma zoseri za wantu wa Sayuni zagamira,

wakulu wakuyi wawera gambira shinjapuli yakananjala.

Na weni wawatira wankondu pawawera wahera makakala.

7 Mumashaka ga ntabiku yakuyi, wantu wa Yerusalemu wagahola makaliru gawu gaherepa ga makashu gawaweriti naga.

Kumbiti vinu wamuntabiku na kuhinginika kwa wankondu, kwahera yoseri yakaweziti kuwatanga.

Wankondu wawu wakuseka kuguwa kwawu.

8 Wantu wa Yerusalemu watenditi vidoda nentu na mji gwakuyi guweriti gudoda.

Woseri yawagukwisiti wagujongera, vinu wayiwona soni yakuyi.

Na wantu wa Yerusalemu washigibikila sheni shawu kwa soni.

9 Vidoda vyakuyi viwonekaniti, kumbiti mweni kalisheritindiri upeleru wakuyi.

Kuguwa kwakuyi kuweriti kukulu nentu,

kwahera yakaweza kumtanga. Gutakula. Gwee Mtuwa Mlungu gulori ntabiku yangu,

toziya wankondu wangu wankanga.

10 Wankondu wakuyi wampoka lunda yakuyi yoseri.

Wantu weni wawera ndiri Wayawudi wawona wankondu pawingira Munumba ya Mlungu,

wantu weni Mtuwa Mlungu kawaberiti kwingira amu pahala palijojoniku lya wantu wakuyi.

11 Wantu woseri wa Yerusalemu wankushashatika kusakula shiboga,

Wagalambula vintu vyawu wapati shiboga, su waendereyi kulikala.

Na wantu wa mji wankulira, "Gwee Mtuwa Mlungu, guntoli ntambu yambeziwa."

12 Mwenga wapita njira, mlisherandili shintu?

Muloli! Kwana muntu yoseri katabikiti handa neni,

ntabiku yakanjegeriti Mtuwa Mlungu,

lishaka lya ngalalaliru yakuyi.

13 Mlungu kasulusiyiti motu kulawa kumpindi,

gununguziyiti mpaka mumihonju yangu. Kanyambiriti wavu kambata,

shakapanu kambuziya kumberi, kandeka panilikangasha na kupeluwa makakala paliwala poseri.

14 Kawalangiti vidoda vyangu vyoseri na kazitawa pahala pamuhera,

kavitawiti musingu yaneni na kupeluwa makakala kwa uzotopa wakuyi.

Mtuwa Mlungu kawatenditi wankondu wangu wampati ata wezandiri kuwakanka.

15 Mtuwa Mlungu kawalemiti wamashonta yawanolera neni na kalagalira wamashonta wizi wankomi na wawalagi wantemba wangu wapalu na wadala.

Mtuwa kawaponditi wantu wangu Yuda handa ntambu ya kutimbanga zabibu.

16 Toziya ya aga nankulira na mashozi gandawa.

Nahera muntu yoseri gwa kunzanganzanga.

Wana wangu walekwa gweka washiwa, toziya mnkondu gwangu kankanka.

17 Nyasula mawoku gangu kumbiti kwahera gwa kunyamaziya.

Mtuwa Mlungu kalagalira kuwusu neni Yakobu, wapakwegera wangu waweri wankondu wangu.

Yerusalemu iwera shintu sha kukalalira kwa womberi.

18 Kumbiti Mtuwa Mlungu kagatenda yagafiruwa, toziya nishilema shisoweru shakuyi.

Mwenga watu woseri mpikaniri, muziloli ntabiku zaneni.

Wahinga wangu na wantemba waneni walopolwa na kujegwa muumanda.

19 Niwashemiti waganja wangu wantangu, kumbiti womberi wang'alambuka.

Watambika na wazewi waneni wahowera kumjini,

pawalisakulira shiboga su waweri wakomu.

20 Gwee Mtuwa Mlungu guloli ntambu yawera muntabiku.

Neni nankushashatika mmoyu mwangu, toziya nikugalambuka nentu.

Kunja aku kwana malaga kwa ligumba na mngati kwana kuhowa hera.

21 Wantu woseri wapikanira ntambu yanira nentu, kumbiti kwahera gwa kunzyanganzanga.

Wankondu waneni woseri wapikanira kuwusu ntabiku zyangu.

Wanemelera kuwona lyaguntendiliti.

Lisha lilii lyagutakuliti hagulijegi gulijegi su waweri handa neni.

22 Guwakomi toziya ya ukontola wawu woseri.

Guwatenderi ntambu yaguntendiliti neni toziya ya likosa lyangu lyoseri.

Hinginika nentu kwa ntabiku na nahera nemeru.