1 Neni ndo muntu yankomangitwi toziya ya nkalaliru ya Mlungu.

2 Kantola na kunjega kuluwindu yakuwera ndiri na langala.

3 Kankomanga kayi na kayi paluwala poseri pota kuleka.

4 Kalitenda likuli lyangu na nshimba yaneni izeyeki, mihonju yangu kayimeganga.

5 Kankangaliti na kuzyengeta kwa utama na ntabiku.

6 Kantenda nilikali muluwindu gambira wantu yawahowiti makashu.

7 Kanzengetera shibambaza su nanshapira, kantawiti kwa minyololu izotopa.

8 Ata panshema na kumluwa utanga, kumbiti kalema kupikanira maluwa gangu.

9 Njira zaneni kazidiwa kwa mabuwi makulu, ata wezandiri kugenda koseri.

10 Yomberi kagwadira handa kanyama yawamshema dubu ama simba yakahepelera kunkangala.

11 Kankwega kulawa munjira, kandeganga na kundeka pota utanga.

12 Kawunikiti upindi wakuyi na kananguziya msali gwakuyi.

13 Kansomiti mushimba kwa misali, kulawa muntumbi yakuyi.

14 Wera lijonga kwa wantu wangu woseri, wera lwimbu lwawu paluwala poseri.

15 Kamemiziya ntabiku, kantenda weri na utama.

16 Kasyagira menu gangu mumabuwi, kantenda nkalagati mumalivu.

17 Kuwera na ponga kuwusiwa kwaneni, ndwaluwa kuwera na mpatiru.

18 Nilihola panonga, twezuka nakamu, litumbiru lyangu kwa Mtuwa Mlungu liwuka.

19 Niyihola ntabiku yangu na kuyerayera kwaneni, ndo kukalipa handa shikalikali.

20 Niliholera aga mashaka goseri na rohu yangu imema hinginika.

21 Kumbiti niholiti shisoweru ashi, hangu nanali litumbiru.

22 Toziya ufiru wa Mtuwa Mlungu uperandiri, lusungu lwakuyi lwahera upeleru.

23 Ndo wasyayi kila mandawira, uwaminika wakuyi ndo mkulu nentu.

24 Nilitakulira namweni, Mtuwa Mlungu ndo luhanja lwangu, su hanimtumbiri yomberi.

25 Mtuwa Mlungu ndo mheri kwa wantu yawamtumbira, na kwa woseri yawamjimira na kwa walii yawamluwa utanga.

26 Iherepa muntu kuhepera kwa kunyamalira ulopola yawulawa kwa Mtuwa Mlungu.

27 Na iherepa muntu kulifunda uhepelera, kwanjira shaka sha untemba wakuyi.

28 Mbaka kulikala gweka na kunyamala, toziya Mlungu kalagalira shaka shikamala shimwizili.

29 Kafiruwa kung'ong'onala na kunanagala, pamonga litumbiru badu lyankali.

30 Muntu kafiruwa kumgalambulira lisaya yakamkoma na kuwera kala kwigilangwa.

31 Mtuwa Mlungu hapeni katulemi mashaka goseri.

32 Tembera katutenda twinginiki, hakaweri na lusungu kayi kwa uvuwa wa ufiru wakuyi.

33 Yomberi kafirandiri kuwajegera ntabiku pota kuwahinginiziya wantu.

34 Mtuwa kavimana watatirwa woseri muisi pawatendelwa madoda,

35 kagamana galii yagafiruwa kupananwa muntu, pagapotoziwa kulongolu kwa Mlungu Mkulu,

36 kumwima Muntu yagafiruwa kupananwa kuvyotera motu, hashi Mtuwa Mlungu kagawonandiri aga?

37 Gaa yakaweza kulagalira shintu shilawiri, handa Mtuwa Mlungu pakalagalirandiri iweri hangu?

38 Makontola na maheri galawira hera kwa lilagaliru lya Mlungu Mkulu.

39 Ntambu gaa muntu kalalami, payiwera kakomangwa kwa vidoda vyakuyi?

40 Tufiruwa kulilolera twaweni na kujera matendu getu, su tumwuyiri Mtuwa Mlungu.

41 Patukuluwa Mlungu gwa kumpindi na kulaviya miyoyu yetu patulonga,

42 "Twenga tukutendera vidoda na kukugalambuka na gwenga gutulekeziyandiri."

43 Guwera na maya na kutufata, gutulagiti pota lusungu.

44 Gulizyengetera kwa liwundi lizotopa, maluwa gatwenga goseri nagapena amu.

45 Gututenda kuwera uhakata na udoda muwamu mwa wantu wa isi zimonga.

46 "Wankondu wetu woseri wankutubolera."

47 Tutabika kwa ntiliziwu na lyoga vyavitwizira na tuwera mumaagamiziya na vintu vyetu wavyagamiziya.

48 Masozi galawa mumasu gangu gambira nshemba za mashi toziya ya kulaguwa kwa wantu waneni.

49 Masu gangu galawa masozi pota koya,

50 mpaka Mtuwa Mlungu kulawa kumpindi kaloli pasi na kuwona.

51 Niliti nentu panigawoniti galii yagawapatiti wadala wa mji gwangu.

52 Wankondu wangu yawankalaliriti pota likosa, wawinga gambira mpongu.

53 Wanasiliti m ulirindi pawera mkomu na pampindi paneni wanasira mabuhi.

54 Mashi ganjiti kungibikira kumtuwi na neni niliholiti, awu ndo upeleru wangu.

55 Kulawa pasi pa lirindi nikulililiti. Gwee Mtuwa Mlungu.

56 Gwenga gumpikanira panikulilira, naguleka kupikanira kuluwa utanga kwa neni.

57 Panikushemiti gusokiti pakwegera na neni gung'ambira nagutira.

58 Gwee Mtuwa Mlungu, guntanga muntabiku yangu, na gugalopola makaliru gangu.

59 Gwee Mtuwa Mlungu, guwuwona ukontola yawuntenderitwi guntoziti kwa uheri wa visoweru vyangu.

60 Guwuwona ukontola wa wankondu wangu na mipangu yawu yoseri midoda kwa neni.

61 "Gwee Mtuwa Mlungu gupikanira pawanihigiranga,

na mipangu yawu yoseri midoda kwa neni."

62 Lishaka lyoseri wankondu wangu visoweru vyawu na maholu gawu ndo kundaga neni.

63 Guwalori shaka shoseri pawawera walivaga ama wankugenda, wambolera neni hera.

64 "Gwee Mtuwa Mlungu, guwatozi, ntambu ya vitendu vyawu, teratera na galii ganigatenditi."

65 Guwapangiri na kuwatabisiya,

66 "toziya guwakalalira guwagendeli na guwalagi kulawa muisi!"