1 Gwee Mtuwa Mlungu, guliholi mirandu yayitupatiti,

Na gwenga guwoni soni ya twenga.

2 Isi yetu wapananwa wahenga,

na numba zyetu wapananwa wantu wamonga.

3 Tuwera washiwa yawahera tati,

na wamawu wetu wawera handa wakenja.

4 Mpaka tuhemeri mashi gatulanda

na mbawu tuzihemera.

5 Watukankanika kutenda lihengu gambira punda,

tutoka kumbiti watulewelera kwoyela.

6 Tutenda lihengu kwa Misri na Ashuru,

su tupati shiboga shivuwa.

7 Wazewi wetu watenditi vidoda na vinu kwahera kayi,

na twenga twankutabika toziya ya makosa gawu.

8 Wamanda ndo yawatukolamlima

na kwahera gwa kutulopola mumawoku gawu.

9 Shiboga shetu tushipata kwa kugatula makaliru getu mukutenduwa,

toziya yawalaga wankuzyengetazyengeta kumalambu.

10 Makuli getu gana motu handa shifinja sha kubanikira,

toziya ya njala yayitabisiya.

11 Wankondu wetu wawatendera vidoda wahinga wetu kumjini Sayuni

na wahinga wetu muvijiji vya Yuda.

12 Walonguziya watwenga watolwa na kukongerwa,

wankontu wetu wawapananwandiri ligoya wazewi wetu.

13 Wana wapalu wakakanikwa kusyaga viboga kwa mabuwi,

wantemba wankuwegukaweguka kwa visanka vya mbawu.

14 Wazewi waleka kulaviya matakuziya gawu muligomi lya mji na wantemba waleka kwimba na kugomba ngoma.

15 Nemeru iwuka mumiyoyu yatwenga, kuvina kwa twenga kugalambuka madaya.

16 Mfalumi yatumtumbiriti kawuka. Hatushiwoni twenga, toziya tutenda vidoda!

17 Toziya ya aga tulwala mumoyu,

toziya ayi masu getu gawonaweri ndiri.

18 Toziya lugongu Siyoni lulekwa pota shintu,

na vibweta wazyengetazyengeta pampindi pakuyi.

19 Kumbiti gwenga Mtuwa Mlungu gukolamlima mashaka goseri

Shiti shaku sha ukulu shilikala mashaka goseri.

20 Ntambu gaa gutuwaluwa mashaka goseri?

Ntambu gaa gutuleka shaka shitali?

21 Gwee Mtuwa Mlungu, gutuwuziyi zyuma yetu, su tukuwuyili,

gugatendi syayi mashaka getu handa mashaka ga makashu.

22 Hashi gutulema nakamu? Ama gutukalalira nentu?