1 Ntambu gaa zahabu yaying'ereng'etiti ihowiziya mng'eleng'etu wakuyi,

Mabuwi ga beyi nkulu kulawa Numba ya Mlungu gapalangulwanga munjira yoseri.

2 Wana wa Sayuni yawazyumikiti nentu na kupananwa ligoya handa zahabu iherepa,

ntambu gaa vinu wawera handa vyombu vya litapaka, lihengu lya mkuluga.

3 Ata limihi kawanoniziya wana wakuyi,

kumbiti wantu waneni wawera wangesera, watenda handa mbuni kushiwala

4 Miromu ya wanonu iyuma kwa kwimiluwa,

wana waluwa shiboga kumbiti kwahera yakawapanana.

5 Wantu yawaliyiti viboga viherepa vinu wankuhowa munjira kwa njala.

Yawalelitwi na kuvalaziwa shifalumi vinu wankugoja kushifungusi.

6 Wantu wangu wakomangwa nentu kuliku wantu wa muji gwa Sodoma,

gweni gulunguziwitwi vumu pota kuwera na gwakuwatanga.

7 Wakulu wa Yerusalemu waweriti wafufu mbu.

Nshimba zawu ziweriti na makakala handa madini ga rubi.

8 Kumbiti vinu vyeni vyawu vititu kuliku makala, wamanika ndiri munjira,

likuli lyawu lilibata na mihonju yawu, mihonju ayi iyuma handa mbawu.

9 Mbaka yawalagitwi munkondu kuliku yawahowiti kwa njala,

watabikiti kwa njala mpaka wahowa, toziya waweritindiri na shiboga sha kulawa mumalambu.

10 Wamawu yawaweriti na lusugu nentu wawaterikiti wana wawu weni,

wawatenda kuwera shiboga shawu shaka wantu waneni pawagamiziwitwi.

11 Mtuwa Mlungu kalanguziyiti uzotopa wa nkalala yakuyi, kaminta maya gakuyi gakalipa,

kayakaziyiti motu kumjini Sayuni aku kalunguziyiti numba kwanjira kumpindi mpaka kumiyanjiru.

12 Wafalumi na wenikaya woseri pasipanu waminitindiri,

kuwera mkankala ama mnkondu mekingili mumigomi ya Yerusalemu.

13 Kumbiti ali lilawiriti toziya ya vidoda vya wambuyi wakuyi,

na makontola ga watambika wakuyi, weni wawalagiti wantu yawahera na vidoda.

14 Walonguziya wayerayera munjira handa wanalwisi,

waweriti na mwazi munguwu zawu, ata kuweriti ndiri na muntu yoseri gwa kuwashinkula.

15 Wantu wawashowera pawalonga, "Muwuki" mgendi zyenu mwenga mdoda na mjimilikandiri! "Muwuki, muwuki, namshinkula shoseri."

Su waweriti watuga isi na kuyerayera,

wantu wa maisi gamonga watakuliti. Awa hapeni washemerwi kulikala kwa twenga.

16 Mtuwa Mlungu mweni kawapalasiyiti na kawasherandiri kayi.

Watambika hapeniwapati kayi ligoya, walonguziya hapeniwapendelewi kayi.

17 Tutokiti kulikala masu kuhepera utanga,

tugonjitindiri na kuhepera kwa matamata isi yeni iwezitindiri kutulopola.

18 Wankondu wetu watuwinga, ata tusinditi kupita munjira zyetu.

Mashaka getu gaweriti gatimiya, na upeleru wetu uweriti usoka.

19 Yawatufatiti waweriti kalongola kuliku nkashanga muliyera,

watutugiziyiti kumigongu na kutugwadira kushiwala aku.

20 Wambata mfalumi wetu,

mfalumi ulii yakalumikitwi na Mtuwa Mlungu, ulii mweni tutakuliti.

Pa ulolera wakuyi hatulikali muwamu mwa maisi.

21 Wantu wa Edomu, muweza kufyapilira vinu, viraa muweza kusekelera mwenga wantu wa Uzi,

kumbiti makomangu hagawawiziri na mwenga hamlandi na kulowera, mpaka hamvuli nguwu zenu!

22 Gwee Sayuni nkomangu ya ukontola waku ipera, Mtuwa Mlungu hapenikawaleki muwuhamisiwu.

Kumbiti mwenga wantu wa Edomu hakawakomangi kwa ukontola wenu na hakavituli paweru vidoda vyenu.