1 Mtuwa Mlungu kwa maya gakuyi, kawatula wantu wa Sayuni muluwindu.

Uherepa wa Israeli kawuwasira pasi.

Lishaka lya maya gakuyi kayilemiti Numba yakuyi.

2 Mtuwa Mlungu kahalibisiya pota lusungu Numba zoseri za wiwuka wa Yakobu.

Kwa ngalaliru yakuyi kagabomola maboma ga wantu wa Yuda.

Kawatenda wafalumi wawu na walongoziya wakuyi waweri na soni.

3 Mumankalliru yakuyi kagawusiya makakala goseri ga Israeli.

Kawatangandiri wantu wa Israeli wankondu wawu pawawiziriti,

kawera kakalipa kwa wantu wa Yakobu gambira motu na kulunguziya kila shintu.

4 Kanika upindi wakuyi kwa twenga handa mnkondu,

Kawalagiti wantu wakuyi woseri wa Sayuni.

Katukalariti nentu kwa twenga iweriti gambira motu.

5 Mtuwa Mlungu kawera gambira mnkondu,

kawagamiziya wantu wa Israeli na numba zakuyi zoseri kagabomola maboma gakuyi.

Kawatenda wantu wa Yuda walili na kudaya.

6 Kayibomola Numba yakuyi ya kumguwira handa shisasa sha kulirambu ntambu yashihalibisiya,

Kawusilira kutali msambu na lishaka lya kwoyera aku Sayuni.

Kwa maya gakuyi makulu kawalema mfalumi na watambika.

7 Mtuwa Mlungu kashilema shitalawanda shakuyi na kuyilema numba yakuyi.

Kawalekela vibambaza vya numba kumjini wavibomoli,

watenda umatu Mnumba ya Mtuwa Mlungu gambira umatu wa lishaka lya msambu.

8 Mtuwa Mlungu kafiliti kashibomoli shibambaza sha mji gwa Sayuni,

kabomoliti libuwi kwa libuwi.

Shindwalingu na vibambaza vya kunja kumji kavitenda mahami, vyoseri kwa pamuhera vyagamira.

9 Migomi yakuyi iguwa pasi na vigobeku vya shuma vya kutatira kavimegangameganga.

Mfalumi na walonguziya wakuyi wamuwuhamisiwu pakati pa maisi.

Lagiru kwahera kayi na watambika wakuyi wapatandiri kayi malola kulawa kwa Mtuwa Mlungu.

10 Wazewi wa Yerusalemu walivaga pasi jii,

na walitilira madikudiku mumituyi na kuvala nguwu za mafafa kulanguziya hinginiku.

Wahinga wa Yerusalemu wang'ong'onaziya mituwi pasi kulanguziya wana soni.

11 Masu gangu gawera masheri kwa kulira, moyu gwangu guntama.

Hinginika nentu toziya yakwagamiziwa kwa wantu waneni.

Ata wana na wanonu wahowa munjira za mji toziya wawera na njara.

12 Wankuwalilira wamawu wawu, pawalonga shiboga shakoshi na shakulanda sha koshi,

agawu pawaguwa gambira matenduwa munjira za mjini,

na wahowera mumawuku ga wamawu wawu.

13 Nikugambiri shishi gwee Yerusalemu?

Nikulinganiziya na shishi? Nikufananiziya na shintu gaa su wezi kukuzyangazyanga, gwee mhinga Sayuni?

Ntambiku yaku ivuwa gambira bahari, gaa hakawezi kukuponiziya?

14 Malola ga wambuyi waku gaweriti ga mpayu na gafaandiri shintu,

wavigubutulandiri vidoda vyaku, su kukulewelera gwenga kugenda muumanda.

Visoweru vyawakupananiti viweriti vya mpayu na vya kupotuziya.

15 Yawapita njira woseri wankukubolera na kukubeziya,

wakujongera pawatikisiya mtiwu gwee Yerusalemu, pawalonga.

Agu ndo mji yaguherepa kuliku miji yoseri kwa uherepa na mji yaguweriti gwana nemeru pasipanu poseri?

16 Wankondu waku woseri wankukubolera.

Wankukudokola na kukuwonera maya pawatakula,

tumwagamiziya! Nakaka lishaka lirii lyatuliheperiti kwa matamata vinu lisoka na tuliwona.

17 Mtuwa Mlungu katenda galii gakapangiti, kashitenda shisoweru shakuyi

shakalagaliriti mashaka ga makashu.

Kakugusiya pota lusungu, kawatenda wankondu wakulongilongi, kamtenda mnkondu gwaku kaweri na makakala.

18 Miyoyu ya wantu imlilira Mtuwa Mlungu. Gwee shibambaza sha Sayuni,

Masozi gaku gaseleri gambira lushemba paluwala na pashiru!

Pota koyera na masu gaku nagoyera.

19 Pashiru poseri gwimuki gwakalili. Gumgambiri Mtuwa Mlungu yagawera mumoyu mwaku.

Gunyasuliri mawoku gaku kuwaluwira wana waku, wana yawaguwa kwa njala munjira.

20 Gwee Mtuwa Mlungu, guliholi. Hashi kwana yoseri yagumtenderiti ntambu yagudutendera twenga?

Hashi ata kina wamawu waliyi wana wawu?

Hashi, watambika na wambuyi waku walaguwi Mnumba mwaku?

21 Mauti ga wantu yawahiwiti gagonja munjira,

wahinga na wantemba waneni walaguwa kwa nkontu.

Guwalagiti pota lusungu lishaka sha maya gaku.

22 Guwashemera kumsambu, wankondu wangu wazyengetiti kila uwega wantenda ntiri.

Mulishaka lya maya gaku gwee Mtuwa Mlungu, kwahera yakashapiliti ama kuponeka.

Wana yaniwaleriti mweni na kuwafira nentu wankondu wangu wawalaga.