1 ✝ 11:1 1 कुरन्‌थी 4:16; फीलीपीयो 3:17 मारीन तेम जीवो जेम मे ईसु मसीन तेम जीवु।

2 मे तमने वारु केम। काहाके तमु मने जत्‌यार आखी वात मे फोम करो, अने जे ह़ीकापण मे तमने आप्‌यो, तीहयी ह़ीकापण ने मानो अने पाळो। 3 पण मे तमने केम के तमु आहयु जाण लेवो के बयर नु मुंडु अदमी से, अने अदमी नु मुंडु ईसु मसी से: अने मसी नु मुंडु भगवान से। 4 कानो अदमी मुंडु ढाकीन भगवान सी वीन्‌ती करे, नीता भगवान वगे गेथी वात करे, तीहयी टेमे तीहयो आह़फा मुंडु नो वाक काडे। 5 पण जे बयर उगाड़लु मुंडु लीन भगवान सी वीन्‌ती करे, नीता भगवान वगे गेथी वात करे, तीहयी आह़फी नु मुंडु नो वाक काडे। अने तीहयी मुंडु बोड़ली बयर नी तेम से। 6 वीन्‌ती करवा नी टेमे नीता भगवान वगे गेथी वात केवा नी टेमे बयर लुगड़ी नी ओडे ता आह़फा ना नीम्‌बाळा कतराय लेवा जोवे; अने बयर ने आह़फा ना नीम्‌बाळा कतराव्‌वा अने बोड़ाव्‌वा लाज आवे ता लुगड़ी ओडवा जोवे। 7 पण अदमी ने मुंडु ढाकवा ताले नी हय, काहाके अदमी भगवान नो सीको अने बड़ाय से; पण बयर अदमी नी बड़ाय से। 8 काहाके अदमी ने बयर मे गेथो नी बणायो, पण बयर ने अदमी मे गेथी बणावलो से। 9 अने अदमी ने बयर जुगु नी घड़्‌यो, पण बयर ने अदमी जुगु घड़लो से। 10 एतरे भगवान, जे हक बयर ने आप्‌यो, तीहया हक मे रेवा करीन बयर आह़फी नु मुंडु ह़रगदुत नी लेदे ढाकवा जोवे। 11 ते बी मालीक ईसु मे बयर वगर अदमी कंय बी नी हय, अने अदमी वगर बयर बी कंय बी नी हय। 12 काहाके जीसम बयर अदमी मे गेथी आवी तेमेत बयर अदमी ने पयदा करे; पण आखी चीज भगवान नी लारे घड़ाये।

13 तमु वीच्‌यार करो? बयर ने उगाड़ला मुंडे भगवान सी वीन्‌ती करवा ताले से ह़ु? 14 आसम बी कळी ना अनसारे अदमी ने नाम्‌बला नीम्‌बाळा राखवा लाज नी वात से। 15 पण बयर ने नाम्‌बला नीम्‌बाळा राखवा तीनी ह़ोबा से; काहाके बयर ना नाम्‌बला नीम्‌बाळा तीनु मुंडु ढाकवा करीन आपला से। 16 आना बारा मे कोय बी वात मे जखड़ी पड़वा हींडे ता आहयु जाण लेवो के भगवान नी मंडळी मे आहयी रीती ने सोड़ीन कानी बी रीती नी हय।

17 पण आहयु कीन मे तमने वारु नी केतो काहाके जत्‌यार तमु भेळा हयो ता नुकसान हये। 18 काहाके पेले ते मे आहयु ह़मळ्‌ळो के तमु ईसु नी मंडळी मे भेळा हयो, ता तमारी मे बेरजाव पड़ जाय, आहयी वात ह़मळीन मे थोड़ो-थोड़ो ईसम बी भरहो करु के तमारी वच मे आसम हये। 19 अने तमारी मे बेरजाव पड़वा जोवे, काहाके आसम हयवा सी तमारी मे जे खरला से अने झुट्‌ला से टळ जाय। 20 एतरे तमु जत्‌यार बी भेळा हयो, ता ह़ाचलीन मालीक नी पंगात मे बहीन खावा भेळा नी हयो। 21 काहाके तमु खाणु खावा बहो ता कानो पेलेत खाय लेय अने कानो भुकलोत रेय, अने कानो ह़रो पीन छाक जाय। 22 तमारी पांह खावा-पीवा जुगु तमारु घोर नी हय ह़ु? तमु भगवान नी मंडळी ने रीकामी ह़मजी र्‌या? तमु ईसम करीन तमु जीनी पांह नी हय तीने लजवाड़वा हय र्‌या ह़ु? मे तमने ह़ु केम? आहयी वात मे तमने वारु केम ह़ु? मे तमने वारु नी केतो।

23 आहयी ह़ीकापण ईसुन्‌तां गेथी मारीन्‌तां पुगली से, अने तीहयी ह़ीकापण मे तमारीन्‌तां बी पुगाड़ देदलो से; के जे राते मालीक ईसु धरायो तीहयी टेमे रोट्‌लो लेदो। 24 अने रोट्‌ला जुगु भगवान ने तु घणो वारु से कीन रोट्‌लो तोड़्‌यो अने केदो; "आहयु मारु डील से, जे तमारी जुगु आपलो से: मारी फोम करवा नी करते, मे कर्‌यो तेमेत, तमु बी कर्‌या करजो।" 25 अने अळतेण ईसु हात मे पीयालो धर्‌यो अने केदो, "आहयो पीयालो मारा लोय नो नवलो कायदो से। अने जत्‌यार बी तमु पीयालो पीवो, ता मने फोम करवा करीन मारीन तेमेत कर्‌या करजो।"

26 एतरे जत्‌यार बी तमु आहया रोट्‌ला ने खावो, अने आहया पीयाला मे गेथा पीवो, ता तमु मालीक ईसु पासो नी आवे, तां लग तीनी मोत नो परच्‌यार करो। 27 एतरे जे कोय ईसु नी ईज्‌जत कर्‌या वगर, मालीक ईसु ना रोट्‌ला मे गेथो खाय, अने तीना पीयाला मे गेथो पीये, तीहयो मालीक ना डील नो अने मालीक ना लोय ना वीरोद मे पाप करे। 28 एतरे जे कोय आहया रोट्‌ला मे गेथो अने पीयाला मे गेथो पीये तीहयो आह़फा ना मन ने पारखवा जोवे के मारी मे कंय पाप ते नी हय। 29 काहाके जे कोय रोट्‌ला मे गेथो खावा नी पेले अने पीयाला मे गेथो पीवा नी पेले मालीक ईसु ना डील ने नी ओळखे तीहयु रोट्‌ला खाय्‌न अने पीयालो पीन आह़फा पोर पाप नो डंड लावे। 30 एतरे तमारी मे ढेरेत जणा लुला अने मांदा हय ज्‌या, अने ढेरेत जणा मरी बी ज्‌या। 31 कदीम आपणु आह़फाम ना मन ने पारखहु, ता आपणु ने नीयाव नो डंड नी जड़े। 32 पण ते बी मालीक आपणु ने डंड आपीन ह़ुदारे, आनीन करते आपणु ने आहयी कळी ना मनख्‌या ह़ाते नीयाव ना दाड़े गुनाळ्‌ळा ठेरावीन डंड नी आपे तेम।

33 एतरे ए भायु अने बेन्‌या जत्‌यार बी तमु भगवान नु खाणु खावा करीन भेळा हयो, ता एक-बीजा नी वाट जोवो। 34 कदीम कोय भुकलु हय, ता आह़फाम ना घोर मे खाय लेवो ईसम करवा सी तमु भेळा हयह़ु तीहयी टेमे तमने नीयाव नो डंड नी जड़े तेम। अने रेली वात ने मे आवीन ह़ुदार देही।