João 18

ईसु नु धरावणु

1 ईसु आह़फा ना भगवान बाह ह़ाते वीन्‌ती करीन नवराय ज्‌यो, अने अळतेण आह़फा ना चेला ह़ाते एक कोतड़ु ने छेकीन एक वाड़ी मे ज्‌यो। ते कोतड़ु नु नाम कीदरोन हतु। 2 ईसु आह़फा ना चेला ह़ातेण घणो झाजो जीया करतो हतो। एतरे ईसु ने धोको दीन धराव्‌वा वाळो चेलो यहुदा बी आहयी वाड़ी ने देख र्‌यो हतो 3 अळतेण यहुदो, रोमी सीपायड़ा नो टोळो लीन, अने मंदीर ना डायला पुंजारा ना, अने फरीसी पंथवाळा माणहु ना लारे मोकल्‌ला मंदीर ना रखवाळ्‌या सीपायड़ा ने लीन तीहयी वाड़ी मे आय लाग्‌यो। तीहया दीवा, कंदल्‌या, अने हत्‌यार भेळ आवला हता। 4 मारी पोर ह़ु-ह़ु वीतहे तीहयु आखु जाणीन, ईसु अगो ज्‌यो, अने तीमने केदो, "तमु कोयने ह़ोद र्‌या?"

5 तीहया तीमने जपाप आप्‌या, "ईसु नासरी ने।"

ईसु तीमने केदो, "मे से।"

अने तीने धराव्‌वा वाळो यहुदा बी तीमनी ह़ाते उबो हतो। 6 जत्‌यार ईसु तीमने केदो, "मे तीहयो से" तीहया पासा जत र्‌या अने हेटा पड़ ज्‌या। 7 ईसु तीमने अळी पुछ्‌यो, "तमु कोयने ह़ोद र्‌या?"

तीहया केदा, "ईसु नासरी ने ह़ोद र्‌या?"

8 ईसु जपाप आप्‌यो, मे तमने पेलेत की देदो के मे तीहयोत से, कदीम तमु मने ह़ोद र्‌या हय ता मारा आहया चेला ने जवा देवो। 9 आहयु आनीन करते हयु, के जे तीहयो केदलो तीहयु पुरु हयवा जोवे, "जीने तीहयो मारा सुपरत करलो से, तीमनी मे ना ने एक बी खोवायवा नी देम।"

10 तत्‌यार सीमोन पतरस आह़फा नी तलवार मीयान मे गेथी काडीन मंदीर ना डायला पुंजारा ना पावर्‌या ने देदो, अने तीनो जमणो कान्‌टो वाड नाख्‌यो। ते पावर्‌या नु नाम मलखुस हतु। 11 ✝18:11 मत्‌ती 26:39; मरकुस 14:36; लुका 22:42 ईसु पतरस ने केदो, "तलवार पासी मीयान मे घाल ले। जे दुख नो पीयालो भगवान बाह मने पीवा करीन आपलो से, तीहयो दुख नो पीयालो तु ना पीय करीन तु अड़चन काहा नाख र्‌यो?"

सीपायड़ा ईसु ने धरीन मुखी पुंजारा हन्‌ना अगळ ली जाय

12 अळतेण रोमी सीपायड़ा नो टोळो, अने तीमनो सुबेदार, अने युहदी-पुडार्‌या ना लारे मोकल्‌ला मंदीर ना रखवाळ्‌या सीपायड़ा, ईसु ने धरीन बांद लेदा। 13 अने ईसु ने धरीन पेले हन्‌नान तां ली ज्‌या, तीहयो मंदीर ना डायला पुंजारा नो जुन्‌लो मुखी हतो। काहाके आहयो हन्‌ना केफा नो ह़ाहरो हतो, आहयो केफा तीहया साल मंदीर ना डायला पुंजारा नो मुखी हतो। 14 ✝18:14 युहन्‌ना 11:49,50आहयो तीहयोत केफा हतो, जे युहदी ने आसम कीन अगवाय करलो के, आपणा माणहु जुगु एक माणेह ने मरवा वारु से।

पतरस ईसु नो नीकारो करे

15 सीमोन पतरस अने एक अळी बीजो चेलो ईसु पसळ-पसळ चाल पड़्‌या। आहयो बीजो चेलो, डायला पुंजारा ना मुखी नो ओळखायतो हतो; एतरे आहयो चेलो, ईसु ह़ाते मंदीर ना डायला पुंजारा ना मुखी ना आंगणा मे लग ज्‌यो, आने कोय नी रोक्‌यु। 16 पण पतरस झापलेत उबो री ज्‌यो। एतरे डायला पुंजारा ना मुखी नो ओळखायतो चेलो ते आंगणा मे गेथो पासो बारो जाय्‌न झापलु रखवाळ्‌याण पावर्‌याण ने पुसीन, पतरस ने मोय आंगणा मे ली आयो। 17 तीहयी झापलु रखवाळ्‌याण पावर्‌याण पतरस ने केदी, "तु बी तीहया अदमी ना चेला मे नो नी हय ह़ु?"

पतरस केदो, "नी हय।"

18 टाड ना दाड़ा हता, एतरे घोर ना पावर्‌या अने मंदीर ना रखवाळ्‌या सीपायड़ा उबा-उबा तापवा बाज र्‌या हता। अने पतरस बी तीमनी ह़ाते आक्‌ठु तापवा बाज र्‌यो हतो।

डायला पुंजारा नु ईसु ने पुछवु

19 अळतेण मंदीर ना डायला पुंजारा नो मुखी हन्‌ना, ईसु ने तीना चेला ना बारा मे, अने तीनी ह़ीकापण ना बारा मे पुछ्‌यो। 20 ईसु जपाप आप्‌यो, "मे होगो-होगो कंय बी नी ह़ीकाड़्‌यो, मे माणहु अगळ उजन्‌तो ह़ीकापण आपलो से, मे जलम तमारा भक्‌ती ना घोर मे अने मंदीर मे, जां आखा युहदी माणहु भेळा हया करे, ह़ीकापण आपतो र्‌यो। 21 तु मने ह़ुका पुछ र्‌यो? ह़मळन्‌या ने आसम पुछ के हीय्‌यो तमने ह़ु ह़ीकाड़लो से? मे तीमने ह़ु-ह़ु केदलो से तीमने मालम से।"

22 जत्‌यार ईसु आहयी वात केदो, ता तां उबा हय रेला मंदीर ना रखवाळ्‌या सीपायड़ा मे नो एक जणो ईसु ने एक थापड़ देदो अने केदो, "तु मंदीर ना पुंजारा ना मुखी ने आसम जपाप काहा आप र्‌यो?"

23 ईसु तीने जपाप आप्‌यो, "कदीम मे गलत वात केदो हय, ता पुरावो दीन देखाड़; पण ह़ाचली वात केदो हय, ता मने काहा देय।"

24 अळतेण हन्‌नो हेमेत बंदायलोत ईसु ने हमणे ना डायला पुंजारा ना मुखी केफान्‌तां मोकली देदो।

पतरस ईसु नो अळी नीकारो करे

25 तीहयी टेमे सीमोन पतरस आक्‌ठुन तां उबो-उबो तापवा बाज र्‌यो हतो।

तत्‌यार थोड़ाक माणहु पतरस ने केदा, "तु बी तीना चेला मे नो एक से ह़ु?" पतरस ईसु नो नीकारो करतो जाय्‌न केदो, "मे नी हय।"

26 मोट्‌ला पुंजारा ना चाकर्‌या मे गेथो एक, तीहया माणहु नो ह़गलो हतो तीनो कान्‌टो पतरस तोड़ देदलो हतो। तीहयो केदो, "ह़ु मे तने तीनी ह़ाते वाड़ी मे नी देख्‌यो?"

27 पतरस अळी ईसु नो नीकारो करतो जाय्‌न केदो, "मे नी हय।" अने तत्‌यारुत कुकड़ो वाही देदो।

ईसु ने पीलातुस अगळ उबो करे

28 ह़वारे-ह़वारे ईसु ने केफा ना घोर गेथा राजा नी हवेली मे ली ज्‌या। युहदी मुखी माणहु हवेली मे नी जता हता, काहाके तीहया फसह ना तीवार नु खाणु खावा लायक बणवा नी लेदे खुद ने चोखला राखवा हींडता हता। 29 एतरे राज करन्‌यो पीलातुस हवेली मे गेथो बारो नीकळीन तीमनी अगळ आयो अने केदो, "तमु आहया माणेह पोर कानो गुनो लगाड़ र्‌या?"

30 तीहया जपाप आप्‌या, "कदीम आहयो गुनाळ्‌ळो नी हतो, ता आमु आने तारीन्‌तां नी लावता।"

31 पीलातुस तीमने केदो, "तमुत आने ली जावो ने तमारा कायदा ना लारे आनो नीयाव करजो।"

युहदी-पुडार्‌या केदा, "अमारी पांह कोयने जीव ह़ाटे डंड आपवा नो हक नी हय।" 32 ✝18:32 युहन्‌ना 3:14; 12:32मारी मोत कीसम हयहे करीन ईसु पेलेत आह़फा ना चेला ने केदलो हतो। अने ईसु नी केदली वात नी लारे आखु हयु, अने तीनात लारे हाव युहदी-पुडार्‌या तीने मोत नो डंड अपाड़वा करीन पीलातुस सी वात कर्‌या।

33 अळतेण पीलातुस अळी पासो हवेली मे जत र्‌यो, अने ईसु ने बोलाय मांग्‌यो, अने तीने पुछ्‌यो, "तु युहदी माणहु नो राजा से ह़ु?"

34 ईसु पीलातुस ने जपाप आप्‌यो, "आहयी वात तु तारा अवड़तेत की र्‌यो के मारा बारा मे काना बीजा तने केदला से?"

35 पीलातुस ईसु ने जपाप आप्‌यो, "मे युहदी से ह़ु? तारीत जाती ना माणहु, मंदीर ना डायला पुंजारा भेळता भेसकाय्‌न, तने धराय्‌न मारी सुपरत करला से। तु कानो गुनो करलो से?"

36 ईसु केदो, "मारु राज आहयी कळी ना राजान तेम नी हय। कदीम मारु राज आहयी कळी ना राजान तेवु रेतु, ता मारा रखवाळ्‌या सीपायड़ा मारीन करते झगड़ो करता, अने मे युहदी माणहु ना हात मे नी धरायतो। पण मारु राज आहयी कळी ना राज ने तेवु नी हय।"

37 आहयु ह़मळीन पीलातुस ईसु ने केदो, "ता तु ह़ाचलीन राजा से ह़ु?" ईसु पीलातुस ने जपाप आप्‌यो, "तु तालेत की र्‌यो, काहाके मे राजा से। अने मे सच्‌चाय ना गवा-पुरावा आपवा करीनेत आहयी कळी मे पयदा हय्‌न आवलो से। अने जे सच्‌चाय वगो से, तीहयो मारी वात ह़मळीन पाळे।"

38 पीलातुस ईसु ने पुछ्‌यो, "सच्‌चाय ह़ु से?" आहयु पुछीन पीलातुस अळी हवेली मे गेथो बारो नीकळीन, युहदी-पुडार्‌या अगळ केदो, "मने ते हीय्‌या माणेह मे कंय बी गुनो नी देखायतो।"

ईसु ने मोत नो डंड आपे

39 "पण तमारी रीती ना लारे, मे तमारी जुगु फसह ना तीवार नी टेमे एक केदी ने जेल मे गेथो छोड़्‌या करतो हतो। एतरे तमारी मरजी हय ता तमारी जुगु हीने सोड़ देम ह़ु, जीने तमु अमारा युहदी माणहु नो राजा कीन वाक काडे?"

40 आहयु ह़मळीन तीहया एक कावा अळी आड़ीन केदा, "हीने ना सोड़े पण बरब्‌बा ने सोड़ दे।" अने आहयो बरब्‌बा डाकु हतो।