Lucas 12

15 तत्‌यार ईसु तीहया माणहु ने केदो, "चेतीन रेवो, अने हयाळ्‌ळा ना बणो! कानो अदमी केतरो बी मालदार हय, हीनो मतलब आहयो नी हय के तीनी उमर वद जहे।"

16 तत्‌यार ईसु तीमने एक मालदार अदमी नो दाखलो ह़मळायो, "एक मालदार अदमी पांह एक खेतर हतु; तीनी मे घणी जबर मेर पाकी।" 17 तीहयो मालदार माणेह आह़फा ना मन मे आसम वीच्‌यार कर्‌यो, मारी आखी मेर मेकवा जुगु मारी पांह जागो नी हय ह़ु करु एतरा दाणा ने कां मेकु? 18 ता तीहयो केदो, "मने मालम से के मे ह़ु कर सकु: मे जुन्‌ला मोहट्‌या वेखड़ी देही, अने तीमनी गेथा बी मोटा बणावही। तत्‌यार मे मेर अने रेली आखी चीज तीमनी मे मेक देही। 19 अने मे मनेत केही तारी पांह घणा साल तक, घण ढेरकु धन भेळु करलु से, एतरे अराम कर, खा-पी अने मजा कर।" 20 पण भगवान तीहया अदमी ने केदो, "ए वण-अकल्‌या! आहयीत राते तारो जीव तारी पांह गेथो मांग लेही अने तु मर जही। अने तु आह़फा जुगु भेळु करलो से, तीहयु हाव कोय नु रेहे?"

21 "जे आह़फा जुगु धन भेळु करे, तीहयो माणेह बी आहया वण-अकल्‌या माणेह तेम मरीन खुट जहे; पण भगवान नी नींगा मे तीहयो मालदार नी हय।"