17 जेम के लीखलु से, "मे तने घणा ढेरका मुलक नो बाह ठेरावलो से।" भगवान नी नींगा मे अब्राहम अमारो बाह से। अब्राहम भगवान पोर भरहो कर्यो, जे भगवान मरला ने जीवाड़े अने जे हय नी तीमने बी घड़ीन उबजाड़े। 18 अब्राहम ह़ोह़वाय ना दाड़ा मे बी आह राखीन भरहो कर्यो अने तीहयो घणा ढेरका मुलक नो बाह बण ज्यो, जेम तीने केदलु हतु के तारी गणाये नी एतरी अवल्यात हयहे। 19 अब्राहम नी उमर एक ह़ो साल नी हती, पण भरहो तीना डील ने तेम कमजोर नी हयो जीसम तीहयो डायो हय जेलो, अने सच्चाय ते आहयी से सारा वांजाण हती अने डाहली हय जेली, तीहयी सोरा पयदा नी कर सक्ती हती। 20 अने तीहयो भगवान ना वायदा पोर सण्का नी कर्यो, बाखीन भरहा मे वातड़ो रीन भगवान नी बड़ाय कर्यो। 21 तीने पक्को भरहो हतो के भगवान जे वात नो वायदो करलो से, तीहयो तीने पुरो करीन सोड़हे।
Publicidade