1 ए मारा भायु, बड़ाय भर्‌या मालीक ईसु मसी पोर भरहो करवा नी लारे आपणु आखा एक से; एतरे कोयनी बी भेद-भाव नी करवा जोवे। 2 मान लेवो, कंखर माय्‌न एक माणेह ह़ोना नी वीटी अने वार घटाळ्‌ळा लुगड़ा पेरीन आवे, अने एक गरीब जीनी पांह कंय बी नी हय, तीहयो बी मोळ वाळा, कोचळायला लुगड़ा पेरीन आवे; 3 अने तमु तीहया घटाळ्‌ळा लुगड़ा पेरीन आवण्‌या नु मोडु देखीन केवो के "ए दादा, तु आञे वारला मे बह" अने तीहया गरीब ने केवो के "तु हीञा उबो रे, नीता मारा पोगुन्‌तां बह।" 4 ईसम वेहवार करीन तमु ते एक वगा वळीन नाना-मोटा नी छीट राख र्‌या। एसवो वीच्‌यार खोड़लो से ईसम वीच्‌यार करीन तमु माणहुम गरीब अने मालदार नो टाळो पाड़ र्‌या।

5 ए मारा भायु, ह़मळो। भगवान आहयी कळी ना गरीब माणहु ने भरहा मे मालदार अने भगवान ना राज ना हकदार्‌या बणाव्‌वा करीन टाळलो से। जे भगवान ने मोंग करे, तीमने तीहयो आह़फा राज नो हकदार्‌यो बणाव्‌वा करीन पेले गेथोत वायदो करलो से। 6 पण तमु गरीब नी ह़ाही नी कर्‌या। ह़ु मालदार माणेह तमने वेला नी पाड़्‌यो अने तमने कोरट-कचवरी मे घीहड़ी-घीहड़ीन लीजवा वाळा कोय से? 7 ह़ु तीहया वारु नाम नी नामबद्‌दी नी कर्‌या जीना तमु केवायो।

8 भगवान ना खरला सास्‌तर ना आहया बोल नी लारे "तु आह़फा ह़ाते वाळा ने आह़फा नी तेम मोंग कर।" ह़ाचलीन तीहया राज कायदो आखा मे मोटो से करीन आपणो राजा ईसु ह़ीकाड़लो से। कंखर माय्‌न तमु कायदो पाळो ता तमु वारलुत काम कर र्‌या। 9 पण कदीम तमु भेद-भाव करता हय ता पाप कर र्‌या, अने कायदो तमने गुनाळ्‌ळा ठेरावलो से। 10 काहाके जे कोय आखा कायदा पाळे, पण एकीत वात मे चुक जाय, ता तीहयो आखी वात मे गुनाळ्‌ळो केवाये। 11 एतरे के जे "तमु छीनाळु नी करजो" ईसम हुकम आप्‌यो, तीहयोत आहयु हुकम बी आपलो से के "तमु हत्‌या नी करजो।" एतरे तमु छीनाळु ते नी कर्‌या, पण खुन एतरोत कर्‌या, ते बी तमु भगवान ना कायदा ना अनसारे गुनाळ्‌ळा रेहु। 12 तमु तीहया माणहु नी तेम बोल बोलो अने काम बी करो, जीनो नीयाव छुटला बी करे अमर जीवाय नी हीसाबे कायदा नी तेम हयहे। 13 काहाके जे दया नी कर्‌या, तीमनो नीयाव वण-दया नो हयहे: दया नीयाव पोर जीकली से।

14 ए भायु, कंखर माय्‌न कोय केय के मे ईसु पोर भरहो करु, पण भलाय नो काम नी करु, ता आनी सी कंय बी फायदो नी हय। एसवो भरहो करन्‌या ने भगवान छुटकारो नी आपे। 15 मान लेवो के काना भाय नीता बेन्‌या पांह पेरवा जुगु लुगड़ा नी हय, अने दाड़ीक खावा जुगु खाणु नी हय; 16 अने कंखर माय्‌न तमारी माय्‌न कोय तीने केय, "खुस हय्‌न जत रे; अने वारु लुगड़ा पेरजे अने पेट भरीन खाणु खाजे।" पण तीहयो केवा वाळो तीमने डील जुगु जे नी आपे, ता तीना केदला बोलु कंय बी फायदो नी करे 17 तेमेत भरहो बी काम वगर नी हय ता भलाय ना काम वगर मरलो से।

18 कंखर माय्‌न कोय पुछ के "भगवान पोर तारो भरहो से ह़ु?" ता मे कीही "होव, मे ते भलाय ना काम नी लारे मारा भरहा नो पुरावो दी र्‌यो। मे तने मारा भरहा ने भलाय ना काम नी लारे देखाड़ही। पण भगवान ना नाम सी भलाय ना काम करे वगर, तु कीसम की सके, के मे भगवान पोर भरहो करु?" 19 ए मनख्‌या एकीत भगवान से, ईसम तारो भरहो से ह़ु? पण कुहर्‌या भुत बी भगवान पोर भरहो करे, अने थर-थर कापे। 20 ए वण-अकल्‌या माणेह, ह़ु तु आहयु नी जाणतो के भलाय ना काम नी करे, ता तारो भरहो रीकामो से? 21 अब्‌राहम ते भगवान ना केणा सी आह़फा सोरा ईसाक ने भगवान जुगु वेदी पोर मारीन चड़ाव्‌वा करीन ली ज्‌यो, ईसम करीन तीहयो भगवान नु हुकम मानीन भगवान ने गमे ईसम काम कर्‌यो करीन भगवान हीयो धरमी से करीन गवा देदो। 22 अब्‌राहम नो भगवान पोर एतरो जबर भरहो हतो, के तीहयो जे कंय बी केदो, तीने करवा करीन तीयार हतो, एतरे जे भलाय ना काम अब्‌राहम कर्‌यो, तीनी सी आपणी अगळ आहयी वात उजन्‌ती हय जाय के अब्‌राहम ना भरहा मे कंय बी कसर नी री। 23 चोखली सास्‌तर मे ईसम लीखलु से "अब्‌राहम भगवान पोर भरहो कर्‌यो, अने भगवान तीने धरमी गण्‌यो।" सास्‌तर नु आहयु बोल अब्‌राहम ना जीवाय मे पुरु हय ज्‌यु। अने भगवान नो दोस्‌तीदार्‌यो बण ज्‌यो। 24 आहयी रीते तमु देख लेदा के माणहु भरहा सी एतरो नी पण तीना भलाय ना कामु सी बी धरमी गीणायहे।

25 पेल्‌ना वारा नी राहाब बेनेह जे रंडी हती, अने जे युहदी माणेह राहाब रेत्‌ली तीहया देस नी खबर लेवा करीन आया, तीमने तीहयी आह़फा ना घोर मे ह़ताड़ देदी, अने अळतेण बीजी वाट्‌ये तीमने मोकली देदी, आहया भलाय ना काम नी लारे भगवान तीने धरमी गण्‌यो।

26 एतरे: जीसम डील आत्‌मा वगर मरलो से, तेमेत भरहो बी भलाय ना काम वगर मरलो से।