Apocalipse 16

परमेस्वर को गुस्सा की सात बटकी

1 तबा मि ना मंदिर मा जोरलक लक उन सात सरगदूत इन ला असो कव्हतो आयकयो। "जाव! परमेस्वर को सात गुस्सा वालो बटका ला धरती मा उबड़ाय देव।"

2 तबा पहेलो सरगदूत ना जायके, आपरो बटका धरती मा, उबड़ देइस। एना कारन लक उन मानूस गीनला, जोन पर ओनो हिसंक जनावर को छाप होतीन, अना जोन ओको मुरती को पूजा करत होतीन। उनला कस्ट देनवारी अना मारन वालो फोड़ा हिटन।

3 दुसरो सरगदुत ना जबा आपरो बटका समुंदर पर उबड़ायो ता मरयो हुयो मानूस को रकत जसो पानी होय गयो। अना समुंदर को हरेक जीव मर गयिन।

4 तीसरो सरगदूत ना जबा आपरो बटका नदी अना पानी को झरना पर उबड़ायो, ता वय रकत बन गईन। 5 तबा मीना सप्पा पानी को हकदार सरगदूत ला यो कव्हत हुयो आयकियो: "तुमी जो सेव, जो होतीन, धरमी अना सब लक पवीतर! बेस सेत तोरो न्याय!" 6 एकोलाय का उनना पवीतर लोकगीन अना भविस्यवक्ता गीन को रकत बोहायो सेत। "यो काजी पिवन को लाई उनला तुना रकत च दे दियोस। वय यो लायक सेत।" 7 तबा मीना सहमती मा वेदी ला असो सांगत हुयो आयकयो: "खरो से, उ सब लक ताकत वर परमेस्वर! बेस अना धरमी सेत तोरो नियाव।"

8 सूरज पर चवथो सरगदूत ना आपरो बटका उबड़ाईस, अना ओला मानूसगिन ला स्तो लक जलाय देवन को हक देयो गयो। 9 मानूस मोठो तपन लक जर गइन। अना परमेस्वर को नाव को जेनला ऐना आफद पर हक से, लोक निन्दा करीन। पर पस्तावा करके ओको बड़ाई करन ला मन नही बदलिन।

10 पाँचवा सरगदूत ना आपरो बटका ओनो जनावर को सिघासन पर उबड़ाईस, अना ओको राज मा इंधारो भय गयो। लोक कस्ट को मारे आपरो-आपरो जुबान चबावन लगीन। 11 अना आपरी दूख अना फोड़ा को कारन सरग को परमेस्वर को निन्दा करीन। पर आपरो-आपरो कामगीन लक मनमा पस्तावा कर मन नही बदलीन।

12 छटो सरगदूत ना आपरो बटका महानदी फरात पर उबाड़ायो। अना ओको पानी सूक गयो का पूरब दिसा को राजा इन को लाई रस्ता सुधर जाहे। 13 मंग मीना अजगर को टोंड लक, अना ओनो जनावर को टोंड लक, अना ओनो खोटो भविस्यवक्ता को टोंड लक तीन बेकार आतमा ला मेडका को रूप मा हिटतो दिसयो। 14 यो निसान दिसान वालो बुरो आतमा सेत। जो सप्पा संसार को राजा गिनको जवर हिटके एकोलाय जावासेत। का उनला सब लक ताकत वर परमेस्वर को बिरोधमा ओनो मोठो दिवस को लड़ाई को लाई जमा करेत।

15 "आयको, मि चोर को जसो आवुसू। धन्य उ सेत जो जागत रव्हसे, अना आपरो कपरा को चौकसी करासे का नंगरो नोको फिरेहत अना लोक ओको नंगरोपन नही दिसेत।"

16 अना उनना राजागिनला ओनो जघा जमा करीन जोन इबरानी मा हर मगीदोन कहलावासे।

17 सातवो सरगदूत ना आपरो बटका वारा पर उबड़ायो, अना मंदिर को सिघासन लक एक उचो आवाज आयकु आयो, "पूरो भय गयो!" 18 तबा बिजली चमकी, अना आवाज अना गरजन हुयो। अना एक असो मोठो भुयीडोल आयो। का जब लक मानूस धरती पर पैदा भयी से, तबा लक असो मोठो भुयीडोल कबच नही आयो होतो। 19 एको लक मोठो नगर को तीन टुकड़ा भय गयो। अना देस-देस को नगर पड़ गयीन। तबा परमेस्वर ना मोठो बेबीलोन ला हेत करयो। का आपरो भयानक गुस्सा वोको पर उतारेत। 20 अना हरेक पहाड़ी आपरी-आपरी जघा लक हट गयीन, अना दीपगीन को नाव निसान मिट गयो। 21 बादर लक मानूस गीन पर मन-मन भर को मोठा गारगोटा पड़या, अना एकोलाय का यो आफद लगत च भारी भरकम होती। लोक इन ना गारगोटा को आफद को कारन परमेस्वर को निन्दा करीन।