पैदाइस 42

यूसूफ को भाऊहुन को मिसर मा आवनो

1 जब याकूब ना चोवयो का मिसर देस मा अनाज से तबा वोना आपरो टूरा गिनला कह्यो, तुमी काजक चोवासेव ? 2 मी आयकु सेव का मिसर देस मा अनाज से जायके लेय के आनो जोनलक आपरो परान बचेत। 3 तबा यूसूफ को दहा भाऊ हुन अनाज लेवन लाय मिसर देस गयीन। 4 याकूब ना यूसूफ को भाऊ बिन्यामीन ला उनको भाऊ गिनको संग यो काजी नही धाड़ो क वोला भेव होतो कही बिन्यामिन पर काही आफद नोको आय जाय। 5 अनाज लेवन आवनवालो मा इसराइल को टूरा गिन भी होतिन। काहेका कनान देसमा भी गिरानी पड़यो होतो। 6 यूसूफ तो मिसर देस को अधिकारी होतो। अखिन वोना देस को सब लोक गिनको हात वोच अनाज बिकत होतो। एकोलाय जब यूसूफ को भाऊ हुन आयो तबा जमीन मा तोन्ड को बल पड़ के वोला नमस्कार करीन। 7 उनला चोवके यूसूफ ना ओरख लियो। पर उनला कड़ाई लक उनला पुसयो तुम्ही कह्यो किता लक आवासो? उन ना कहीन अमी कनान देस लक अनाज लेवन आयो सेजन। 8 यूसूफ ना आपरो भाऊ गिनला ओरख लियो पर उन ना वोला नही ओरखयो। 9 तबा यूसूफ आपरो सपना ला हेत करके जोन वोना वोको बारेमा चोयो होतो। उनलक कव्हन लगयो तुम्हि जासूस सेव जासूसी करन लाय यो देस मा आयो सेव। 10 तबा उन ना कहीन नही-नही ओ मालीक तोरो दासगिन अनाज लेवन काजी आयो सेत। 11 अमी सब एकच अजी को सन्तान सेजन। अमी बारा भाऊ सेजन अखिन लहान अबा आमरो अजी को जवर से, अना एक नही रहयो। 12 वोना उनलक कह्यो नही-नही तुम्ही आमरो देस को कमजोरी देखन आयो सेव। 13 अमी तोरो सेवक सब कनान देस को एकच अजी को सन्तान सेजन। अमी बारा भाऊ सेजन अखिन लहान अबा आमरो अजी को जवर से, अना एक नही रहयो। 14 तबा यूसूफ ना कह्यो, मीना तुम्हीला सांग दियो का तुम्हि जासूस सेव। 15 एकोलाय अबा तुमीला असो रीत लक परखो जाहेत, फराओ को जिंदगी को कसम, जब तकन तुमरो लहान भाऊ नही आहेत, तबा तकन तुमरो सूटकारा नाहती। 16 तुमी आपरो मा लक एक ला धाड़ो, उ जायके वोला आने, तबा तकन बाकी बन्दी रव्हो जोनलक तुमरो गोस्टि को सच्चायी को पता लग जाहेत। यदि तुमरो गोस्टी खोटि होहेत ता फराओ को जिन्दगी को कसम तुमी पक्को जासूस समजो जावने। 17 यूसूफ उनला तीन दिवस जेल मा राखयो। 18 तीसरो दिवस यूसूफ ना कह्यो, मी परमेस्वर को भेव मानासू यो काजी असो काम करो, तबा तुम्हि जिन्दो रव्हने। 19 अदि तुम्हि सही मानूस सेव ता तुमी मा लक एक भाऊ जेलमा रव्हो अखीन बाकी भाऊ अनाज लेयके, आपरो भूको परिवार को लाय अनाज लेयके जाव, 20 अखिन आपरो लहान भाऊ ला मोरो कठा आनो तबा तुमरो गोस्टी खरो हिटेत अना तुमी मरनो लक बच जावने। तबा उनना असोच करीन। 21 उनना आपसी मा एकमेक लक कव्हन लगीन, सही मा अमी आपरो भाऊ यूसूफ को दोसी सेजन। काहेका वोना आमरो लक गिड़गीड़ा के बिनती करयो, अना अमीला मालूम होतो का वोको जिन्दगी कसो संकट मा से, वोको नही आयको, योच कारन लक अमी संकट मा सेजन। 22 रूबेन ना उनला जवाब दियो, का मीना तुमीला नही सांगयो होतो, टूरा को बिरोध मा पाप नोको करो? पर तुमीना मोरो गोस्टी नही आयकयो, अबा वोको रकत को बदला आमरो लक लियो जाहेत। 23 यूसूफ को अखिन उनको गोस्टि एक अनुवादक लक होत होतो, एकोलक उनला समज मा नही आयो का यूसूफ उनको बोली ला समजासे। 24 यूसूफ उनको जवर लक दूहूर जायके रोवन लगयो। अना दुबारा आयके उनको लक गोस्टि करन लगयो, अखिन सीमोन ला बन्दी बनाय लियो।

यूसूफ को भाऊ गिनको कनान लवटनो

25 तबा यूसूफ ना हुकूम दियो, उनको बोरा मा अनाज भर देव अना हरेक मानूस को बोरा मा उनको खूरो का सिक्का ठेय देव। अना रस्ता को लाय जेवन को जुनूस भी देव। उनको लाय वसोच कर दियो गयो। 26 तबा वय आपरो अनाज गढव मा लदा के वहान लक चले गयीन। 27 सराय मा जबा एक ना आपरो गढव ला चारा देवन बोरा खोलयो, तबा वोना बोरा को वरता च आपरो खूरो का सिक्का राख्यो चोयो। 28 तबा ओना आपरो भाऊ हुन लक कह्यो, मोरो खूरो का सिक्का लवटा दियो गयो सेत, चोवो! मोरो बोरा मा सेत। तबा उनको जियान सूक गयो। अना वय भेव को कारन लक एकमेक ला चोवन लगीन। अना कहीन, अता परमेस्वर ना आमरो संग काजक करयो से? 29 जब वय कनान देस गयिन तबा आपरो अजी याकूब ला सबरी गोस्टि सांगीन, 30 मिसर देस को मालीक ना आमरो लक कड़ाई लक गोस्टि करयो अना अमीला जासूस समज लियो। 31 पर अमीना वोको लक सांगयो का अमी सच्चो लोक सेजन, अमी जासूस नही सेजन। 32 अमी बारा भाऊ सेजन, अमी सब एकच अजी को सन्तान सेजन एक भाऊ नही रहयो सबलक लहान भाऊ यो बेरा मा कनान देसमा आमरो अजी को कठा से। 33 तबा वोना देस को मालीक ना आमरो लक कव्हयो, अदि तुम्हि असो काम करो ता मोला मालूम भयी जाहेत का तुम्हि सच्चो लोक सेव, तुम्हि आपरो भाऊ गिनलक एक ला मोरो जवर सोड़ के जाव अना तुम्हि आपरो भूको परीवार गिनको लाय अनाज लेयके जाव, 34 अना सब लक लहान भाऊ ला मोरो जवर आनो, तबा मोला भरोसा भयी जाहेत का तुम्ही जासूस नही सेव, तबच तुम्हि आमरो देस लक बयपार कर सकने। 35 उनना अनाज को बोरा खोलयो ता हरेक को सिक्का*42:35 खूरो को सिक्का को पिवसी उनको बोरा च मा होतो। तबा आपरो अजी को संग रुपिया को पिवसी चोयिन ता उनला भेव लगन लगयो। 36 तबा याकूब ना वोको लक कह्यो, तुम्हि मोला बिना सन्तान को कर दियो सेव। यूसूफ नही रहयो अखिन सीमोन भी नही रहयो, अता बिन्यामीन भी जाहेत। यो सब आफद मोरोच पर पड़यो सेत। 37 रूबेन ना आपरो अजी लक कह्यो, अदि मी बिन्यामीन ला वापीस नही आनीन, ता मोरो दूई टूरा ला मार डाकजोस, वोला मोरो हातमा देव मी वापस आनीन। 38 पर याकूब ना कह्यो मोरो टूरा बिन्यामीन तुमरो संग नही जाहेत, काहेका वोको भाऊ यूसूफ ता मर चुकयो से अखिन उ एकलो से। रस्ता मा कोनी आफद आ जाय ता तुम्हि लोक मोला बुड़गो पनमा सोक करतो अधलोक*42:38मूल मे सीओल मा पहुचा देवने।