1 सीनार को राजा अमारपेल, अना एल्लासार को राजा अरयोक अना एलाम को राजा कदोरलाओमेर, अना गोयीम को राजा तिदाल को बेरा मा असो भयो, 2 का उनना सदोम को राजा बेरा, अना गोमेरा को राजा बिरसा अना अदमा को राजा सीनाब, अना सबोयीम को राजा सेमेबेर, अना बेला जोन सोअर भी कहलावासे, इन राजा गीनको को खिलाप लड़ाई करयो। 3 इन पांचो राजा न सिद्दीम नाव को घाट मा जोन खारो सागर कहलावा से, वहान यो सब जमा भयो। 4 अना यो बारा साल तकन वय कदोरलाओमेर को अधिन रह्यो पर तेरवा साल मा ओको खिलाप भयी गयीन। 5 चौदवो साल मा कदोरलाओमेर अना , ओको संगी राजा लड़ाई करन आयो, अना अस्तारोत्कनम मा रापाई जाति अना हाम मा जूजी जाति ला, सावे किरयातईम एमी जाती ला, 6 अना सेईल नाव की पहाड़ी मा होरी जाति ला, हराय के ऊ एल्पारान तकन जोन जंगल को जवर से, उता तकन 7 उता लक वय लवट के एन्मिसपात ला आयो, जोन कादेस कहलावा से अना अमालेकी जाति ला पूरो देस ला, अना हसासोन्तामार मा रव्हन वाली एमोरी जाति ला भी हराय दियो। 8 तबा सदोम, गोमेरा, अदमा, सबोयीम, अना बेला, जो सोअर भी कहलावा से, इनको राजा हीटयो, अना सिद्दीम नाव को घाट मा, उनको संग लड़ाई को लायी फैसला करयो। 9 मजे एलाम को राजा कदोरलाओमेर, गोयीम को राजा तिदाल, सीनार को राजा अमारपेल, अना एल्लासार को राजा अरयोक, वय चारी को खिलाप उन पांचो ना लड़ाई को बारेमा फैसला करयो। 10 सिद्दीम नाव को घाट मा डामर को लगत सारो गड्डा होतो, जब सदोम अना गोमेरा को राजा परायो तबा उनकी सेना को लगत सारो सिपाही उनमा पड़ गयो, अना जोन बच्यो वय पहाड़ी मा पराय गयो। 11 तबा उनको बयरी ना सदोम अना गोमेरा को पूरो धन-सम्पत्ति अना जेवन को पूरो चीज ला लूट लाट के चली गयो। 12 अना अबराम को पूतन्या लूत, जोन सदोम मा रव्हत होतो अना ओकी धन-सम्पत्ति समेत वय लेके चले गयीन।

13 तबा एक मानूस जो बच के पराय गयो होतो, वोना जाय के इबरी, अबराम ला खबर आयकायो। अबराम ता एमोरी ममरे, जोन एसकेल अना आनेर को भाऊ होतो, ओको पवितर झाड़ को बीच मा रव्हत होतो, अना वय लोक अबराम को संग करार कियो होतो। 14 जब अबराम ना असो आयकयो का वोको पूतन्या बन्दी बना लियो गयो से, तबा अबराम ना अपरो तीन सौ अठरा लड़ाई मा माहीर गीनला लेयके जोन उनको कुटुम्ब मा पैदा भयो होतो, वय हतियार धरके दान नगर तकन उनको मघानी गयीन। 15 अना अबराम ना रात मा अपरो जूवान गीनला दूई अलग-अलग दल गिनमा बाट दियो, अना अपरो जुवान गीनको संग बैरी पर हमला कर के उनला मार डाकयो अना होबा तकन, जोन दमिस्क नगर को उत्तर को कन से उता तकन उनला कुदायो। 16 ओको मघानी उ पूरी सम्पत्ति अना अपरो पुतन्या लूत, अना ओकी सम्पत्ति समेत आईमाई अना सब बन्दी ला सुड़ाय के आनयो।

17 जब वा कदोरलाओमेर अना ओको संगी राजा गीनला जीत के लवटयो होतो तबा सदोम को राजा सावे नाव को घाट मा, जोन राजा को घाट भी कह्यो जावासे, ओको लक भेंट करन लायी आयो। 18 तबा सालेम को राजा मलिकिसिदक, जोन मोठो परमेस्वर को याजक होतो, ऊ भाकर अना अंगूर को रस ले आयो।✝ 19 अना ओना अबराम ला यो आसीस दियो, मोठो परमेस्वर को कनलक जोन सरग अना धरती को से तू धन्य हो। 20 अना धन्य से परम परधान परमेस्वर, जोनना तोरो बैरी गिनला तोरो बस मा कर दियो। तबा अबराम ना हरेक चीज को दसवा अंस हिस्सा भेंट करयो। 21 तबा सदोम को राजा ना अबराम लक कह्यो, "मानूस गिनला मोला दे- दे। अना धन ला तू अपरो जवर राख ले।" 22 अबराम ना सदोम को राजा ला जवाब दियो, "परम परधान यहोवा जोन बादल अना धरती ला बनावन वारो से। ओकी मी कसम खावासू 23 का जोन काही तोरो से वोको एक दोरी भी नही लेहीन ना पनही को लेस अना कोनी चीज। काहेका तु असो नोको कव्हनो पाहेत का अबराम तोरो कारन लक धनी से। 24 पर जोन काहि इन जवान हुनना जेय लियो से अना एसकेल, ममरे अखीन आनेर जोन मोरो संग गयो होतीन यो ता आपरो-आपरो हिस्सा राख लेय।"