1 तबा अबराहम उता लक हीट के कनान को दक्सिन देस मा आयके कादेस अखीन सूर को बीच मा ठैयर गयो, अखीन गरार नगर मा रव्हन लग्यो। 2 ✝अखिन अबराहम ना अपरो बायको सारा को बारे म कव्हन लग्यो, "वा मोरी बहिन आय," एकोलायी गरार नगर को राजा अबीमेलेक न दूत धाड़के सारा ला अपरो जवर बुलाय लियो। 3 पर रात ला परमेस्वर न सपनो मा अबीमेलेक को जवर आयके कह्यो, "आयक, जोन बायको ला तूना राख लियो से , ओको वजह लक तू मर जाजो, काहेका वा सुहागिन से।" 4 पर अबीमेलेक अब तकन सारा को जवर नहीं गयो होतो एकोलायी ओना कह्यो, "हे परमेस्वर, मी निरदोस से? का तू मोला अखीन मोरो रास्ट ला भी नास कर देवजोस? 5 का अबराहम ना खुद मोरो लक नहीं कह्यो होतो, ‘वा मोरी बहिन आय?’ अवर वा बाई न भी खुद कह्यो होतो, कि यो मोरो भाऊ आय, मी ना ता अपरो मन को खराई अवर अपरो बरताव को लक यो काम करयो सेऊ।" 6 परमेस्वर ना ओको लक सपना मा कह्यो, हव मी जानासू का तूना अपरो मन को खराई लक यो काम करयो सेत, अवर मीना तोला रोक के भी रख्यो का तू मोरो खिलाप पाप नोको करे। योच कारन लक मी तोला वोला छियन नही दीयो। 7 एकोलायी तू वा बायको ला वोको नवरा ला आपीस कर। काहेका वा एक भविस्यवक्ता से। अना वो तोरो लाय पिराथना करहेत तबा तू जिन्दो रव्हजोस। अगर तू वोला वापस नही देवजोस ता मी तोला चेताय देसू का तू अखीन तोरो नगर को पूरो लोक मर जाहेती।

8 दूसरो दिवस अबीमेलेक ना सक्कारी लवकर जाग के अपरो सब अधिकारी गीनला बुलायो अना यो सब गोस्टी सांगयो अना सबा लोक हुन लगत डराय गयीन। 9 तबा अबीमेलेक अबराहम ला बुलाय के कव्हयो, "तूना आमरो संग यो काजक करयो से? अवर मीना तोरो काजक बिगाड़ी सेऊ का तूना मोरो पर असो पाप डाक दियो से? तू ना मोरो संग असो बरताव करयो सेत जोन तोला नही करनो पाहीजे।" 10 तबा अबीमेलेक न अबराहम लक पुसयो, "तू ना काजक समजके असो काम करयो?" 11 अबराहम ना कह्यो, "मीना यो सोच्यो होतो का यो जघा मा परमेस्वर को काही भेव नही होयेत। एकोलाय मोरो बायको को कारन मोला मार डाकेत। 12 वा वास्तव म सचमुच मोरी बहिन आय, वा मोरो अजी को टूरी ता लेकिन मोरी माय की नहीं, तबा वा मोरी बायको भयी गयी। 13 अवर असो भयो का जब परमेस्वर ना मोला अपरो अजी को घर सोड़न को हुकुम दीयो, तबा मीना ओको लक कह्यो, इतरो दया करजोस, जिता-जीता अमी दूई जाबीन उता-उता तू मोरो बारे म कह्यजो कि यो मोरो भाऊ आय।" 14 अब अबीमेलेक ना सेरी मेंढी, गाई बईल, को करप अना दास दासी अबराहम ला भेंट दे दियो, अना ओकी बायको सारा भी ओला वापस कर दियो। 15 अखीन अबीमेलेक न कह्यो, "चोव, मोरो देस तोरो पूढा से, जोन जघा तोरी नजर मा साजरो लगे, उतच तू रव्ह सका सेत।" 16 अना सारा लक अबीमेलेक न कह्यो, "चोव , मी ना तोरो भाऊ ला एक हजार खूरो को सिक्का दियो सेऊ, जोन लोक तोरो संग से, उन सब लोक की नजर मा तू निरदोस से अना सब लोक ला पता चल जायेत, का तूना कोनी गलत काम नहीं करयो सेत।" 17 तबा अबराहम ना परमेस्वर लक पिराथना करयो, अना परमेस्वर ना अबीमेलेक, अना ओकी बायको अना दासिगीन ला साजरो करयो। अना वय दुबारा लक सन्तान पैदा करन लगीन। 18 काहेका परमेस्वर ना अबराहम को बायको सारा को कारन लक अबीमेलेक को घर की सब बायको गिनको कोख ला पूरी रीति लक बंद कर दियो होतो।