पैदाइस 12

परमेस्वर को कनलक अबराम ला हाकलो जावनो

1 यहोवा परमेस्वर ना अबराम लक कह्यो, " तु अपरो देस, अना अपरो, रिस्तेदार अना आपरो बाप को घर ला सोड़ के वोना देस मा जाय जोनमी तोला चोवाहू।✝12:1 पेरीत 7:2,3; इब्रानियो 11:8 2 अना मी तोरो लक एक मोठो रास्ट पैदा करहीन, अना मी तोला आसीस देहीन, अना तोरो नाव महान करबीन, जोन लक तू मानूस जाती को लाय आसीस को कारन बनजोस। 3 अना जोन तोला आसीस देहेत, मी उनला आसीस देऊ, पर जोन तोला सराप देहेत वोला मी सराप देहीन, अना धरती को पूरो कुटुम्ब तोरो बंस लक मोरो कन लक आसीस पायेत।✝12:3 गलातियो 3:8 "

4 परमेस्वर को हुकुम को अनुसार अबराम चली गयो, अना लूत भी ओको संग चली गयो अना अबराम हारान देस लक हिटयो, वोना बेरा अबराम पचहत्तर साल को होतो। 5 असो परकार लक अबराम अपरो बायको सारा, अना अपरो पूतन्या लूत अखीन जोन धन उनना जमा करयो होतो, अना जोन उनना हारान देस मा दास दासी गीन हासिल करयो होतो, इन सबला लेके कनान देस जान लायी हीट गयो, अना उ कनान देस मा पहुंच्यो। 6 वा देस को बीच लक जातो हुयो अबराम सेकेम नाव को जघा मा पहुंच्यो, जिता मोरे को मोठो झाड़ से। वोना बेरा कनानी जाति को लोक वा देस मा रव्हत होती। 7 ✝12:7 पेरीत 7:5; गलातियो 3:16 तबा परमेस्वर ना अबराम ला दरसन देके कह्यो, "यो देस मी तोरो खानदान ला देऊ।" अना अबराम उता जोन परमेस्वर ना वोला दरसन दियो होतो वोको लाय एक वेदी बनायो। 8 तबा उता लक पूढा बढ़के अबराम बेतेल नगर को दिन उगती कन को पहाड़ी मा आयो, अना आपरो तम्बू उभो करयो। वहान लक दिन बुड़ती मा बेतेल अना दिन उगती मा ऐ नगर होतो। उतानी अबराम ना यहोवा परमेस्वर को लाय एक वेदी बनायो अना पिरभू को अराधना करयो। 9 तबा अबराम कनान देस को दक्सिन कन यातरा करयो।

मीसर देस मा अबराम

10 पर कनान देसमा एक मोठो गीरानी पड़यो। एकोलाय अबराम मिसर देस ला चली गयो। का वोना देस मा परदेसी जसो रव्हे। 11 तबा असो भयो का उ मिसर देस को जवर पहुचयो अना अबराम आपरो बायको सारै लक कह्यो, "आयक! मोला मालूम सेत का तू लगत खोप सूरत सेत, 12 अना मिसर को लोक हुन तोला चोहेत, अना कहेत, या ओकी बायको आय अना मोला मार डाकेत अना तोला जिन्दो राख लेहेत। 13 ✝12:13 पैदाइस 20:2; 26:7 एकोलाय तू मोरी बहीन आऊ असो सांगजोस, जोन लक मोरी जान बच जाहेत, अना मोरो लक साजरो बरताव करहेत।" 14 तबा असो भयो का जब अबराम मिसर देस मा आयो, तबा उता को रव्हन वालो ना ओकी बायको ला चोवयो, का यो लगत खोप सूरत से। 15 अना मीसर को राजा फराओ को अधिकारी गीनना वोला चोव के फराओ को पूढा ओकी परसंसा करीन, एकोलाय सारै ला फिरौन को महल मा पहुंचायी गयी। 16 अना फराओ ना वोको कारन लक अबराम को संग साजरो बरताव करयो। अना अबराम ला करप सेरी-मेंढी, गाई-बईल, दास-दासी, गधा-गधी, अना ऊंट मिल्यो।

17 तबा परमेस्वर ना फराओ अना ओको महल को लोक हुन पर, अबराम को बायको सारै को कारन लक भयानक रोग तकलीफ लगायी। 18 तबा फराओ ना अबराम ला बुलाय के कह्यो, "तू ना मोरो संग यो का करयो? तू ना मोला काहे नही सांगयो, का वा तोरी बायको आय? 19 तू ना कायको लाय कह्यो कि वा तोरी बहिन आय? मी ना वोला आपरो बायको बनाय लियो होतो। पर अब अपरी बायको ला लेके यहान लक चलो जाय।" 20 अना फराओ ना अपरो अधिकारी गीनला ओको बारे म हुकुम दियो अना उन लोग गीनना अबराम अना वोकी बायको अना सप्पा धन को संग जो ओको होतो, ओला सारा कर दियो।