पैदाइस 34

दीना ला भरस्ट करनो

1 एक दिवस लिआ की टूरी दीना, जोन याकूब लक पैदा भयी होती, वा कनान देस की टुरि गिन लक भेंट करन लाय गयी। 2 तबा उ देस को मोठो परधान हमोर होतो। हमोर को टुरा को नाम सकेम होतो उ हिव्वी जाति को होतो, सकेम ना दीना ला पकड़ लियो अना वोको संग गलत काम कर दियो। अना वोला भरस्ट कर दियो। 3 तबा सकेम को मन याकूब की टूरी दीना लक लग गयो, अना वोना दीना लक पिरेम को गोस्टी करयो, अना ओको लक पिरेम करन लग्यो। 4 तबा सकेम ना अपनो बाप हमोर लक कह्यो, "मोला यो टूरी मोरी बायको को रूप मा दिलाय दे।" 5 अना याकूब ना आयकयो का सेकेम ना मोरी टूरी दीना ला भिरस्ट कर डाकीस, ओना बेरा याकूब को टूराहुन वोना बेरा जनावर को संग बर्रा मा होतीन एको लाय याकूब उनको आवनो तकन उगो-मूगो रह्यो। 6 तबा सकेम को अजी हमोर याकूब लक गोस्टी करन वोको जवर आयो। 7 तबा याकूब को टुरागीन दीना को बारे मा असो आयकयो ता लगत हिजड़ के उदास भयी गयो होतीन। काहेका सेकेम ना याकूब को टूरी को संग सोय के मूरख को काम कियो होतो असो काम इसराइल समाज को संग करनो लगत गलत होतो। 8 हमोर ना उन सब लक कह्यो, मोरो टूरा सकेम तुमरो टूरी लक लगत पिरेम करन लगयो से यो कारन लक आपरो टूरी ला सकेम को बायको होवन को काजी अमीला दे देव। 9 अना अमी लोक गिनलक सादी बिहाव करो रिस्तेदार बनके आमरो टूरी तूम लेव अना तुमरो टूरी अमीला देव। 10 तबा तुम आमरो संग यो देस मा रह्य सको। यो देस को दरवाजा तुम्हरो लायी खुल जायेत, यहांन रव्हो अना बयपार करो, अना धन सम्पत्ति कमाय लेवो। 11 सकेम ना भी दीना को अजी अना भाऊ गिनलक कह्यो, "यदि मोरो पर तुम लोगगिन को किरपा को नजर होय ता जोन काही तुम मोरो लक सांगो मी तुमला देहीन। 12 तुम्ही मोरो लक कितरो भी ज्यादा दहेज अना भेंट मांगो, उतनो मी तुम्हिला तुमरो वचन को अनुसार देहीन। पर तुम सीरप मोला अपरी टूरी बायको बनन लाय दे-देव।" 13 तबा यो सोच के का सकेम ना आमरो बहीन दीना ला भिरस्ट करयो से। याकूब को टुरा गीनना सकेम अना वोको अजी हमोर ला छल को संग जवाब दियो। 14 अमी असो काम नही कर सकासेत का कोनी बिन खतना वालो मानूस ला अमी आपरी बहीन देबीन। काहेका एकोलक आमरो बेइज्जती होहेत। 15 अमी सीरप यो सरत मा तुमरो गोस्टी मानबीन, का आमरो जसो तुमरो लोकगिन हरेक मानूस को खतना करायो जाय। 16 तबा अमी आपरो टूरी तुमी लोक हुनला देबीन अना तुमरो टूरी अपनाय लेबीन अना तुमरो संग बस के अना अमी दूई एकच समाज बन जाबीन। 17 पर यदि तुम्ही ला आमरो गोस्टी नहीं जमासे अना खतना नहीं करासो,, ता अमी अपरी टूरी ला धरके इता लक चले जाबीन। 18 उनको असो गोस्टी आयक के हमोर अना ओको टुरा सकेम खुस भयो। 19 अना उ जवान सकेम ना वोको मांग पूरो करनो मा उसीर नही करयो, काहेका उ याकूब की टूरी ला लगत चाहत होतो। उ आपरो अजी को पूरो घरानो को लगत खास मानूस होतो। 20 एकोलाय हमोर अना ओको टुरा सकेम अपरो नगर को बेसकुड़ को जवर जाय के नगर मा रव्हन वालो गीनला समजान लगयो, 21 "यो मानूस आमरो संग मील-जुल के रव्हनो चाव्हा से एकोलाय उनला यो देस मा रव्ह के लेवन देन करन देवो, चोवो यो देस की जमीन उनको लाय भी लगत से । तबा अमी उन लोक गीनको टूरी लक भी बिहाव कर लेबीन अना अपरी टुरि ला उनला भी देबीन। 22 यो लोक हून सिरप यो गोस्टी पर आमरो संग रव्हन लायी अना एकच जाति को लोग हो जान लायी राजी सेत का उनको जसो आमरो सब मानूस गिनको खतना भयी जाय। 23 तबा उ सेरी-मेंढी अना गाई-बईल जनावर अना धन-सम्पत्ति का आमरो नहीं होयेत? इतरोच नही पर अमी उनको गोस्टी मानबीन ता उ आमरो संग रहेत।" 24 एकोलाय जितरो वा नगर की बेसकुड़ लक हीटत होतीन उन पूरो ना हमोर की अना ओको टुरा सकेम की गोस्टी मानी अना हरेक मानूस को खतना करायो गयो , जितरो उ नगर को बेसकुड़ लक हीटत होतीन। 25 तीसरो दिवस, जब खतना करयो वालो लोग दुख मा पड़यो होतो, तबा असो भयो की सीमोन अना लेवी नाम को याकूब को दूई टुरागीन जोन दीना को भाऊ होतो, अपरो-अपरो तलवार धर के उ नगर मा बेधड़क घुस के सप्पा मानूस गिनला मार डाखयो। 26 हमोर अना ओको टुरा सकेम ला तरवार लक मार डाकयो, अना दीना ला सकेम को घर लक हेड़ के लिजायो। 27 याकूब को दूसरो टुरा गीनना मार डाकन को मघानी उ नगर ला एकोलायी लूट लियो कि ऊ नगर मा उनकी बहिन भिरस्ट करी गयी होती। 28 उनना सेरी मेंढी गाई बईल, गढव को करप अना नगर अना मैदान मा जितरो धन होतो लूट लियो। 29 उन सब ला अना उनको लेकरा बारा अना उनको बायको ला भी लिजायो, अना घर-घर मा जोन काही होतो उनला भी लूट लियो। 30 तबा याकूब न सीमोन अना लेवी लक कह्यो, "तुम ना जोन यो देस को निवासी मा कनानी अना परिज्जी जाति को मन मा मोरो खिलाफ नफरत पैदा करायो से, एको लक तुम मोला संकट मा डाकयो सेव, काहेका मोरो जवर ता जरासो लोक सेत एकोलाय जब वय जमा होयके आमरो पर हमला करहेत ता अमी नास भयी जाबीन। अना अपरो घराना सहीत नास होय जाऊ।" 31 उनना कह्यो, "का उ आमरो बहिन को संग बेसिया को जसो बरताव करेत?"