कैन अना हाबिल को बखान
1 जबा आदम आपरी बायको हव्वा को कठा गयो तबा वा पोट लक होयके कैन ला जलम देइस अना कह्यो, "मीना यहोवा को मदद लक एक मरद ला जलम4:1बनाई सेऊ देईसेउ।" 2 मंग ओना ओको भाउ हाबिल ला भी जलम दियो। हाबिल मेढ़ा अना सेरी हुन को करप चरानवालो सेरकी बन गयो, अना कैन भुई पर खेती करनवालो किसान बन गयो। 3 काही दिवस को मंघा कैन यहोवा परमेस्वर ला चढ़ावन साठी भुई की उपज को फसल लक काही भेट ला आनीस, 4 अना हाबिल भी आपरो मेढ़ा अना सेरी को करप लक काही एक पहेलो पाठी भेट चढ़ावन लाई आनीस अना ओकी चरबी ला भेट चघायो, तबा यहोवा ना हाबिल अना ओको भेट ला ता अपनाय लियो, 5 पर कैन अना ओको भेट ला नही अपनायो। तबा कैन लगत गुस्सा भयो, अना ओको टोंड मा उदासी छाय गयी। 6 तबा यहोवा ना कैन लक कह्यो, "तु कायलाई गुस्सा भयीसेस? अना तोरो टोंड मा उदासी कायलाई छाय गयी से? 7 अदि तु भलो करजोस, ता का तोरी भेट ला अपनायो नही जाहेत? अना तु भलो नही करजोस, ता पाप बेसकुड़ मा बसयो रव्हसे; अना ओको लालच तोरो कना होव्हे, अना तोला ओको पर राज जतावनो से।" 8 तबा कैन ना आपरो हाबिल लक काही कव्ह दियो जबा वय मैदान मा होतीन, तबा कैन ना आपरो भाउ हाबिल पर चघके ओला घात करयो। 9 तबा यहोवा ना कैन लक पुछिस, "तोरो भाऊ हाबिल किता से?" ओना कह्यो, "मालुम नही; काजक मि आपरो भाउ को रखवालो सेऊ?" 10 ओना कह्यो, "तु ना काजक करीसेस? तोरो भाऊ को रकत भूई लक मोरी कना चिल्लाके मोरी दोहाई देव रव्ही से। 11 तुना आपरो भाउ को रकत लक आपरो हात रंगा डाकीसेस अना धरती मा ओको रकत बहयो से यो कारन लक तु अना धरती दुई ला सराप से। 12 अबा तु धरती मा खेती करहेत, ओकी पूरी फसल तोला नही अना धरती मा तु इता उता भटकनवारा अना भगोड़ा होजोस।" 13 तबा कैन ना यहोवा परमेस्वर कह्यो, "मोरो सजा सव्हन को बाहेर से। 14 चोवो, तुना आज को दिन मोला भुई पर लक हेड़ीसेस, अना मि तोरो निघा को आड़ मा रहूँ, अना धरती पर भटकनवालो अना भगोड़ा रहुँ; अना जोन कोनी मोला पाहे, मोला मार डाकेह।" 15 एने कारन लक यहोवा परमेस्वर ना ओको लक कह्यो, "जोन कोनी कैन को घात करहे ओको लक सात गुना बदला लेयो जाहे।" अना यहोवा परमेस्वर ना कैन को साठी एक हिदान राखिस असी नही होवा का कोनी ओला पायके मार डाकेह।
कैन को खानदान
16 तबा कैन यहोवा परमेस्वर को पुढ़ा लक हिट गयो, अना नोद नाव को देस मा जोन अदन बगीचा को दिन उगती कना से, रव्हन लगयो। 17 जबा कैन आपरी बायको को कठा गयो तबा वा पोट लक भयी, अना ओना हनोक ला जलम देइस; मंग कैन ना एक नगर बसायीस अना ओना नगर को नाव आपरो लेकरा को नाव पर हनोक राखिस। 18 हनोक लक ईराद भयो, अना ईराद लक महुयाएल भयो, अना महुयाएल लक मतुसाएल, अना मतुसाएल लक लेमेक भयो। 19 लेमेक ना दुई बायका लक बिहा कर लेईस। जेमा लक एक को नाव आदा, अना दुसरी को सिल्ला होतो। 20 आदा ना याबाल ला जलम देइस। उ तम्बू मा रव्हनो अना जनावर पालनो येना दुई को काम को जलम देवन वालो बनान को रिती मा माहीर भयो। 21 अना ओको भाउ जेको नाव यूबाल होतो। उ वीना अना बाँसुरी आदि बाजागीन को बजावन को सप्पा रिती मा माहीर भयो। 22 अना सिल्ला ना भी तुबुल-कैन नाव को एक लेकरा ला जलम देइस। उ पीतल अना लोहो को सब धार वारा हतियार ला बनावनवालो भयो, तुबुल कैन की बहिन नामा होती। 23 अना लेमेक ना आपरी बायको लक कह्यो, " अवो आदा अना अवो सिल्ला मोरी आयको; अवो लेमेक को बायको, मोरी आयको। एक जवान मोला चोट देवत होतो मनजे उ मोला घायल करत होतो ओला मीना मार डाकीसेउ। 24 जबा कैन को बदला सात गुना सेत ता लेमेक को सत्तर गुना बदला लियो जाहेत।"
सेत अना एनोस
25 आदम आपरी बायको को कठा मंग गयो, अना ओना एक लेकरा ला जलम देइस अना ओको नाव यो कव्ह के सेत राखिस। " परमेस्वर ना मोरो साठी हाबिल को बदला जेला कैन ना मार डाकिस, एक अखिन खानदान दे देइसेस।" 26 सेत ला भी एक लेकरा पैदा भयो, अना ओना ओको नाव एनोस राखियो; ओनो बेरा लक लोकहुन यहोवा लक पिराथना करन लागीन।