1 इन गोस्टी को मघानी कोनी ना यूसूफ लक कह्यो, आयक तोरो अजी बीमार से तबा वा मनस्से अखिन एपरेम नाव को आपरो दूई टूरा ला लेयके याकूब को जवर गयो। 2 कोनी ना याकूब ला सांग दियो "तोरो टूरा यूसूफ तोरो कठा आय रहयो से" तबा इसराइल आपरो आपला संभाल के खाट मा बस गयो। 3 अखिन याकूब ना यूसूफ लक कह्यो, सर्वसक्तीमान परमेस्वर ना, कनान देस को लूज नगर को जवर मोला दरसन देयके आसीस दियो, 4 अखिन वोना मोरो लक कहीस, मी तोला लगत सो सन्तान देहिन, क तोरो खानदान मा लगत सो रास्ट भयी जाहेत। अखिन मी यो देस तोरो खानदान ला हरामेसा को लाय उनको हक करके दे देहिन। 5 अखिन अबा तोरो दूई टूरा जोन मिसर मा मोरो आवन को पहले जलमो सेत, वय मोरोच कहलाहेत, जसो परकार लक रूबेन अखिन सीमोन मोरो से वसोच एपरेम अखिन मनस्से मोरो ठैयरेत। 6 अखिन उनको मघानी तोरो जोन सन्‍तान पैदा होहेत, वय तोरो होहेत, पर बटवारा को बेरा मा वय अपरो भाऊ गिनको घराना मा गिनती कियो जाहेत। 7 जबा मी पद्दान लक आवत होतो तबा एपरात पहुँचन को जरा सो दूहुर पूढा राहेल कनान देस मा रस्ता मा मोरो समोर मर गई, अखिन मीना वोला उतानी एपरात जोन बैतलहम भी कहलावासे उतच गाड़ दियो। 8 तबा इसराइल ला यूसूफ को टूरागिन दिसयो, तबा वोना पूसयो का यो कवन सेत? 9 तबा यूसूफ ना आपरो अजी ला कव्हयो, यो दुई मोरो टूरा सेत, इनला परमेस्वर ना मोला दियो से। वोना कह्यो, मोरो जवर आनो मी उनला आसीस देहू। 10 इसराइल को डोरा बुड़गापन को कारन लक धुंधरो भयी गयो होतो। एकोलाय उ साजरा लक चोव नही सकत होतो। तबा यूसूफ उनला वोको जवर ले गयो अखिन उनको चूमा लेयके उनला गरो लक लपटा लेयीस। 11 तबा इसराइल ना यूसूफ लक कव्हयो, मोला असो आस नही होतो का मी दुबारा तोरो टोन्ड चोहीन, पर चोव! परमेस्वर ना तोरो खानदान भी चोवायो से। 12 तबा यूसूफ ना उनला आपरो अजी को टोघरा को बीच लक हटायो अखीन भूई मा डोस्का टेक के परनाम करीस। 13 तबा यूसूफ ना वोना दूई ला धरके अखिन एपरेम ला इसराइल को उज्जो कन अखिन मनस्से ला वोको डावा कन ले गयो। 14 तबा इसराइल ना आपरो उज्जो हात एपरेम को डोका मा अखीन डावो हात मनस्से को डोका धर दियो। वोना जान बूझ के असो करयो होतो। नही ता मोठो मनस्से च होतो। 15 मंग वोना यूसूफ ला आसीरवाद देयके कह्यो,

परमेस्वर जोन को समोर रव्हके

मोरो आजा-बाबा गिन अबराहम अखिन इसहाक चलयो,

परमेस्वर जोन ना लगत बुड़गो होवन पर भी

अज तकन कोरो अगवाई करयो से।

16 अखिन वोको दूत जोन सप्पा बूराई लक मोला सुड़ातो आयो से

वोच अबा इन लेकरा गिनला आसीस देय,

इनको लक मोरो अखीन मोरो आजा-बाबा

अबराहम, अखिन इसहाक को नाव चले,

एना महान बनेत अना धरती मा बेगीनती भयी जाय।

17 जब यूसूफ ना चोयो का मोरो अजी ना आपरो उज्जो हात एपरेम को डोस्का मा राखयो से, तबा यो गोस्टि वोला बूरो लगयो, एकोलाय वोना आपरो अजी को हात असो बिचार लक थाम लियो का एपरेम को डोका लक उचल के मनस्से को डोका मा राख देय। 18 अखिन यूसूफ ना आपरो अजी लक कह्यो, अरे अजी असो नही! काहेका मोठो यो से आपरो उज्जो हात एको डोका मा ठेव। 19 वोको अजी ना कह्यो, नही। ओ मोरो टूरा आयक! मी यो गोस्टि साजरो लक जानासू अदि एको लक भी मानूस गिनको एक समाज पैदा होहेत अखीन उ भी महान होहेत अना लगत रास्ट बनहेत। 20 मंग वोच दिवस यो सांगके लेकरा गिनला आसीरवाद दियो,

इसराइली लोक तोरो नाव लक असो आसीर वाद देहेत,

परमेस्वर तोला एपराइम अखिन मनस्से जसा बना देय

असो परकार लक मनस्से को पूढा एपरेम को नाव राख्यो। 21 तबा इसराइल ना यूसूफ लक कह्यो, चोव मी ता मरनो पर सेऊ, पर परमेस्वर तुमरो संग रहेत, अखीन तुम्हिला आपरो सियानो गिनको देस मा दूबारा पहुँचा देहेत। 22 अखिन मी तोला तोरो भाऊ गिनलक जादा जमीन को एक हिस्सा देवासू, जोनला मीना एमोरी गिनलक अपरो तरवार अखीन तीर धनुस को ताकत लक हासील करयो सेऊ।