पैदाइस 24

इसहाक को बिहाव को बखान

1 अबराहम अब लगत बुड़गा भय गयो होतो, अना ओकी उमर लगत होती अना यहोवा परमेस्वर ओला हरेक काम मा आसीस दियो होतो। 2 ✝24:2 पैदाइस 37:29एक दिवस अबराहम ना अपरो घर को सब लक बूड़गा अना अपरो सम्पत्ति की देख भाल करन वालो सेवक लक कह्यो, "अपरो हात मोरी जांघ *24:2दूसरी पीढ़ी ला बांधन वाली अटल कसम को अनुसार सना असो परकार को किरीया खायो मा राख 3 अना मोरो लक सरग अना धरती ला बनान वालो परमेस्वर यहोवा को किरिया खाव का तू मोरो टूरा को लाय जोनको बीचमा मी रव्हसू उन कनानी गीन को टूरी नोको आनजोस, 4 पर तू मोरो देस मा मोरो रिस्तेदार मा लक मोरो टूरा इसहाक को लाय टूरी आनजोस।" 5 ऊ दास ना अबराहम लक कह्यो, " पर यदी कोनी टूरी मोरो संग यो देसमा आवन कोलाय तैय्यार नहि होहेत ता मी असो मौका मा मी काय करू, का मी वोना देस मा तोरो टूरा ला लेके जाहीन?" 6 तबा अबराहम ना कह्यो सतरक रव्हजोस तू मोरो टूरा ला कभ्भू उता नोको ले जाजोस। 7 यहोवा, जोन सरग को परमेस्वर आय, जोन मोला मोरो अजी को घराना अना मोरी जलम भूमि लक लायो से। अना जोनना किरिया खायके मोरो लक वादा करयो सेत। "मी यो देस तोरो खानदान ला देहू, वोच सरगदूत ला तोरो पूढा-पूढा धाड़ेत, अना तू मोरो टूरा को लाय वहान लक एक टूरी आन जोस। 8 अगर कोनी टूरी तोरो संग आन लायी मना करे, तबा तू मोरी यो कसम लक छूट जाजो, पर ध्यान रखजो का तू मोरो टूरा ला वहान नोको ले जाजोस " 9 एकोलाय उ दास ना आपरो मालीक अबराहम को जांघ मा आपरो हात राखके वोको लक किरिया खायो।

10 तबा वा दास ना अपरो मालीक को ऊंट को करप लक दहा ऊंट गिनला लियो अना उनमा आपरो मालीक को कन लक अलग-अलग उपहार धरयो अना नाहोर को नगर ला चली गयो जो उत्तरी मेसोपोटामिया जघा को अराम नगर मा होतो। 11 नगर को जवर जाय के वोना ऊंट गीनला बेहेर को जवर बसा दियो, यो सन्जा को बेरा होति। योच बेरा आईमाई पानी भरन बेहेर आवत होतीन। 12 तबा दास ना पिराथना करयो, "ओ यहोवा, मोरो मालीक अबराहम को परमेस्वर, अज मोरो काम ला सफल कर, अना मोरो मालीक अबराहम पर दया कर। 13 तू चोय रह्यो से का मी यो बेहेर को जवर उभो सेऊ। अना यो नगर को निवासी गीन को टुरि गिन पानी भरन लायी हीट के आई रही सेत। 14 तू काही असो कर का जोन टूरी लक मी असो कँहू," "तू अपरो घघरा झुकाय के मोला पानी पियाय दे", अना वा टूरी कहेत, "तू पानी पीव ले, मंग मी तोरो ऊंट गिनला पानी पिलाय देऊ, यो वाच टूरी होय जोनला तू ना अपरो दास को टूरा अपरो सेवक इसहाक लायी निवाड़ो से, एको लक मोला यो भरोसा*24:14 तबा मी जान जाहीन भयी जाहेत का तूना मोरो मालीक पर आपरो दया दिसायो से।"

15 अना असो भयो का जब पिराथना करच रह्यो होतो, तबच रिबका नगर को बाहेर अपरो बख्खा मा घघरा लेके पानी भरन आयी। वा मिल्का को टूरा बतूएल की टूरी होती अना मिल्का अबराहम को भाऊ नाहोर की बायको होती। 16 रिबका लगत खोबसूरत होती, वा कुंवारी होती। अब तकन कोनी मानूस लक वोको रिस्ता नही भयो होतो। वा खाल्या बिहर मा उतरी अना अपरो घघरा मा भरी अना वरता आय गयी। 17 दास धावके ओको जवर आयो, अना ओको लक कह्यो, "मोला आपरो घघरा लक मोला अपरो घघरा को जरा सो पानी पिवाय दे।" 18 रिबका न कह्यो, "ओ मोरो मालीक लेव, अना पीव , अना ओना तुरंत च घघरा को खाल्या करके पानी पिलाव।" 19 जब रिबका ना दास ला पानी दियो, तबा ओना ओको लक कह्यो, "मी तोरो ऊंट गीन लायी भी पानी लेके आवा सू जब तकन तु जीव भरके पानी पीव।" 20 ओना फटाकनारी लक घघरा को पानी जनावर को डोंगी मा खाली कर दियो। मंग लवट के बेहेर मा पानी भरन गयी। अना ओको पूरो ऊंट गिनको लाय पानी आनीस। 21 जब यो सब होय रह्यो होतो, तबा दास धियान लक रिबका ला चोव रह्यो होतो। अना बिचारत होतो का यहोवा न मोरी यातरा ला सफल करयो से का नही।

22 जब ऊंट ना पानी पी लियो, तबा दास ना आरधो तोला की सोन्नो कि एक नथ हेड़ के ओला दियो, अना दहा तोला सोन्नो को कंगन ओको हात मा पहिनाय दियो; 23 अना रिबका ला चोवके ओको लक पूसयो, "मोला सांग तू कोनकी टूरी आस? का तोरो अजी को घर मा रुकन लाय जघा से?" 24 रिबका ना जवाब दियो, "मी ता नाहोर अना मिल्का को टूरा बतूएल की टूरी सेऊ।" 25 अना ओना यो भी कह्यो, "आमरो इता गवथ अना चारा लगत से। अना रूकन लायी जघा भी से।" 26 तबा उ दास ना नवके अना यो कह्य के यहोवा की आराधना करी, 27 "धन्य से यहोवा, मोरो मालीक अबराहम को परमेस्वर ना मोरो मालीक को लाय अपरो पिरेम अना करूना ला नहीं हटायो, यहोवा मोला सही जघा पर लायो जोन मोरो मालीक को रिस्तेदार कोच घर से।"

28 तबा रिबका धाव के घर गयी अना अपरी माय को घर को लोक ला सब गोस्टी सांगयो। 29 रिबका को भाऊ लाबान धावके बीहर को जवर गयो जिता अबराहम को दास होतो। 30 जब लाबान ना नथ अना अपरो बहिन रिबका को हात मा कंगन चोवयो, अना जोन गोस्टी दास ना कही होती। ओला आयकयो तबा लाबान उ दास को जवर गयो, अना चोयो का उ दास बिहर को जवर ऊंट को बाजू मा उभो से। 31 लाबान ना दास लक कह्यो, " ओ यहोवा परमेस्वर को कन लक धन्य मानूस भीतर आव, तू कायको लाय बाहेर उभो से? मीना तोरो लायी, घर अना तोरो ऊंट लायी भी जघा तैयार करयो से।" 32 अबराहम को दास लाबान को संग घर मा गयो, तबा लाबान ना ऊंट मा लक चीज उतारयो, अना ऊंट को लायी पैंरा अना चारा लायो, तबा ओना दास अना ओको लोग गीनको पाय धोवन लायी पानी दियो। 33 तबा दास ला जेवन दियो, पर ओना कह्यो, "मी तबा तकन जेवन नहीं करू, जब तकन मी अपरो गोस्टी नही आयकावो देऊ" लाबान न कह्यो, "ठीक से सांग दे।"

34 तबा ओना कह्यो, "मी अबराहम को दास सेऊ। 35 यहोवा परमेस्वर ना मोरो मालीक ला लगत आसीस दियो से जेनको लक उ धनी भयी गयो से। यहोवा परमेस्वर ना वोला लगत सो सेरी-मेंढी, गाई-बईल, सोन्नो-खूरो दास-दासी अना ऊंट अखिन गढव को करप दियो से। 36 अना मोरो मालीक को बायको सारा ला बुड़गीपन मा एक टूरा पैदा भयो, अना उ टूरा ला अबराहम ना आपरो सब काही दे दियो से। 37 अना मोरो मालीक ना मोला कसम खिलायी से का तू मोरो टूरा कोलाय कनानी गिनको टुरि मा लक कोनी ला नोको आनजो। 38 पर तू मोरो अजी को परिवार मोरो अपरो खानदान मा जाजो, अना मोरो टूरा को लाय टूरी आनजोस।" 39 तबा मीना अपरो मालीक लक पुसयो, "यदि वा टूरी मोरो संग आनो नहीं चाहेत, तबा का?" 40 मोरो मालीक ना कह्यो, "यहोवा परमेस्वर, जोनको मी हरामेसा हुकुम मानीसेऊ, उ अपरो सरग दूत ला तोरो संग धाड़ेत अना तोरी यातरा सफल करेत, जोन लक तू मोरो टूरा को लाय मोरो अपरो खानदान अना मोरो अजी को परिवार लक एक बायको आन सकजोस। 41 तू मोरी यो किरिया लक तबच छूट पावजो, जब तू मोरो खानदान को लोकगिन को जवर जाजो, अना वय टूरी ला तोरो संग धाड़न लाय मना करे तबा तू मोरी कसम लक छूट जाजो।" 42 एकोलाय मी अज जब बेहेर को जवर पहुंच्यो, त मीना असो पिराथना करयो, "यहोवा, परमेस्वर मोरो मालीक अबराहम को परमेस्वर मी जोन काम लाय इता आयो सेऊ उ काम पूरो भयी जाय। 43 त चोव मी बीहर को जवर उभो सेऊ " यदि कोनी टूरी हीट के पानी भरन आहेती अना मी वोको लक सांगू "अपरो घघरा लक मोला जरासो पानी दे।"

44 अना यदि वा मोरो लक कहे, "पी ले, अना मी तोरो ऊंट गिनको लायी भी पानी लेके आवासू, त वाच टूरी होय जोनला मोरो मालीक को टूरा को लाय परमेस्वर को कन लक निवाड़ो गयी से।" 45 एको पहिले का मी पिराथना खतम करतो। त रिबका अपरो खन्दा मा घघरा धर के आयी, तबा वा खाल्या बीहर को कगर जायके पानी भरन लगी, अना मी ओको लक कह्यो, "मोला पानी पिलाय दे।" 46 तबा ओना लवकर अपरो खन्दा लक घघरा नवाय के मोला कही, "ले, पी ले, अना मी तोरो ऊंट गिनला भी पानी पिलाय देऊ, तबा मी ना पानी पियो, अना वोना ऊंट गिनला भी पानी पिलाय दियो।" 47 तबा मी ना वोको लक पूसयो "तू कोनकी टूरी आस?" ओना कही "मी बतूएल की टूरी सेऊ, जोन नाहोर अना मिल्का को टूरा आय," तबा मीना ओकी नाक मा नथ, अना हात मा कंगन पहिरा दियो। 48 तबा मीना नवके यहोवा परमेस्वर को स्तूती करयो, अना मी ना आपरो मालीक अबराहम को परमेस्वर यहोवा को महिमा करयो, काहेका वोना मोला सही रस्ता चोवायो जोन लक मी आपरो मालीक को टुरा लायी रिस्तेदार की टूरी ला लेके जाऊ। 49 अबा फैसला तुमरो पर सेत, अदी तुम्ही चाव्हासो ता आपरो टूरी देयके मोरो मालीक को लाय आपरो पिरेम को अना भरोसा काबील होवन को सबूत दे सका सेव। त अबा मोला सांगो मोला काजक करनो से यदी नहि ता वो भी सांग देव ।

50 यो सब आयक के लाबान अना बतूएल ना जवाब दियो, "यो गोस्टी यहोवा परमेस्वर को कन लक से, एकोलाय अमी तोला भलो या बुरो काही नही कव्ह सकत। 51 चोव रिबका तोरो पूढा से एला आपरो संग लेके जाय, जोन लक वा तोरो मालीक को टूरा को बायको बन जाय। जसो यहोवा परमेस्वर को हुकुम सेत।" 52 उनकी असो गोस्टी आयक के अबराहम को दास धरती मा टोन्ड को बल लक पड़ के यहोवा परमेस्वर ला परनाम करयो, अना वोको बड़ाई करयो। 53 तबा दास ना सोन्नो अना खूरो को जेवर, अना कपरा हेड़ के रिबका ला दियो, ओना रिबका को भाऊ अना ओकी माय ला भी लगत कीमती चीज दियो। 54 तबा ओना अखीन उनको संग को लोक ना जेवन करीन अना वहान रात बिताइन। दूसरो दिवस सक्कारी जब सोय के उठयो तबा दास ना वोला कह्यो, मोला आपरो मालीक कन जावन को लाय सार करो। 55 पर रिबका को भाऊ अऊर ओकी माय न कह्यो, "टूरी ला आमरो संग काही दिवस मजे करीब दहा दिवस तकन रव्हन देव, तबा ओला ले जावो।" 56 पर दास ना उनलक कह्यो, "मोला रोको नोको, काहेका परमेस्वर ना मोरी यो यातरा ला सफल करयो से, मोला अपरो मालीक को जवर वापस जान लायी बिदा करो।" 57 तबा उनना कह्यो, "अमी रिबका ला बुलाय के एको बारे मा पूसबिन" 58 तबा उनना रिबका ला बुलाय के वोको लक पूसीन, "का तू यो मानूस को संग जाजोस? वोना कही, हा मी जाहीन।" 59 एकोलायी उनना अपरी बहन रिबका ला ओकी दासी अना अबराहम को दास अना वोको लोक गीन को संग सार करयो। 60 अना उन ना रिबका ला आसीस देयके कह्यो, "ओ आमरी बहिन, तू हजार लाख गिनकी माममाय होवजोस, अना तोरो खानदान को लोक आपरो बयरी को नगर गीनमा कब्जा करे।" 61 तबा रिबका अपरी दासी गिन समेत ऊंट मा बसके जावन लगी। अना अबराहम को दास को मघानी चली गयी।

62 इसहाक जोन कनान को दक्सिन देस मा रव्हत होतो, लहैरोई नाव को बेहेर को जवर लक सूनसान जघा लक आवत होतो। 63 सन्जा को बेरा इसहाक धियान करन लाय हीटयो होतो। अना वोना नजर उठाय के चोयो का ऊंट चलत आय रह्यो सेत। 64 रिबका ना भी डोरा उठाय के इसहाक ला चोयो अना आपरो ऊंट लक उतर पड़ी। 65 तबा ओना दास लक पूसयो, उ मानूस कोन से? जोन लक अमी मुलाकात करयो सेजन। दास ना कह्यो वोतो मोरो मालीक आय। तबा रिबका न घूघंट लक आपरी टोन्ड ला झाक लियो। 66 दास ना इसहाक लक अपरो संग भयो घटना को बखान करयो। 67 तबा इसहाक रिबका ला तम्बु मा लायो, जोनमा ओकी माय सारा रव्हत होती, अना ओको संग बिहाव करके ओको लक पिरेम करयो। असो परकार लक इसहाक ला माय को मरन को मघानी सांती भेटयो।